Keçid linkləri

2024, 29 Mart, Cümə, Bakı vaxtı 11:44

Yalçın İmanov Baş Prokurorluğu məhkəməyə verdi


Y.İmanov
Y.İmanov

Vəkil Yalçın İmanov Baş Prokurorluğu məhkəməyə verib. Səbəb isə onun hüquqlarını müdafiə etdiyi şəxslərə işgəncə verilməsi haqda prokurorluğa göndərdiyi müraciətə 10 ay ərzində cavab ala bilməməsi, çıxarılan qərarların ona verilməməsidir.

Bu barədə AzadlıqRadiosuna məlumat verən Y.İmanov bildirib ki, iddia ərizəsi martın 27-də 1 Saylı Bakı İnzibati-İqtisadi Məhkəməsinə göndərilib. Vəkilin sözlərinə görə, hüquqlarını müdafiə etdiyi Aqil İsmayılovBəhruz Əsgərovun (hər ikisi Nardaran hadisələrində həbs olunub-red.) işgəncələrə məruz qalması, ləyaqətlərinin alçaldılması haqda şikayətləriylə əlaqədar 2017-ci il iyunun 10-da Baş Prokurorluğa məktubla müraciət edib. Amma bu günə qədər prokurorluqdan heç bir cavab almayıb:

***Buna da bax-Vəkillər Kollegiyası Yalçın İmanovla bağlı rəyi saxtalaşdırıb?

«Sonradan şifahi şəkildə mənə dedilər ki, araşdırma aparılıb və cinayət işinin başlanması rədd olunub, prokurorluğa yazılı şəkildə müraciət edib qərarların surətini ala bilərəm. Oktyabrın 20-də Baş prokuror Zakir Qaralova yazılı qaydada müraciət edib qərarların surətini istəmişəm. Nəticəsi olmadığına görə dekabrın 25-də bir daha Qaralova məktub göndərmişəm. Yenə də heç bir nəticə yoxdur. Martın 27-də Baş Prokurorluğun qəbul otağına gedib, rədd qərarını çıxarmış prokurorlarla əlaqə saxladım. Biri ümumiyyətlə, telefona cavab vermədi, o biri isə heç bir əsas gətirmədən qərarı verməkdən imtina etdi. Baş Prokurorluğun daxili işlər orqanlarında istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəisi Kamal Qılıcov isə «sənin vəkillik fəaliyyətin dayandırılıb, ona görə də qərarlar sənə verilməyəcək» dedi».

Y.İmanov deyir ki, qərarların ona verilməməsi qanunsuzdur. Çünki həmin qərarlar o, adları çəkilən şəxslərə vəkillik etdiyi dövrdə qəbul olunub. İkincisi, onun vəkillik fəaliyyətinə xitam verilməsi haqda hələlik məhkəmə qərarı yoxdur: «Vəkillik fəaliyyətimə xitam verilməsinə dair qanuni qüvvəyə minmiş məhkəmə qərarı olana qədər vəkil hesab edilirəm. Üstəlik, vəkillik fəaliyyətimin dayandırılması müştərilərim qarşısında öhdəliyimi aradan qaldırmır. Mən Avropa Məhkəməsində həmin şəxsləri təmsil edirəm».

***Buna da bax-Vəkillər Kollegiyası jurnalistləri qarayaxmada suçlayır

Y.İmanov məhkəmədən Baş Prokurorluğun üzərinə qərarları ona vermək öhdəliyi qoymasını istəyir.

Xatırlatma

Vəkillər Kollegiyası Rəyasət Heyətinin 2017-ci il noyabrın 20-də verdiyi qərarla Y.İmanovun vəkillik fəaliyyəti dayandırılıb. Səbəb kimi isə avqust ayında Penitensiar Xidmətin rəis əvəzi olmuş Oqtay Məmmədovun ondan şikayəti göstərilib.

Y.İmanov Nardaran hadisələrinə görə 20 il həbs cəzası almış Abbas Hüseynovun ona təqdim etdiyi yazılı izahatına və Qobustan həbsxanasında müvəkkilinin üzərində gördüyü xəsarətlərə əsaslanaraq, mətbuata açıqlamasında onun işgəncəyə məruz qalmasından danışıb. Penitensiar Xidmətin rəhbərliyi bunu «ölkədə ictimai-siyasi vəziyyətin gərginləşməsinə, bu dövlətin çiçəklənməsini gözü götürməyən qüvvələrə xidmət edən addım» kimi qiymətləndirib.

Vəkillər Kollegiyasının Rəyasət Heyəti də vəkilin öz müvəkkilinə istinadən onun həbsxanada işgəncəyə məruz qalması haqda söylədiklərini «vəkillik fəaliyyətinə yaraşmayan hərəkət» hesab edib.

Nardaran məhbusu A.Hüseynov Penitensiar Xidmətin şöbə rəisi, Ombudsman Aparatının nümayəndələri ilə görüşündə də onlara işgəncəyə məruz qalması haqda yazılı izahat verib. Vəkil məsələ ilə əlaqədar prokurorluğa və məhkəməyə müraciət edib.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG