„Biz öz fəaliyyətimizlə nəinki Qafqaz regionunda münasibətlərimiz çərçivəsində birliyi möhkəmləndiririk, həm də Azərbaycan dünyada bütün müsəlmanların həmrəyliyi üçün böyük işlər görür“.
Bu sözləri prezident İlham Əliyev dekabrın 2-də Qafqaz Xalqları Ali Dini Şurasının üzvlərini Bakıda qəbul edərkən deyib.
„Bu il İslam Əməkdaşlıq Təşkilatının Sammiti keçirildi. Tədbirdə Azərbaycanın İslam həmrəyliyindəki roluna dəstək bir daha vurğulandı. Həmçinin dünyanın bütün müsəlmanları bu ilin aprelində erməni təcavüzünü pisləyiblər və Ermənistan-Azərbaycan, Dağlıq Qarabağ münaqişəsinin tənzimlənməsi üzrə kontakt qrupu yaradıblar“.
"SİZİN BU MƏSƏLƏDƏ FƏALİYYƏTİNİZ HƏLLEDİCİ OLDU"
İlham Əliyev 2016-cı ildə dünya katoliklərinin rəhbəri Roma Papasının Azərbaycana rəsmi səfərinin də mühüm hadisə olduğunu vurğulayıb.
„O, Katolik Kilsəsində ibadət etdi, sonra Heydər Məscidini ziyarət etdi, mötəbər şeyxlə, eləcə də digər dini konfessiyaların rəhbərləri ilə görüşü oldu. Roma Papası buradan, Bakıdan bütün dünyaya yaxşı mesaj göndərdi. Yəni, bizim multikulturalizm sahəsində əldə etdiyimiz nailiyyətlər bütün dini aləmdə layiqincə dəyərləndirilib“.
Şimali Qafqaz Müftiləri Əlaqələndirmə Şurasının sədri, Rusiya Federasiyası Qaraçay-Çərkəz Respublikasının müftisi İsmayıl Berdiyev İlham Əliyevə ilk təşəkkürünü Rusiya-Türkiyə münasibətləri ilə bağlı bildirib.
„Mən ilk növbədə istərdim ki, Sizə Rusiya ilə Türkiyə arasında münasibətlərin yaxşılaşdırılması üçün etdiklərinizə görə minnətdarlığımı bildirim. Bu münaqişə baş verəndə, inanın, mənim ürəyim ağrıyırdı. Müsəlman ölkəsi olan Türkiyə ruhən bizə doğmadır. Buna görə də çox ağır idi. Sizin bu məsələdə fəaliyyətiniz həlledici oldu. Atanızın müdrikliyi Sizə də keçib, inanın. Siz bu işi gördünüz, buna görə Sizə “Çox sağ ol” deyirik“.
„BİZ ELÇİBƏYİN VAXTINDA DA BURADA OLMUŞDUQ...“
İsmayıl Berdiyev çıxıçında Heydər Əliyevlə Əbülfəz Elçibəyi də müqayisə edib.
„...Atanızın fəaliyyəti, ümumiyyətlə, ölkəni xilas etdi. Biz Elçibəyin vaxtında da burada olmuşuq, baxmışıq. Müqayisə etməli çox şeylər var. İndi tamam başqa vaxtdır. Azərbaycan tamam başqa ölkədir. Siz ötən ilin yayında Avropa Oyunlarını keçirdiniz. Bəli, şeyxülislam deyir ki, indi isə İslam ölkələrinin Oyunları keçiriləcək. Ümid edirəm ki, biz də iştirak edəcəyik“.
„BU MÜDRİKLİK ONA SİZİN ATANIZDAN KEÇİB“
İsmayıl Berdiyev Allahşükür Paşazadə haqqında da tərifli sözlər deyib.
“Dünən Qafqaz Xalqları Ali Dini Şurasının iclasını keçirdik. Şeyxülislam bizim ağsaqqalımız idi. Onun müdrikliyi həqiqətən də kömək edir. Bax, bu müdriklik ona Sizin atanızdan keçib. Çünki o, onunla birlikdə çox olub“.
Sonda İsmayıl Berdiyev Prezident İlham Əliyevə Qaraçay-Çərkəz milli geyimi və xəncər hədiyyə edib.
