• İsrail Müdafiə Qüvvələri HƏMAS-ın Qəzzada 120-dən çox mülki vətəndaşı girov saxladığını təsdiqləyib.

• Qəzzanın daxili işlər nazirliyinin məlumatına görə, İsrailin hava hücumları Qəzzanın şimalını təxliyə edən 70 nəfəri öldürüb, 200 nəfəri yaralayıb.
  
• BMT bildirir ki, Qəzzada 423 min insan didərgin düşüb.
  
• Rusiya BMT Təhlükəsizlik Şurasında humanitar atəşkəsə çağıran qətnamə təqdim edib.

Qəzzənin şimalında yaşayan əhali İsrailin gözlənilən quru hücumundan əvvəl qaçır. İsrail rəsmiləri bugün axşam dördə qədər əhalinin təxliyyəsi üçün Qəzzənin cənub istiqamətində iki təhlükəsiz yol açdıqlarını bildirir.

İsrail ordusu iki Həmas komandirini öldürdüyünü açıqlayıb

Bu barədə İsrail ordusunun rəsmiləri məlumat yayıb.

İsrail rəsmilərinin sözlərinə görə öldürülən komandirlər Merad Abu Merad və Ali Qadidir.

Qeyd edək ki, oktyabrın 7-də Həmas qruplaşmasının İsrailə hücumunun ardından İsrail ordusu Qəzzə bölgəsini bombalamağa davam edir. Yaxın zamanda İsrail ordusunun quru əməliyyatlarına başlayacağı gözlənilir. Bugünə qədər Qəzzədə ölənlərin sayı iki min nəfəri keçib.

Buna da bax:

İsrail-Fələstin mübahisəsi: dövlətçilik, Yerusəlim, qaçqınlar

BMT on minlərlə fələstinlinin köçkün düşdüyünü açıqlayıb

Reuters BMT rəsmilərinə istinadən yazır ki, İsrailin cümə günü Qəzzənin şimal bölgəsinin təxliyyə edilməsini tələb etməsinin ardından on minlərlə fələstinli evlərini tərk etmək məcburiyyətində qalıb.

Buna qədər oktyabrın 7-dən sonra 400 minə yaxın fələstinli yaşadığı yerdən köçkün düşdüyü bildirilir.

"Qəzzə sakinlərinə su, qida və yanacaq çatdırılması üçün təxirəsalınmaz şəkildə humanitar girişin açılmasına ehtiyacımız var" - bu sözləri BMT baş katibi Antonio Queterreş deyib.

İsveçrənin Kran-Montana dağ-xizək kurortundakı "Le Constellation" barında partlayış və sonrakı yanğın nəticəsində azı 40 nəfər ölüb, təxminən 100 nəfər yaralanıb.

"Reuters"in məlumatına görə, partlayış yerli vaxtla saat 01:30 radələrində Yeni ilin gəlişinin qeyd olunduğu barda baş verib. Polis rəsmisinin sözlərinə görə, hadisə zamanı içəridə 100-dən çox insan olub.

Hüquq-mühafizə qurumları partlayışın mənbəyinin araşdırıldığını bildiriblər. Jurnalistlərin məlumatına görə, partlayışa pirotexnikadan istifadə səbəb ola bilərdi.

Barın ətrafı mühasirəyə alınıb, ərazi üzərində uçuşlar qadağan edilib. RTS telekanalının xəbərinə görə, İsveçrənin cənub-qərbindəki xəstəxanalar "ağır yanıqları olan xəstələri" müalicə etmək üçün səfərbər olunub.

Kran-Montana kurortu İsveçrə Alp dağlarının mərkəzində, Vale kantonunda yerləşir.

"Biz bu il əldə olunmuş uğurlarla fəxr edə bilərik". Prezident İlham Əliyev bunu Dünya Azərbaycanlılarının Həmrəyliyi Günü və Yeni il münasibətilə müraciətində deyib.

"İqtisadi inkişafa gəldikdə, biz bu il əldə olunmuş uğurlarla fəxr edə bilərik. Bizim valyuta ehtiyatlarımız tarixi rekord həddə çatıb - 80 milyard dollardan artıqdır. Bizim xarici borcumuz daha da aşağı düşüb, bu gün ümumi daxili məhsulumuzun (ÜDM) cəmi 6.3 faizini təşkil edir", - o vurğulayıb.

