MeydanTV-nin həbsdə olan əməkdaşlarından Xəyalə Ağayeva məhkəmədə ifadə verərkən Əliyevlər ailəsinin xaricdəki mülkləri və hökumətdəki korrupsiya faktları barədə danışarkən proses yarımçıq dayandırılıb. Hakimlər qəfildən ayağa qalxaraq məhkəmə zalını tərk ediblər. Bu hadisə mayın 22-də Bakı Ağır Cinayətlər Məhkəməsində yaşanıb.
"MeydanTV işi" üzrə təqsirləndirilən 12 nəfərin cinayət işinə hakim Aytən Əliyevanın sədrlik etdiyi hakimlər kollegiyası baxır. Mayın 22-də keçirilən prosesdə jurnalistlərdən yalnız X.Ağayeva ifadə verib.
Hazırda Azərbaycanda Ümumdünya Şəhərsalma Forumunun keçirildiyini xatırladan X.Ağayeva bildirib ki, prezident İlham Əliyev gələn qonaqlara Bakının tarixinin və memarlıq irsinin qorunmasından bəhs edir: "Lakin paytaxtın xatirələrinin dağıdılmasından, tarixi binaların yerlə-yeksan edilməsindən danışmır. Həbsimizdən əvvəl çəkdiyim, amma hakimiyyətin yayımlamağa imkan vermədiyi son süjetimiz də Bayırşəhərin məhv edilməsi ilə bağlı idi. Foruma gələn xarici qonaqlar Ağ Şəhərdə gəzdirildiyi vaxt Bayırşəhərdə tarix artıq dağıntılar altındadır".
Özü də daxil olmaqla, MeydanTV əməkdaşlarının siyasi sifarişlə həbs olunduğunu deyən jurnalist vurğulayıb ki, onların məqsədi rəsmilərin yalanlarını ifşa etmək, insanlara doğru xəbəri çatdırmaq olub.
Jurnalist ona qarşı irəli sürülən qaçaqmalçılıq ittihamını rədd edərək bildirib ki, həbs olunanadək xaricə gedib-gələrkən həmişə sərhəd-keçid məntəqələrində yoxlanılıb və onun fəaliyyətində heç bir qanun pozuntusu aşkarlanmayıb. "Gəlin, sizə orada heç vaxt yoxlanılmamış bir şəxsdən danışım. Mənimlə həmyaşıd olan balaca Heydər hələ 9 yaşında ikən adına 75 milyon dollarlıq Dubay mülkləri alınmışdı. Bu hadisə məhz 2006-cı ildə — hökumətimizin ölkədə uşaqpulunun verilməsini dayandırdığı vaxt baş verib. Bəs eyni vaxtda öz uşaqları üçün milyonlarla pulu xaricə necə çıxarmışdılar?!", — jurnalist ifadəsində sual edib.
X.Ağayeva çıxışında Azərbaycan hökumətinin Avropa Şurası Parlament Assambleyasındakı (AŞPA) deputatları rüşvətlə ələ alması ilə bağlı beynəlxalq qalmaqalı da xatırladıb: "Cinayətkar məqsədlər üçün hökumət təqribən 3 milyon dollar rüşvət verib. Nəticədə ləyaqətini satışa çıxaran həmin deputatlar Azərbaycan hökuməti ilə eyni mövqedən çıxış ediblər…".
X.Ağayevanın ifadəsi zamanı hakimlər ona bir neçə dəfə xəbərdarlıq ediblər. Jurnalist çıxışını davam etdirərkən isə hakimlər qəfildən ayağa qalxaraq məhkəmə zalını tərk edib və prosesi yarımçıq dayandırıblar.
Xatırlatma
2024-cü il dekabrın 6-da MeydanTV-nin baş redaktoru Aynur Elgünəş, əməkdaşları Aysel Umudova, Natiq Cavadlı, Aytac Tapdıq, Xəyalə Ağayeva, Ramin Deko və Bakı Jurnalistika Məktəbinin direktor müavini Ülvi Tahirov həbs edilib. Cinayət işi çərçivəsində daha sonra jurnalistlər Şəmşad Ağa, Nurlan Libre, Fatimə Mövlamlı, Ülviyyə Əli və fotojurnalist Əhməd Muxtar da saxlanılıb. Onlara qanunsuz sahibkarlıq, cinayət yolu ilə əldə edilmiş əmlakın leqallaşdırılması, vergidən yayınma və qaçaqmalçılıq maddələri ilə ittihamlar irəli sürülüb. İttihamlar təsdiqlənərsə, jurnalistlər 12 ilədək həbs oluna bilərlər.
Ümumilikdə, 2023-cü ilin noyabrından bəri Azərbaycanda 30-dan çox jurnalist və fəal bənzər ittihamlarla qruplar halında həbs olunub. Artıq "AbzasMedia işi" üzrə 7 jurnalistə 7 il 6 aydan 9 ilədək (o cümlədən AzadlıqRadiosunun əməkdaşı Fərid Mehralızadəyə 9 il) həbs cəzası verilib.
"Toplum TV işi" üzrə isə məhkəmə hələ davam edir.
Jurnalistlər ittihamları rədd edərək korrupsiya və məmur özbaşınalıqlarını işıqlandırdıqlarına görə hədəfə alındıqlarını deyir. Rəsmilər isə həbslərin peşə fəaliyyəti ilə deyil, konkret cinayət əməlləri ilə bağlı olduğunu bildirir.