Azərbaycan xəbərləri
İmran Əliyev işgəncələrə məruz qaldığını deyir
Aprelin 24-də Bakı Apellyasiya Məhkəməsi meclis.info saytının təsisçisi İmran Əliyev barəsində 2 ay müddətinə həbs-qətimkan tədbiri seçilməsi ilə bağlı məhkəmə qərarından verilən şikayəti təmin etməyib.
İ.Əliyev Cinayət Məcəlləsinin 206.3.2-ci (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ilə ittiham edilərək həbs olunub. O, ittihamı əsasız və qurama sayır.
İ.Əliyevin yaxınları bildiriblər ki, aprelin 19-da o, Xətai rayon Məhkəməsində (həmin gün haqqında həbs qərarı verilib) Bakı Baş Polis İdarəsində işgəncəyə məruz qaldığını deyib.
Yaxınları əlavə edir ki, Əliyevin vurğulamasına görə, məhkəmədən sonra o, Xətai rayon Polis İdarəsinə aparılıb, orada isə işgəncələrdən şikayət etdiyi üçün yenidən döyülüb: "Deməsinə görə, daha sonra onu hansısa sənədi imzalamağa məcbur ediblər".
Yaxınlarının iddiasına görə, İ.Əliyevin bədənində zorakılıq izləri görünür.
DİN yalanlayır
"Turan"ın xəbərinə görə, Daxili İşlər Nazirliyi (DİN) mətbuat xidmətinin əməkdaşı İbrahim Əmiraslanlı bütün bu deyilənləri "əsassız iddialar, şəxsi mülahizələr" adlandırıb.
+++
Aprelin 19-u Xətai Rayon Məhkəməsində meclis.info platformasının rəhbəri İmran Əliyev barəsində 2 ay 1 gün müddətinə həbs-qətimkan tədbiri seçilib.
***
meclis.info platformasının dünən, aprelin 18-də saxlanan rəhbəri İmran Əliyevə Cinayət Məcəlləsinin 206.3.2-ci (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsi ilə ittiham elan olunduğu bildirilir.
Bu barədə onun yaxınları məlumat verib.
Hazırda onun Xətai rayon Məhkəməsinə aparıldığı deyilir.
Yaxınlarının əlavə etməsinə görə, o, "AbzasMedia işi" üzrə təqsirləndirilən şəxs kimi cəlb olunub. İ.Əliyev ona qarşı irəli sürülən ittihamı qəbul etmir
Son aylar Azərbaycanda aralarında "AbzasMedia" nəşrinin, "Toplum" internet televiziyasının əməkdaşlarının da olduğu 20-ə yaxın jurnalist və ictimai fəal həbs edilib. Onlara qarşı, əsasən, qaçaqmalçılıq ittihamı irəli sürülüb. Amma onlar bu ittihamı peşə fəaliyyətləri ilə bağlı, qurama və siyasi sayırlar. Rəsmilər isə ölkədə heç kimin sırf peşə fəaliyyətinə görə həbs edilmədiyini vurğulayaq siyasi həbslərlə də bağlı deyilənləri əsassız sayırlar.
"AbzasMedia işi"ndə öncə saytın direktoru Ülvi Həsənli, direktor müavini olduğu bildirilən Məhəmməd Kekalov, baş redaktoru Sevinc Vaqifqızı həbs edilmişdi. Daha sonra bu işə aid həbslər jurnalistlər Hafiz Babalı, Nərgiz Absalamova və Elnarə Qasımova ilə davam edib.
meclis.info platformasının rəhbəri İmran Əliyev saxlanıb
O özü aprelin 18-i axşam saatlarında Bakı hava limanında saxlandığı haqqında açıqlama yayıb. Vurğulamasına görə, aprelin 18-də bəzi media orqanlarında onun barəsində yayılan məlumatlardan sonra təhlükəsizliyi ilə bağlı Türkiyəyə getməyə qarar vermişdi.
İ.Əliyevin yaxınları da deyirlər ki, onu axşam saatlarında Heydər Əliyev adına hava limanında Dövlət Sərhəd Xidmətinin əməkdaşları saxlayıb.
Sonra İ.Əliyevin qara maskalı şəxslərə təhvil verildiyi iddia edilir.
Bu deyilənlərlə hüquq-mühafizə orqanlarından münasibət öyrənmək mümkün olmayıb.
meclis.info parlamentin fəaliyyətini monitorinq edən platformadır.
Aprelin 18-də bəzi media orqanlarında yer alan iddialara görə, meclis.info platformasının rəhbəri İ.Əliyev və bəzi başqa şəxslər maliyyə nəzarətindən yayınmaq üçün xarici ölkələrə məxsus adsız bank kartlarından istifadə ediblər. İddialara görə, xaricdən onlara ötürülən vəsaitlərin bir qismini bu kartlar vasitəsilə nağdlaşdırıblar.
İ.Əliyev özü bu iddiaları rədd edib.
Bütün xəbərləri izləyin
İki AXCP üzvünün 'söhbətinə' məhkəmədə baxılır
Azərbaycan Xalq Cəbhəsi Partiyası (AXCP) Qaradağ rayon şöbəsinin sədri Zaur Əsgərov və Binəqədi şöbəsinin keçmiş üzvü Gündüz Mirzəyev dövlət əleyhinə çağırışlar ittihamıyla mayın 15-də məhkəmə önünə çıxarılıblar. Bu işə Bakı Ağır Cinayətlər Məhkəməsində Azər Tağıyevin sədrlik etdiyi hakimlər kollegiyası baxır.
Məhkəmədə prokurorun elan etdiyi ittiham aktından aydınlaşıb ki, Z.Əsgərov və G.Mirzəyev sosial şəbəkəkərdə, “WhatsApp” kimi ani mesajlaşma sistemində yaradılmış qruplarda yazdıqlarına görə həbs ediliblər. Onlar “Azərbaycan Naminə Birlik", “AXCP-nin dostluq qrupu” adlı qruplarda hakimiyyəti ələ keçirmək, itaətsizlik göstərmək kimi fikirlər yazmaqda, dövlət əleyhinə açıq çağırışlarda suçlanırlar.
