ABŞ prezidenti Donald Trampın xüsusi elçisi Stiv Uitkoff CNBC-yə deyib ki, sabah – yanvarın 22-də Moskvaya səfər edəcək və Rusiya prezidenti Vladimir Putinlə görüşəcək. O, səfərə Trampın kürəkəni Cared Kuşnerlə birlikdə gedəcək.
"Baxın, cümə axşamı onunla görüşməliyik. Amma bu görüşü rusiyalılar istəyib. Məncə, bu onlar tərəfdən mühüm açıqlamadır", – Uitkoff söyləyib.
Putin Trampın yaratdığı Sülh Şurasına qoşulacaqmı? Uitkoff bu suala "düşünürəm ki, bəli" cavabını verib və Putinə dəvət göndərildiyini bir daha təsdiqləyib.
Ukraynanı danışıqlarda təmsil edən Rustem Umerov isə ötən həftə bildirib ki, bu həftə İsveçrənin Davos şəhərində Dünya İqtisadi Forumu çərçivəsində ABŞ rəsmiləri ilə danışıqlar davam edəcək. Danışıqlarda məqsəd Rusiyanın dörd ilə yaxındır Ukraynaya apardığı təcavüzkar müharibəyə son qoymadır.
19 yanvar
ABŞ-Ukrayna danışıqları razılaşmasız bitib
Kiyev ABŞ rəsmiləri ilə son danışıqlarda heç bir razılaşma əldə etməyib, müzakirələr yanvarın 19-da İsveçrənin Davos şəhərində Dünya İqtisadi Forumu çərçivəsində davam etdiriləcək. Tərəflər Rusiyanın Ukraynada qarşı dörd ilə yaxındır apardığı müharibəni sona çatdırılması üçün müzakirələr aparırlar.
Floridada iki günlük danışıqlarda Ukraynanı təmsil edən Rustem Umerov yanvarın 18-də sosial mediada yazıb ki, "ədalətli və davamlı sülh əldə etmək, Ukraynanın təhlükəsizlik təminatlarını və növbəti addımları razılaşdırmaq üçün işi davam etdirəcəyik".
Umerov Ukraynanın əsas tələblərindən birinin ABŞ və Avropadan təhlükəsizlik təminatları olduğunu vurğulayıb.
"Məzmunlu" müzakirələr
Umerov danışıqları "məzmunlu" adlandırıb, iqtisadi inkişaf və rifah planının müzakirə edildiyini bildirib. ABŞ-ni danışıqlarda prezidentin xüsusi nümayəndəsi Stiv Uitkoff və prezident Donald Trampın kürəkəni Cared Kuşner təmsil edir.
Tramp 2025-ci ilin noyabrında Ukrayna prezidenti Volodimir Zelenskiyə çoxlarının Rusiyanın xeyrinə saydığı 28 maddəlik sülh təklifini qəbul etməsi üçün təzyiq göstərib. Ukrayna isə Avropa tərəfdaşları – Böyük Britaniya, Fransa və Almaniya ilə alternativ plan hazırlamağa çalışıb. Onların təklif etdiyi 20 maddəlik planda Ukrayna üçün təhlükəsizlik təminatları, ərazi bütövlüyü nəzərə alınıb.
Tramp bugünlərdə Zelenskinin sülh müqaviləsini Rusiya prezidenti Vladimir Putindən daha çox əngəllədiyini iddia edib. Zelenski isə bu ittihamı rədd edib.
"Aydındır ki, ABŞ müharibəni sabah bitirmək istəyir. Biz isə bu müharibəni bu gün bitirmək istəyirik. Hər ikimiz buna maraq göstəririk. Və başa düşürük ki, müharibənin sona çatmamasının səbəbi Rusiyadır", - o deyib.
