ABŞ Dövlət Departamenti tanınmamış Dağlıq Qarabağ Respublikasında keçirilən prezident seçkilərinin münaqişənin sülh yolu ilə həlli istiqamətində aparılan danışıqlara təsir göstərməyəcəyinə inanır. Birləşmiş Ştatlar Dağlıq Qarabağda keçirilən seçkiləri tanımır.
AzərTAc-ın xüsusi müxbiri xəbər verir ki, bu bəyanatla iyulun 19-da ABŞ Dövlət Departamentinin Avropa və Avrasiya Məsələləri üzrə bürosunun mətbuat katibi Çeyz Bimer çıxış edib.
Çeyz Bimer bildirib ki, Birləşmiş Ştatlar Azərbaycanın ərazi bütövlüyünə hörmətlə yanaşır. ATƏT-in Minsk qrupunun digər həmsədrləri ilə yanaşı, ABŞ Ermənistan və Azərbaycan hökumətləri ilə birgə işləyərək münaqişənin qarşılıqlı qəbul olunan həllinin tapılmasına səy göstərəcəkdir.
Mətbuat katibi deyib: «Ümid edirik ki, Ermənistan və Azərbaycan prezidentləri əsas prinsiplər üzrə razılığa mümkün qədər tez gələrək, ətraflı sülh razılaşmasının tərtibatına qapı açacaqlar».