“Hakimiyyəti zorla ələ keçirmək söhbəti olmayıb”
Z.Əsgərov bu ittihamla razılaşmır və özünü təqsirli bilmir. AXCP fəalı ittihama münasibət bildirəndə vurğulayıb ki, olsa-olsa, sosial şəbəkələrdəki söhbətlərdə təhqir xarakterli ifadələr işlətdiyinə görə peşmandır və bu səbəbdən üzr istəyir.
Digər təqsirləndirilən G.Mirzəyevlə yaxın münasibəti olmadığını, bir dəfə 10 dəqiqəlik söhbətləşdiklərini deyən cəbhəçinin sözlərinə görə, sosial şəbəkələrdəki qruplarda da yaşayış səviyyəsi, həyat tərzi barədə söhbət ediblər: “Mən bazarda işləyən adam olmuşam. Günümün çoxu da orada keçirdi, heç sosial şəbəkələrə vaxtım olmurdu. Bizim söhbətlərdə dövlət əleyhinə çağırış, hakimiyyəti zorla ələ keçirmək söhbəti olmayıb”.
Z.Əsgərov vurğulayıb ki, seçkini hakimiyyət dəyişikliyinin tək yolu sayır.
G.Mirzəyev isə özünü təqsirli bilib, peşman olduğunu dilə gətirib. O vurğulayıb ki, cinayət işində istinad edilən səs yazıları 2020-ci ilə aiddir:
“Mən sosial ədalətin bərpasını istəmişəm, lakin terrorçuluğa çağırış eləməmişəm. Bəli, gərgin vəziyyətdə müəyyən ifadələr işlətmişəm. Buna görə peşmanam. Amma bizim Zaur Əsgərlovla zorla hakimiyyəti ələ keçirmək istiqamətində söhbətimiz olmayıb”.
G.Mirzəyev partiyadan istefa verdiyini, bağışlanması üçün prezidentə müraciət etdiyini də sözlərinə əlavə edib.
Məhkəmə prosesi mayın 22-də davam edəcək.
Xatırlatma
Gündüz Mirzəyev və Zaur Əsgərov bu il martın 7-də saxlanılıblar. Onlara Cinayət Məcəlləsinin 281.2-ci (dövlət əleyhinə açıq çağırışlar, təkrar və ya bir qrup şəxs tərəfindən törədildikdə) maddəsilə ittiham verilib. Bu maddədə 5 ildən 8 ilədək həbs cəzası nəzərdə tutulub.
Martın 29-da AXCP G.Mirzəyevin partiya üzvlüyündən çıxarıldığını açıqlayıb.
AXCP-dən bildirilib ki, hazırda partiyanın, azı, 15 nəfər üzvü həbsdədir. Onlar özlərini təqsirli bilmir, siyasi baxışlarına görə sifarişlə həbs olunduqlarını deyirlər.
Hökumət təmsilçiləri isə ölkədə heç kimin siyasi motivlərlə təqib olunmadığını, həbs olunanların konkret faktlara görə saxlandığını bildirirlər.
Teymur Kərimovun həbs müddəti 1 il azaldıldı
"Kanal11" internet televiziyasının rəhbəri Teymur Kərimovun həbs müddəti azaldılıb. Mayın 15-də Bakı Apellyasiya Məhkəməsi onun vəkilinin verdiyi vəsatəti qismən təmin edib və Kərimovun cəzası 8 ildən 7 ilə endirilib.
T.Kərimov 2023-cü ilin dekabrından həbsdədir. Bakı Ağır Cinayətlər Məhkəməsinin hökmü ilə ona 8 il həbs cəzası kəsilib. Üstəlik, əlavə cəza kimi ona 2 il də jurnalist fəaliyyəti ilə məşğul olmaq yasaqlanıb. T.Kərimovla birlikdə mühakimə edilən reportyor İstək Totiyevaya isə şərti cəza verilib.
Onlar Cinayət Məcəlləsinin 182-ci (hədə-qorxu ilə tələb-etmə) maddəsi ilə - saytdan materialın silinməsi üçün Fərrux Ələkbərov adlı şəxsdən 10 min manat tələb edib sonda min manat almaqda təqsirli biliniblər. T.Kərimov bunu yalan sayır, F.Ələkbərovdan pul tələb edib almadığını deyir. O, etiraz aksiyalarını, vətəndaş hüquqlarının pozulması hallarını, özəlliklə polislərin Qarabağ müharibəsi veteranlarını döyməsini çəkib yaydığına görə sifarişlə həbs edildiyini vurğulayır. Jurnalist işgəncəyə məruz qaldığını, hətta zorlanmaqla hədələndiyini də məhkəmədə dilə gətirib. Daxili İşlər Nazirliyinin mətbuat xidməti T.Kərimovun hədələnməsi, işgəncəyə məruz qalması haqda iddiaları rədd edib.
Xatırlatma
2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq və başqa ittihamlarla həbs edilib. Onlar ittihamla razılaşmır, bunu peşə fəaliyyətləri və siyasi sifarişlə izah edirlər.
Yerli hüquq-müdafiə təşkilatlarının hazırladığı siyahılara görə, indi Azərbaycan həbsxanalarında 350-dən çox siyasi məhbus var. Rəsmilərsə, bir qayda olaraq, vurğulayırlar ki, ölkədə heç kim peşə fəaliyyəti ilə bağlı, siyasi əsaslarla həbs edilmir.
Yaxınları Elvin Mustafayevin taleyindən narahatdırlar
Yaxınları "İşçi Masası" Həmkarlar İttifaqları Konfederasiyasının həbsdə olan üzvü Elvin Mustafayevdən bir həftədən çoxdur xəbər ala bilmir.
Bu barədə mayın 14-də "İşçi Masası" məlumat yayıb.
Bildirilir ki, Mustafayev saxlanıldığı 3 saylı Cəzaçəkmə Müəssisəsində məhbusların hüquqlarının pozulmasına, həmçinin siyasi məhbusların azad edilməsinə görə mayın 6-da aclıq aksiyasına başlayıb: "Bundan sonra ona təzyiqlər edilib və saxlanıldığı yer dəyişdirilib, lakin hazırda hansı müəssisədə saxlanıldığından xəbər yoxdur".
Yaxınlarının onun səhhətindən narahat olduqları vurğulanır.
Bu məlumata, hələlik, Penitensiar Xidmət və başqa rəsmi qurumlardan münasibət almaq mümkün olmayıb.
