Keçid linkləri

Təcili xəbərlər
2023, 28 Yanvar, şənbə, Bakı vaxtı 05:21

Azərbaycan xəbərləri

Gəncə mağazalarında qida məhsulları yoxlanılacaq

Budəfəki reyddə şübhə doğuran qida məhsullarının fiziki və kimyəvi analizi aparılacaq.

Bu barədə məlumatı Standartlaşdırma, Metrologiya və Patent üzrə Dövlət Komitəsinin 2 saylı Ərazi Nəzarət İdarəsinin rəis müavini Qasım Hüseynov verib.

O deyib ki, son vaxtlar mağazalarda keyfiyyətsiz ərzaq məhsulları satılır.

Bütün xəbərləri izləyin

Gömrük işçiləri həbs edilib

Dövlət Gömrük Komitəsi

Baş Prokuror yanında Korrupsiyaya qarşı Mübarizə Baş İdarəsi Dövlət Gömrük Komitəsində (DGK) əməliyyat keçirir. Baş Prokurorluğun Mətbuat xidmətindən məlumatı təsdiq ediblər.

Azərbaycan Dövlət Gömrük Komitəsinin (DGK) əməkdaşları saxlanıb. Bu barədə yanvarın 26-da Baş Prokurorluq məlumat yayıb.

Məlumata görə, Korrupsiyaya qarşı Mübarizə Baş İdarəsi Dövlət Gömrük Komitəsi ilə birgə əməliyyat-axtarış tədbirləri keçirib.

Bildirilir ki, DGK-nin Aksizli Mallar üzrə Baş Gömrük İdarəsi Gömrük dəyərləndirilməsi və risklərin idarə olunması şöbəsinin əməkdaşı Şahin İskəndərovun ölkəyə gətirilmiş avtomobillərə görə ödəniləcək rüsum və digər xərclərin azaldılması əvəzində rüşvət almasına əsaslı şübhələr yaranıb:

“Habelə Şimal Ərazi Baş Gömrük İdarəsinin Şirvanlı Gömrük Postunun əməkdaşı Cavid Məmmədovun postda yoxlama tədbirlərinin səthi və sürətli aparılması müqabilində rüşvət almasına əsaslı şübhələr müəyyən edilib”.

Baş prokuror yanında Korrupsiyaya qarşı Mübarizə Baş İdarəsində cinayət işləri başlanıb:

“Şahin İskəndərovla Cavid Məmmədova Cinayət Məcəlləsinin 311.2 (rüşvət alma) və 311.3.2-ci (təkrar rüşvət alma) maddələrilə ittiham elan edilərək barələrində məhkəmənin qərarı ilə həbs qətimkan tədbiri seçilib”.

Hələlik, rəsmi açıqlamaya həbs edilən şəxslər və onların yaxınlarından münasibət almaq mümkün olmayıb.

Gömrükdə təyinatlar olmuşdu…

Ötən ilin sonu, dekabrın 27-də DGK-da iki sədr müavini vəzifədən kənarlaşdırılmışdı. Bununla bağlı Prezident İlham Əliyev sərəncamlar imzalamışdı. Söhbət Əsgər Abdullayev İqbal Babayevdən gedir. Prezidentin digər sərəncamı ilə isə Natiq Şirinov bu qurumda sədr müavini vəzifəsinə təyin edilib.

İyulun 15-də İ.Əliyev Səfər Mehdiyevin DGK sədri vəzifəsindən azad edilməsi haqda da sərəncam imzalamışdı. Hazırda bu qurumda sədr vəzifəsini birinci müavin Şahin Bağırov icra edir.

DGK-nın saytında bu qurumda birinci müavinlər daxil, ümumilikdə altı müavin postu olduğu bildirilir.

Əvvəlki həbs…

Hazırda DGK-nın Əməliyyat-İstintaq Baş İdarəsinin rəisi olmuş Məsum Rəsulov həbsdədir. Onun Cinayət Məcəlləsinin 179.4 (xüsusilə külli miqdarda dövlət əmlakını mənimsəmə) və 308.1-ci (vəzifə səlahiyyətlərindən sui-istifadə) maddələri ilə ittiham edildiyi bildirilir. Amma Rəsulovun özünün və ya vəkillərinin ittihamlara münasibəti bəlli deyil.

Balıqçılarla polis arasında narazılıq yaranıb

Sosial şəbəkədə videosu yayılan balıqçı: 'Ay Allah, bunlara insaf ver, ac qalmışam'
Gözlə

No media source currently available

0:00 0:04:33 0:00

Son günlər Masallı rayonunun Təzəkənd kəndinin sakinləri ilə polis əməkdaşları arasında insident baş verdiyi deyilir.

Adının açıqlanmasını istəməyən şəxsin "Turan"a bildirməsinə görə, kəndin sakinləri, əsasən, ovçuluq və balıqçılıqla məşğul olurlar: "Polis onlara mane olub, xəsarət alanlar olub".

Bu gün, yanvarın 26-da isə Lənkəran rayonunun Nərimanabad qəsəbəsinin ərazisində da oxşar olaylar yaşandığı deyilir. Yerli sakinlərdən biri bildirib ki, Təzəkənd Masallı rayonunun kəndi olsa da, bəzi sakinləri Lənkəranın dəniz ərazisində ov edirlər: "Bu gün, yanvarın 26-da Lənkəranın dənizə çıxış hissəsi olan Nərimanabad qəsəbəsinə yüzlərlə maskalı, kaskalı polis yeridilib. Saxlanılanlar Lənkəran rayon Liman şəhər polis bölməsinə daşınır. Olay Nərimanabad qəsəbəsi ərazisində olsa da, Təzəkənd sakinləri ilə polis arasında baş verib. Polis kəndin giriş və çıxışını bağlayıb".

DİN-dən izah…

Daxili İşlər Nazirliyi (DİN) Mətbuat xidmətinin Lənkəran regional qrupundan isə "Turan"a bildirib ki, Masallının Təzəkənd kəndinin sakinləri Qızılağac Milli Parkında qanunsuz ovçuluq etməyə çalışıblar: "Parkın əməkdaşları tərəfindən onlara xəbərdarlıq edilməsinə baxmayaraq, onlar buna məhəl qoymayıblar. Əraziyə dəvət olunan polis əməkdaşları tərəfindən onlarla izahedici söhbət aparılıb, onlar ərazidən uzaqlaşdırılıblar".

Məlumata görə, hazırda Lənkəran Şəhər Polis Şöbəsində araşdırmalar davam etdirilir.

Nazirlikdən yanvarın 26-da deyilən ərazidə hər hansı insidentin baş vermədiyi bildirilib.

Naxçıvanın keçmiş nazirinə rədd cavabı verildi

V.Talıbov və Ə.Əhmədov

Ali Məhkəmədə 17 il Naxçıvan Muxtar Respublikasının (MR) Daxili İşlər naziri olmuş Əhməd Əhmədovun şikayətinə baxılıb. O iddia edirdi ki, vaxtilə problemlərlə üzləşib, 11 il azadlıqdan məhrum edilməsi haqda hökmdən vaxtında Ali Məhkəməyə şikayət verə bilməyib.

Ali Məhkəməyə kassasiya şikayəti verməkdən ötrü qanunda konkret müddət nəzərdə tutulub. Müddəti ötürən Əhmədov bunun üzrlü səbəbdən baş verdiyini, maneələrlə üzləşdiyini, səhhətində problemlər yarandığını vurğulayaraq müddətin bərpasını istəyirdi. O, ərizəsində göstərib ki, uzun müddətdir Müalicə Müəssisəsində saxlanılır.

Yanvarın 25-də Ali Məhkəmədə onun ərizəsinə baxan hakimlər keçmiş nazirə "yox" cavabı verib. Ələsgər Əhmədovun sədrlik etdiyi hakimlər kollegiyası Əhmədovun göstərdiyi səbəblərin üzrlü olmadığı qənaətinə gəlib.

Sabiq nazirin vəkili bundan sonra Ali Məhkəmənin Plenumuna müraciət etmək niyyətindədir.

2000-2017-ci illərdə Naxçıvan MR Daxili İşlər naziri vəzifəsində çalışmış Əhməd Əhmədov 2020-ci ilin əvvəlində Bakıda həbs olunub. Lakin onun mühakiməsi Naxçıvanda həyata keçirilib. Xüsusilə külli miqdarda mənimsəmə, vəzifə səlahiyyətlərindən sui-istifadə, rüşvətalma və s. ittihamlarla sabiq nazir haqqında 11 il azadlıqdan məhrumetmə hökmü çıxarılıb. Apellyasiya instansiyası da bu hökmü qüvvədə saxlayıb. O, özünü təqsirli bilmir.

Əhmədovun adı zaman-zaman insan haqlarının pozulması, işgəncələrlə bağlı müxtəlif hadisələrdə hallanıb.

Bəxtiyar Hacıyevin vəziyyətinin getdikcə ağırlaşdığı bildirilir

Bəxtiyar Hacıyev

Həbsinə etiraz olaraq 17 gündür aclıq aksiyası keçirdiyi bildirilən ictimai fəal Bəxtiyar Hacıyevin səhhətinin getdikcə ağırlaşdığı deyilir.

Yanvarın 25-də vəkillər Nemət KərimliRövşanə Rəhimli onunla görüşüblər.

Kərimlinin Azadlıq Radiosuna bildirməsinə görə, Hacıyevin vəziyyəti əvvəlki günlərlə müqayisədə daha ağır görünür:

“Bəxtiyar Hacıyev ayağa qalxanda müvazinətini itirir və az qalır yıxılsın. Təcridxana həkimi deyib ki, bu, beyinin qanla kifayət qədər təmin olunmaması ilə əlaqədar ola bilər”.