Onun sözlərinə görə, bəzi inkişaf etmiş ölkələrdə bu rəqəm 100 faizdir, ondan da çoxdur. "Bizim valyuta ehtiyatlarımız xarici borcumuzu 16 dəfə üstələyir və təsadüfi deyil ki, dünyanın aparıcı reytinq agentlikləri Azərbaycanın kredit reytinqini qaldırıblar - investisiya reytinqini müsbət reytinq səviyyəsinə qaldırıblar", - o əlavə edib.

Amma...

Müstəqil iqtisadçılar ölkədə iqtisadi inkişafla bağlı fikirləri bir elə də bölüşmürlər. Onlar vurğulayırlar ki, bu ilin 11 ayında ÜDM cəmi 1.6 faiz artıb və bu, real artım sayılmır. Üstəlik, xatırlanır ki, ötən ilin eyni dövrü ilə müqayisədə ixrac azalıb, idxal isə artıb.

2026-cı ildə həm vergi və rüsumlar, həm də cərimələr artırılır. Müstəqil iqtisadçılara görə, vergilər, rüsumlar bundan sonra da artacaq, çünki, hökumətin hədəfi yanlışdır - hədəf vətəndaş hesabına büdcəyə əlavə gəlir gətirməkdir, əslində isə məqsəd iqtisadi aktivliyin artırılması olmalıdır.

Embed paylaş

2026-ci ildə neftin ucuzlaşacağı proqnozlaşdırılır

by AzadlıqRadiosu

Embed paylaş

Kod yaddaşa götürüldü

---

en px hündürlük px

---

The URL has been copied to your clipboard

No media source currently available

0:00 0:06:23 0:00

Rusiyanın Müdafiə Nazirliyi "Putinin iqamətgahına hücum" barədə mətbuat konfransı keçirib. İki gün öncə baş verdiyi deyilən hücumu Ukrayna dronlarının gerçəkləşdirildiyi iddia olunur. Xəbəri Rusiyanın Hava Hücumundan Müdafiə Qüvvələrinin başçısı, general-mayor Aleksandr Romanenkov açıqlayıb.

Moskva bu hücum barədə daha öncə bəyanatlar səsləndirib. Putin ABŞ prezidenti Donald Tramp ilə telefon söhbətində bu haqda danışıb. Bəzi ölkə prezidentləri “hücumu” qınayıb.

Romanenkov hücumun dekabrın 28-də axşam 8-ə 20 dəqiqə işləmiş uzaq məsafəli təyyarə tipli dronlarla gerçəkləşdirildiyini bildirib. Hədəfin Putinin Novqorod vilayətindəki iqamətgahı olduğunu deyib. Romanenkov dəqiqləşdirməsə də, bu iqamətgah Valday şəhəri yaxınlığındadır. 91 dronun hamısının vurulduğu açıqlanıb.

MN “vurulan dronlardan” birinin görüntülərini də yayıb. Onun “Çaklun-B” dronu olduğu bildirilir.

Heç bir itki, yaxud ziyan olmadığı qeyd olunur.

“Mojem obyasnit” layihəsi Novqorod vilayətinin 14 sakini ilə danışıb. Onlar “hücum” günlərində dron təhlükəsinə dair SMS almadıqlarını deyiblər. Valday sakinləri dron, partlayış səsi eşitmədiklərini söyləyiblər.

MN isə bu məlumatları təkzib etmək üçün İqor Bolşakov kimi təqdim etdiyi sakinin dediklərini yayımlayıb. O, dekabrın 29-da Putinin iqamətgahına yönələn dronların səsini eşitdiyini deyib.

Tramp Putinlə söhbətindən sonra “hücum”un “həssas vaxtda” baş verdiyini, “bunun onun xoşuna gəlmədiyini” vurğulayıb.

Bir sıra qərb liderləri isə Rusiyanın “hücum”la bağlı bəyanatlarına skeptik yanaşıblar. Ukrayna prezidenti Volodimir Zelenski isə bu iddianı "yalan" adlandırıb/

Dekabrın 31-nə keçən gecə Ukrayna dronları Rusiyanın Krasnodar diyarında yerləşən Tuapse şəhərinə hücum edib. İki nəfər xəsarət alıb, limanda körpü zədələnib, “Rosneft”ə məxsus neft emalı zavodu, yaşayış evlərinə ziyan dəyib.