E.Mustafayev 2023-cü ilin avqustunda narkotik maddələrin satışında ittiham olunaraq saxlanılıb. 2024-cü il yanvarın 31-də Bakı Ağır Cinayətlər Məhkəməsi onu 3 il müddətinə azadlıqdan məhrum edib. Mustafayev ittihamı rədd edib və bunu onun "İşçi Masası"ndakı fəaliyyəti ilə əlaqələndirib: "Marketdən çıxanda dörd nəfər zorbalıqla mənə hücum etdi. Dərhal telefonumu götürdülər. Məni idarəyə gətirdilər. Dedilər ki, bunu boynuma götürməsəm, üzümə qadın qoyub, zorlama ilə ittiham edəcəklər. Yaxud "İran agenti" ittihamı ilə həbsə göndərəcəklər...".
2022-ci ildə yaradılan "İşçi Masası" Həmkarlar İttifaqları Konfederasiyasının dörd üzvü – sədr Afiəddin Məmmədov, üzvləri Ayxan İsrafilov, Elvin Mustafayev və Möhyəddin Orucov hazırda həbsdədir. Onlar müxtəlif ittihamlarla üzləşsələr də, ittihamların hamısını qurama, siyasi sayırlar.
Xatırlatma
Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təxminən 350 siyasi məhbus var. Rəsmilər ölkədə siyasi motivli həbslərin olmadığını deyirlər. Onların vurğulamasına görə, siyasi məhbus siyahılarında yer alan şəxslər sırf törətdikləri əməllərlə bağlı mühakimə ediliblər. Amma beynəlxalq insan haqları qurumları, ABŞ Dövlət Departamenti, Bakıdakı bir qrup Qərb diplomatı hökuməti haqsız tutulanları azad etməyə, müstəqil mediaya, vətəndaş cəmiyyətinə basqıları dayandırmağa çağırıb.
Hacı Vəliyevin 'karser'ə salındığı deyilir
"Gənc Qazilər" Birliyinin həbsdə olan sədri Hacı Vəliyevin keçən həftənin dördüncü günü, mayın 8-də cərimə kamerasına (karser) salındığı bildirilir.
Yaxınlarının bildirməsinə görə, bu barədə məlumatı bu gün, mayın 14-də H.Vəliyevlə bağlı vəsatətin baxıldığı Xətai rayon Məhkəməsində öyrəniblər.
Yaxınlarının vurğulamasına görə, buna onun "mən qaziyəm yaralarım ağrıyır" deyə göz ağrılarından həkimə şikayətini bildirəndə mübahisə yaranması səbəb olub: "Hacı Vəliyevi üç gün cərimə kamerasında saxlayıblar. Pensiya və prezident təqaüdü kartını bloklayıblar".
Bildirildiyinə görə, Vəliyev məhkəmədə deyib ki, ictimai fəaliyyətinə görə sifarişlə həbs olunub.
Hələlik, bu məlumata Penitensiar Xidmət və başqa rəsmi qurumlardan münasibət almaq mümkün olmayıb.
'Gənc Qazilər' Birliyinin sədri Hacı Vəliyev həbsdə qaldı
Bu gün, mayın 14-də "Gənc Qazilər" Birliyinin sədri Hacı Vəliyev barəsində olan həbs-qətimkan tədbirinin dəyişdirilməsi ilə bağlı vəsatətə baxılıb.
Xətai rayon Məhkəməsində keçirilən prosesdə müraciət təmin edilməyib və H.Vəliyev həbsdə saxlanıb.
Müdafiə tərəfi bu vəsatətin verilməsini H.Vəliyevin səhhətindəki problemlərlə izah etmişdi. Qərardan apellyasiya şikayəti veriləcəyi bildirilir.
12 may
Hacı Vəliyev göz institutuna göndərilməsini istəyir
"Gənc Qazilər" İctimai Birliyinin (İB) həbsdə olan sədri Hacı Vəliyev bildirib ki, göz institutunda müalicə və müayinəsinə ehtiyacı var. Bu barədə Birliyin yaydığı açıqlamada qeyd edilir.
Açıqlamaya görə, H.Vəliyev ailə üzvlərinə deyib ki, gözünün yeri irinləməyə başlayıb, saxlandığı yerdə gözünü dezinfeksiya etmək üçün yetərli tibbi yardıma şərait yoxdur.
Hələlik, bu məlumata rəsmi qurumlardan münasibət almaq mümkün olmayıb.
Hacı Vəliyevin xəstəxanaya aparıldığı bildirilir
Həbsdə olan "Gənc Qazilər" İB sədri Hacı Vəliyevin həkim müayinəsi üçün 1 saylı Respublika Psixiatriya Xəstəxanasına aparıldığı bildirilir.
Bu barədə məlumatı onun yaxınları yayıb.
Onların vurğulamasına görə, Vəliyev ailə üzvlərinə bildirib ki, havaya çıxa bilmir, gözləri ağrıyır.
"Saxlanılma yerində isə müalicə və müayinəsini həyata keçirmək üçün həkim ayrılmayıb. Onun reabilitasiya mərkəzində müalicəyə ehtiyacı var", - onun yaxınları bildiriblər.
Hələlik, bu məlumata rəsmi qurumlardan münasibət almaq mümkün olmayıb.
Bir müddət əvvəl isə sosial şəbəkələrdə onun xəsarət alan gözündə əlavə problemlər yarandığı açıqlanmışdı.
H.Vəliyev barəsində aprelin 1-də Xətai rayon Məhkəməsində 22 gün müddətinə həbs-qətimkan tədbiri seçilmişdi. Aprelin 18-də bu müddət daha iki ay artırılıb. Onun Cinayət Məcəlləsinin 221.3-cü (Silahdan və ya silah qismində istifadə olunan əşyalardan istifadə edilməklə xuliqanlıq...) və 186.1-ci (Özgənin əmlakını qəsdən məhv etmə və ya zədələmə - zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunduğu bildirilir. Amma onun ittihamları qəbul etmədiyi vurğulanır. Həmin maddələrlə şəxsə 5 ilə qədər həbs cəzası verilə bilər.
H.Vəliyev sosial şəbəkələrdə tənqid çıxışları ilə də tanınırdı. Onun bundan əvvəl də saxlanıb sərbəst buraxıldığı bildirilmişdi. O, xüsusilə İkinci Qarabağ müharibəsindən sonrakı dövrdə döyüşlərdə sağlamlığını itirmiş hərbçilərin və ya həlak olanların ailələrinin problemlərini ictimailəşdirib.
