ABŞ prezidenti Donald Tramp rusiyalı həmkarı Vladimir Putinlə aprelin 29-da baş tutan telefon danışığını müsbət qiymətləndirib. Oval Ofisdə jurnalistlərə açıqlama verən Tramp bir saat yarım davam edən söhbəti "çox yaxşı" adlandırıb.
Ağ Ev rəhbəri bildirib ki, müzakirələrin əsas mövzusu Ukraynadakı münaqişə olub: "Mən Ukrayna, bir qədər də İran barədə danışdım. Bir neçə fərqli mövzuya toxunsaq da, söhbətin əsas hissəsi Ukraynaya həsr olunmuşdu".
Trampın sözlərinə görə, Putin əslində çoxdan razılığa gəlməyə hazır olsa da, "bəzi insanlar" onun sövdələşmə bağlamasına mane olub. O, Rusiya prezidentinin Ukrayna məsələsinin həllində maraqlı olduğunu vurğulayıb.
Rusiya liderinin köməkçisi Yuri Uşakov bir qədər əvvəl bildirmişdi ki, Putin Qələbə Günü münasibətilə Ukrayna müharibəsində atəşkəs elan olunmasını təklif edib və Tramp bu təşəbbüsü dəstəkləyib. Bu bayram Rusiyada mayın 9-da, Ukrayna və əksər Avropa ölkələrində isə mayın 8-də qeyd olunur.
D.Tramp vəzifəyə gəldiyi gündən Ukraynadakı müharibəyə tezliklə son qoyulmasının vacibliyini bəyan edir. Seçki kampaniyası dövründə müharibəni bir günə bitirəcəyinə söz verən Trampın vasitəçiliyi ilə bir sıra danışıqlar aparılsa da, hələlik atəşkəs əldə olunmayıb.
Hazırda sülh yolunda əsas maneə ərazi məsələsi olaraq qalır: Rusiyanın bütün Donetsk bölgəsi üzərində nəzarət tələbi Ukrayna tərəfindən qətiyyətlə rədd edilir. Sonuncu birbaşa üçtərəfli danışıqlar bu ilin fevralında — ABŞ və İsrailin İrana qarşı hərbi əməliyyatlara başlamasından əvvəl baş tutub.