Yerli hakimiyyət orqanları Tuapsedə zavod ərazisində 300 kvadratmetr sahədə baş vermiş yanğının söndürüldüyünü təsdiqləyib. Tuapse limanındakı yanğın da söndürülüb.

Tuapse neft emalı zavodu dəniz terminalı ilə birlikdə “Rosneft”ə daxildir. Şirkətə Vladimir Putinin yaxın dostu və silahdaşı olan İqor Seçin rəhbərlik edir. Ukrayna 2025-ci ilin mart və noyabrında Tuapsedə neft infrastrukturuna zərbələr endirib.

Ötən gecə Yaroslavl vilayətində Rıbinsk şəhərinə də dron hücumu olub. Yanacaq anbarının yandığı bildirilir.

Ukrayna bir neçə aydır Rusiyanın neft emalı zavodlarına, yanacaq anbarlarına zərbələr endirir. Kiyev bunları qanuni hərbi hədəf sayır. Çünki neft, benzin və dizel ya cəbhədə istifadə olunur, ya da satılır, qazanılan vəsait Ukraynada müharibəyə yönəldilir. Ukrayna hərbçiləri hələlik, son hücumları şərh etməyiblər.

Rusiya Ukraynanın bir neçə vilayətinə zərbələr endirib

Dekabrın 31-nə keçən gecə Rusiya Ukraynanın Odessa vilayətinə hücum edib. Vilayət hərbi administrasiyasının rəhbəri Oleq Kiper yaşayış binalarına, logistika və enerji infrastrukturuna zərbələr endirildiyini bildirib.

“Bir neçə çoxmərtəbəli yaşayış binasının fasadları və şüşələri zədələnib. Binalardan birində mənzillərdə yanğınlar baş verib. Mülki avtomobillərə də yanğın nəticəsində ziyan dəyib”, – o yazıb.

Şəhər hərbi administrasiyasının rəhbəri Sergey Lısak isə dörd nəfərin xəsarət aldığını, onlardan 3-nün uşaq olduğunu deyib, vəziyyətləri orta ağırdır. Daha bir yaralı, 42 yaşlı kişi isə ağır vəziyyətdədir.

“Həkimlər, xilasedicilər və şəhər xidmətləri hadisə yerində çalışır”, – Lısak bildirib.

Onun sözlərinə görə, səhər saatlarında Odesanın bir hissəsində elektrik enerjisi, su və istilik təchizatı olmayıb.

Dnepropetrovsk vilayətinin rəhbəri Vladislav Qayvanenkonun dediyinə görə, dekabrın 31-nə keçən gecə Rusiya ordusu dronlar ilə vilayətin Sinelnikov rayonuna hücum edib, iki kişi xəsarət alıb. Nikopol rayonuna isə FPV-dronlar və artilleriya zərbələri qeydə alınıb. Bir fərdi ev, iki avtomobil və elektrik ötürücü xətt zərər görüb.

Kiyev vilayətinin rəhbəri Nikolay Kalaşnik də bu regionda dron hücumları nəticəsində dağıntılar olduğunu bildirib:

“Dron hücumu nəticəsində Belaya Tserkov şəhərində çoxmərtəbəli yaşayış binası zədələnib. Birinci mərtəbədən altıncı mərtəbəyədək pəncərələr sınıb, eyvanlar zədələnib. Sakinlər arasında yaralananlar barədə məlumat daxil olmayıb”.

Qazaxıstan prezidenti Kasım-Jomart Tokayev “pedofiliyanın və qeyri-ənənəvi cinsi oriyentasiyanın təbliğinin” yasaqlanmasını nəzərdə tutan qanunu imzalayıb.

Ölkə Senatı sənədi dekabrın 18-də təsdiqləyib. Düzəlişlərin müzakirəsi dekabrın 4-də olmalıydı, Tokayevin Avropa Şurası prezidentı Antoniu Koşta ilə görüşü fonunda təxirə salınmışdı.

Ədliyyə nazirinin müavini Botagöz Jakselekova parlamentin yuxarı palatasının iclasında bildirib ki, LGBT mənsubluğu hüquq pozuntusu sayılmayacaq: “LGBT mənsubluğu nə Qazaxıstan qanunvericiliyinə, nə də beynəlxalq qanunvericiliyə görə hüquqpozma sayılır. Buna görə məsuliyyət müəyyən etmirik. Söhbət yalnız təbliğatdan gedir. LGBT-nin açıq təbliği ilə bağlıdır”.