Onun sözlərinə görə, Hacıyev MRT (maqnit rezonans tomoqrafiya) və KT (kompüter tomoqrafiya) müayinələrinin aparılması xahişilə Penitensiar Xidmətə müraciət etsə də, hələlik cavab almayıb.

Hacıyev istintaq təcridxanasının tibb-sanitariya hissəsində saxlanılır.

Bu açıqlamya, hələlik, Penitensira Xidmət və başqa müvafiq qurumlardan münasibət almaq mümkün olmayıb.

Hacıyev yanvarın 9-da Bakı Apellyasiya Məhkəməsində yenidən aclıq aksiyasına başladığı haqqında məlumat vermişdi.

Bundan öncə Hacıyev dekabrın 15-də aclıq aksiyasına başladığını açıqlamış, dekabrın 28-də onu dayandırmışdı.

Yanvarın 13-də isə Bəxtiyar Hacıyevə qarşı irəli sürülən ittiham ağırlaşdırılıb. Əvvəl ona qarşı Cinayət Məcəlləsinin 221.1 (xırda xuliqanlıq) və 289.1 (məhkəməyə hörmətsizlik etmə) maddələri ilə cinayət işi başlanmışdı.

Yanvarın 13-də 221.1-ci maddə 221.2.2 (İctimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə xuliqanlıq) ilə əvəzlənib.

Əvvəlki ittihamla gəncə fəala 1, bundan sonra isə 3 ilə qədər həbs cəzası verilə bilər.

Xatırlatma

Ötən il dekabrın 9-da Bakının Xətai Rayon Məhkəməsi ictimai fəal Bəxtiyar Hacıyevi 1 ay 20 gün müddətinə həbs edib.

O, xuliqanlıq və məhkəməyə hörmətsizlikdə ittiham olunur. Həmin insident daha öncə böhtan iddiası ilə bağlı fəala qarşı açılmış cinayət işi üzrə məhkəmədə baş verib.

Harvard Universitetinin məzunu olan Hacıyev 2011-ci ilin martında da həbs edilmişdi. Ona hərbi xidmətdən yayınma ittihamı ilə 2 il müddətinə azadlıqdan məhrumetmə cəzası verilmişdi.

Hacıyev 2012-ci ildə Ali Məhkəmənin qərarı ilə vaxtından əvvəl şərti azadlığa çıxıb.

O, son illər hökumətin və hüquq-mühafizə orqanlarının fəaliyyəti ilə bağlı sərt tənqidləri ilə seçilirdi.

Başqa bir cəbhəçinin də həbs edildiyi deyilir

AXCP fəalları ziyarət zamanı polis kordonlarının olmasından narazılıqlarını bildiriblər.

Azərbaycan Xalq Cəbhəsi Partiyasının (AXCP) üzvü Rövşən Səfərovun inzibati qaydada həbs olunduğu bildirilir.

Partiyadan AzadlıqRadiosuna deyilib ki, fəal yanvarın 22-də yoxa çıxıb və yalnız 36 saatdan sonra onun inzibati qaydada 30 sutka müddətinə həbs olunduğu bilinib: "Rövşən bəyin atası Birinci Qarabağ müharibəsində həlak olub. Amma 20 Yanvar faciəsinin 33-cü il dönümündə onun da qarşısını kəsib saatlarla Şəhidlər Xiyabanına buraxmayıblar. O, elə sonradan həbs olunmuş Anar Hüseynovla birgə buna etiraz etdiyi üçün iki gün sonra onu da şərləyib həbs ediblər".

AXCP-dən əlavə ediblər ki, R.Səfərov İnzibati Xətalar Məcəlləsinin 535.1-ci (Polis işçisinin qanuni tələbinə qəsdən tabe olmama) maddəsi ilə həbs olunub. Onlar fəalın həbsini siyasi hesab edirlər.

R.Səfərovun həbsi ilə bağlı deyilənlərə isə Daxili İşlər Nazirliyindən münasibət öyrənmək mümkün olmayıb. Amma rəsmilər, bir qayda olaraq, ölkədə siyasi həbslərlə bağlı deyilənləri qəbul etmirlər.

20 Yanvar günü saxlanan cəbhəçiyə 30 sutka…

Yanvarın 20-də Şəhidlər Xiyabanını ziyarət etdikdən sonra saxlanılan Azərbaycan Xalq Cəbhəsi Partiyasının fəalı (AXCP) Anar Hüseynovun 30 sutka inzibati həbs cəzası aldığı bildirilir.

AXCP-dən Azadlıq Radiosuna verilən məlumata görə, İnzibati Xətalar Məcəlləsinin 510 (xırda xuliqanlıq) və 535-ci maddələri (Polisin qanuni tələbinə tabe olmamaq) ilə ittiham olunan Anar Hüseynov barədə qərar Səbail Rayon Məhkəməsində çxıarılıb.

Partiyadan deyilib ki, cəbhəçini tədbir bitəndən sonra Nazirlər Kabinetinin binası qarşısında mülki geyimli şəxslər saxlayıblar.

AXCP-nin açıqlamasına görə, Anar Hüseynov ziyarətə qatılmazdan əvvəl maşınını Müsavat Partiyasının qarşısında saxlayıb:

"Anar Hüseynov saxlanılandan sonra yaxın qohumu, cəbhəçi Niyaməddin İsmayılov onun maşını evinə aparıb. Ancaq 2 saat sonra mülki geyimli polislər Niyaməddin İsmayılovu və maşını aparıblar. Maşını metronun "Koroğlu" stansiyasının yaxınlığındakı cərimə meydançasına aparıblar. Niyaməddin İsmayılovu da 2 saat Bakı Baş Polis İdarısində saxladıqdan sonra sərbəst buraxıblar. Amma maşın hələ cərimə meydançasındadır".

Partiyadan deyilib ki, yanvarın 23-də vəkil Nemət Kərimli ilə Anar Hüseynovun müdafiəsi üçün müqavilə imzalanacaq.

DİN-dən açıqlama

Bu fikrlərə, hələlik, Daxili İşlər Nazirliyi (DİN) və başqa rəsmi aidiyyatı qurumlardan münasibət almaq mümkün olmayıb.

Amma iki gün əvvəl, DİN-ə istinadən yerli saytlarda belə iddia səslənmişdi ki, yanvarın 20-də Şəhidlər Xiyabanında bir qrup şəxs ziyarətçilər üçün əvvəlcədən təşkil olunmuş növbəlilik prinsipini pozmaqla orada qarışıqlıq yaratmağa cəhd göstərib.
DİN Mətbuat Xidmətinin bölmə rəisi Zeyni Hüseynov APA-nın sorğusuna cavab olaraq bildirib ki, cəhdin qarşısı alınıb, onlardan biri - Anar Hüseynov polisin qanuni tələbinə qəsdən tabe olmadığına görə saxlanılıb və inzibati qaydada həbs olunub.

Müxalifətçilər ziyarətlərinə problem yaradıldığını deyirlər

Müsavat Partiyası, Milli Şura və bu quruma daxil olan Azərbaycan Xalq Cəbhəsi Partiyası (AXCP) üzvlərinin Bakıda Şəhidlər Xiyabanın ziyarətinə maneə yaradıldığı bildirilir. Bu barədə Müsavat və AXCP-dən məlumat verilib.

AXCP-dən qeyd olunub ki, ərazidə olan polis əməkdaşları onlara 1 saat ərzində dezinfeksiya işləri aparılacağını söyləyib: "Ziyarətimiz saat 15:00-a planlaşdırılıb. Buna görə də bizə maneçilik törətmək məqsədilə burada olan bəzi polis əməkdaşları 1 saatlıq dezinfeksiya işləri aparıldığını, bəziləri isə, ümumiyyətlə, ziyarətin bitdiyini deyirlər".

Müsavat Partiyasından da eyni şikayəti bildiriblər: "Bir neçə saatdır dezinfeksiya bəhanəsi ilə heç kimi ziyarətə buraxmırdılar, "1 saat sonra buraxacağıq" deyirdilər. İndi də polis elan edir ki, 16:30-da buraxılacaq. Belə oyunlarla camaatı neçə ildir o qədər bezdirdilər ki, artıq ziyarətə çox az adam gəlir".

Rusiya ordusu əleyhinə şüar səslənib

Bir qədər sonra (saat 16 radələrində) yenidən ziyarətə imkan verildiyi bildirilib. Amma AXCP fəalları ziyarət zamanı polis kordonlarının olmasından narazılıqlarını bildiriblər. Onlar deyiblər ki, artıq dezinfeksiya bəhanəsi aradan qalxsa da, qabaqda adamların, sıxlığın olmadığına baxmayaraq, tez-tez onları dayandırıb 10-15 dəqiqə saxlayırlar.

AXCP üzvləri yolda "Rusiya ordusu Azərbaycandan çıxarılsın" və başqa şüarlar da səsləndiriblər.

Onlardan öncə Prezident İlham Əliyev də Xiyabanı ziyarət edib, "Əbədi məşəl" abidəsinin önünə əklil qoyub.

DİN təkzib edir

Daxili İşlər Nazirliyi Mətbuat xidmətinin KİV və ictimaiyyətlə əlaqələr şöbəsinin rəisi Elşad Hacıyev isə "Turan"a bu deyilənləri təkzib edib. O bildirib ki, Şəhidlər Xiyabanına keçidə məhdudiyyət tətbiq olunmayıb. "Sıxlıq yaranmaması üçün tədbirlər görülür".

Bakı. Yanvar 1990
Bakı. Yanvar 1990

20 Yanvar faciəsinin 33 ili tamam olur

Azərbaycanda 1990-cı il yanvarın 20-də baş vermiş qırğından 33 il keçir.

Artıq hər il yanvarın 20-də Azərbaycanın paytaxtı Bakıda və əyalətlərdə həmin faciədə həlak olanlar anılır. Səhər saatlarından hökumət, dövlət nümayəndələri, siyasətçilər, diplomatik korpusun təmsilçiləri, sıravi vətəndaşlar 20 Yanvar faciəsində həlak olanların dəfn olunduğu Şəhidlər Xiyabanını ziyarət edirlər.

33 il öncə, 1990-cı il yanvarın 19-dan 20-nə keçən gecə SSRİ Silahlı Qüvvələri Bakıda qırğın törədib. Bu hadisələr nəticəsində 130-dan çox şəxsin həlak olduğu, 700-dən çoxunun yaralandığı, mindən çox insanın isə həbs edildiyi bildirilir.

O vaxtdan hər il yanvarın 20-də həmin hadisələrdə həlak olanlar Azərbaycanın azadlığı və ərazi bütövlüyü uğrunda mübarizlər kimi xatırlanırlar.

O dövrdə gəmi kapitanı olmuş Kərəm Məmmədovun 20 Yanvar xatirələri
Gözlə

No media source currently available

0:00 0:02:55 0:00

Jurnalistin xanımı etiraz aksiyası keçirib

Məlahət Zeynallı

Yanvarın 24-də "Xural" saytının həbsdə olan rəhbəri Əvəz Zeynallının həyat yoldaşı Məlahət Zeynallı Baş Prokurorluğun İstintaq İdarəsinin binası qarşısında etiraz aksiyası keçirib. O, jurnalistin həbsdə olduğu müddətdə ailəsi ilə görüşə və zənglərinə məhdudiyyətə etiraz etdiyini bildirib: "Əvəz Zeynallı dövləti cinayət törətməyib və ailəsi ilə görüşüb əlaqə saxlamaq onun doğal hüququdur".

M.Zeynallı bütün sivil variantlara əl atdığını qeyd edib: "Prezidentə müraciət etdim, ondan sonra Əvəz Zeynallı, mən ombudsmana müraciət etdik, dedilər ki, mümkün qədər kömək edəcəyik. Düşünürdüm ki, prezidentə müraciətdən sonra bu qadağalar aradan qalxacaq, çünki Əvəz Zeynallının həbsi qanunsuzdur və ailəsi ilə görüşünün qarşısının alınması təzyiq üsullardan biridir".

Jurnalistin həyat yoldaşı yenə Prezident İlham Əliyevə, Baş prokuror Kamran Əliyevə, Baş Prokurorluğun İstintaq İdarəsinin rəisi Nemət Eyvazova müraciət edərək əri ilə telefon danışığı və görüşə icazə verilməsini istəyib.

M.Zeynallı həmçinin qeyd edib ki, axtarış zamanı evlərindən müəyyən vəsait götürülüb. O, bunun qızlarının təhsil haqqı üçün nəzərdə tutulan vəsait olduğunu deyərək onun onlara qaytarılması ilə bağlı göstəriş verilməsini istəyib.

Onun sözlərinə görə, Ə.Zeynallının səhhətində də ciddi problemlər var: "Saxlandığı təcridxananın tibbi müəssisəsində ona zəruri göz əməliyyatının aparılmaması üçün müxtəlif bəhanələr gətirilir və heç kəs məsuliyyəti öz üzərinə götürmək istəmir".

Onun bu açıqlamalarına, hələlik, Baş Prokurorluq, başqa rəsmi və aidiyyəti qurumlardan münasibət öyrənmək mümkün olmayıb.

Xatırlatma

Ə.Zeynallı ötən ilin sentyabrında rüşvət ittihamı ilə saxlanıb, haqqında həbs-qətimkan tədbiri seçilib. O, ittihamı qəbul etmir.

Ə.Zeynallı bundan da əvvəl - 2011-ci ildə yenə rüşvət ittihamı ilə saxlanmış və 9 il həbs cəzası almışdı. Amma onda da ittihamı qurama sayan jurnalist 2014-cü ilin sonunda prezidentin əfv sərəncamı ilə vaxtından əvvəl azadlığa çıxmışdı.

Azərbaycan redaktorlara görə təzminat ödəyəcək

Ə.Zeynallı

Avropa İnsan Hüquqları Məhkəməsi (AİHM) yanvarın 19-da Azərbaycandan göndərilmiş bir neçə şikayət üzrə qərarlarını elan edib. AİHM onlardan iki jurnalistin şikayətlərini əsaslı sayıb.

Hüquqşünas Xalid Ağalıyevin verdiyi məlumata görə, məhkəmə "Xural" qəzetinin həbsdə olan baş redaktoru "Əvəz Zeynallı Azərbaycana qarşı" işində ərizəçinin ifadə azadlığı hüququna müdaxilə olunduğu qərarına gəlib: "Məhkəmə işi 2010-cu ildə "Xural" qəzetinin iki məqaləyə görə mülki qaydada cərimə edilməsinin ifadə azadlığı hüququna zidd olması iddiası ilə bağlı idi".

X.Ağalıyev qeyd edib ki, mübahisəli "İlham Əliyev "Xural"ın prezidenti deyil?!" və "Mətbu qəssab" məqalələrində bir sıra məsələlərlə yanaşı, Kütləvi İnformasiya Vasitələrinə Dövlət Dəstəyi Fondunun hazırda mənimsəmə ittihamı ilə həbsdə olan icraçı direktoru Vüqar Səfərli də tənqid olunmuşdu: "Vüqar Səfərli şərəf və ləyaqətinin aşağılanması əsası ilə məqalələrdən məhkəməyə şikayət etmiş, məhkəmələr "Xural" qəzetini 5 min manat cərimələmişdilər".

Qərara əsasən, hökumət ərizəçiyə mənəvi zərər və xərc əvəzi 6 min avro ödəməlidir.

Ə.Zeynallı hazırda həbsdədir. O, ötən ilin sentyabrında rüşvət ittihamı ilə saxlanıb, haqqında həbs-qətimkan tədbiri seçilib. O, ittihamı qəbul etmir. O, bundan da əvvəl - 2011-ci ildə yenə rüşvət ittihamı ilə saxlanmış və 9 il həbs cəzası almışdı. Amma onda da ittihamı qurama sayan jurnalist 2014-cü ilin sonunda prezidentin əfv sərəncamı ilə vaxtından əvvəl azadlığa çıxmışdı.

Q.Zahid
Q.Zahid

Qənimət Zahid işi

Hüquqşünasın sözlərinə görə, "Azadlıq" qəzetinin baş redaktoru "Qənimət Zahid Azərbaycana qarşı" işində ərizəçinin ədalətli məhkəmə araşdırması hüququnun (maddə 6.1) pozulduğuna qərar verilib: "Bu məhkəmə işi ərizəçinin 2007-ci ildə xuliqanlıq ittihamı ilə azadlıqdan məhrum edilməsi ilə bağlı idi".

O bildirib ki, yerli məhkəmələr ərizəçini təqsirli bilib, barəsində 4 il müddətinə azadlıqdan məhrum etmə hökmü çıxarıblar: "Ərizəçi ardınca 2010-cu ildə Azərbaycan prezidenti tərəfindən əfv edilib. Avropa Məhkəməsi bu işdə ərizəçinin ədalətli məhkəmə araşdırması hüququnun (maddə 6.1) pozulduğuna qərar verdi. Qərara əsasən, hökumət ərizəçiyə mənəvi zərər və xərc əvəzi 6 min avro ödəməlidir".

Hələlik, AİHM qərarlarına rəsmi qurumlardan və başqa maraqlı şəxslərdən münasibət almaq mümkün olmayıb.

İlham Əliyev Davosa gedib

Yanvarın 17-də Azərbaycan prezidenti İlham Əliyev Dünya İqtisadi Forumunun illik toplantısında iştirak etmək üçün İsveçrə Konfederasiyasına səfər edib.

Bu barədə ölkənin rəsmi saytları məlumat yayıb.

Bir gün əvvəl, yanvarın 16-da Davosda Dünya İqtisadi Forumu başlayıb. Yanvarın 20-dək davam edəcək Foruma bir çox beynəlxalq təşkilatların, iş dünyasının nümayəndələri dövlət və hökumət başçıları qatılıb.

Dünya İqtisadi Forumu bu il “Parçalanmış dünyada əməkdaşlıq” mövzusu altında təşkil olunub.

Yanvarın 17-dən etibarən liderlərin çıxışları və panel müzakirələri başlayıb.

Artıq Davosda illik ənənə halını alan Dünya İqtisadi Forumu ötən əsrin 70-ci illərindən etibarən keçirilir.

Bakıda 3 təşkilat qaldığı ofisi boşaldır

Bakıda 3 təşkilat qaldığı ofisi boşaldır
Gözlə

No media source currently available

0:00 0:01:48 0:00

Yanvarın 15-də Azərbaycanda fəaliyyət göstərən İctimai Siyasət İnstitutu, Hüquqi Təşəbbüslər Mərkəzi və "Müdafiə Xətti" Təşkilatının paytaxt Bakıda yerləşdikləri "Kaspian Plaza"nı tərk etdikləri bildirilir.

Bu barədə Azadlıq Radiosuna "Müdafiə Xətti" Təşkilatının həmtəsisçisi Zaur Əkbər açıqlama verib:

“ “Caspian Plaza”nın rəhbərliyi adından yanvarın 11-də bizə bildirildi ki, yanvarın sonunadək ofisi tərk etməliyik. Sonra isə yanvarın 15-ni dedilər”.


Amma o, "Kaspian Plaza"nın rəhbərliyini qınamayıb. Zaur Əkbər bunu hakimiyyətin təzyiqi ilə izah edib.

Onun sözlərinə görə, hələ d ekabrın 30-da gənc fəal Bəxtiyar Hacıyevin həbsi ilə bağlı "Kaspian Plaza"da mətbuat konfransı keçirmək istəyiblər, amma oradan deyilib ki, buna icazə verməyəcəklər:

“Həmin vaxt polis də gəldiyindən, mətbuat konfransını Müsavat Partiyasının qərargahında keçirdik".

Z.Əkbər bəhs etdiyi 3 təşkilat haqqında bunları deyib:

"Bəxtiyar Hacıyevin rəhbərlik etdiyi İctimai Siyasət İnstitut, Ziya Quliyevin Hüquqi Təşəbbüslər Mərkəzi və həmtəsisçisi olduğum Müdafiə Xətti Təşkilatı. Bəxtiyar Hacıyev 2015-ci ildən ofisi kirayəyə götürüb, mənimlə Ziya Quliyev 2017-ci ildən burdayıq. 2020-ci ildən isə Müdafiə Xətti Təşkilatı mərkəzdə yer götürdü".

Zaur Əkbər "Kaspian Plaza" ilə müqaviləni Bəxtiyar Hacıyevin bağladığını, ancaq hansı müddətə olduğunu bilmədiyini söyləyib:

"Vəkil vasitəsilə Bəxtiyar bəyə məlumat göndərmişik, vəkil hələ onunla görüşmədiyindən bir şey deyə bilməyəcəm".

O deyib ki, bu gün, yanvarın 15-də axşama doğru ofisi təhvil verəcəklər.
Zaur Əkbər hazırda əşyalarını daşıdıqlarını vurğulayıb.

Amma, hələlik, bütün bu deyilənlərə "Kaspian Plaza"nın rəhbərliyinin və rəsmi qurumların münasibətini almaq mümkün olmayıb.
Rəsmilər bir qayda olaraq vətəndaş cəmiyyətinin təmsilçilərinə təzyiqlərin edilməsi ilə bağlı şikayətləri əsaslı saymırlar.

Yeri gəlmişkən iki gün öncə, yanvarın 13-də həbsdə olan ictimai fəal Bəxtiyar Hacıyevə qarşı irəli sürülən ittiham ağırlaşdırılıb. Vəkil Elçin Sadıqov bildirib ki, əvvəl B.Hacıyevə qarşı Cinayət Məcəlləsinin 221.1 (xırda xuliqanlıq) və 289.1 (məhkəməyə hörmətsizlik etmə) maddələri ilə cinayət işi başlanmışdı. Onun deməsinə görə, yanvarın 13-də 221.1-ci maddə 221.2.2 (İctimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərməklə xuliqanlıq) ilə əvəzlənib.Vəkil bildirib ki, müdafiə tərəfi əvvəlki və yeni ittihamla razı deyil.

Əvvəlki ittihamla gəncə fəala 1, bundan sonra isə 3 ilə qədər həbs cəzası verilə bilər.

Xatırlatma

Ötən il dekabrın 9-da Bakının Xətai Rayon Məhkəməsi ictimai fəal B.Hacıyevi 1 ay 20 gün müddətinə həbs edib. O, xuliqanlıq və məhkəməyə hörmətsizlikdə ittiham olunur. Həmin insident daha öncə böhtan iddiası ilə bağlı fəala qarşı açılmış cinayət işi üzrə məhkəmədə baş verib.

Harvard Universitetinin məzunu olan Hacıyev 2011-ci ilin martında da həbs edilmişdi. Ona hərbi xidmətdən yayınma ittihamı ilə 2 il müddətinə azadlıqdan məhrumetmə cəzası verilmişdi. Hacıyev 2012-ci ildə Ali Məhkəmənin qərarı ilə vaxtından əvvəl şərti azadlığa çıxıb.

O, son illər hökumətin və hüquq-mühafizə orqanlarının fəaliyyəti ilə bağlı sərt tənqidləri ilə seçilirdi.

Azərbaycan və Almaniya prezidentləri Laçın dəhlizindən danışıblar

Almaniya və Azərbaycan prezidentləri Frank-Valter Ştaynmayer (solda) və İlham Əliyev (Arxiv fotosu)

Yanvarın 13-də Almaniya prezidenti Frank-Valter Ştaynmayer Azərbaycan prezidenti İlham Əliyevə zəng edib.

Bu barədə Azərbaycan Prezidentinin mətbuat xidməti məlumat yayıb.

Məlumata görə, söhbət zamanı prezidentlər Azərbaycan-Almaniya əlaqələrinin mövcud vəziyyətindən məmnunluqlarını bildiriblər və əməkdaşlığın perspektivlərini müzakirə ediblər.

Açıqlamaya görə, regional təhlükəsizlik məsələlərinə toxunan Frank-Valter Ştaynmayer Almaniyanın Avropa İttifaqı Şurasının prezidenti Şarl Mişelin bilavasitə iştirakı ilə aparılan Azərbaycan-Ermənistan arasında danışıqları dəstəklədiyini vurğulayıb.

Prezident İlham Əliyev də Azərbaycanın həmin üçtərəfli format çərçivəsində aparılan müzakirələr prosesinə sadiqliyini ifadə edib.

Eyni zamanda, telefon söhbətində Xankəndi-Laçın yolundakı vəziyyət müzakirə olunub.

Məlumata görə, Azərbaycan dövlət başçısı bildirib ki, “Ermənistanın yolun blokada şəraitində olması barədə iddiaları yalandır”.

Onun vurğulamasına görə, yolda Beynəlxalq Qızıl Xaç Komitəsinin xətti ilə və eləcə də digər humanitar yüklərin sərbəst hərəkəti təmin olunur.

Qarabağ erməniləri internet, telefon və işığın kəsildiyini deyirlər
Gözlə

No media source currently available

0:00 0:03:30 0:00

Laçın dəhlizində

Ötən il dekabrın 12-dən bir çox Azərbaycan vətəndaşları Ermənistanı Qarabağla birləşdirən Laçın dəhlizində növbəli aksiya keçirir.

Ermənistan tərəfi Azərbaycanı bu aksiyanın arxasında durmaqda, Qarabağ ermənilərini blokadaya almaqda və "humanitar böhran" yaratmaqda ittiham edir.

Rəsmi Bakı isə bildirir ki, aksiyaçılar sərbəst toplaşmaq hüququna malikdirlər. Aksiyaçılar Qarabağdakı qızıl və mis yataqlarında monitorinq keçirilməsini tələb edirlər.

Bakı Qarabağdakı separatçı rejimi və Ermənistanı Azərbaycanın təbii sərvətlərini qanunsuz istismar etməkdə ittiham edib.

Qarabağda tanınmayan qurumun “dövlət naziri” kimi təqdim olunan Ruben Vardanyan isə AzadlıqRadiosunun Erməni xidməti – Azatutyuna söyləyib ki, ‘bu ekoloji yox, siyasi məsələdir’.

Avropa İttifaqının vasitəçiliyi

2021-ci ilin dekabrından Azərbaycan və Ermənistan arasında sülh danışıqları, əsasən, Avropa İttifaqının vasitəçiliyi ilə aparılırdı. Lakin ötən ilin sonlarından bu proses dayanıb.

Azərbaycan rəsmiləri buna səbəb kimi Ermənistanın bu danışıqlarda Fransa prezidentinin iştirakını istəməsini göstərib.

Brüsseldə Avropa İttifaqının vasitəçiliyi ilə keçirilən son görüşdə Fransa prezidenti də iştirak etmişdi.

Azərbaycan rəsmiləri hesab edirlər ki, Fransa bu məsələdə bitərəf yox, Ermənistanın mövqeyindən çıxış edir.

Hərçənd Fransa rəsmiləri hesab edirlər ki, onlar iki ölkə arasında sülhün bərqərar olmasında maraqlıdırlar.

Paşinyan: "Vəziyyəti daha da çətinləşdirən bəyanatlardan qaçmalıyıq"
Gözlə

No media source currently available

0:00 0:03:11 0:00

Xatırlatma

2020-ci ildə 44 günlük İkinci Qarabağ Müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa etmişdi.

Həmin il Azərbaycan, Ermənistan və Rusiya rəhbərliyinin imzladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olmuşdu.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Maaş və müavinətlər artırıldı

İlham Əliyev

Prezident İlham Əliyevin yanvarın 13-də imzaladığı sərəncam ilə dövlət büdcəsindən maliyyələşən bir sıra təşkilatlarda çalışan rəhbər və digər işçilərin aylıq vəzifə maaşları bu il yanvarın 1-dən orta hesabla 15 faiz artırılıb.

Bununla bağlı siyahıda əvvəlcə Azərbaycan Milli Elmlər Akademiyasının Rəyasət Heyəti, Aparatı, Gəncə bölməsinin Aparatı qeyd edilir. Daha sonra isə bir sıra başqa təşkilatlar gəlir.

Dövlət başçısının başqa bir sərəncamı ilə bir sıra təqaüd və müavinətlərdə də artım baş verib. Bəzi kateqoriyalarda bu, təqribən 10, bəzilərində isə 50 faizdir.

Habelə, prezidentin başqa bir sərəncamı ilə tələbə və doktorantların təqaüdləri də artırılıb. Onlarda artım ümumilikdə 10-15 civarinda gözlənilir. Bu artımlar ümumilikdə 150 minədək doktorant və tələbəni əhatə edir.

Əmək və Əhalinin Sosial Müdafiəsi Nazirliyinin məlumatına görə, ümumilikdə bu il sosial ödənişlərdə artımlar üçün əlavə 750 milyon manat vəsait nəzərdə tutulub. Həmin artımlar 1.9 milyon vətəndaşı əhatə edir.

Aclıq edən Bəxtiyar Hacıyevdən yeni xəbər var

Bakhtiyar Hajiyev

Bakı İstintaq Təcridxanasında saxlanan ictimai fəal Bəxtiyar Hacıyevin vəziyyətinin pisləşdiyi bildirilir.

