İran ölkənin şimalında hərbi təlim keçirib. Bu haqda "Mehr" xəbər agentliyi avqustun 13-də məlumat yayıb. Bu təlimlər Tehranın İsrailə qarşı cavab tədbiri görmək vədləri fonunda baş verir.

İyulun 31-də ABŞ və Aİ-nin terrorçu saydığı HƏMAS radikal qruplaşmasının lideri İsmayıl Haniyə Tehranda öldürülüb. İran və HƏMAS İsraili ittiham etsə də, Təl-Əviv birbaşa məsuliyyəti üzərinə götürməyib.

Tehran Haniyənin qətlinə görə qisas alacağını bəyan edib.

"Reuters" təlimlərin yerli vaxtla 7:30-dan 8:30-dək Xəzər dənizi sahilindəki Gilan vilayətində keçirildiyini yazır. "Mehr" yerli rəsmiyə istinadla bildirib ki, məqsəd ordunun donanma qüvvələrinin müdafiə hazırlığını gücləndirməkdir.

Bu, son üç gündə İranın ikinci hərbi təlimidir.

İsrail hazırda Qəzza zolağında HƏMAS ekstremistləri ilə müharibə aparır. HƏMAS ötən ilin oktyabrında İsrailə hücum edərək 1200 nəfəri öldürüb, 250 nəfəri girov götürüb. Bundan sonra İsrail Qəzzada əməliyyatlara başlayıb.

13 avqust

İran Qərbin çağırışlarını rədd edir

İran avqustun 13-də İsrailə cavab hücumu təhdidini geri götürməklə bağlı Qərbin çağırışlarını rədd edib.

İran XİN-in sözçüsü Nasir Kənani deyib ki, belə bir xahişin "siyasi məntiqi yoxdur, beynəlxalq hüququn prinsip və qaydalarına ziddir", İsrailə "açıq və praktik" dəstək deməkdir.

ABŞ İranın bu həftə İsrailə hücum edə biləcəyini deyir

Birləşmiş Ştatlar avqustun 12-də bildirib ki, kəşfiyyat dəyərləndirmələri ilə razıdır, İran və/yaxud onun Yaxın Şərqdəki proksiləri bu həftənin əvvəlində İsrailə hücum edə bilərlər. Vaşinqton Tehranı davamlı hədələrdən əl çəkməyə çağırıb.

Milli təhlükəsizlik sözçüsü Con Körbi (John Kirby) jurnalistlərə deyib ki, prezident Co Bayden Qərbdəki əsas müttəfiqlərlə vəziyyəti müzakirə edib. Onun sözlərinə görə, Vaşinqton İranın İsrailə tezliklə hücum edə biləcəyi barədə xəbərlərə ciddi yanaşır.

ABŞ və Aİ-nin terrorçu saydığı HƏMAS radikal qruplaşmasının siyasi lideri İsmayıl Haniyənin iyulun 31-də Tehranda qətlinə görə İran İsraili ittiham edir və buna görə cavab verəcəyini bildirib. Bu isə regionda daha böyük münaqişənin başlaya biləcəyi ilə bağlı qorxu yaradıb.

İsrail Haniyənin qətlinə görə birbaşa məsuliyyəti üzərinə götürməyib.

ABŞ regiondakı qüvvələrini gücləndirib

"Ciddi hücumlara hazır olmalıyıq. Bu səbəbdən son bir neçə gündə regiondakı qüvvələr nisbətimizi gücləndirmişik", – Körbi vurğulayıb.

"Regionda əhəmiyyətli sayda qüvvəmiz var. Son bir neçə gündə onların nisbətini müəyyən qədər dəyişmişik. Prezident əmindir ki, İsrailin müdafiəsinə kömək göstərməyə qadirik", – Körbi əlavə edib.

Artan gərginlik fonunda Pentaqon Yaxın Şərqdə qüvvələrini gücləndirib. Vaşinqton müttəfiqi İsrailə dəstəyini dəfələrlə vurğulayıb.

Britaniya, Fransa, Almaniya və İtaliya ilə birgə bəyanatda Ağ ev bildirib: "İranın təcavüzünə və İranın dəstəklədiyi terrorçu qrupların hücumlarına qarşı İsrailin müdafiəsinə dəstəyimizi ifadə etdik".

Bəyanat müəllifləri həmçinin İranı İsrailə qarşı hərbi hücumla bağlı davam edən təhdidləri azaltmağa çağırırlar.