Doqquz beynəlxalq və Qazaxıstanın hüquq müdafiə təşkilatı isə hakimiyyəti bu qanunun qəbulundan imtina etməyə çağırıb. Onların fikrincə, dəyişikliklər LGBT fərdlərinin hüquqlarını və ictimaiyyətdə görünməsini kəskin məhdudlaşdıracaq.

“Bu normalar təkcə özünü LGBTI icmasına aid edən insanlara deyil, həm də jurnalistlər, alimlər, rəssamlar, hüquq müdafiəçiləri və vətəndaş cəmiyyəti təmsilçilərinə birbaşa təhdid yaradır. Bu şəxslər həmin qrupların hüquqlarının işıqlandırılması və müdafiəsi, eləcə də LGBTI hüquqları barədə ictimai məkanda və ya onlayn müsbət fikirlərin səslənməsinə görə inzibati məsuliyyətlə üzləşə bilərlər”, – hüquq müdafiəçilərinin birgə bəyanatında deyilir.

Ermənistanda məhkəmə “Taşir” qrupunun rəhbəri Samvel Karapetyanın girov qarşılığında ev dustaqlığına buraxılmasına qərar verib. Vəkili Aram Vardevanyan müdafiə tərəfinin vəsatətinin qismən təmin olunduğunu deyib.

Girovun məbləği açıqlanmayıb.

Karapetyan bu ilin iyununda hakimiyyəti ələ keçirməyə çağırışlar ittihamı ilə həbs olunub. Ona həmçinin ölkənin ərazi bütövlüyünün pozulması, suverenlikdən imtina və konstitusiya quruluşunun zorakılıqla devrilməsi ittihamları irəli sürülüb. Karapetyan Erməni Apostol Kilsəsinin ölkə hakimiyyəti ilə münaqişəsində açıq şəkildə kilsənin tərəfini tutandan sonra onun təqibi başlayıb.

Milyarderin həbsindən sonra Ermənistan prezidenti Vaagn Xaçatryan Karapetyana məxsus “Ermənistan Elektrik Şəbəkələri”nin milliləşdirilməsinə imkan verən qanunları imzalayıb. İyulda isə sahibkar Stokholm Ticarət Palatasında arbitraj məhkəməsini qazanıb. Məhkəmə Ermənistan hakimiyyətinə “Ermənistan Elektrik Şəbəkələri”nin aktivlərinin müsadirəsinə gətirib çıxara biləcək hərəkətləri qadağan edib.

Karapetyan Rusiyada “Taşir” şirkətlər qrupuna və “Rio” ticarət-əyləncə mərkəzləri şəbəkəsinin sahibidir. “Forbes”un Rusiya milyarderləri reytinqində 44-cü yerdədir, sərvəti 3,2 milyard dollar qiymətləndirilir.

Almaniya milyarder Alişer Usmanovla razılığa gəlib, 10 milyon avro qarşılığında onun xarici ticarət qanunvericiliyinin pozması iddiaları üzrə istintaqı bağlayacaq. "Reuters" bunu Almaniya prokurorları və Usmanovun Almaniyadakı vəkillərinə istinadla yazır. Rusiya və Özbəkistan vətəndaşı olan milyarder Avropa İttifaqının (Aİ) sanksiyaları altındadır.

Vəkillər və prokurorlar bəyanatlarında Usmanovun bu şərtlə razılaşdığını, məbləğin tam ödənilməsinə göstəriş verdiyini bildiriblər.

İstintaq 2022-ci ilin aprel-sentyabrında Bavariyanın Rottax-Eqern şəhərciyində göl kənarındakı iki evin təhlükəsizliyi üçün 1.5 milyon avro ödəniş olunması iddiası ilə bağlıdır.

İstintaqın versiyasına görə, Usmanov Aİ-nin sanksiya qaydalarını pozub, zinət əşyaları, rəsmlər və şərabları Almaniyanın ixraca nəzarəti orqanı olan BAFA-ya bəyan etməyib. Usmanov isə hər hansı qanun pozuntusunu inkar edirdi.