"Gənc Qazilər" Birliyi 2021-ci ildə "Qarabağ Qaziləri" İctimai Birliyinin əsasında yaradılıb.
Uitkoff: Azərbaycan-Ermənistan münaqişəsinin həllinə çox yaxınıq
ABŞ prezidenti Donald Trampın Yaxın Şərq üzrə xüsusi nümayəndəsi Stiv Uitkoff Azərbaycan və Ermənistan arasında münaqişənin yekun həllinin çox yaxın olduğunu deyib.
Xüsusi nümayəndə Uitkoff bu barədə ABŞ-nin "Breitbart" xəbər saytına müsahibəsində danışıb: "Azərbaycan və Ermənistanla bağlı biz inanırıq ki, münaqişənin yekun həllinə – son razılaşmaya çox, çox yaxınlaşmışıq".
Trampın Yaxın Şərq üzrə xüsusi nümayəndəsi Bakı və Yerevanın "Abraham Sazişi"nə qoşula biləcəyi ehtimalına da toxunub.
"İnanıram ki, hər ikisi (Azərbaycan və Ermənistan) "Abraham Sülh Sazişi"nə qoşulmağa hazır ola bilər. Bu, prezident Donald Tramp üçün böyük təşəbbüsdür. O, buna inanır. Bu, ümumilikdə regionda sülh və sabitliyə kömək edir", - o əlavə edib.
ABŞ rəsmisi, həmçinin yaxın gələcəkdə bir sıra ərəb ölkələrinin də İsraillə münasibətlərin normallaşdırılmasına yönəlmiş "Abraham Sazişi"nə qoşulacağına ümid etdiyini qeyd edib. "Mənim proqnozum odur ki, nisbətən yaxın gələcəkdə Livan və hətta Suriya da "Abraham Sazişi"nə qoşula bilər", - Uitkoff bildirib.
Xatırlatma
Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olmuşdu. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilmişdi. 2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
Son illər iki ölkə arasında müxtəlif formatlarda danışıqlar aparılsa da, hələlik, sülh sazişi imzalanmayıb. Bununla belə, tərəflər bu yaxınlarda saziş üzrə bütün maddələrin razılaşdırıldığını açıqlayıblar.
UNICEF də Azərbaycandan gedir
Birləşmiş Millətlər Təşkilatının (BMT) Beynəlxalq Fövqəladə Uşaqlara Yardım Fondunun (UNICEF) Azərbaycandakı nümayəndəliyi fəaliyyətini növbəti aylarda mərhələli şəkildə dayandıracaq.
Bu barədə məlumatları UNICEF-in Avropa və Mərkəzi Asiya üzrə Kommunikasiya İdarəsinin regional rəhbəri İrina Mazur AzadlıqRadiosuna təsdiq edib.
O bildirib ki, bundan sonra UNICEF Azərbaycandakı tərəfdaşlarla əməkdaşlığı regional ofisi və baş qərargahı vasitəsilə davam etdirəcək.
Artıq bu məlumatlar Azərbaycanda bir çox sosial şəbəkə istifadəçilərinin narazılığı ilə müşahidə edilir. Onlar vurğulayırlar ki, Azərbaycanda onsuz da uşaq ölümləri yüksəkdir. Həmin şəxslərin narahatlıqlarına görə, UNICEF-in Azərbaycandakı fəaliyyətini növbəti aylarda mərhələli şəkildə dayandırması bu prosesə ancaq ziyan gətirəcək.
Yerli saytların məlumatına görə, rəsmi Bakı hələ martın əvvəlində BMT-nin dörd ofisinin - BMT İnkişaf Proqramı (UNDP), BMT Əhali Fondu (UNFPA), BMT-nin Qaçqınlar üzrə Ali Komissarlığı (UNHCR) və BMT Uşaq Fondunun (UNICEF) Azərbaycanda ofislərinin bağlanması təklifi ilə çıxış edib. Rəsmi Bakı hesab edir ki, "Azərbaycan artıq yardım qəbul edən dövlətdən qlobal gündəliyə töhfə verən bir ölkəyə çevrilib".
5 may
BMT Əhali Fondunun da Azərbaycandakı nümayəndəliyinin fəaliyyəti dayandırılıb
2025-ci ilin mayında Birləşmiş Millətlər Təşkilatının Əhali Fondu (UNFPA) da Azərbaycandakı nümayəndəliyinin fəaliyyətini başa çatdırıb. Bu barədə həmin qurumun məlumatında bildirilir.
Vurğulanıb ki, UNFPA bu ölkədəki 30 illik fəaliyyəti ərzində ana sağlamlığını yaxşılaşdırmaq, gender əsaslı zorakılıqla mübarizə aparmaq üçün hökumətə və digər tərəfdaşlara kömək etməkdə əsas rol oynayıb.
"UNFPA-nın Azərbaycanla əlaqələri Şərqi Avropa və Mərkəzi Asiya üzrə Regional Ofisi, eləcə də baş qərargahı vasitəsilə davam edəcək", - qurum qeyd edib.
Son illər Azərbaycanda həm ana, həm də uşaq ölümünün artdığı bildirilir. Üstəlik, yerli mediada, bir qayda olaraq, tez-tez gender əsaslı zorakılıqla bağlı şikayətlər eşidilir.
2 may
BMT İnkişaf Proqramının Azərbaycandakı nümayəndəliyi işini dayandırır
BMT-nin İnkişaf Proqramının (UNDP) Azərbaycandakı nümayəndəliyinin fəaliyyəti başa çatır.
Bu barədə məlumatı nümayəndəlikdən AzadlıqRadiosuna da təsdiqləyiblər.
"Bu gün (mayın 2-də) BMT-nin İnkişaf Proqramının Azərbaycandakı nümayəndəliyində son iş günüdür. Sabahdan etibarən fəaliyyət göstərməyəcəyik",- qurumdan bildirilib.
UNDP-nin Azərbaycanda nümayəndəliyi 1992-ci ilin payızında təsis edilib. İlk vaxtlarda qurumun Azərbaycandakı fəaliyyəti Dağlıq Qarabağ münaqişəsindən zərərçəkənlər üçün erkən bərpa proqramının həyata keçirilməsinə yönəlib. Zaman keçdikcə, onun Azərbaycandakı rolu ölkənin dəyişən ehtiyaclarına uyğun istiqamətlənib.
3 mart
Azərbaycanın BMT qurumları ilə əməkdaşlığında dəyişikliklər gözlənir
Martın 3-də Azərbaycan xarici işlər naziri Ceyhun Bayramov Bakıda BMT İnkişafı Əlaqələndirmə Ofisinin Avropa və Mərkəzi Asiya üzrə regional direktoru Qvi-Yop Sonu qəbul edərkən bu təşkilatın qurumları ilə yeni əməkdaşlıqdan bəhs edib.
Bu barədə Azərbaycan Xarici İşlər Nazirliyi (XİN) məlumat yayıb.
Bildirildiyinə görə, görüşdə vurğulanıb ki, Bakı BMT ilə əməkdaşlıqdakı prioritetlərini yeni dövrün reallıqlarına uyğun və onun resurslarından daha səmərəli istifadə edəcək şəkildə yenidən nəzərdən keçirir: "Bu xüsusda, bəzi BMT qurumları ilə bundan sonrakı tərəfdaşlığın milli prioritetlərə uyğun şəkildə layihə əsaslı əməkdaşlıq mexanizmi vasitəsilə davam etdiriləcəyi müqabil tərəfin diqqətinə çatdırılıb".
Əməkdaşlıqda yeni yanaşma "Azərbaycanın artıq yardım qəbul edən dövlətdən qlobal gündəliyə töhfə verən bir ölkəyə çevrilməsi" ilə əlaqəndirilib: "... BMT-nin Məskunlaşma Proqramı, BMT-nin Ətraf Mühit Proqramı, BMT-nin İqlim dəyişikliyi üzrə Çərçivə Konvensiyasının Katibliyi... ilə əməkdaşlığın prioritet təşkil etməsi və bəzi BMT qurumları ilə də gələcək əməkdaşlığın bu model əsasında, birbaşa mənzil qərargahları ilə işləməklə davam etdiriləcəyi qeyd olunub".
Xatırlama
Azərbaycan BMT-yə 33 il əvvəl, 1992-ci il martın 2-də qəbul edilib. Hələ bu il martın əvvəlində bir sıra sosial şəbəkə istifadəçiləri BMT-nin bəzi qurumlarının Azərbaycandan çıxarılacağı ilə bağlı iddialar yaymışdılar.
YAP üzvü 'Georgi lenti' və SSRİ bayrağına görə vəzifədən çıxarılıb
İmişli rayon Ağsaqqallar Şurasının sədri Saleh Səmədov "Georgi lenti" və SSRİ bayrağına görə vəzifədən çıxarılıb.
Bu barədə qərar mayın 13-də Azərbaycan Ağsaqqallar Şurası İdarə Heyətinin növbədənkənar iclasında verilib. Bu qurum bununla bağlı məlumatı da artıq öz saytında yayıb.
Məlumata görə, qurumun sədri Eldar Quliyev iclasda təəssüflə vurğulayıb ki, faşizm üzərində Qələbə günü münasibətilə mayın 9-da İmişlinin Sarıxanlı kəndində keçirilən tədbirdə S.Səmədov "SSRİ bayrağı altında", sinəsində "rus imperiyasının rəmzi" olan "Georgi lenti" ilə çıxış edib.
Əlavə edilib ki, müzakirələrdən sonra S.Səmədovun İmişli rayon Ağsaqqallar Şurasının sədri vəzifəsindən, o cümlədən Azərbaycan Ağsaqqallar Şurasının üzvlüyündən çıxarılması barədə qərar qəbul olunub.
S.Səmədovun hakim Yeni Azərbaycan Partiyasının (YAP) da üzvü olduğu bildirilir.
Modern.az-a açıqlamasında Milli Məclisin deputatı, YAP Təftiş Komissiyasının üzvü Elman Nəsirov deyib ki, İmişlidə baş verən bu hadisəni pisləyir: "...İstisna deyil ki, məsələyə dair Yeni Azərbaycan Partiyasının rəhbər orqanlarından olan Təftiş Komissiyası qiymət verə bilər".
Hələlik, qərara və tənqidlərə S.Səmədovun özündən ayrılıqda münasibət almaq mümkün olmayıb.
Amma o, yerli saytlara məsələ ilə bağlı fikirlərini bölüşüb. Həmin tədbir zamanı meydanda başqa bayraqların da olduğuna diqqət çəkən S.Səmədov sonra da vurğulayıb ki, "Azərbaycan bayrağı bizim hər zaman başımızın üstündədir".
Xatırlatma
Azərbaycan Ağsaqqallar Şurası SSRİ dönəmində, 1989-cu ildə təsis edilib. 1990-cı ildə isə dövlət qeydiyyatından keçərək rəsmi fəaliyyətə başlayıb. Şuranın ilk sədri Azərbaycan SSR Kommunist Partiyası Mərkəzi Komitəsinin keçmiş birinci katibi, akademik İmam Mustafayev olub.
Bu təşkilat Azərbaycan müstəqilliyinə qovuşduqdan sonra da fəaliyyətini davam etdirib. Təşkilata İ.Mustafayevdən sonra akademik Budaq Budaqov, deputat Fəttah Heydərov da rəhbərlik edib. Hazırda onun sədri keçmiş deputat, Azərbaycan Mərkəzi Kooperativlər İttifaqının (Azərittifaq) sədri, Kooperasiya Universitetinin rektoru Eldar Quliyevdir.
Azərbaycan sənayesində geriləmə davam edir
2025-ci ilin yanvar-aprel aylarında Azərbaycanda 21 milyard manatlıq və ya əvvəlki ilin eyni dövrü ilə müqayisədə 2.2 faiz az sənaye məhsulu istehsal edilib.
Bu barədə bu gün, mayın 13-də Dövlət Statistika Komitəsi (DSK) məlumat yayıb.
Məlumatda bildirilir ki, neft-qaz sektorunda məhsul istehsalı 3.4 faiz azalıb, qeyri neft-qaz sektorunda isə 5.3 faiz artıb.
Bu, Azərbaycanda sənaye istehsalının azalmasının davam etdiyini göstərir. Bu ilin iki ayında azalma 1.9 faiz açıqlanmışdı.
