İran rəsmiləri Tehranın bəzi yerlərində içməli su təchizatında fasilələrlə bağlı xəbərdarlıq ediblər. İllərlə çəkən quraqlıq ölkədə su böhranını dərinləşdirib.

Su xəbərdarlığı noyabrın 8-də səslənib. Bir gün öncə isə prezident Məsud Pezeşkian deyib ki, durum pisləşməyə davam etsə, İranın paytaxtı təxliyə oluna bilər.

"Suyun fasiləylə verilməsi daha öncə tətbiq olunmalıydı. Hazırda Tehranın suyunun 62 faizi yeraltı mənbələrdən gəlir və onların səviyyəsi düşüb", – İran Su Sənayesi Federasiyasının başçısı Rza Hacıkərim dövlət televiziyasında deyib.

Energetika naziri Abbas Əli Abadi bəyan edib ki, rəsmilər Tehranın bəzi rayonlarında su təchizatını mərhələ ilə məhdudlaşdırmağa hazırlaşırlar.

"Bu, müəyyən narahatlığa səbəb olsa da, israfın qarşısını almağa kömək edəcək", – Abadi dövlət televiziyasına bildirib.

Su sənayesinin sözçüsü İsa Bozorqzadənin dediyinə görə, vəziyyət elə bir mərhələyə çatıb ki, "istehlak həcminə məhdudiyyətlər tətbiq etməyə məcburuq".

"Əgər istehlak 10 faiz azaldılmasa, Tehranın davamlı su təchizatında pozuntular qaçılmaz olacaq", – o əlavə edib.

İranda su böhranının əsas səbəbi yağıntıların azalması, beş ildir davam edən quraqlıqdır.

Bəzi mütəxəssislər isə böhranı yeraltı su hövzələrindən aşırı asılılığı, kənd təsərrüfatında illərlə çəkən israfı, səmərəsiz idarəçiliyi də göstərirlər.

ABŞ Ümumdünya Səhiyyə Təşkilatından (ÜST) rəsmən çıxıb və təxminən 260 milyon dollarlıq borcunu ödəməyib. Xəbəri "Bloomberg" agentliyi yayıb.

Qurumdan çıxma prosesinin 2026-cı il yanvarın 22-də tamamlandığı bildirilir. ABŞ prezidenti Donald Tramp 2025-ci ilin yanvarında prezidentlik postuna keçən kimi ÜST ilə əlaqələri kəsməyə qərar verib, səbəb kimi qurumun COVID-19 pandemiyasına reaksiyasında səhvləri göstərib.

ABŞ Səhiyyə və Sosial Xidmətlər Nazirliyinin məlumatına görə, ÜST-nin təşəbbüslərinə bütün maliyyə və kadr dəstəyi dayandırılıb, amerikalılar qurumun bütün ofislərindən və qərargahından geri çağırılıb. ABŞ həmçinin təşkilatın rəhbər orqanlarında və işçi qruplarında iştirakını dayandırıb.

Konqresin 1948-ci il qətnaməsinə görə, təşkilatdan çıxmaq üçün ABŞ bir il əvvəl bildiriş verməli, bütün borcları ödəməlidir. ABŞ Səhiyyə və Sosial Xidmətlər Nazirliyinin yüksəkvəzifəlisi agentliyin jurnalistlərinə deyib ki, qanunda təşkilatdan çıxmadan öncə borcun ödənilməsi tələbi yoxdur.

"Verilən vədlər yerinə yetirilib. ÜST amerikalıların həyatını xilas edə biləcək vacib məlumatların vaxtında və dəqiq mübadiləsinə mane oldu, sonra bu uğursuzluqları "ictimai sağlamlıq maraqları" adı altında gizlətdi", – dövlət katibi Marko Rubio və səhiyyə naziri Robert Kennedinin bəyanatında vurğulanıb.

Bəyanatda ABŞ-nin ölkələrlə və "nüfuzlu səhiyyə qurumları" ilə işləyəcəyi vurğulanır.

Avropa İttifaqı (Aİ) İranın daxili işlər nazirinə, 14 digər aparıcı rəsmiyə etirazların zorakılıqla yatırdılmasındakı roluna görə sanksiyalar təklif edib. AzadlıqRadiosu bu haqda sənədləri görüb.