"Bloomberg Billionaires Index"də Usmanovun sərvəti 18.8 milyard dollar göstərilir. O, Ukraynada müharibə başlayandan sonra Aİ və ABŞ sanksiyalarına, səyahət qadağasına məruz qalıb.

Vəkillərinə görə, milyarderin ödənişlərdə adı hallanan şirkətlərlə heç bir əlaqəsi yoxdur, o, sözügedən mülklərin sahibi olmayıb, yaxud onlara nəzarət etməyib. Onlar Aİ sanksiyalarının bu istintaqa birbaşa aidiyyəti olmadığını bildirirlər.

Münhen prokurorları ödəniş alındıqdan sonra icraatın dayandırılacağını deyiblər. 8.5 milyon avro Bavariya xəzinəsinə, 1.5 milyon avro isə məhbusların rifahı üzrə dövlət assosiasiyasına yönəldiləcək.

Usmanovun vəkilləri bildiriblər ki, işin bağlanması ilə vaxta və resurslara qənaət olunacaq. Onların sözlərinə görə, bu ödəniş nə cərimə, nə də cəza formasıdır.

2024-cü ilin noyabrında Almaniya prokurorları oxşar şərtlərlə Usmanova qarşı çirkli pulların yuyulması üzrə istintaqı da dayandırmışdılar.

Milli Məclisin bu gün, dekabrın 30-da keçirilən iclasında İnzibati Xətalar Məcəlləsinə təklif olunan dəyişikliklər axırıncı - üçüncü oxunuşda qəbul edilib.

Layihədə bir sıra məsələlərlə bağlı cərimələr kəskin şəkildə artırılır. Vergi hesabatlarının və dövlət rüsumunun tutulması barədə hesabatların təqdim edilmə qaydalarının pozulmasına görə cərimələr xüsusilə diqqət çəkir. Belə hallara görə fiziki şəxslər 300 manat (hazırkı cərimə 50 manatdır), hüquqi şəxslər isə 1000 manat (hazırkı cərimə 100 manatdır) cərimə ediləcək.

Gələn ildən Azərbaycanda bir sıra sahələr üzrə həm vergi və rüsumlar, həm də cərimələr artırılır. Ekspertlər bunu ölkəyə daxil olan neft pullarının azalması ilə izah edirlər. Həm hasilat azalır, həm də qiymət düşür.

Rusiya Baş Prokurorluğu Corc Vaşinqton Universitetinin ölkə ərazisində fəaliyyətini "arzuolunmaz" elan edib.

Qurumun iddiasına görə, universitetin nəzdində fəaliyyət göstərən analitik mərkəz "xüsusi hərbi əməliyyatla bağlı Rusiyanı nüfuzdan salmağa yönəlmiş anti-Rusiya çıxışları, hesabatları üçün platforma rolunu oynayır".

Kreml Ukraynadakı təcavüzkar müharibəyə "xüsusi hərbi əməliyyat" deyir.

Baş Prokurorluq həmçinin universitetin Rusiyada "xarici agent" kimi tanınan xarici media qurumlarını, fiziki şəxsləri və təşkilatları maliyyələşdirdiyini bildirib.

"Eyni zamanda, universitetin işə saldığı media resursu burada ictimai-siyasi vəziyyətlə bağlı xarici agentlərin və arzuolunmaz birliklərin materiallarını sistemləşdirir, beynəlxalq təcrid haqda nəşrlər tirajlanır, Vaşinqtondakı hakimiyyətə ölkəmizə qarşı sanksiya təzyiqini gücləndirməyə çağırışlar səsləndirilir", – qurumun məlumatında deyilir.

Corc Vaşinqton Universiteti 1821-ci ildə qurulmuş özəl tədqiqat universitetidir. Təhsil ocağının nəzdində Avropa, Rusiya və Avrasiya Araşdırmaları İnstitutu fəaliyyət göstərir.

2026-cı il yanvarın 1-dən Türkiyə və Ermənistanın diplomatik, xidməti və xüsusi pasport sahibləri elektron vizanı (e-viza) pulsuz əldə edə biləcəklər. Bu haqda hər iki ölkənin xarici işlər nazirlikləri məlumat yayıb.

Tərəflər bu addımın Ermənistan-Türkiyə münasibətlərinin normallaşdırılması prosesi çərçivəsində atıldığını bildiriblər. İki ölkənin xarici işlər nazirlikləri oxşar mətnli bəyanat yayıblar.