İqtisadçılar sənayedə geriləməni ölkədə neft hasilatının azalması ilə izah edirlər.
DSK-nın məlumatına görə, bu ilin üç ayında Ümumi Daxili Məhsul ( ÜDM) isə 0.9 faiz artıb. Açıqlamaya görə, 2025-ci ilin yanvar-aprel aylarında ölkədə 39 milyard 305.8 milyon manatlıq məhsul istehsal olunub.
DSK əlavə edir ki, 2025-ci ilin yanvar-aprel aylarında əsas kapitala 5 milyard 69.3 milyon manat, yaxud əvvəlki ilin müvafiq dövrü ilə müqayisədə 4.6 faiz az investisiya yönəldilib. Bu da neft-qaz sektoruna qoyulan investisiyanin azalması ilə izah edilir.
Əziz Orucov həbsdə qaldı
Bu gün, mayın 12-də "Kanal 13" internet televiziyasının həbsdə olan rəhbəri Əziz Orucovun barəsində olan hökmdən verilən apellyasiya şikayəti üzrə məhkəmə prosesi keçirilib.
Bakı Apellyasiya Məhkəməsində keçirilən prosesdə şikayət təmin olunmayıb və birinci instansiya məhkəməsinin qərarı qüvvədə saxlanıb.
Ə.Orucov 2023-cü il noyabrın 27-də icazəsiz evtikmə ittihamı ilə həbs olunub. Bir ay sonra – dekabrın 19-da ona əlavə valyuta qaçaqmalçılığı ittihamı da verilib. İstintaq yekunlaşarkən onun üzərindən qaçaqmalçılıq ittihamı götürülüb.
Bu il fevralın 26-da Səbail rayon Məhkəməsində hakim Günel Səmədovanın sədrliyi ilə keçirilən prosesdə ona 2 il həbs cəzası verilib. Jurnalist ittihamla razı deyil.
Xatırlatma
2023-cü ilin noyabrından Azərbaycanda "AbzasMedia", "Kanal 13", "ToplumTV", meclis.info, "MeydanTV" kimi çoxsaylı media orqanının 30-dan çox əməkdaşı, əsasən, qaçaqmalçılıq ittihamı ilə həbs olunub. Jurnalistlər ittihamları rədd edir, tənqidçi fəaliyyətlərinə görə cəzalandırıldıqlarını deyirlər. Bir çox hüquq müdafiəçilərinin hazırladığı siyahıya əsasən, Azərbaycanda hazırda 350 civarında siyasi məhbus var. Hökumət təmsilçiləri ölkədə heç kimin siyasi məqsədlərlə izlənmədiyini, həbs olunanların konkret cinayətlərə görə cəzalandırıldığını iddia edir.
Beynəlxalq insan haqları qurumları isə hökuməti haqsız tutulanları azad etməyə çağırır.
Bəşir Süleymanlının şikayətləndiyi məsələ həllini tapıb
Həbsdə olan hüquq müdafiəçisi Bəşir Süleymanlının şikayətləndiyi məsələ həllini tapıb. Bu barədə onun özü məlumat verib.
Yaxınlarının vurğulamasına görə, hüquq müdafiəçisi mayın 9-da onlara bildirib ki, saxlanma şəraitləri ilə bağlı şikayət həllini tapıb.
B.Süleymanlının daha əvvəl Kürdəxanıdakı istintaq təcridxanasında sıxlıqdan şikayətləndiyi bildirilmişdi.
Hələlik, məsələ ilə bağlı Penitensiar Xidmətlə danışmaq mümkün olmayıb.
Bəşir Süleymanlı saxlanma şəraitindən şikayətçidir
Həbsdə olan hüquq müdafiəçisi Bəşir Süleymanlı saxlanma şəraitindən narazıdır.
Bu haqda onun yaxınları bildiriblər. Onların deməsinə görə, B.Süleymanlı Kürdəxanıdakı istintaq təcridxanasında dördnəfərlik kamerada saxlanılır: "Bugünlərdə isə həmin kameraya bir nəfər də gətiriblər, bununla kamerada saxlanılanların sayı beş nəfər olub. Bu isə orada saxlanan şəxslərin yatması, sıxlıq və digər məsələlər ilə bağlı problemlər yaradıb".
Yaxınlarının vurğulamasına görə, məsələ ilə bağlı istintaq təcridxanasının rəhbərliyinə müraciət edilsə də, müraciət nəticəsiz qalıb.
Hələlik, bu şikayətə təcridxana rəhbərliyi və Penitensiar Xidmətdən münasibət almaq mümkün olmayıb. Amma buna qədər Xidmətdən oxşar şikayətləri, bir qayda olaraq, əsassız sayıblar.
Vətəndaş Hüquqları İnstitutunun rəhbəri B.Süleymanlı bu il martın 14-də vətəndaş cəmiyyətinin bir neçə təmsilçisi ilə birgə saxlanıb. Onlara qarşı Cinayət Məcəlləsinin 193-1.3.2-ci (cinayət yolu ilə əldə edilmiş xeyli miqdarda əmlakı leqallaşdırma), 308.2-ci (vəzifə səlahiyyətlərindən sui-istifadə etmə, ağır nəticələrə səbəb olduqda) və 313-cü (vəzifə saxtakarlığı) maddələri ilə ittiham irəli sürülüb. Həmin maddələrdə 12 ilədək həbs cəzası nəzərdə tutulub. Binəqədi rayon Məhkəməsinin qərarı ilə istintaq müddətində onlar haqqında 3 ay 28 günlük həbs-qətimkan tədbiri seçilib.
Baş Prokurorluğun İstintaq İdarəsində 2014-cü ildə bir sıra qeyri-hökumət təşkilatları ilə (QHT) bağlı cinayət işi açıldığı bildirilib. "QHT işi"nin sonradan bağlandığı bildirilsə də, bu ildən onun yeniləndiyi açıqlanıb.
Xatırlatma
B.Süleymanlı 2014-cü ilin mayında da "QHT işi" üzrə qanunsuz sahibkarlıq, vergidən yayınmada suçlanaraq 3 il 6 ay azadlıqdan məhrum edilmişdi. O zaman da bu ittihamları qəbul etməyən Süleymanlı 2015-ci ilin martında prezidentin əfv sərəncamı ilə azadlığa çıxmışdı. Həmin vaxt o, Seçkilərin Monitorinqi və Demokratiyanın Tədrisi Mərkəzinin (SMDT) icraçı direktoru idi. Bu qurum monitorinq apardığı zamanlar Azərbaycandakı seçkilərlə bağlı, əsasən, tənqidi hesabatlar dərc edib.
Son ilyarımda Azərbaycanda 40-a yaxın jurnalist, bloqer və ictimai fəal həbs olunub. Bəzi hüquq müdafiəçilərinə görə, hazırda Azərbaycanda 350-dən çox siyasi məhbus var. Azərbaycan rəsmiləri isə bunu qəbul etmirlər, onlar deyirlər ki, siyasi məhbus siyahılarında yer alanlar sırf törətdikləri əmələ görə məsuliyyətə cəlb olunublar.
600 min getmişdi, 300 min qayıtmışdı – indi cəmi 18-i sağ qalıb
Bu gün, mayın 9-u Azərbaycan və keçmiş SSRİ məkanında faşizm üzərində qələbənin 80 illiyi qeyd edilir. ABŞ və əksər Avropa ölkələrindən fərqli olaraq keçmiş SSRİ məkanında bu qələbə mayın 8-i yox, 9-da xatırlanır.
Hitler Almaniyasının hərbi rəhbərliyi 80 il öncə təslim olmaq haqqında saziş imzalayıb.
1939-cu ildə faşist Almaniyasının Polşanı işğal etməsi ilə İkinci Dünya müharibəsi başlayıb. 1941-ci il iyunun 22-də isə Hitler Almaniyası Azərbaycanın da daxil olduğu SSRİ-yə hücum edib. Bu müharibə 1945-ci il mayın 8-də başa çatıb. İkinci Dünya müharibəsi isə tam olaraq həmin ilin sentyabrında yekunlaşıb.
Müharibə nəticəsində 60 milyona yaxın insanın həlak olduğu bildirilir.
1941-1945-ci illərdə Azərbaycan SSR-in 3 milyon yarım əhalisindən 600 mindən çoxu cəbhəyə gedib, onlardan təqribən yarısının döyüşlərdə həlak olduğu açıqlanıb.
Müharibə illərində Azərbaycandan gedən 123 şəxs Sovet İttifaqı Qəhrəmanı adına layiq görülüb. 170 mindən çox əsgər, zabit müxtəlif orden və medallarla təltif edilib
Azərbaycan tarixçilərinin bildirdiklərinə görə, həmin illərdə Bakı cəbhəyə 75 milyon ton neft göndərib, benzin və sürtgü yağlarına olan tələbatın 75-90 faizini ödəyib.
Mayın 9-u Azərbaycanda da Qələbə Günü kimi qeyd olunur və rəsmi iş günü deyil.
Son (aprel) rəsmi məlumatlara görə, Azərbaycanda 18 İkinci Dünya müharibəsi veteranı yaşayır.
Əhməd Məmmədli həbs edildi
Bu gün, mayın 8-də Binəqədi rayon Məhkəməsində ictimai fəal, "Yoldaş media"nın təsisçisi Əhməd Məmmədli haqqında 4 aylıq həbs-qətimkan tədbiri seçilib.
Ə.Məmmədli Cinayət Məcəlləsinin 221.3 (xuliqanlıq... silahdan və ya silah qismində istifadə olunan əşyalardan istifadə edilməklə...) və 126.2.4 ( Qəsdən sağlamlığa ağır zərər vurma) maddəsi ilə ittiham olunur. Gənc fəal ittihamları qəbul etmir. O, hələ prosesdən öncə Binəqədi rayon Məhkəməsinə gətirilərkən deyib ki, "azad media susdurula bilməz".
Ə.Məmmədli hesab edir ki, onu təsisçisi olduğu "Yoldaş media"ya görə şərləyərək tutublar.
Həmin maddələrlə fəala 11 ilə qədər həbs cəzası verilə bilər.
6 may
İctimai fəal Əhməd Məmmədli saxlanıb
Mayın 6-da axşam saatlarında ictimai fəal Əhməd Məmmədli saxlanıb.
Bu barədə onun yaxınları məlumat verib. Vurğulanır ki, fəalı Binəqədi rayon Polis İdarəsinin əməkdaşları saxlayarkən, o zorakılığa məruz qalıb.
Məsələyə, hələlik, Daxili İşlər Nazirliyindən (DİN) münasibət almaq mümkün olmayıb.
Amma Azərbaycanın yerli saytlarının iddiasına görə, mayın 6-da saat 22 radələrində bir şəxsə Biləcəri qəsəbəsi, R.İsmayılov küçəsində qarın boşluğundan bıçaqla xəsarətlər yetirilib. Vurğulandığına görə, Ə.Məmmədli həmin məsələ ilə bağlı saxlanıb.
İctimai fəalın yaxınları isə Ə.Məmmədlinin şərləndiyini və belə bir ssenari düzəldildiyini bildiriblər.
Ə.Məmmədli 2022-ci ildə D-18 Hərəkatının (hərəkat 2023-cü ildə buraxılıb) sədri ikən polisin qanuni tələbinə qəsdən tabe olmama maddəsi ilə 30 sutka inzibati həbs edilmişdi. Ancaq o, həbsini sülhdən danışması, prezident İlham Əliyevi tənqid etməsi ilə əsaslandırmışdı.
Xalq Cəbhəsi üzvü həbs edilib
Azərbaycan Xalq Cəbhəsi Partiyasının (AXCP) üzvü Asam Əlinin 30 sutka inzibati qaydada həbs edildiyi bildirilir.
Bu barədə AXCP-dən məlumat yayıblar.
Partiyadan qeyd edilib ki, A.Əli ilə dörd gün əvvəldən əlaqələri kəsilib, nəhayət, mayın 8-də onun inzibati qaydada həbs olunduğunu öyrəniblər.
AXCP A.Əlinin nədə ittiham edildiyini və başqa detalları açıqlamayıb. Məsələni, hələlik, rəsmi qurumlardan da dəqiqləşdirmək mümkün olmayıb.