İranda dekabrın 28-də başlanan milli valyutanın kəskin ucuzlaşmasına etirazlar sonra rejimə qarşı nümayişlərə çevrilib, amma qanlı şəkildə yatırdılıb.

Aİ-nin xarici işlər nazirləri yanvarın 29-da Brüsseldə görüşəcəklər. Onlar İran rəsmilərinə qarşı aktivlərin dondurulması, viza qadağaları kimi tədbirlər tətbiq edə bilərlər.

Əsas hədəfdə daxili işlər naziri İsgəndər Mömini, İslam İnqilab Keşikçiləri Korpusunun (SEPAH) təhlükəsizlik bölmələridir. Onlar yüzlərlə etirazçının ölümündə günahlandırılırlar.

Baş prokuror Məhəmməd Müvəhhidi Azad nümayişçiləri iğtişaşlarda "Allaha qarşı ədavət" ittihamı ilə ölüm cəzasıyla hədələdəyinə görə sanksiyaya məruz qala bilər.

Ali baş komandan müavini olan Mömini isə "küçə etirazlarını boğan" qüvvələrə komandanlıq edib, - Aİ-nin sənədində deyilir.

ABŞ-də yerləşən HRANA insan haqları təşkilatı yanvarın 22-də 4 min 900-dən çox ölümün təsdiqləndiyini, onlardan 201-nin təhlükəsizlik qüvvələri olduğunu bildirib. 9 min 300-dən çox ölüm isə araşdırılır.

İspaniyanın cənub-şərqindəki Kartaxena şəhərində sərnişin qatarı tikinti kranına çırpılıb, bir neçə nəfər yaralanıb, birinin vəziyyəti ağırdır. Xəbəri TVE dövlət televiziyası yayıb.

Bazar günü Andalusiya regionunda sürət qatarlarının toqquşmasında azı 43 nəfər həlak olub.

Yanvarın 20-də isə Kataloniyada qatar qəzasında maşinist ölüb.

İspaniyanın "Adif X" dəmiryol operatoru sosial şəbəkəsində bildirib ki, bugünkü qəzanın baş verdiyi xətdə hərəkət dayandırılıb, səbəb "dəmir yoluna aid olmayan kranın infrastruktura müdaxiləsi"dir, amma əlavə detal açıqlanmayıb.

Rusiyada məktəblilərə dron yığmağı və onları idarə etməyi də öyrədəcəklər. Bu bacarıq "Vətənin təhlükəsizliyi və müdafiəsinin əsasları" (VTMA) fənnində öyrədiləcək. Əvvəllər fənn "Həyat təhlükəsizliyinin əsasları" kimi tanınırdı. Bu haqda "RİA Novosti" dövlət agentliyi yanvarın 21-də yazıb. Hökumətin təsdiqlədiyi VTMA fənni üzrə məktəb kabinetləri üçün avadanlıqlar siyahısı açıqlanıb.

"Mel" nəşrinə görə, təsdiqlənmiş siyahıya 90-dan çox müxtəlif avadanlıq və vəsait daxildir. Əsas siyahıda "Kalaşnikov" avtomatının və "Makarov" tapançasının maketləri, qumbara maketləri, təcili tibbi yardım vasitələri, əleyhqazlar, dozimetrlər, ümumqoşun mühafizə dəstləri, sanitar xərəklər, əsgər qazanı, çadırlar və gecəgörmə cihazları yer alır.

Əlavə tədris vasitələri siyahısına isə dronlar üzrə tədris-metodik material dəstləri, dronların hazırlanması üçün komplektlər, pilotaj üçün proqram-aparat kompleksi, dron-konstruktor, eləcə də aeroyarışlar üçün proqram təminatı salınıb.

Dronlardan Ukraynadakı müharibədə fəal istifadə olunur. Müharibə başlayandan sonra Rusiyada "Şahed" (Qeran) zərbə dronlarını genişmiqyaslı istehsal olunmağa başlanıb, prosesə yetkinlik yaşına çatmayanlar da cəlb olunub. Jurnalist araşdırmalarına görə, bu iş xüsusilə Tatarıstandakı "Alabuqa Politex" kollecində aparılır.