"Türkiyə və Ermənistan bir daha iki ölkə arasında heç bir ilkin şərtsiz... normallaşma prosesini davam etdirmək öhdəliklərini təsdiqləyir", – bəyanatda deyilir.

Ermənistanın xarici işlər naziri Ararat Mirzoyan bir gün öncə Türkiyə ilə intensiv və çox müsbət dialoqun aparıldığını, "böyük, hiss olunacaq" irəliləyiş əldə etməyin vaxtı çatdığını demişdi.

Türkiyə ilə Ermənistanın sərhədləri 1990-cı illərdən bağlıdır, iki qonşu ölkə arasında rəsmi diplomatik əlaqə olmayıb. Bunun əsas səbəbi Azərbaycanla Ermənistan arasında 30 ildən çox davam edən müharibə olub. Digər ziddiyyət isə 20-ci əsrin əvvəllərində Osmanlı Türkiyəsində ermənilərin kütləvi öldürülməsi ilə bağlıdır. Yerevan həmin hadisələri "soyqırımı" adlandırır, Ankara isə ölü sayının şişirdildiyini, ölənlərin vətəndaş müharibəsi nəticəsində həlak olduğunu bildirir.

Azərbaycan ərazi bütövlüyünü bərpa edəndən sonra Türkiyə ilə Ermənistan da əlaqələri normallaşdırmaq yönündə fəaliyyət göstərib, barışıq, sərhədlərin açılması üzrə xüsusi elçilər təyin ediblər.

ABŞ prezidenti Donald Tramp amerikalı hərbçilərin sahilboyu ərazidə narkotiklərin yükləndiyi liman qurğusuna zərbə endirdiyini bildirib. Bunu prezident dekabrın 29-da İsrailin baş naziri Benyamin Netanyahu ilə görüşündə deyib.

Tramp zərbənin hansı ölkənin ərazisinə endirildiyini açıqlamayıb. Amma şərhçilər Trampın Venesuelanı nəzərdə tutduğunu ehtimal edirlər. İki gün öncə D.Tramp radiomüsahibəsində deyib ki, ABŞ Venesuelada gəmilərin yola salındığı iri bir obyekti məhv edib. Dekabrın 29-da jurnalistlərin Venesueladakı partlayışla bağlı sualına cavabında prezident "narkotiklərin qayıqlara yükləndiyi dokda böyük partlayış nəticəsində" yükləmə zonasının məhv edildiyini bildirib.

Ağ ev və Pentaqon təmsilçiləri hələlik prezidentin bu bəyanatlarını şərh etməyiblər. Prezident Trampın bildirdiyi zərbə gerçəkdən də Venesuelaya endirilibsə, bu, həmin ölkə ərazisinə ilk belə zərbə sayılar. İndiyədək ABŞ hərbi-dəniz qüvvələri Karib dənizində sürətli qayıqları məhv edib. Pentaqon iddia edir ki, həmin qayıqlar narkotiklərin ABŞ-yə qeyri-qanuni daşınması üçün istifadə olunur.

Son aylar Tramp həm Venesuela ərazisində, həm də digər ölkələrdə narkokartellərlə əlaqəli obyektlərə zərbələrin mümkünlüyü barədə xəbərdarlıq edib. Ağ ev bildirir ki, Karib dənizində əməliyyatın məqsədi ABŞ-yə narkotik axınının önləməkdir.

Venesuela rəhbəri Nikolas Maduro isə ABŞ-nin onun ölkəsinə müdaxiləyə hazırlaşdığını, onu hakimiyyətdən kənarlaşdırmaq istədiyini iddia edir.

Bu gün, dekabrın 29-da prezident İlham Əliyev Azərbaycan Dövlət Neft Fondunun (ADNF) 2026-cı il büdcəsini təsdiqləyib.

Fondun büdcəsinin gəlirləri 13 milyard 32 milyon, xərcləri isə 13 milyard 16 milyon manat təşkil edib. Həm gəlirdə, həm də xərcdə azalma var – müvafiq olaraq, 9.8 faiz və 11 faiz.

Gələnilki xərclərin 12 milyard 835 milyon manatı Azərbaycanın 2026-cı il dövlət büdcəsinə transfertin payına düşür.

Xatırlatma

Hazırda ADNF aktivlərinin 70 milyard ABŞ dollarından çox olduğu bildirilir.