Almaniya kansleri Olaf Şolts və Britaniyanın baş naziri Keir Starmer İran prezidenti Məsud Pezeşkiana ayrı-ayrılıqda telefon zənglərində regionda hərbi gərginliyi qızışdırmaqdan çəkinməyə çağırıb. Vaşinqtonun Tehranla diplomatik münasibətləri yoxdur.

Pezeşkian nə deyir

Şoltsla danışıqdan sonra İranın rəsmi IRNA xəbər agentliyi prezident Pezeşkiana istinadla yazıb ki, "İran bütün ölkələrlə təmasların genişlənməsini alqışlayır, problemləri danışıqlar yoluyla həll etməyin gərəkdiyini vurğulayır, amma təzyiqə, sanksiyalara, qorxutma və təcavüzə boyun əyməyəcək".

"İran təcavüzkarlara beynəlxalq qaydalara uyğun şəkildə cavab verməyi öz hüququ sayır", – Pezeşkian deyib.

HƏMAS ekstremistləri oktyabrın 7-də İsrailin cənubuna girərək 1 min 200 nəfəri qətlə yetirib, 250 nəfəri girov götürüb.

Bundan sonra İsrail Qəzza zolağında hava və quru əməliyyatına başlayıb. HƏMAS-ın səhiyyə rəsmiləri 39 minə yaxın insanın öldürüldüyünü deyirlər.

Avstraliya tarixində ilk dəfə ordunun rəhbəri qadın olacaq. Bu haqda hökumət aprelin 13-də məlumat yayıb.

General-leytenant Syuzan Koyl hazırda birgə imkanlar üzrə rəisdir. O, iyuldan quru qoşunlarının komandanı olacaq, bu vəzifədə general-leytenant Saymon Stüartı əvəz edəcək.

Hazırda Avstraliya ordusunun sıralarında qadın zabitlərin sayı artır. Bu, ordunun sistemli cinsi qısnama və ayrıseçkilik ittihamları ilə üzləşməsi fonunda baş verir.

"İyuldan Avstraliya ordusunun 125 illik tarixində ilk dəfə qadın quru qoşunları komandanı olacaq", – baş nazir Entoni Albaneze bildirib.

Müdafiə naziri Riçard Marlz Koylun təyinatını "əsl tarixi məqam" adlandırıb.

55 yaşlı Koyl 1987-ci ildə hərbi xidmətə başlayıb, komandanlıqda bir sıra vəzifələrdə çalışıb.

"Reuters" yazır ki, hazırda qadınlar Avstraliya Müdafiə Qüvvələrinin (ADF) təxminən 21 faizini, yüksək rəhbər vəzifələrin isə 18.5 faizini təşkil edir. ADF 2030-cu ilədək qadınların ümumi iştirak səviyyəsini 25 faizə çatdırmağı hədəf qoyub.

Ötən ilin oktyabrında ADF-yə qarşı kollektiv iddia qaldırılıb, ordunun minlərlə qadın zabiti sistemli cinsi qısnama və ayrıseçkilikdən qoruya bilmədiyi iddia olunub.

Pasxa atəşkəsinə baxmayaraq, Ukraynanın şərqi Donetsk vilayətində Rusiya qoşunları iki nəfəri öldürüb, bir nəfər yaralanıb.

Region qubernatoru Vadım Filaşkin Telegram-da yazıb ki, aprelin 12-də Kramatorsk və Drujkovka şəhərlərində bir nəfər həyatını itirib.

Rusiya və Ukrayna bir-birini 32 saatlıq atəşkəsi pozmaqda ittiham edib. Atəşkəs aprelin 11-dən 12-si gecə yarısınadək davam edib.

Ukrayna rəsmiləri Pasxa atəşkəsi müddətində Rusiya hərbçilərinin Xarkov vilayətində dörd ukraynalı hərbi əsiri də güllələyərək öldürdüyünü bildirib. Ancaq detallar açıqlanmayıb. Rusiya bu məlumatı şərh etməyib. Bu xəbəri müstəqil şəkildə təsdiqlətmək mümkün olmayıb.

Ukrayna Rusiyanın atəşkəsi 10 min 721 dəfə pozduğunu bildirib. Hava zərbələrinin qeydə alınmadığı açıqlanıb.

Rusiya Müdafiə Nazirliyi isə bazar gününə keçən gecə Ukraynanın atəşkəs min 971 dəfə pozduğunu bildirib.

Aprelin 9-u səhər Rusiya qoşunları Ukraynanın Zaporojye rayonuna zərbə endirib. Bir nəfər həlak olub, dörd nəfər yaralanıb.

Dnepropetrovsk vilayətinə hücumlar nəticəsində isə iki nəfər yaralanıb. Çoxmərtəbəli və fərdi evlərə, qaraja və avtomobillərə ziyan dəydiyi bildirilir.

Aprelin 8-i axşam saatlarında Rusiya hərbçiləri Odessa vilayətində yarımstansiyaya zərbə endirib. Vilayət administrasiyasının rəhbəri Oleq Kiper infrastruktur obyektinin zədələndiyini yazıb, detalları açıqlamayıb.

Ukrayna Silahlı Qüvvələrinin məlumatına görə, Rusiya ötən gecə Ukraynaya 119 pilotsuz aparatla hücum edib, onlardan 99-u hava hücumundan müdafiə qüvvələri vurub. Daha 16 dron 11 müxtəlif məkanda düşüb.

Rusiya Müdafiə Nazirliyi isə ötən gecə Kursk və Astraxan vilayətləri, həmçinin Krasnodar diyarı və Azov dənizi üzərində Ukraynaya məxsus 69 dronun vurulduğunu bildirir.

Krasnodar diyarında dron hücumundan bir kişi həlak olub. Diyarın operativ qərargahı bildirib ki, Krımsk şəhərində "PUA qalıqlarının neft bazasının ərazisinə düşməsi nəticəsində" üç nəfər xəsarət alıb.

Bryansk vilayətinin qubernatoru Aleksandr Boqomaz sosial şəbəkədə yazıb ki, Ukrayna hərbçiləri Klimovo rayonunda avtomobili vurub, bir qadın yaralanıb.

Rusiya dronu Ukraynanın Nikopol şəhərində bələdiyyə avtobusunu vurub, azı 4 sərnişin həlak olub, 16 nəfər yaralanıb. Ukrayna rəsmiləri bunun FPV dronu olduğunu deyirlər, yəni operator sərnişinlərin mülki şəxslər olduğunu çox güman, görürdü.

Aprelin 7-də Dnepropetrovsk vilayətinin şərqində yerləşən Nikopol şəhərinin mərkəzində bələdiyyə avtobusu dayanacağa yaxınlaşarkən dron hücumuna məruz qalıb. Vilayət hərbi administrasiyasının rəhbəri Oleksandr Hanjanın sözlərinə görə, həm avtobusun içində, həm də minmək üçün gözləyən insanlar olub.

“Bu, mülki əhaliyə qarşı qəsdən törədilmiş terror idi”, – o, Telegram-da yazıb.

“Çox qorxuludur, çünki avtobuslar işə gedən insanlarla dolu olur”, – Nikopol sakinlərindən biri hücumdan az sonra AzadlıqRadiosunun Ukrayna xidmətinə deyib.

“Təsəvvür edin, tək bir zərbədən nə qədər qurban ola bilərdi”, – o əlavə edib.

“Burada necə yaşayacağımızı bilmirik, şəhərdə necə hərəkət edək, ümumiyyətlə necə sağ qalaq. Çox qorxuludur”, – deyən qadın zərbədən cəmi 10 dəqiqə əvvəl həmin yerin yaxınlığında olduğunu da qeyd edib.

Ukrayna hakimiyyəti hadisəyə FPV dronun səbəb olduğunu bildirib. Bu dronları operator birbaşa video bağlantı ilə uzaqdan idarə edir, pilot hədəfini yaxından görə bilir.

Vilayət qubernatoru Rusiya qüvvələrinin ötən gecə Dnepropetrovsk vilayətinə azı 10 dəfə hücum etdiyini deyib. Onun sözlərinə görə, dron zərbəsindən bir evdə yanğın baş verib, 11 yaşlı uşaq həyatını itirib, daha 5 nəfər yaralanıb.

Ukrayna Hərbi Hava Qüvvələri aprelin 7-də bildirib ki, Rusiya ötən gecə Ukraynaya qarşı 110 dron buraxıb.

Rusiyanın Vladimir vilayətinə dron hücumunda üç nəfər ölüb

Rusiyanın Leninqrad vilayətinə yenidən dron hücumu olub. Vilayətin qubernatoru Aleksandr Drozdenko bildirib ki, hava hücumundan müdafiə qüvvələri region üzərində 22 dronu vurub.

Ukraynanın "Supernova+" və "Exilenova+" monitorinq kanalları isə Ust-Luqa limanının hücuma məruz qaldığını yazır.

Ukrayna tərəfi hələlik hücumla bağlı şərh verməyib.

Bu il martın 25-dən Ukrayna dronları ixrac üçün vacib Ust-Luqa limanına aktiv hücum edir. Zərbələr nəticəsində üç neft tankeri, bir neçə yanacaq rezervuarı, yanalma körpüləri və "Novatek"in infrastrukturu zədələnib. "Bloomberg" aprelin 5-də yazıb ki, bir neçə günlük fasilədən sonra Ust-Luqa limanı neft yüklənməsi bərpa edilib.

Vladimir vilayətinə də dron hücumu olub. Qubernator Aleksandr Avdeyev bildirib ki, dronlardan biri Aleksandrovski rayonunda ikimənzilli yaşayış evinə düşüb, nəticədə valideynlər və onların 2014-cü il təvəllüdlü oğlu həlak olub. Beş yaşlı qız isə hazırda qohumlarının yanındadır.

Rusiya Müdafiə Nazirliyi aprelin 7-nə keçən gecə Ukraynanın 45 dronunun vurulduğunu açıqlayıb.

Ukraynanın atəşkəs təklifi

Ukrayna Prezidenti Volodimir Zelenski enerji infrastrukturuna hücumların dayandırılması üçün atəşkəs təklif edib.

“Əgər Rusiya bizim enerji infrastrukturumuza zərbələri dayandırmağa hazırdırsa, biz də eyni şəkildə cavab verməyə hazır olacağıq”, – Zelenski aprelin 6-da müraciətində deyib. O, təklifin ABŞ vasitəsilə çatdırıldığını əlavə edib.

Hazırda Rusiya Ukrayna ərazisinin 20 faizini tutub, Kiyevdən qüvvələrini Donetsk vilayətindən çıxarmasını tələb edir.

Donetsk və Luqanskın daxil olduğu Donbasa nəzarət ABŞ-nin vasitəçilik etdiyi sülh danışıqlarında əsas mübahisəli məqamdır.

Son aylar ABŞ-Ukrayna və Rusiya danışıqlarının bir neçə raundu keçirilib. Amma fevralın 28-də ABŞ və İsrail İrana aviazərbələrə başlayandan Ukrayna və Rusiya arasında görüş olmayıb.

"Integrity" kosmik gəmisi göyərtəsində dörd astronavtla ABŞ-də Kanaveral burnundakı kosmodromdan buraxılıb. İnsanlar yarım əsrdən də çox keçəndən sonra ilk dəfə "Artemida-2" missiyası çərçivəsində Aya yollanıblar.

Gəmi Aya enməyəcək. O, Ayın orbitinə daxil olmadan, təxminən 8 min kilometr məsafədə Ayın ətrafından dolanacaq. Bunun altı gün sonra baş verəcəyi gözlənilir. Gəmi Yerdən maksimum 400 min kilometr məsafədə olacaq.

Astronavtlar Yerə 10 gündən sonra qayıdacaqlar.

"Artemida-2" ABŞ-nin yeni Ay proqramının əsas elementidir. Uçuş zamanı astronavtlar kosmosun dərinliyində həyat təminatı sistemini sınaqdan keçirməlidirlər.

Proqramın davam etdirilməsi missiyanın uğurundan asılıdır. Bu proqram çərçivəsində gələn il Aya enişlə pilotlu uçuş gerçəkləşdirilə bilər.

Ekipaj komandir Rid Uaysmen, pilot Viktor Qlover, mütəxəssis Kristina Kox və kanadalı astronavt Ceremi Hansendən ibarətdir.

Böyük Britaniyanın Rusiyadakı səfirliyinin ikinci katibi Yanse Cerardus kəşfiyyat fəaliyyətində şübhəli bilinir, o, deportasiya ediləcək. Bunu TASS agentliyi FSB-nin mətbuat mərkəzinə istinadla bildirir.

"Rusiya Federal Təhlükəsizlik Xidməti (FSB) adı çəkilən diplomatın Rusiya Federasiyasının təhlükəsizliyinə təhdid yaradan kəşfiyyat və təxribat fəaliyyətinin əlamətlərini müəyyənləşdirib, rusiyalı iqtisadi ekspertlərlə qeyri-rəsmi görüşlərdə məxfi məlumat əldə etmək cəhdlərini qeydə alıb", – FSB-nin məlumatında deyilir.

