Keçid linkləri

Təcili xəbərlər
2018, 18 İyul, çərşənbə, Bakı vaxtı 23:50

İcra başçısı Nardaran hadisələrinə görə tutulanlar haqda nə yazıb


Taleh Qaraşov

«Cinayət işinin materialları arasında Lənkəranın icra başçısının Elman Ağayev haqda verdiyi xasiyyətnamə var. İcra başçısı yazır ki, «Elman təhlükəli ünsürdür, təcrid olunmalıdır». Bu nə deməkdir axı? Elə təkcə bu faktın özü bu işin də, Elmanın həbsinin də sifarişli olduğunu deməyə əsas verir», – Nardaran hadisələrinə görə həbs olunmuş ilahiyyatçı Elman Ağayevin vəkili Akif Əliyevin sözləridir.

E.Ağayev başqa bir ilahiyyatçı Zülfüqar Mikayılov və daha 10 nəfərlə birlikdə Nardaran hadisələrinə görə Bakı Ağır Cinayətlər Məhkəməsində mühakimə olunur. Doqquz aydır davam edən bu prosesdə məhkəmə istintaqı başa çatıb, prokuror təqsirləndirilən şəxslərə 14 ildən 18 ilə qədər həbs cəzası istəyib. Hazırda vəkillərin müdafiə çıxışı mərhələsidir.

«YAXŞI Kİ, FEMİDANIN GÖZÜ BAĞLIDIR, BURADA OLANLARI GÖRMÜR»

Dövlət ittihamçısı təqsirləndirilən şəxslərdən E.Ağayevə 15 il cəza verilməsini təklif edib. Vəkil isə deyir ki, onun heç bir günahı yoxdur, sifarişlə həbs olunub. Müdafiəçi məhkəmədə bu iş üzrə lazımi araşdırma aparılmamasından, tərəflərin bərabərliyi prinsipinin pozulmasından, hakimlərin prokurorun mövqeyindən çıxış etməsindən gileylənib:

***Buna da bax-Prokuror 'Nardaran məhbusları'na 180 il həbs cəzası istədi

«Məhkəmə prosesi boyunca müdafiə tərəfi sıxışdırıldı. Femidanın tərəzisinin bir gözünə bizi, o biri gözünə prokuroru qoyanda görürük ki, tərəzi əyridir. Yaxşı ki, Femida xanımın gözü bağlıdır, burada olanları görmür. Elman Ağayev həbs olunarkən protokollara imza atmış müdafiəçi var. Guya, dövlət hesabına vəkil təyin olunub. Halbuki, həmin adam Bakıda yaşayır və həmin vaxt Lənkəranda olmayıb. Həmin imzalar da saxtalaşdırılır. Biz məhkəmədə bu məsələnin araşdırılması haqda vəsatət qaldırdıq, amma təmin olunmadı. Bu adamların günahsız, ittihamların da qurama olduğunu görmək üçün heç hüquqşünas olmağa ehtiyac yoxdur, açıq-aşkar görünür. Bu cür işlərdə günahsız adamlara qanunsuz hökm oxumaqla tək o adamın özünün yox, ailəsinin də həyatını məhv edirlər».

«ONLAR BAŞQA DİN XADİMLƏRİ KİMİ PUL ALMAYIB, BU DA KİMLƏRİSƏ NARAHAT EDİB»

E.Ağayevin həbsi ilə əlaqədar Avropa Məhkəməsinə şikayət edildiyini, yerli və beynəlxalq insan haqları təşkilatlarının onu siyasi məhbus kimi tanıdığını deyən vəkil Lənkəranın icra başçısı Taleh Qaraşovun məktubu haqda da danışıb:

***Buna da bax-Anası: 'Abbası qızmar günün altında üç saat dəmirə bağlayıblar' [video]

«İcra başçısının yazdığı xasiyyətnamədə Elman demək olar ki, bütün ağır cinayətlərdə ittiham edilir. İcra başçısı maraqlı fiqurdur, prezidentin rayondakı naibidir. İşin içindəki bu məktub Elmanın həbsinin siyasi motivli olmasından xəbər verir. Elman dini ayinləri icra edən, Quranda yazılanlara əməl edən şəxsdir. Bu da cinayət deyil. O, vətənə sevgini təbliğ edib, vəhhabilərlə, İŞİD-lə, terrorla mübarizədən danışıb. Onun, Zülfüqar Mikayılovun ətrafına çox adam toplaşıb. İnsanlar onlara inanıb. Çünki onlar başqa din xadimləri kimi dini ayinlərə görə pul almayıblar. Bu da kimlərisə narahat edib».