ADNF 1999-cu ildə yaradılıb, ora vəsaitlər, əsasən, 2001-ci ildən köçürülməyə başlayıb. Onun yaradıldığı vaxtdan ümumi gəlirlərinin 210 milyard ABŞ dollarından çox olduğu deyilir.

Fondun hesabatlarında ona daxil olan vəsaitlərin böyük bir hissəsinin dövlət büdcəsinə, beynəlxalq və yerli layihələrin maliyyələşməsinə ayrıldığı açıqlanıb. Amma müxalifət partiyaları iddia edirlər ki, həmin vəsaitlərin bir hissəsi korrupsiyanın yemi olub. Rəsmilər belə iddiaları qərəzli sayırlar.

Azərbaycan Baş Prokurorluğu bu gün, dekabrın 29-da Rusiya-Ukrayna müharibəsində iştirakla bağlı vətəndaşlara xəbərdarlıq edib.

Vurğulanır ki, son dövrlər hüquq-mühafizə orqanlarının apardığı araşdırmalar və mediada yayılan məlumatlara əsasən, Rusiya ilə Ukrayna arasında hərbi əməliyyatlarda, eləcə də digər silahlı münaqişələrdə Azərbaycanın bəzi vətəndaşlarının da iştirak etməsi halları müşahidə olunur: "Təəssüflə qeyd edirik ki, bu döyüşlər nəticəsində həlak olan, ağır yaralanan, habelə əsir düşən vətəndaşlarımız var".

Qurum əlavə edir ki, xarici dövlətlərin ərazisindəki silahlı münaqişələrdə iştirak bəzi hallarda xüsusilə ağır cinayətdir: "...Bu əməllərə görə müəyyən müddətə (8 ildən 20 ilədək) və ya ömürlük azadlıqdan məhrum etmə cəzaları nəzərdə tutulur".

Bildirilir ki, artıq bu növ fəaliyyətlərlə məşğul olan bir neçə vətəndaş barəsində Azərbaycanın aidiyyəti hüquq-mühafizə orqanları cinayət işləri başlayıblar. "Bəzi işlər üzrə ibtidai istintaq tamamlanaraq baxılması üçün aidiyyəti üzrə məhkəməyə göndərilib və həmin şəxslər uzunmüddətli azadlıqdan məhrumetmə cəzalarına məhkum olunublar. Bu kateqoriyadan olan digər cinayət işləri üzrə isə hazırda ibtidai istintaq davam etdirilir", - məlumatda əlavə edilir.

Xatırlatma

Azərbaycanın və keçmiş SSRİ-nin müttəfiq respublikalarının daxil olduğu Müstəqil Dövlətlər Birliyinə (MDB) üzv bir çox ölkələrdə də Rusiya-Ukrayna müharibəsində iştirak edən vətəndaşları ilə bağlı cinayət işləri açılır. Azərbaycanda bəzi təhlilçilər Qazaxıstan kimi ölkələrdə ötən il Ukraynada Rusiyanın tərəfində döyüşməkdə şübhəli bilinən ölkə vətəndaşları ilə bağlı çoxlu sayda cinayət işlərinin açılmasına diqqət çəkərək Azərbaycan hüquq-mühafizə qurumlarını da eyni addımları atmağa səsləyirdilər.

Rusiya 2022-ciil fevralın 24-də Ukraynaya geniş miqyaslı təcavüzə başlayıb. Hər iki tərəfdən bir neçə yüz min insanın həlak olduğu, təkcə Ukraynadan bir neçə milyon insanın didərgin düşdüyü bildirilir.

Bu ilin 11 ayında Azərbaycan Türkiyə ilə ticarət dövriyyəsini azaldıb, Rusiya ilə artırıb.

Bu ilin yanvar-noyabr aylarında Azərbaycanla Türkiyə arasında ticarət əməliyyatlarının həcmi 5.2 milyard ABŞ dolları təşkil edib.

Bu barədə Dövlət Gömrük Komitəsinin (DGK) məlumatında bildirilir. Məlumata əsasən, bu, 2024-cü ilin eyni aylarındakı göstərici ilə müqayisədə 424.3 milyon ABŞ dolları və ya 7.5 faiz azdır.