FSB iddia edir ki, Cerardus viza alarkən yalan məlumat verib. Nəticədə onun diplomatik akkreditasiyası ləğv edilib, iki həftə ərzində ölkədən çıxması tapşırılıb.

Rusiya Xarici İşlər Nazirliyi (XİN) Britaniyanın Rusiyadakı müvəqqəti işlər vəkili Deyni Dolakiyaya etiraz təqdim edib. FSB rusiyalıları Britaniya diplomatları ilə təmaslardan çəkinməyə çağırıb, bunun cinayət məsuliyyəti yarada biləcəyi barədə xəbərdarlıq edib.

Britaniya Xarici İşlər Nazirliyi hələlik əməkdaşının qovulması ilə bağlı xəbərləri şərh etməyib.

Rusiya XİN sonuncu dəfə 2026-cı il yanvarın ortalarında Moskvadakı Britaniya səfirliyinin əməkdaşının akkreditasiyasını ləğv edib, o da Britaniya kəşfiyyat xidmətləri ilə əlaqədə şübhəli bilinib.

Rusiya prezidenti Vladimir Putin Avrasiya İqtisadi Birliyi ölkələrinə nağd rubl və qızıl ixracına məhdudiyyətlərlə bağlı fərman imzalayıb. Bu ittifaqa Ermənistan, Belarus, Qazaxıstan və Qırğızıstan daxildir.

Aprelin 1-dən yalnız fiziki şəxslərin 100 min ABŞ dolları ekvivalentindən artıq olmayan nağd rubl çıxarmasına icazə verilir.

Beynəlxalq aeroportlarda keçid məntəqələrinə istisna tətbiq ediləcək. Bu zaman vəsaitin çıxarılması üçün bank hesablarından pul çıxarışlarını təsdiqləyən arayışlar tələb olunacaq.

Mayın 1-dən 100 qramdan artıq qızıl külçələrin çıxarılması da yasaqlanacaq. Bu məhdudiyyət fiziki və hüquqi şəxslərə, eləcə də fərdi sahibkarlara aiddir.

Yenə aeroportlar üçün istisna nəzərdə tutulub. Bu zaman Federal Əyar Palatasından icazə sənədi tələb olunacaq.

Fərmanda deyilir ki, nağd valyuta və qızıl külçələrinin ixracı üçün xüsusi prosedur "milli təhlükəsizliyi və milli maraqları qorumaq məqsədilə" tətbiq olunur.

Martın 25-də Ukrayna Rusiyadakı hədəflərə 400-dək dron buraxıb. Rusiyanın Müdafiə Nazirliyi azı 10 vilayətə və ilhaq edilmiş Krım yarımadasına hücum olunduğunu bildirir. Bir çoxları bunun dörd il öncə müharibə başlayandan bəri Ukraynanın böyük hücumlarından biri olduğunu deyir.

Bir gün öncə Rusiya Ukrayna vilayətlərinə azı 500 dron və raketlə hücum etmişdi.

Rusiyanın Baltik dənizindəki Ust-Luqa limanında yanğın başlayıb. Açıqlamanı Leninqrad vilayətinin qubernatoru Aleksandr Drozdenko verib. O, hazırda yanğının söndürüldüyünü bildirib.

Ukrayna hücumu təsdiqləyib, bunu Ukrayna Təhlükəsizlik Xidməti (SBU) günündə "Kiyevin Rusiyaya hədiyyəsi" adlandırıb.

Ukrayna ordusu isə Rusiyanın "Purqa" buzqıran gəmisinin vurulduğunu bildirib. Bu hücum Ukrayna sərhədindən 900 km uzaqda, Leninqrad vilayətindəki Vıborq şəhərində gerçəkləşdirilib.

Rusiya rəsmiləri bu zərbənin baş verdiyini təsdiqləməyib. Amma Drozdenko Vıborqda yaşayış binasının damına ziyan dəydiyini deyib.

Martın 23-də oxşar hücumlar nəticəsində Ust-Luqa və Primorsk limanları xam neft və yanacaq ixracını bir günlüyə təxirə salmalı olmuşdu.