Yanvarın 20-də ABŞ hərbçiləri Venesuela sahilləri yaxınlığında "Sagitta" adlı tankeri ələ keçiriblər. Dekabrın əvvəlindən ABŞ Sahil Mühafizəsi Venesuela nefti ilə yüklənmiş, Vaşinqtonun sanksiyalarını pozan yeddinci tankeri saxlayır.

"The Associated Press" yazıb ki, "Sagitta" tankeri Liberiya bayrağı altında üzür, sahibi Honkonqdan bir şirkətdir. O, 2022-ci ildə Rusiyanın Ukraynaya müdaxiləsindən sonra ABŞ-nin sanksiyalarına məruz qalıb. Tankerin yerini göstərən transponder söndürülüb, sonuncu dəfə iki ay öncə Baltik dənizindən çıxanda aktivləşdirilib.

Tramp administrasiyasının təmsilçiləri dəfələrlə bəyan ediblər ki, onlar müsadirə olunan neftin satışından gəliri Venesuelanın neft infrastrukturunun bərpasına xərcləməyi planlaşdırırlar. Prezident Donald Tramp yanvarın 20-də bildirib ki, ABŞ artıq dünya bazarlarında satılan 50 milyon barel Venesuela nefti alıb, bu isə neft qiymətlərində "əhəmiyyətli" azalmaya səbəb olur.

Yanvarın 20-də axşam Kiyevdə Rusiyanın hücumları nəticəsində bir milyondan çox istehlakçı işıqsız qalıb. Bunu Ukrayna prezidenti Volodimir Zelenski açıqlayıb.

Prezident deyib ki, Kiyevdə 4 minə yaxın çoxmərtəbəli binada hələ də istilik yoxdur. Səhər saatlarında 5 min 600-dən çox binada istilik olmayıb, sonradan bəzilərində istilik təchizatı bərpa edilib.

Zelenski bildirib ki, elektrik enerjisinin istehsalını və istehlakını yenidən bölüşdürməklə bağlı tədbirlər müzakirə olunacaq. O, Ukrayna Hava Qüvvələrinin Rusiya dronlarını zərərsizləşdirməsi işini qənaətbəxş saymadığını bildirib. Bu mövzunu yeni müdafiə naziri Mixaylo Fyodorovla müzakirə etdiyini söyləyib.

Yanvarın 20-sinə keçən gecə Rusiyanın Ukraynaya 372 pilotsuz uçuş aparatı və raketlə hücum etdiyi bildirilir. Əsasən enerji obyektləri, Kiyevdəki infrastruktur vurulub. Ukraynanın digər bölgələrində də işıq kəsilib.

Beynəlxalq Atom Enerjisi Agentliyinin (IAEA) məlumatına görə, Rusiyanın kütləvi hücumunda Ukraynanın bir neçə elektrik stansiyası, nüvə təhlükəsizliyi üçün həyati əhəmiyyətli stansiyalar zərər görüb. Agentliyin rəhbəri Rafael Qrossi bildirib ki, Çernobıl Atom Elektrik Stansiyası tamamilə xarici enerji təchizatından kəsilib, digər atom elektrik stansiyalarına gedən xətlərə də ziyan dəyib.

+++

Yanvarın 21-də səhər Ukrayna dronlarının qalıqları Rusiyanın cənubundakı Krasnodar diyarında Afipski neft emalı zavodunda yanğına səbəb olub. Yerli fövqəladə hallar mərkəzinin məlumatına görə, xəsarət alan olmayıb, ziyan dəyməyib və yanğın söndürülüb.

Elə həmin gün Ukrayna dronları Rusiyanın cənubunda müxtəlif şəhərlərə zərbələr endirib, 11 nəfər yaralanıb və bir neçə sakin təxliyə edilib.

Afipski zavodu, əsasən, ixracyönümlüdür, son aylar Ukraynanın ardıcıl dron hücumlarına məruz qalıb.

Bu arada Moskva döyüş meydanında irəliləyir, Ukraynanın ciddi zərər görmüş enerji sisteminə qış kampaniyasını da gücləndirib.

Son günlərdə Gürcüstandan Rusiya, Çin və daha 14 ölkənin vətəndaşları deportasiya edilib. Məlumatı Gürcüstanın Daxili İşlər Nazirliyi məlumat yayıb. Gürcüstanın Miqrasiya Departamentinin ümumilikdə ölkədən 56 xarici vətəndaşı deportasiya etdiyi açıqlanıb.

Həmin şəxslər Türkiyə, Hindistan, Rusiya, Çin, Qazaxıstan, Türkmənistan, Banqladeş, Pakistan, Misir, İsrail, Kipr, Mərakeş, Nigeriya, Ermənistan, Özbəkistan və Azərbaycandan olub.

"Mövcud qanunvericiliyə uyğun olaraq, deportasiya olunan şəxslərə ölkəyə giriş qadağan edilib", – nazirlik bildirib.

Ötən il Gürcüstandan ümumilikdə 1311 xarici vətəndaş deportasiya edilmişdi.

Hakim "Gürcü Arzusu" partiyası xarici vətəndaşların ölkədən deportasiyasına dair qanunvericiliyi sadələşdirib. Məsələn, xarici vətəndaş etiraz aksiyalarına qatılmaq qaydalarını pozduğu üçün deportasiya edilə bilər.

Gürcüstanda əcnəbilərin işə qəbul şərtləri isə sərtləşdirilib: 2026-cı il martın 1-dən iş fəaliyyəti üçün xüsusi icazə tələb olunacaq.

Böyük Britaniya da Avstraliya kimi uşaqlar üçün sosial media qadağasını nəzərdən keçirir. Baş nazir Kir Starmer yanvarın 20-də bildirib ki, uşaqlar "sonsuz skrollinq, narahatlıq və müqayisə dünyasına" sürüklənmə riski ilə üzləşirlər.

Starmer hökumətin sərt tədbirlər görməyə hazır olduğunu deyib.

Hökumət sosial media qadağasının uşaqlar üçün effektiv olub-olmayacağını araşdıracağını bildirib.

"Bu, çox mürəkkəb bir məsələdir, buna görə də düzgün şəkildə nəzərdən keçirilməlidir", – Starmer "Substack"ə bildirib.

Nazirlər Avstraliyaya səfər edərək onların yanaşmasından öyrənəcəklərini deyiblər.

Ötən ay Avstraliya yaşı 16-dan az uşaqlar üçün sosial medianı qadağan edən ilk ölkə olub.

Britaniyada bu yaxınlarda Onlayn Təhlükəsizlik Aktı qüvvəyə minib. İnternetdə yaş yoxlaması ilə üzləşən uşaqların sayı 30 faizdən 47 faizə qalxıb. Hökumət bildirir ki, pornoqrafiya saytlarının açılması da 30 faiz azalıb.

Buna da bax:

Avstraliyada yeniyetmələrin sosial mediadan istifadəsi yasaqlandı

Ermənistan yaxın vaxtlarda Rusiya istehsalı mayeləşdirilmiş qazı Azərbaycan ərazisindən keçməklə dəmir yolu ilə idxal edəcək. Açıqlamanı Ermənistanın İqtisadiyyat Nazirliyi yayıb.

Nazirlik mayeləşdirilmiş qazın ilk partiyasının Ermənistana nə vaxt çatacağını, konkret hansı şirkətlərin idxalla məşğul olacağını açıqlamır.

AzadlıqRadiosunun erməni xidməti ölkədə son günlər mayeləşdirilmiş qazın kəskin bahalandığını yazır. Hökumət bildirir ki, hazırda İrandan yanacaq idxalı mümkün deyil, Rusiyadan idxal isə "Yuxarı Lars" buraxılış məntəqəsi bağlı olduğundan real deyil.

Ötən ilin oktyabrından Azərbaycan Ermənistana yük tranzitinə məhdudiyyətləri qaldırıb. Azərbaycan və Gürcüstandan keçməklə Ermənistana Qazaxıstandan taxıl, Rusiyadan buğda çatdırılıb. Dekabrın ortalarında Azərbaycan Dövlət Neft Şirkəti (SOCAR) Ermənistana Aİ-95 markalı benzin çatdırıb.

Embed paylaş

Yerevan sakini: 'Maşına Azərbaycan benzini vuranda nə olur ki?'

by AzadlıqRadiosu

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:01:30 0:00

Gürcüstanda 46 yaşlı rusiyalı çətənə yetişdirmək ittihamı ilə saxlanılıb. Bu haqda "Exo Kavkaza" ölkənin Daxili İşlər Nazirliyinə istinadla xəbər yayıb.