Vəkil çıxışının sonunda məhkəmədən bəraət hökmü çıxarılmasını istəyib.

«BU ADAMLAR HARANI PARTLADIBLAR, HANSI DÖVLƏTİ HƏDƏLƏYİBLƏR?»

Təqsirləndirilən şəxslərdən Cabir Əliyev və Mübariz İbrahimovun vəkili Bəhruz Bayramov da ittihamların absurd olduğunu, məhkəmə önünə çıxarılan 12 nəfərin heç birinin cinayət törətmədiyini deyib. Təqsirləndirilən şəxslərə verilən ittihamların hər biri haqda ayrıca danışan Bayramov bildirib ki, onlarda silah olmayıb:

«Bir neçə köhnə silahı adamların evinə qoyub sonra da götürüblər. Adını da qoyublar ki, filankəsin evindən qumbara tapıldı».

Terrorçuluq suçlamasına gəlincə, vəkil sual edib ki, bu adamlar haranı partladıblar, yaxud hansı ölkəni, hansı təşkilatı hədələyiblər?

***Buna da bax-Yalçın İmanov 'ölkədə sabitliyi pozmaqda' suçlanır

«Məsələ sadədir, istintaq orqanı bilib ki, nə yazsa, onsuz da məhkəmədə keçəcək, ona görə nə gəldi yazıb işi bağlayıblar. Bu, ilk növbədə məhkəmənin özünə hörmətsizlikdir», – vəkil bildirib.

B.Bayramov da, onun ardınca çıxış edən həmkarı, təqsirləndirilən Mehman Məmmədovun vəkili Xavər İsmayılova da hüquqlarını müdafiə etdiyi şəxslər haqqında bəraət hökmü çıxarılmasını istəyib.

Məhkəmə oktyabrın 2-də digər vəkillərin çıxışı ilə davam edəcək.

XATIRLATMA

2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyatda ikisi polis olmaqla, altı nəfər həlak olub. Rəsmi ittihama görə, radikal silahlı dəstə polis əməkdaşlarına silahlı müqavimət göstərib və ölüm hadisələri bu qarşıdurmada baş verib.

Nardaranda və Sabunçu Rayon Polis İdarəsinin qarşısında baş verən hadisələrə görə 70-dən çox (hüquq müdafiəçilərinin siyahısında bu rəqəm 80-dən çox göstərilir) adam həbs olunub. Onların bir qisminə silah saxlama ittihamı ilə ilyarımdan 6 il 6 ayadək həbs cəzası kəsilib. 40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib.

Üç qrupa ayrılan cinayət işi Bakı Ağır Cinayətlər Məhkəməsinə göndərilib. «Müsəlman Birliyi» Hərəkatının sədri Taleh Bağırov və daha 17 nəfərin məhkəməsi yekunlaşıb. T.Bağırov, onun müavini Abbas Hüseynova 20 il, digərlərinə isə 10 ildən 19 ilədək həbs cəzası verilib.

Daha iki qrupun məhkəməsi davam edir. Ötən həftə isə əlavə iki nəfərin istintaqı yekunlaşıb. İş məhkəməyə göndərilib.

Nardaran olayları ilə bağlı həbs edilənlərin əksəriyyəti məhkəmələrində tutularkən və ilkin dindirilmədə ağır işgəncələrə məruz qaldıqlarını bildiriblər. Onlar verilən ittihamları qəbul etməyiblər.

Ancaq Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin və digər hüquq-mühafizə orqanlarının əməkdaşları məhkəmə prosesində işgəncə şikayətlərini təkzib ediblər.

Günün bütün mövzuları

XS
SM
MD
LG