AXCP sədri Əli Kərimli isə vurğulayıb ki, A.Əli sosial şəbəkələrdə bir elə də fəal olmayıb: "Məsələ belədir ki, öz maşını ilə, ictimai əsaslarla mənə sürücülük edən AXCP fəalı Zaur Rzalı həbs edildikdən sonra Asam bəy məni öz maşını ilə bir neçə dəfə müxtəlif tədbirlərə aparmışdı. Bununla da rejimin qara siyahısına düşübmüş. Son iki ayda məni müxtəlif tədbirlərə aparan və ya müşayiət edən altı AXCP fəalı həbs olunub".
Z.Rzalı aprelin 1-də Nərimanov rayon Məhkəməsində 30 sutka həbs edilmişdi. O, İnzibati Xətalar Məcəlləsinin 510 (xırda xuliqanlıq) və 535.1-ci (Polis işçisi və ya hərbi qulluqçu ictimai qaydanın mühafizə vəzifələrini icra edərkən onların qanuni tələblərinə qəsdən tabe olmamaq) maddələri ilə təqsirli sayılıb. Partiyadan onun da şərləndiyi bildirilib.
Xatırlatma
Müxalifətdə olan AXCP-nin hazırda 15-ə yaxın üzvü uzunmüddətli həbsdədir. Üstəlik, bir çox fəalları inzibati qaydada həbs edilib. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Əli Kərimlinin mühafizəçisinin qardaşı da həbs edilib
Azərbaycan Xalq Cəbhəsi Partiyasının (AXCP) üzvü Rahil Quliyevin inzibati qaydada 30 sutka həbs edildiyi bildirilir.
Bu barədə AXCP-dən məlumat yayılıb.
Partiyadan bildirildiyinə görə, dünən, mayın 6-dan onunla əlaqə saxlamaq mümkün olmayıb: "Bu gün, mayın 7-də öyrəndik ki, Rahil Quliyev də 30 sutka müddətinə inzibati qaydada həbs olunub".
Amma AXCP-dən məsələnin detalları açıqlanmayıb.
R.Quliyev AXCP sədrinin hazırda 30 sutkalıq inzibati həbsdə olan mühafizəçisi Elnur Quliyevin qardaşıdır.
Hələlik, bu məlumatlara rəsmi qurumlardan münasibət almaq mümkün olmayıb.
9 aprel
AXCP fəalına 30 sutka verilib
Azərbaycan Xalq Cəbhəsi Partiyasının (AXCP) fəalı Elnur Quliyevə 30 sutka inzibati həbs verilib.
Bu barədə AzadlıqRadiosuna aprelin 9-da AXCP-dən bildirilib.
8 aprel
AXCP fəalının yeri bilinmir
Azərbaycan Xalq Cəbhəsi Partiyası (AXCP) fəalı Elnur Quliyevin yeri bilinmir. Partiyadan onun saxlandığı güman edilir.
AXCP sədri Əli Kərimli bildirib ki, E.Quliyev onun kütləvi tədbirlər zamanı ictimai əsaslarla mühafizəsində iştirak edən gənclərdəndir. Onun vurğulamasına görə, E.Quliyev bu gün, aprelin 8-i səhər onlara gəlməli idi: "Mühafizəçim Kənan Basqal həbs olunduğundan səhər saat 10-da Almaniya səfiri ilə görüşə gedərkən məni o müşayiət edəcəkdi. Elnur bəy təqribən saat 9:15-də artıq metronun "28 May" stansiyasından çıxmışdı və oradan bizim evə piyada gələcəkdi. Ancaq bir azdan Elnur Quliyevə zəng çatmadı... Əminliklə demək olar ki, Elnur Quliyevi də rejim oğurlayıb".
Hələlik, bu deyilənlərə Daxili İşlər Nazirliyi və başqa rəsmi qurumlardan münasibət almaq mümkün olmayıb.
Müxalifətdə olan AXCP-nin hazırda 15-ə yaxın üzvü həbsdədir. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Onlardan ikisi Ə.Kərimlinin mühafizəçisidir. Həmin şəxslərdən biri Niyaməddin Əhmədov terroru maliyyələşdirmə və başqa qanunsuz əməldə ittiham olunaraq 13 il azadlıqdan məhrum edilib. Ə.Kərimlinin başqa bir mühafizəçisi Kənan Basqal isə bu yaxınlarda başqa bir şəxsi bıçaqlama ittihamı ilə həbs olunub. Onlar da ittihamları qəbul etmirlər.
Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 350-dən çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
AXCP sədrinin daha bir mühafizəçisi həbs edilib
Müxalifətdə olan Azərbaycan Xalq Cəbhəsi Partiyası (AXCP) sədri Əli Kərimlinin mühafizəçisi Kənan İsmayılın inzibatı qaydada 30 sutka həbs edildiyi bildirilir.
Bu barədə AXCP-dən məlumat verilib. Partiyadan vurğulandığına görə, o, "xırda xuliqanlıq"da günahlandırılıb. Amma partiya məsələnin detallarını açıqlamayıb.
AXCP dünən, mayın 5-i günorta saatlarından Ə.Kərimlinin ictimai əsaslarla mühafizəçisi K.İsmayıl ilə əlaqənin kəsildiyini açıqlamışdı. Partiya onun saxlandığını ehtimal edirdi. "Artıq Əli Kərimlinin mühafizə xidmətindən dördüncü fəalı həbs edirlər", - partiyadan daha sonra qeyd edilib.
Hələlik, bu açıqlamalara Daxili İşlər Nazirliyi (DİN) və başqa rəsmi qurumlardan münasibət almaq mümkün olmayıb.
AXCP bir ay əvvəl, aprelin 9-da bildirmişdi ki, Ə.Kərimlini kütləvi tədbirlər zamanı ictimai əsaslarla mühafizəsində iştirak edən Elnur Quliyev də 30 sutka inzibati qaydada həbs olunub.
Müxalifətdə olan AXCP-nin hazırda 15-ə yaxın üzvü uzunmüddətli həbsdədir. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb.
Cinayət məsuliyyətinə cəlb edilənlərdən də ikisi Ə.Kərimlinin mühafizəçisidir. Həmin şəxslərdən biri Niyaməddin Əhmədov terroru maliyyələşdirmə və başqa qanunsuz əməldə ittiham olunaraq 13 il azadlıqdan məhrum edilib.
Ə.Kərimlinin başqa bir mühafizəçisi Kənan Basqal isə bu yaxınlarda başqa bir şəxsi bıçaqlama ittihamı ilə həbs olunub. Onlar da ittihamları qəbul etmirlər.
Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 350-dən çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