İstintaqın məlumatına görə, kişi kirayələdiyi mənzildə xüsusi istixana quraraq narkotik tərkibli bitkilər yetişdirib.

"Axtarış nəticəsində hüquq-mühafizə orqanları sübut kimi çox miqdarda qurudulmuş marixuana və çətənə bitkiləri götürüblər. Həmçinin narkotik vasitələrin yetişdirilməsi və qablaşdırılması üçün istifadə olunan materiallar da müsadirə edilib", – nazirliyin mətbuat xidməti bildirir.

Cinayət işi narkotik vasitələrin saxlanılması və narkotik tərkibli bitkilərin qanunsuz yetişdirilməsi maddələri üzrə açılıb.

Gürcüstanda ilk dəfə deyil narkotik işi üzrə rusiyalı saxlanılır. 2025-ci ilin dekabrında Gürcüstanda saxlanan rusiyalı Oleq Kuprinə narkotiklərin qanunsuz əldə olunması və saxlanılması ittihamı verilib. Sentyabrda Tbilisidə etiraz aksiyalarına qatılan üç rusiyalıya 8 il yarım həbs cəzası kəsilib, onlara narkotik yaymaq ittihamı irəli sürülüb. Onların hamısı işlərini siyasi motivli hesab edir: dediklərinə görə, hüquq-mühafizə orqanları onlara narkotik ittihamlarını aksiya iştirakçılarını gözdən salmaq üçün irəli sürüb.

Cənubi Koreyanın keçmiş prezident Yun Sok Yol 5 il müddətinə azadlıqdan məhrum edilib. Seulun Mərkəzi Rayon Məhkəməsi bu cəzanı məhkəməyə mane olma işi üzrə kəsib. Prokuror 10 il cəza tələb etmişdi. Xəbəri Cənubi Koreyanın "Yonhap" agentliyi yayıb.

Keçmiş prezident 2025-ci ilin yanvarında özünün saxlanmasına mane olmaqda, hərbi vəziyyət elan etməkdə, parlamentin qərarından sonra bununla bağlı fərmanı ləğv etməkdə, hərbçilərin telefonlarından qeydləri silmək əmri verməkdə təqsirli bilinib.

İki gündən sonra keçmiş prezidentin həbs müddəti başa çatmalı idi. Onun vəkilləri deyirdilər ki, bu iş üzrə qərar hərbi üsyan məsələsi müzakirə olunandan sonra verilməlidir, amma hakim bu tələbə etiraz edib.

Agentliyin yazdığına görə, Y.S.Yola toplam səkkiz cinayət işi açılıb. O, hərbi vəziyyət tətbiq etmək cəhdi, xanımım yol verdiyi bildirilən korrupsiya, 2023-cü ildə dəniz piyadasının ölümündə ittiham olunur. Prokurorlar bu həftə hərbi üsyan işi üzrə ona ölüm cəzası kəsilməsini tələb ediblər.

Y.S.Yol "Şimali Koreyanın daxili tərəfdarları ilə mübarizə aparmaq" üçün ölkədə hərbi vəziyyət elan edəcəyini bildirib. Onun imzaladığı fərman partiyaların fəaliyyətini, etirazları, tətilləri qadağan edir, senzura qoyur, ölüm cəzası çıxara biləcək hərbi-səhra tribunalları təsis olunmalı idi. Lakin sənəd cəmi altı saat qüvvədə olub, deputatlar onun ləğvinə səs verib, hərbçilər isə parlament binasını basqın edirdilər.

2024-cü ilin dekabrında parlament Y.S.Yolun vəzifəsindən azad edilməsinə səs verib. Yanvarda istintaqçılar onu həbs edə bilməyib, daha sonra məhkəmə onun saxlanmasına qərar verib. Fevralda siyasətçi Seulun Mərkəzi Dairə Məhkəməsinə apellyasiya şikayəti verib, məhkəmə onun xeyrinə qərar qəbul edib, martın əvvəllərində o, azadlığa buraxılıb. Amma iyulda Y.S.Yolu yenidən həbs ediblər, tədqiqatçılar onun sübutları məhv edə biləcəyini bildiriblər.