Bu barədə yanvarın 12-də onunla görüşən vəkil Fəxrəddin Mehdiyev məlumat verib.

Vəkilin sözlərinə görə, 4-cü gündür aclıq aksiyası keçirdiyini bildirən Hacıyevin qan təzyiqinin aşaığı düşdüyü, nəbzinin zəiflədiyi deyilir:

"Bəxtiyar bəy 1 kiloqram çəki itirib. Ümumi götürəndə bundan öncə 14 gün aclıq edib və indi səhhətində dəyişkiliklər əvvəlki aclığın davamı kimi özünü biruzə verir. Mənimlə söhbət zamanı artıq baş gicəllənmə halları var idi. Artıq narahatedici hallar başlayıb".

Penitensiar Xidmətindən “Turan” Agentliyinə Hacıyevin aclığı davam etdirməsi haqqında məlumatı təsdiq ediblər:

"O, təcridxananın sanitar-tibb hissəsinə köçürülüb, həkim nəzarəti altındadır".

Həbsdə olan ictimai fəal Bəxtiyar Hacıyev yanvarın 9-da Bakı Apellyasiya Məhkəməsində yenidən aclıq aksiyasına başladığı haqqında məlumat vermişdi.

Bundan öncə Hacıyev dekabrın 15-də aclıq aksiyasına başladığını açıqlamış, dekabrın 28-də onu dayandırmışdı. Fəal ittihamları qəbul etmir, həbsini qanunsuz sayır.

Xatırlatma

Ötən il dekabrın 9-da Bakının Xətai Rayon Məhkəməsi ictimai fəal Bəxtiyar Hacıyevi 1 ay 20 gün müddətinə həbs edib.

O xuliqanlıq və məhkəməyə hörmətsizlikdə ittiham olunur. Həmin insident daha öncə böhtan iddiası ilə bağlı fəala qarşı açılmış cinayət işi üzrə məhkəmədə baş verib. O, ittihamları qəbul etmir.

Harvard Universitetinin məzunu olan Hacıyev 2011-ci ilin martında da həbs edilmişdi.

Ona hərbi xidmətdən yayınma ittihamı ilə 2 il müddətinə azadlıqdan məhrumetmə cəzası verilmişdi. Hacıyev 2012-ci ildə Ali Məhkəmənin qərarı ilə vaxtından əvvəl şərti azadlığa çıxıb.

O, son illər hökumətin və hüquq-mühafizə orqanlarının fəaliyyəti ilə bağlı sərt tənqidləri ilə seçilirdi.

Azərbaycan hökuməti 34 min avro təzminat ödəyəcək

Anar Məmmədli:"Soruşdu ki, "Google" kimdir?"
Gözlə

No media source currently available

0:00 0:03:57 0:00

Yanvarın 12-də Avropa İnsan Hüquqları Məhkəməsi (AİHM) Azərbaycanla bağlı dörd yeni qərar elan edib. Məhkəmə Azərbaycanı 34 min 500 avro cərimələyib.

SMDT Azərbaycana qarşı…

Qərarların biri Seçkilərin Monitorinqi və Demokratiyanın Tədrisi Mərkəzi (SMDT) ilə bağlıdır. Təşkilatın təsisçiləri Anar Məmmədli, Bəşir Süleymanlı Suliddin Əsgərov 2009-cu ildə SMDT-nin dövlət qeydiyyatına alınması üçün Ədliyyə Nazirliyinə müraciət ediblər. Lakin məsələ müsbət həll olunmadığından ərizəçilər AİHM qarşısında birləşmək azadlığı hüquqlarına müdaxilə ilə bağlı iddia qaldırıblar.

Hüquqşünas Xalid Ağalıyevin AzadlıqRadiosuna verdiyi məlumata görə, AİHM bu işdə ərizəçilərin birləşmək (11-ci maddə) hüququna müdaxilənin baş verdiyinə, habelə, fərdi şikayət etmək hüququna (34-cü maddə) hörmət göstərilmədiyinə qərar verib: "Qərara əsasən, hökumət ərizəçilərə mənəvi zərər əvəzi 4 min 500 avro, tərcümə məsrəflərinə görə 200 avro, ərizəçilərin hüquqi təmsilçisi İntiqam Əliyevə də 500 avro ödəməlidir".

Hüquqşünasın vurğulamasına görə, digər qərarlar mülkiyyət, ədalətli məhkəmə araşdırması və ayrıseçkiliyin yolverilməzliyi şikayətləri ilə bağlı olub.

Qərarlara Azərbaycanın rəsmi qurumlarından münasibət almaq mümkün olmayıb.

Seçkilərin Monitorinqi və Demokratiyanın Tədrisi Mərkəzi (SMDT) Seçkilərin Monitorinq Mərkəzi (SMM) əsasında yaradılmışdı.

Xatırlatma

AİHM iki il əvvəl SMM ilə də bağlı qərarını açıqlamışdı. Həmin qərarda isə SMM-nin qeydiyyata alınmasından imtina, daha sonra isə qeydiyyatının ləğv edilməsi pozuntu kimi dəyərləndirilib. Məhkəmənin qərarına əsasən, hökumət ərizəçilərə mənəvi zərər əvəzi 4 min 500, hüquq xərclərinə görə 1 min 500, digər məsrəflərə görə 600 avro təzminat ödəməli idi.

Onda ərizəçilərdən Anar Məmmədli AİHM-nin qərarını gecikmiş hesab etmişdi: "Seçkilərin Monitorinq Mərkəzinin qeydiyyatının ləğvi 2008-ci ildə baş verib. Biz çox təəssüf edirik ki, qərar bu qədər yubandı. Üstündən 10 ildən artıqdır ki, vaxt keçdi. Bu müddət ərzində Seçkilərin Monitorinq Mərkəzinin əsasında SMDT (Seçkilərin Monitorinqi və Demokratiyanın Tədrisi Mərkəzi) yarandı. Onun da qeydiyyatı hökumət tərəfindən alınmayıb".

'Sədərək'dəki yanğına görə tutulan var

'Sədərək' Ticarət Mərkəzində yanğın
Gözlə

No media source currently available

0:00 0:00:08 0:00

Yanvarın 8-də Qaradağ rayonunda yerləşən "Sədərək" ticarət mərkəzində baş verən yanğınla bağlı bir nəfər saxlanıb.

Bu barədə Baş Prokurorluq və Fövqəladə Hallar Nazirliyinin birgə məlumatında bildirilir.

Rəsmi açıqlamaya görə, ilkin araşdırma zamanı ticarət mərkəzinin 15-16-cı sıralarında ümumilikdə 800 kvadratmetr sahədə yerləşən 27 mağazanı Bakı şəhər sakini Əfqan Abdullayevin qəsdən yandırmasına əsaslı şübhələr yaranıb: "Faktla bağlı Fövqəladə Hallar Nazirliyinin Əməliyyat-istintaq idarəsində Cinayət Məcəlləsinin 186.2.1 (külli miqdarda ziyan vurmaqla əmlakı qəsdən məhv etmə və ya zədələmə) və 186.2.2-ci (yandırmaqla əmlakı qəsdən məhv etmə və ya zədələmə) maddələri ilə cinayət işi başlanıb. İş üzrə Əfqan Abdullayev şübhəli şəxs qismində tutulub".

Atası təkzib edir

İttihama Ə.Abdullayevin özündən, hələlik, münasibət almaq mümkün olmayıb. Amma onun atası Səməd Abdullayev AzadlıqRadiosuna bildirib ki, oğluna qarşı irəli sürülən ittihamla razılaşmırlar.

Atası vurğulayıb ki, həmin ticarət mərkəzində oğlunun da mağazası var və onun öz mağazasını yandırması haqqında iddianı absurd sayırlar.

'Sədərək'də malları yanan sahibkar
Gözlə

No media source currently available

0:00 0:00:36 0:00

'Sədərək'də 20 mağaza yanıb

Yanvarın 8-də "Sədərək" ticarət mərkəzində baş verən yanğında 20 mağaza ziyan çəkib.

Bu barədə yanvarın 9-da Fövqəladə Hallar Nazirliyinin (FHN) yaydığı məlumatda bildirilir: "Yanğın nəticəsində ümumi sahəsi təxminən 10 ha olan "Sədərək" ticarət mərkəzinin ərazisində "Şirniyyat" bazarında ümumi sahəsi 1700m² olan bir-birinə bitişik 20 müxtəlif təyinatlı mağaza 800m² sahədə yanıb".

Açıqlamaya görə, ticarət mərkəzinin böyük hissəsi yanğından mühafizə olunub:

"Hadisə nəticəsində 4 nəfər tüstüdən yüngül zəhərlənib, 1 nəfər yüngül bədən xəsarəti alıb. Hadisə ilə əlaqədar araşdırma aparılır".

'Sədərək'də yenə yanğın olub

Yanvarın 8-i saat 18:20 radələrində Bakının ən böyük ticarət mərkəzində - "Sədərək"də yanğın baş verib.

Fövqəladə Hallar Nazirliyindən verilən məlumata görə, yanğının söndürülməsinə 30 texnika və 130 yanğınsöndürən cəlb olunub.

Geniş ərazini əhatə edən yanğınla mübarizə bir neçə saat davam edib.

Yanğının hansı səbəbdən baş verdiyi barədə məlumat verilmir.

Son illər "Sədərək" ticarət mərkəzində bir neçə dəfə yanğın baş verib. Sonuncu yanğın ötən il iyulun 16-da olub. Onda yanğının qısa qapanmadan baş verdiyi açıqlanmış və bir sıra mağazalara ziyan dəydiyi vurğulanmışdı.

Prezident İsrailə səfir təyin etdi

Muxtar Məmmədov

Muxtar Məmmədov Azərbaycan Respublikasının İsrail Dövlətində fövqəladə və səlahiyyətli səfiri təyin edilib. Prezident İlham Əliyev bununla bağlı sərəncam imzalayıb.

Ötən ilin noyabrında Azərbaycan Milli Məclisi İsraildə səfirliyin açılması ilə bağlı layihəni qəbul etmişdi.

Azərbaycan 1991-ci ildə müstəqilliyini bərpa edib. Bundan bir il sonra İsrailin Azərbaycanda səfirliyi açılıb. Amma aradan keçən 30 ildə Azərbaycanın İsraildə səfirliyi açılmamışdı.

Muxtar Məmmədov haqqında…

Muxtar Məmmədov 1983-cü ildə Bakıda doğulub.

2000-2004-cü illərdə Bakı Dövlət Universitetində "Beynəlxalq münasibətlər" ixtisası üzrə bakalavriat, 2006-2007-ci illərdə Belçikanın Avropa Kollecində "Avropaşünaslıq" ixtisası üzrə magistratura təhsili alıb.

2005-2013-cü illərdə Xarici İşlər Nazirliyində, o cümlədən 2009-2013-cü illərdə Azərbaycan Respublikasının Belçika Krallığındakı Səfirliyində müxtəlif diplomatik vəzifələrdə çalışıb.

2013-2021-ci illərdə Təhsil Nazirliyində sektor müdiri, Beynəlxalq əməkdaşlıq şöbəsinin müdiri və aparatın rəhbəri vəzifələrində çalışıb.

2021-ci ilin aprelindən indiyədək elm və təhsil nazirinin müavini vəzifəsində çalışırdı.

Almaniyadan qaytarılan AXCP üzvünə 7 il 6 ay həbs tələbi

Cəfər Mirzəyev

Azərbaycan Xalq Cəbhəsi Partiyasının (AXCP) üzvü, Almaniyadan deportasiya olunandan az sonra həbs edilən Cəfər Mirzəyevə 7 il 6 ay həbs cəzası istənilib. Yanvarın 6-da Bakı Ağır Cinayətlər Məhkəməsində prokuror bu təkliflə çıxış edib.

Prokuror iddia edib ki, AXCP fəalına qarşı narkotik ittihamı məhkəmədə sübuta yetirilib. Mirzəyev isə bu ittihamın yalan olduğunu, Almaniyada olarkən Azərbaycanda insan haqlarının pozulmasına etiraz aksiyalarında iştirakına görə cəzalandırıldığını deyir.

O, məhkəmədə də bildirib ki, Ramanı qəsəbəsində mağazada alış-veriş edəndə saxlanılıb, həmin vaxt üstündə də heç nə olmayıb. Polis idarəsində işgəncəyə məruz qaldığını vurğulayan AXCP üzvünün sözlərinə görə, kamera görüntülərinə baxılsa, dedikləri təsdiqini tapar. Onun sözlərinə görə, idarəyə aparılanda üzərində xəsarət izi yox idi. Amma işgəncədən sonra narkotiklə bağlı etiraf videosu çəkiləndə sifətində xəsarət görünür.

Mirzəyev siyasi mühacir kimi Almaniyada oturum izni almaq istəsə də, 2021-ci il noyabrın 25-də Azərbaycana qaytarılıb və yanvarın 27-də Bakıda həbs olunub.

Altı nəfər həbs edilib

Son ilyarım ərzində Azərbaycanda Almaniyadan deportasiya olunanlardan altı nəfər həbs edilib. Onların əksəriyyətinə qarşı narkotik ittihamı irəli sürülüb. Lakin heç biri ittihamı qəbul etmir, Almaniyada olarkən Azərbaycanla bağlı etiraz aksiyalarında iştirak etdiklərinə, hökumətin ünvanına səsləndirdikləri tənqidlərə görə ölkəyə qayıdandan dərhal sonra şərləndiklərini bildirirlər.

Daxili İşlər Nazirliyi isə Almaniyadan deportasiya edilən mühacirlərin polis tərəfindən şərlənməsi haqda iddiaları əsassız sayır.

"Bu cür fikirlər qətiyyən həqiqətəuyğun deyil, məsuliyyətdən yayınmaq məqsədi daşıyır", - nazirliyin mətbuat xidmətinin şöbə rəisi Elşad Hacıyev AzadlıqRadiosuna belə deyib.

Naxçıvanda Ticarət Mərkəzinin işçiləri də aksiya keçirib

Naxçıvan şəhəri

Yanvarın 5-də Naxçıvan şəhərində yerləşən “Cahan” Ticarət Mərkəzində işləyən satıcıların etiraz aksiyası keçirdiyi bildirilir.

Yerli sakinlərin verdiyi məlumata görə, onlar kirayə haqqının yüksək olmasından narazı olduqlarını bildiriblər.

AzadlıqRadiosuna danışan, amma adının çəkilməsini istəməyən satıcılardan biri qeyd edib ki, icarə haqqı baha olduğuna görə, pulu çatdırıb verə bilmirlər.

Həmin şəxsin sözlərinə görə, icarə haqqı iki il əvvəl təqribən 80 faizdən çox bahalaşıb. O deyib ki, “hardasa 170 manatlıq yer 300 manata qaldırılıb”.

Onun vurğulamasına görə, aksiya iştirakçıları icarə haqqının aşağı salınması xahişi ilə Naxçıvan Muxtar Respublikası Ali Məclisinə üz tutublar. Həmin şəxsin vurğulamasına görə, onları yeni rəhbərlik qəbul edib və məsələ ilə maraqlanacaqlarını söyləyiblər.

Bu deyilənlərə, hələlik, “Cahan” Ticarət Mərkəzi və MR rəhbərliyindən münasibət almaq mümkün olmayıb.

Çayxanası sökülən Naxçıvan sakini: 'Yalandır, heç nə dəyişməyib'
Gözlə

No media source currently available

0:00 0:07:00 0:00

Bir həftə əvvəl…

Bundan bir həftə əvvəl, dekabrın 28-də isə taksi sürücülərinin Naxçıvan Muxtar Respublikasının mərkəzi Naxçıvan şəhərində, Ali Məclisin binası qarşısında aksiyası olmuşdu.

Aksiya iştirakçıları deyirdilər ki, yaxın dövrə qədər Naxçıvanda istənilən adam taksi sürücüsü işləyə bilməzdi:

“Vasif Talıbovun dövründə taksi maşınları yalnız “NAZ Lifan” markalı avtomobillər olmalı idi. Başqa maşınlara taksi işləməyə icazə verməmişdilər. Etiraz edən kimi maşınları cərimə meydançasına aparırdılar, lisenziyamızı isə ləğv edirdilər. Biz də acından ölməmək üçün məcbur olub razılaşırdıq. Bu 20 minlik maşınları bizə 35 min manata satırdılar”.

Yerli sakinlərin vurğulamasına görə, Ali Məclisin binası önünə toplaşanlar yeni rəhbərlikdən bununla bağlı onların müracətinə baxmağı xahiş ediblər.

Amma o vaxt bu deyilənlərə də MR-nın indiki və keçmiş rəhbərliyindən münasibət almaq mümkün olmamışdı.

“NAZ Lifan” markalı avtomobilərin Naxçıvan MR-da yığıldığı bildirilir.

Xatırlatma

Ötən il dekabrın 22-də dövlət başçısı İlham Əliyev Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi haqqında fərman imzalayıb.

Digər sərəncamla Naxçıvanda Azərbaycan prezidentinin səlahiyyətli nümayəndəsi təyin edilib. Bu şəxs paytaxt Bakıdan göndərilən, Fuad Vahid oğlu Nəcəfli olub. Naxçıvan Ali Məclisinin sədri vəzifəsi isə, hələlik, boşdur.

Dekabrın 21-də Naxçıvan Ali Məclisinin sədri Vasif Talıbovun istefası qəbul edilib. O düz 27 il idi həmin vəzifədə çalışırdı.

Ondan bir qədər əvvəl isə MR-da bəzi vəzifəli şəxslər mənimsəmə ittihamı ilə həbs edilib. Onların ittihama münasibəti bəlli deyil.

ABŞ-ın Qafqazdakı əsas vasitəçisi istefa verir

Filip Riker

ABŞ Dövlət Departamentinin Qafqaz danışıqları üzrə baş müşaviri Filip Riker (Philip Reeker) yanvarın 5-də diplomatik xidmətdən təqaüdə çıxır. Bu barədə "Turan"ın Vaşinqton müxbiri xəbər verir.

Ötən ilin avqustunda Dövlət katibi Entoni Blinken (Antony Blinken) səfir Rikeri özünün baş müşaviri və ATƏT-in Minsk qrupunun ABŞ-dan olan həmsədri təyin etmişdi.

Dövlət Departamentinin sözçüsü Ned Prays (Ned Price) yanvarın 4-də gündəlik brifinqdə deyib: "...Onun keçən ilin sonuna kimi qısamüddətli əsasda bu vəzifəni tutacağı gözlənilirdi".

Prays bildirib ki, Rikerin gedişi Birləşmiş Ştatların Cənubi Qafqaz regionu üçün təhlükəsiz, demokratik və dinc gələcəyə sadiqliyinə heç bir halda xələl gətirmir.

Xatırlatma

2020-ci ildə İkinci Qarabağ müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa edib. Həmin il Azərbaycan, Ermənistan və Rusiya rəhbərliyinin imzaladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

2021-ci ilin dekabrından bəri tərəflər arasında sülh danışıqlarında Avropa İttifaqı da vasitəçi kimi iştirak edir. ABŞ bu prosesi dəstəkləyir.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olmuşdu. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Tofiq Yaqublu ilə təklikdə görüşə imkan verilmədiyi deyilir

Bakıda etiraz aksiyası, saxlananlar var
Gözlə

No media source currently available

0:00 0:02:34 0:00

Müsavat Partiyasının və Milli Şuranın inzibati həbsdə olan üzvü Tofiq Yaqubluya Daxili İşlər Nazirliyinin İnzibati Həbs Olunanlanların Saxlanma Məntəqəsində vəkili Bəhruz Bayramovla konfidensial görüşə imkan yaradılmadığı bildirilir.