Hesabat dövründə Türkiyə ilə ticarət dövriyyəsi Azərbaycanın ümumi ticarət dövriyyəsinin 11.66 faizi həcmində olub. Bununla da sözügedən ölkə Azərbaycanın ən çox ticarət əməliyyatları apardığı ölkələr sırasında ikinci pillədə qərarlaşıb.

Cari ilin yanvar-noyabrında Azərbaycandan Türkiyəyə 3 milyard dollarlıq məhsul ixracı qeydə alınıb. Bu, ötən ilin eyni dövrü ilə müqayisədə 440 milyon ABŞ dolları və ya 12.5 faiz azdır.

Hesabat dövründə Türkiyədən Azərbaycana isə 2.125 milyard ABŞ dolları dəyərində ixrac əməliyyatları icra olunub. Bu isə 2024-cü ilin eyni dövrü ilə müqayisədə 15.7 milyon ABŞ dolları və ya 0.7 faiz artım deməkdir.

Əvəzində isə Azərbaycanın başqa bir qonşusu -Rusiya ilə ticarət dövriyyəsi bir qədər də güclənib. Bu ilin 11 ayında Azərbaycan Rusiyaya 1 milyard 87 milyon dollar dəyərində (+0.3 faiz) məhsul ixrac edib. İdxal isə 3 milyard 420 milyon dollar (+3.8 faiz) təşkil edib.

Bununla belə, Rusiya Azərbaycanın ticarət dövriyyəsində 10.11 faizlə üçüncü yeri tutur.

Son bir ildə Azərbaycanla Rusiyanın münasibətlərində siyasi baxımdan müəyyən gərginlik olduğu iddia edilirdi. Xüsusilə də ötən il dekabrın 25-də Bakıdan Qroznıya uçan təyyarənin Qazaxıstanda qəzaya uğraması və 38 nəfərin həlak olmasının münasibətlərin gərginləşməsinə səbəb olduğu vurğulanırdı. Bəzi ekspertlər deyir ki, əslində Qərb ölkələri və onun dəyərlərinə sözügedən hər iki ölkənin rəhbərliyində eyni münasibət bəsləndiyindən onların arasında reallıqda dərin böhran hökm sürmür.

Prezident Vladimir Putin Rusiyada xarici məhkəmələrin qərarlarının icra olunmamasını nəzərdə tutan qanunu imzalayıb.

Sənədə əsasən, səlahiyyətləri beynəlxalq müqaviləyə və ya BMT Təhlükəsizlik Şurasının qətnamələrinə əsaslanmayan beynəlxalq məhkəmə orqanlarının qərarları da icra olunmayacaq.

Bu qanun Beynəlxalq Cinayət Məhkəməsinin (BCM) hökmlərinə şamil ediləcək. Bunu Rusiya Hüquqşünaslar Assosiasiyasının İdarə Heyətinin sədri Vladimir Qruzdev bir müddət öncə deyirdi. NSP vəkillər bürosunun tərəfdaşı İlya Raçkovun sözlərinə görə, Ukrayna ilə bağlı mümkün tribunalın qərarları da məhdudiyyətlərə məruz qalacaq.

2023-cü ilin martında BCM Putin və uşaq hüquqları üzrə müvəkkil Mariya Lvova-Belovanın həbsinə order verib. Onlar Ukraynanın işğal olunmuş ərazilərindən uşaqların qanunsuz deportasiyasına görə məsuliyyət daşımaqda ittiham olunurlar. Rusiya Təhlükəsizlik Şurasının katibi, keçmiş müdafiə naziri Sergey Şoyqu, Rusiya Silahlı Qüvvələrinin Baş Qərargah rəisi Valeri Qerasimov, Rusiya Hərbi-Hava Qüvvələrinin komandanı Sergey Kobılaş və Rusiya Qara Dəniz Donanmasının keçmiş komandanı Viktor Sokolov barəsində də həbs orderləri verilib.

Dekabrın 12-də Rusiya məhkəməsi BCM-in prokurorunu və səkkiz hakimini qiyabi olaraq 3 il yarımdan 15 ilədək azadlıqdan məhrumetmə cəzasına məhkum edib. Onlar bilərəkdən təqsirsiz şəxsin cinayət məsuliyyətinə cəlbində, qanunsuz cinayət işi başlamaqda, qanunsuz həbs, beynəlxalq qoruması olan şəxslərə hücumun hazırlanmasında təqsirli biliniblər.