Venesuela müxalifətinin lideri Mariya Korina Maçado yanvarın 15-də Ağ evdə ABŞ prezidenti Donald Tramp ilə görüşdə Nobel Sülh mükafatını ona təqdim etdiyini deyib. Amma Trampın mükafatı qəbul edib-etməməsi haqda bir söz deməyib.

Trampın mətbuat katibi Kerolayn Livitt isə jurnalistlərə deyib ki, Tramp Venesuelanın aralıq prezidenti Delsi Rodriqesin işini bəyənir, onun həddən artıq əməkdaşlıq etdiyini düşünür.

Trampın Maçado haqda fikri dəyişməyib, onu Venesuelanı idarə etməyə real alternativ saymır, - Livitt əlavə edib.

Maçado Trampla görüşdən sonra deyib ki, özü və tərəfdarları Trampa etibar edə bilər, Tramp Venesuela xalqının əziyyət çəkdiyini anlayır və ölkədə siyasi məhbusların buraxılmasına sadiqdir.

Maçado senatorlara deyib ki, Rodriqesin hakimiyyəti dövründə siyasi repressiya Maduro dövründən fərqlənmir, bəzi hallarda pisləşib. Venesuelanın insan haqları qrupları hakimiyyətin onların gözlədiyindən xeyli az məhbusu azad etdiyini deyir.

Tramp bir gün öncə telefonla Rodriqeslə danışıb, neft, minerallar, ticarət və təhlükəsizlik məsələlərini müzakirə edib, onun "möhtəşəm insan" olduğunu deyib.

Ağ ev Trampın mükafatı saxlamağı planlaşdırdığını təsdiqləyib

Tramp yanvarın 15-də axşam sosial şəbəkədə yazıb: "Mariya mənə gördüyüm işlərə görə Nobel Sülh mükafatını təqdim etdi. Bu, qarşılıqlı hörmətin gözəl bir jestidir. Təşəkkür edirəm, Mariya!".

Maçado görüşü "əla" adlandırıb, hədiyyənin Trampın Venesuela xalqının azadlığına sadiqliyini tanıdığı üçün verildiyini bildirib.

+++

Venesuelanın müvəqqəti prezidenti D.Rodriqes isə yanvarın 15-də ölkənin karbohidrogen qanununu islah etmək üçün təklif verdiyini deyib. ABŞ-dən investorlar bu ölkənin neft sənayesinə daha asan çıxış əldə etmək istəyirlər.

Rodriqes neftdən əldə olunan vəsaitlərin işçilərə və ictimai xidmətlərə ayrılacağını qeyd edib.

ABŞ bildirir ki, Karakas ilə razılaşma çərçivəsində neft satışlarından artıq 500 milyon dollar əldə edilib və ABŞ-nin bank hesablarında saxlanır. Planla tanış bir sənaye mənbəyi əsas hesabın Qətərdə yerləşdiyini söyləyib.

Yanvarın 3-də ABŞ qüvvələri Venesuela lideri Nikolas Maduronu ələ keçirərək Nyu-Yorka aparıb, həbsxanaya yerləşdirib. O, özünə qarşı narkotik ittihamlarını rədd edir.

Yanvarın 15-də Fransa və Almaniyadan hərbi heyətlər Qrenlandiyaya yollanıb. Danimarka və müttəfiqləri bu il adada təlimə hazırlaşır. Onlar ABŞ prezidenti Donald Trampı Qrenlandiyanın təhlükəsizliyinin qorunduğuna əmin etmək istəyirlər.

Yanvarın 14-də Ağ evdə Danimarka və Qrenlandiya rəsmiləri ilə görüşdən elə bir nəticə əldə olunmayıb.

İsveç və Norveç də bu ilin sonuna gözlənən təlimlərə hazırlıq üçün Qrenlandiyaya hərbi heyət göndərəcəyini bildirib.

İlkin hərbi heyətlər böyük olmasa da, təhlilçilər bunun ABŞ administrasiyasına mesaj olduğunu deyiblər.

Ağ evdə dövlət katibi Marko Rubio və vitse-prezident Cey Di Vens ilə danışıqlardan sonra Danimarkanın xarici işlər naziri Lars Lökke Rasmussen və onun qrenlandiyalı həmkarı Vivian Motsfeldt deyiblər ki, ABŞ və Danimarka ada ilə bağlı geniş spektrli məsələlərin müzakirəsi üçün işçi qrup yaradacaq.

Amma onlar eyni zamanda etiraf ediblər ki, Vaşinqton mövqeyindən geri çəkilməyib, Qrenlandiyanı əldə etmək istəyir. Onların sözlərinə görə, belə bir nəticə suverenliyin qəbuledilməz şəkildə pozulması demək olardı.

D.Tramp Qrenlandiyanın ABŞ-nin təhlükəsizliyi üçün həyati əhəmiyyət daşıdığını deyir. Onun mövqeyincə, Rusiya və ya Çinin adanı ələ keçirməsinin qarşısını almaq üçün ABŞ ona sahib olmalıdır.

Qrenlandiya strateji baxımdan mühüm mövqedə yerləşir, zəngin mineral ehtiyatları var.

Ukraynada energetika sahəsində fövqəladə vəziyyət rejimi elan ediləcək. Bu addım kütləvi elektrik və istilik kəsintiləri, hava şəraitinin pisləşməsi fonunda atılır. Prezident Volodimir Zelenski xüsusi müşavirədə bu haqda məlumat verib.

Dövlət başçısı bildirib ki, bu rejim işıq və istilik təchizatının bərpası üçün daha geniş imkanlardan istifadəyə şərait yaradacaq.

Zelenski onu da deyib ki, digər ölkələrdən elektrik enerjisinin idxal həcmini artırmaq, komendant saatı qaydalarına yenidən baxmağa dair göstəriş verib.

“... Xüsusilə Kiyevdə durum çox çətindir. Paytaxtda çox az iş görülüb. Hətta son günlərdə də intensivlik görmürəm, bütün bunları indi təcili düzəltmək lazımdır", – Zelenski deyib. Paytaxtda vəziyyətin əlaqələndirilməsi üçün qərargah yaradılacaq.

Kiyevdə artıq altıncı gündür elektrik və istiliklə bağlı problemlər qalır. Təxminən 400 çoxmərtəbəli yaşayış binasında istilik yoxdur. Deputat Yaroslav Jeleznyak bildirib ki, "işıq hər üç saatdan bir gəlib-gedir".

Şəhər meri Vitali Kliçkonun sözlərinə görə, tammiqyaslı müharibənin dörd ili ərzində ilk dəfədir bu miqyasda vəziyyət yaranır.

Rusiya qoşunları Ukraynanın energetika obyektlərini daim atəşə tutur, ölkə sakinləri elektrik və istiliksiz qalır. Yanvarın 13-nə keçən gecə Rusiya yenidən Kiyev və daha yeddi vilayəti dronlar, ballistik və qanadlı raketlərlə hədəfə alıb. Bu da elektrikin kəsilməsinə səbəb olub.

Qazaxıstan neft nəqlinin təhlükəsizliyinin təmin olunması üçün Avropa və ABŞ-ni köməyə çağırıb. Bu çağırış Qara dənizdə Xəzər Boru Kəməri Konsorsiumu (CPC) terminalına gedən tankerlərə dron hücumlarından sonra edilib. Məlumatı yanvarın 14-də Qazaxıstan Xarici İşlər Nazirliyi (XİN) yayıb.

Nazirlik bildirir ki, bu çağırış bir neçə Avropa ölkəsinin səfirləri, ABŞ təmsilçiləri ilə görüşlərdə səsləndirilib.

Yanvarın 13-də Qara dənizdə CPC dəniz terminalına doğru hərəkət edən üç tanker dron hücumuna məruz qalıb. Nazirlik bu hücumdan "ciddi narahatlıq" bildirib.

CPC ilə Qazaxıstanın nəhəng "Tengiz" neft yatağından xam neft Rusiya ərazisindən keçməklə daşınır. Marşrut Qara dənizdəki Novorossiysk terminalında başa çatır.

Son aylar Ukraynanın Rusiyada enerji infrastrukturuna dron zərbələri artıb və Qazaxıstan daxil digər ölkələrə də təsir göstərir.

Ukrayna CPC-ə hücumu şərh etməyib.