Bu barədə T.Yaqublunun qızı Nigar Həzi məlumat verib. Onun sözlərinə görə, yanvarın 3-də T.Yaqublunun vəkil B.Bayramovla görüşü zamanı polis əməkdaşı otaqda onların yanında duraraq konfidensial görüşlərinə mane olub: "Tofiq Yaqublunun haqsız, günahsız yerə həbs etməkləri azmış kimi, hələ təcridxanada da ona rahatlıq verilmir. Bu kobud qanun pozuntusudur və bununla bağlı məhkəməyə müraciət ediləcək".

Bu deyilənlər ilə bağlı Daxili İşlər Nazirliyindən münasibət öyrənmək mümkün olmayıb.

T.Yaqublu dekabrın 23-də Bakının mərkəzində ictimai fəal Bəxtiyar Hacıyevin azadlığa buraxılması tələbi ilə keçirilən etiraz aksiyasında saxlanıb. Həmin gün Səbail Rayon Məhkəməsi onu xırda xuliqanlıq və polisə tabe olmamaq ittihamı ilə 30 sutka həbs edib.

T.Yaqublu buna qədər müxtəlif ittihamlarla (iğtişaş yaratmaq, xuliqanlıq və s.) bir çox dəfə həbsdə olub. O, ittihamları qurama sayıb.

B.Hacıyev də ötən il dekabrın 9-da Bakının Xətai Rayon Məhkəməsinin qərarı ilə 1 ay 20 gün müddətinə həbs edilib. Fəal xuliqanlıq və məhkəməyə hörmətsizlikdə ittiham olunur. Amma ittihamı qəbul etmir.

Rusiyalı nümayəndə Laçın yolu ilə bağlı BMT-dəki müzakirələrdən yazıb

BMT, arxiv foto

Rusiyanın BMT-dəki daimi nümayəndəsinin birinci müavini Dmitri Polyanski Laçın dəhlizi ətrafında baş verən hadisələrlə bağlı BMT Təhlükəsizlik Şurasında (TŞ) müzakirəyə çıxarılan sənədin qəbul olunmamsına münasibət bildirib.

Polyanski dekabrın 31-də özünün teleqram kanalında yazıb ki, “Yerevanın tələbi ilə bu proses Təhlükəsizlik Şurasının digər üzvlərinin düzəlişlərini nəzərə alaraq bizim təkliflərimizin böyük əksəriyyətinə məhəl qoymayan fransızlar tərəfindən koordinasiya edilib”. "Parisin bu cür üsullarının natəmizliyi göz qabağındadır", - o vurğulayıb.

Əvvəldən bu məsələdə konstruktiv işləmək əzminində olduqlarını vurğulayan Polyanski yazıb ki, qərb ölkələrindən fərqli olaraq Rusiya Dağlıq Qarabağ, o cümlədən Laçın dəhlizi ətrafında münaqişənin həlli ilə sözdə deyil, əməldə məşğul olur.

"Qərbliləri münaqişə vəziyyətinin həllindən daha çox Təhlükəsizlik Şurasının hansısa məhsulunu qəbul etmək narahat edirdi..."açıqlamada bildirilir

Dmitri Polyanskinin yazdığına görə, mövcud gərginlikdən asılı olmayaraq, həm Bakı, həm də Yerevan tərəfindən dəstəklənən ən yüksək səviyyədə dörd birgə bəyanat normallaşma üçün əsas olaraq qalır.

O, paylaşdığı açıqlamada Ermənistanın maraqlı tərəflərin geosiyası oyunlara çəkilməsinə imkan verilməyəcəyinə inanmaq istədiyini bildirib.

"Mən şəxsən həqiqətən inanmaq istəyirəm ki, bizim erməni dostlarımız SSRİ-də bir yerdə yaşamış qardaş xalqları hər hansı bəhanələrlə sıxışdırmaqdan çəkinməyənləri razı salmaq üçün özlərinin vicdansız geosiyasi oyunlarına cəlb olunmasına imkan verməyəcəklər..."-Dmitri Polyanski vurğulayıb.

Azərbaycanın Beliçka və Lüksenburqdakı səfiri Vaqif Sadıqov Laçın yolu ilə bağlı sənədin qəbul olunmamasını Fransanın növbəti dəfə Azərbaycana məğlub olması kimi qiymətləndirib. Diplomat dekabrın 30-da paylaşdığı tvittində bu məsələdə Azərbaycana dəstək olan ölkələrə də təşşəkkür edib.

“Bu gün Fransa BMT Təhlükəsizlik Şurasında BMT Təhlükəsizlik Şurasının Laçınla bağlı qərəzli ermənipərəst bəyanatını irəli sürmək cəhdi nəticəsində Azərbaycana növbəti döyüşdə məğlub oldu və bu, BMT TŞ-nin digər üzvlərinin kəskin reaksiyasına səbəb oldu. Albaniya, Rusiya, BƏƏ və Böyük Britaniyaya təşəkkürlər! Azərbaycan diplomatlarının əla işi!”-səfir tvitterdə yazıb.

Xatırlama

Dekabrın 12-dən Azərbaycan vətəndaşları Ermənistanı Qarabağla birləşdirən Laçın dəhlizində növbəli aksiya keçirirlər.

Ermənistan tərəfi Azərbaycanı bu aksiyanın arxasında durmaqda, Qarabağ ermənilərini blokadaya almaqda və "humanitar böhran" yaratmaqda ittiham edir.

Rəsmi Bakı isə bildirir ki, aksiyaçılar sərbəst toplaşmaq hüququna malikdirlər. Etirazçıların sözlərinə görə, onlar yolu bağlamayıblar, humanitar və təcili tibbi yardım maşınlarının keçməsinə imkan yaradırlar.

Bakı Qarabağda tanınmayan qurumu və Ermənistanı Azərbaycanın təbii sərvətlərini qanunsuz istismar etməkdə günahlandırır.

2020-ci ildə 44 günlük İkinci Qarabağ müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa edib.

Həmin il Azərbaycan, Ermənistan və Rusiya rəhbərliyinin imzaladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olub.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Azərbaycan və İran xarici işlər nazirləri danışıblar

Azərbaycan və İran xarici işlər nazirləri Ceyhun Bayramov (sol) və Hüseyn Əmir Abdullahian

Bir müddətdir ki, Azərbaycanla İran arasında gərginlik müşahidə olunmaqdadır

Azərbaycan və İran xarici işlər nazirləri arasında telefon danışığı olub. Bu barədə dekbarın 31-də Azərbaycanın xarici işlər nazirliyinin mətbuat xidməti məlumat yayıb.

Məlumatda bildirilir ki, nazirlər Ceyhun Bayramovla Hüseyn Əmir Abdullahian telefon söhbətində gündəliyin aktual məsələləri, xüsusilə də iqtisadi-ticarət və nəqliyyat sahələrində əldə edilmiş razılıqlar çərçivəsində icra edilən layihələri müzakirə ediblər.

Bununla yanaşı vurğulanır ki, iki ölkə arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının İran tərəfindən yeni həmsədrinin təyin edilməsi ilə komissiyanın işinin intensivləşdirilməsi niyyəti ifadə olunub.

"Tərəflər, həmçinin bölgədə post-münaqişə dövründə vəziyyəti, habelə daha geniş regional məsələləri müzakirə ediblər"-Nazirliyin məlumatında bildirilir.

Azərbaycan İran munasibətlərində gərginlik

2020-ci ildə 44 günlük İkinci Qarabağ Müharibəsindən sonra Azərbaycanla İran arasında müəyyən gərginlik müşahidə olunub,

2022-ci ilin noyabrın 14-də Azərbaycan Dövlət Təhlükəsizlik Xidməti (DTX) İran xüsusi xidmət orqanlarının yaratdığı casus şəbəkəsinin ifşa edildiyi və Azərbaycan vətəndşıolan 5 nəfərin həbs olunduğu barədə məlumat yayıb.

Bundan əvvəl, noyabrın 11-də isə İranın Azərbaycandakı səfiri Seyid Abbas Musəvi Xarici İşlər Nazirliyinə çağırılıb.

Məlumata görə, görüşdə, İran mediasında Azərbaycan əleyhinə aparılan təbliğat, qarayaxma kampaniyası, yüksək vəzifəli rəsmilərin təhdid xarakterli ritorikaları ilə bağlı narazılıq və narahatlıq qarşı tərəfin diqqətinə çatdırılıb.

Ondan bir neçə gün öncə Azərbaycanın İrandakı səfirinin də həmin ölkənin xarici siyasət idarəsinə çağırılaraq oxşar narazılıqla üzləşdiyi açıqlanıb.

Qeyd edilən bu açıqlamalara ölkələrin rəsmi qurum və başqa maraqlı tərəflərdən birbaşa münasibət bildirilməyib.

Əvvəlcə İran Silahlı Qüvvələri Azərbaycanla sərhəddə, Araz çayı sahilində hərbi təlimlər keçiriblər. Həmin vaxt Azərbaycan parlamentində bəzi deputatlar bunu Azərbaycana təhdid kimi dəyərləndirmişdilər.

Biləsuvarda İran radioları Azərbaycan dilində təbliğat aparır
Gözlə

No media source currently available

0:00 0:08:27 0:00

Amma sonradan İranın Azərbaycandakı səfirliyi təlimlə bağlı rəsmi Bakının əvvəlcədən məlumatlandırıldığını bildirib.

Daha sonra Azərbaycanın da xüsusi təyinatlıları ölkənin cənubunda hərbi təlim keçiriblər.

Dünya azərbaycanlılarının həmrəylik günüdür

Həmrəylik günü belə yarandı
Gözlə

No media source currently available

0:00 0:05:26 0:00

Dekabrın 31-i Dünya Azərbaycanlılarının Həmrəylik Günüdür. Artıq 30 ildir ki, bu bayram Azərbaycanda rəsmən qeyd edilir.

Bu bayramın əsası 1989-cu il dekabrın sonlarında Sovet Azərbaycanı ilə İran sərhədinin sökülməsi zamanı qoyulub.

"Berlin divarı"nın sökülməsindən sonra parçalanmış xalqların birləşməsi ideyası Azərbaycanda da möhkəm kök salmışdı. Həmin vaxt həm Azərbaycan Sovet Sosialist Respublikasında (SSR), həm də İranda yaşayan eyni xalqa mənsub insanlar tikanlı sərhəd məftillərinin sökülməsi ilə bir-birlərinə sevgilərini bildiriblər. Sərhəd məftilləri, əsasən, Azərbaycan SSR-in Cəlilabad, Naxçıvan Muxtar Respublikası və başqa sərhəd bölgələrində sökülüb.

Elə həmin vaxt İstanbulda, Dünya Azəri Türk Dərnəyinin birinci qurultayında dekabrın 31-nin həmrəylik günü kimi qeyd olunmasına dair qərar verilib.

İki ildən sonra, 1991-ci il dekabrın 16-da Azərbaycan parlamentinə qərarın qəbul olunması təklifi edilib. 1992-ci ildə prezident Əbülfəz Elçibəyin hakimiyyəti dövründə bu qərar rəsmiləşdirilib.

Məhərrəm Talıbovun yerinə Sənan Paşayev

Sənan Paşayev

Naxçıvan Muxtar Respublikasına (MR) yeni prokuror müavini təyin olunduğu bildirilir.

NUHÇIXAN İnformasiya Agentliyinin xəbərinə görə, bununla bağlı baş prokuror Kamran Əliyev əmr imzalayıb.

Xəbərdə bildirildiyinə görə, Sənan Paşayev Naxçıvan MR prokurorunun müavini təyin olunub.

Məlumatın Baş Prokurorluğun mətbuat xidmətindən də təsdiqləndiyi qeyd edilir.

Sənan Paşayev indiyədək Azərbaycan Baş Prokurorluğunda İstintaq idarəsinin rəis müavini vəzifəsində çalışıb.

Onun adı bir sıra müxalifətçi və jurnalistlərlə bağlı cinayət işlərinin istintaqında tez-tez hallandırılıb.

Naxçıvan MR prokurorunun müavini Məhərrəm Talıbovun öz ərizəsi ilə prokurorluq orqanlarında qulluq keçməsinə xitam verildiyi açıqlanıb.

Vasif Talıbova aid olduğu deyilən şirkətə qarşı etiraz aksiyası: 'Kompensasiyamızı verin!'
Gözlə

No media source currently available

0:00 0:03:18 0:00

Məhərrəm Talıbov vəzifədən gedib

Naxçıvan Muxtar Respublikası prokurorunun müavini Məhərrəm Talıbov vəzifəsindən azad olunub.

Bu barədə məlumatı Azərbaycan Baş Prokurorluğundan “Turan” agentliyinə təsdiqləyiblər:

“Baş Prokurorluğun Mətbuat xidmətinə daxil olmuş sorğuya cavab olaraq bildirilir ki, Naxçıvan MR prokurorunun müavini Məhərrəm Talıbovun öz ərizəsi ilə prokurorluq orqanlarında qulluq keçməsinə xitam verilmişdir.”

Məhərrəm Talıbovun özü ilə isə, hələlik, işdən getməsi ilə bağlı danışmaq mümkün olmayıb. O, Naxçıvan MR Ali Məclisinin sabiq sədri Vasif Talıbovun qardaşıdır.

Nehrəm camaatı: 'Səsini çıxaranı polisə, DTX-ya aparıb döyürdülər'
Gözlə

No media source currently available

0:00 0:04:42 0:00

Ötən həftə, dekabrın 21-də Naxçıvan Ali Məclisinin sədri Vasif Talıbovun istefası qəbul edilib. O 27 il idi ki, həmin vəzifədə çalışırdı.

Ali Məclis sədrinin səlahiyyətlərini hazırda MR Ali Məclisi sədrinin birinci müavini Azər Zeynalov yerinə yetirir. Vasif Talıbov işdən getməsi ilə bağlı ərizəsini səhhəti ilə izah edib.

Dekabrın 22-də də dövlət başçısı İlham Əliyev Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi haqqında fərman imzalayıb.

Onun digər sərəncamıyla Naxçıvanda Azərbaycan prezidentinin səlahiyyətli nümayəndəsi təyin edilib.

Bu şəxs paytaxt Bakıdan göndərilən Fuad Vahid oğlu Nəcəfli olub. Naxçıvan Ali Məclisinin sədri vəzifəsi isə, hələlik, boşdur.

Bir neçə həftə əvvəl isə MR-da bəzi vəzifəli şəxslər mənimsəmə ittihamı ilə həbs edilib. Onların ittihama münasibəti bəlli deyil.

İranla sərhəddə atəş səsləri

Ümumi çəkisi 170 kiloqram 106 qram narkotik vasitə aşkar olunaraq götürülüb.

İranla sərhəddə 170 kq narkotik götürüldüyü bildirilir. Bu barədə bu gün, dekabrın 30-da Azərbaycan Dövlət Sərhəd Xidməti (DSX) məlumat yayıb.

Məlumata görə, dekabrın 29-da saat 02:00 radələrində Yardımlı rayonunun Perimbel kəndi, saat 14:30-da isə Daşkənd kəndi yaxınlığında İrandan Azərbaycana narkotik keçirilməsinin qarşısı alınıb.

DSX-nin bildirməsinə görə, sərhəd pozucuları hər iki halda odlu silahdan atəş açaraq sərhədçilərin həyatına təhlükə yaradıblar: "Sərhəd naryadı xəbərdarlıq məqsədilə silahdan istifadə edib. Sərhəd pozucuları üzərindəki bağlamaları ataraq geriyə, İran ərazisinə qaçmağa müvəffəq olublar".

Məlumata görə, hər iki istiqamət üzrə keçirilmiş əməliyyat-axtarış tədbirləri nəticəsində ümumi çəkisi 170 kiloqram 106 qram narkotik vasitə aşkar olunaraq götürülüb.

Bu məlumata, hələlik, İranın rəsmi qurumlarından münasibət almaq mümkün olmayıb.

Xatırlatma

Baş nazirinin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədri Əli Əhmədov bu yaxınlarda demişdi ki, bu ilin 10 ayında xarici ölkə mənşəli narkotik vasitələrin təxminən 95 faizindən çoxu İran ərazisindən qaçaqmalçılıq və digər qanunsuz yollarla Azərbaycana gətirilib. "Həyata keçirilmiş kompleks əməliyyat-axtarış tədbirləri nəticəsində ümumilikdə 9 min 564 cinayət faktı aşkarlanıb, qanunsuz dövriyyədən 5 ton 62 kq kiloqramdan artıq narkotik vasitə və psixotrop maddə müsadirə edilib", - o qeyd eləmişdi.

Əvəz Zeynalının həbs müddəti uzadılıb

Əvəz Zeynallı

Dekabrın 29-da Bakının Binəqədi Rayon Məhkəməsi jurnalist Əvəz Zeynallının barəsində seçilmiş həbs-qətimkan tədbirinin üç ay uzadılması ilə bağlı istintaqın vəsatətini təmin edib.

Bu barədə onun vəkili Fəxrəddin Mehdiyev məlumat verib:

“Məhkəmə ilkin olaraq Əvəz Zeynallı barəsində 4 ay müddətinə həbs qətimkan tədbiri seçib. Bu müddət yanvarın 8-də başa çatır. Buna görə istintaq həbs müddətinin daha 3 ay uzadılması barədə vəsatət irəli sürüb.”

Müdafiə tərəfi həbs müddətinin uzadılmasının əleyhinə olub.

“Xahiş etdik ki, heç olmasa ev dustaqlığı ilə kifayətləsinlər. Lakin məhkəmə bizim vəsatətimizi təmin etmədi”, - deyə vəkil bildirib.

Vəkilin sözlərinə görə, jurnalistin səhhətində problemlər yaranıb.

Üstəlik, o, şəkər xəstəliyindən şikayətlənir. “Əvəz Zeynallının gözündə katarakt var. Deməsinə görə, dərmanlar kömək etmir, cərrahi əməliyyat lazımdır”, - deyə vəkil bildirib.

Bu açıqlamaya, hələlik, Penitensiar Xidmət və başqa rəsmi qurumlardan münasibət almaq mümkün olmayıb.

Xatırlatma

Vəkil Elçin Sadıqov və “Xural TV” saytının təsisçisi Əvəz Zeynallı bu il sentyabrın 10-da rüşvət iddası ilə saxlanılıblar. Sentyabrın 11-də məhkəmə hər ikisini həbs edib.

Sentyabrın 17-də Bakı Apellyasiya Məhkəməsi Sadıqovu ev dustaqlığına keçirib.

Əvəz Zeynallı Cinayət Məcəlləsinin 311.3.3-cü (külli miqdarda rüşvətalma) Elçin Sadıqov isə rüşvətə köməklikdə ittiham edilib.

Sentyabrın 21-də isə Əvəz Zeynallıya qarşı Cinayət Məcəlləsinin 312-1 (vəzifəli şəxsin qərarına qanunsuz müdaxilə göstərmə - nüfuz alveri) maddəsi ilə əlavə ittiham irəli sürülüb.

Onlar ittihamları qəbul etmirlər.

Davamı

XS
SM
MD
LG