Son vaxtlar Kiyev Rusiyanın enerji infrastrukturuna zərbələri intensivləşdirib. Bu arada neftin bahalanmasının, ABŞ-nin Yaxın Şərq münaqişəsi fonunda Rusiyaya sanksiyaları müvəqqəti yumşaltmasının Moskvanın iqtisadiyyatına stimul verəcəyi, hərbi işğalı daha da körükləyəcəyi sarıdan narahatlıq var.

Rusiyanın Leninqrad və Pskov vilayətləri ilə həmsərhəd Estoniya və Latviyaya Rusiya ərazisindən dron müdaxilələri olduğu bildirilir. Estoniyanın xarici işlər naziri Marqus Tsahkna dronun yerli elektrik stansiyasını vurduğunu, amma bu ölkəyə yönəlmədiyini deyib.

"Bu, Rusiyanın tammiqyaslı təcavüzünün konkret nəticəsidir", – Tsahkna X-də yazıb. Elektrik stansiyasına ziyan dəydiyi, yaxud hər hansı itki baş verdiyi açıqlanmayıb.

Rusiya prezidenti Vladimir Putin özəl mühafizə təşkilatlarının əməkdaşlarına döyüş silahı daşımağa icazə verən qanunu imzalayıb. Məqsəd mühafizə olunan obyektləri dronlardan qorumaqdır.

Sənəddə deyilir ki, mühafizəçilər kritik əhəmiyyətli obyektlər siyahısında olan yerlərdə dronların qarşısını kəsmək üçün döyüş silahından istifadə edə bilərlər.

Silahı yalnız strateji müəssisələr və dövlət şirkətlərinin təsis etdiyi təşkilatların əməkdaşları gəzdirə biləcəklər. Bu təşkilatlar "xüsusi hərbi əməliyyat" müddətində silahı "Rosqvardiya"dan ala biləcəklər. Rusiya hakimiyyəti Ukraynada beşinci ildir apardığı təcavüzkar müharibəni "xüsusi hərbi əməliyyat" adlandırır.

Bundan öncə Dövlət Dumasının Təhlükəsizlik və korrupsiyaya qarşı mübarizə komitəsinin sədri Vasili Piskaryov demişdi ki, yanacaq-energetika kompleksinə aid obyektlərin 80 faizindən çoxunu özəl mühafizə təşkilatları qoruyur.

"Ancaq qanunla onların yalnız xidməti silahdan istifadə icazəsi var, çox vaxt bu, dronların və digər (sualtı, suüstü, quru) pilotsuz vasitələrin hücumunu tez və effektli dəf etməyə yetmir", – deputat bildirib.

Martın 23-də Kolumbiyada hərbi təyyarə qəzaya uğrayıb. 66 nəfər həlak olub, dörd nəfər itkin düşüb.

Təyyarədəki 128 nəfərin 11-i Hava Qüvvələri üzvləri, 115-i hərbçilər, ikisi polis zabiti olub.

"LMT.N Hercules C-130" nəqliyyat təyyarəsi Peru ilə sərhəddə yerləşən Puerto Leqisamodan qalxarkən qəzaya düşüb. Təyyarədə yanğın başlayıb, göyərtəsindəki bəzi partlayıcı qurğular partlayıb.

Yerli sakinlər qəzadan sağ çıxanları xilas etməyə başlayıblar. Yayılan videolarda kişilərin motosikletlərlə yaralı əsgərləri daşıdığı görünür.

Hərbi maşınlar sonradan hadisə yerinə çatıb. Rəsmi qurumlar qəzanın baş verdiyi ərazinin çətin relyefdə yerləşdiyini, bunun da xilasetmə işlərini çətinləşdirdiyini deyirlər.

57 nəfər xəstəxanaya yerləşdirilib, 30-nun vəziyyəti ağır deyil.

Martın 18-də Rusiya qırıcısı Estoniyanın hava məkanını pozub. Estoniyanın xarici işlər naziri Marqus Tsahkna bu gün – martın 19-da Rusiyanın müvəqqəti işlər vəkilini çağırdıqlarını bildirib.

İnsident Estoniyanın şimal sərhədində, Finlandiya Körfəzindəki Vayndlo adası yaxınlığında baş verib. Rusiyanın SU-30 qırıcı təyyarəsi Estoniyanın hava məkanına daxil olaraq orada bir dəqiqəyədək qalıb.

"Bu pozuntuya İtaliyanın Hava Qüvvələrinin bölməsi reaksiya verib, Estoniyanın təhlükəsizliyinə təhdid yaranmayıb", – Tsahkna vurğulayıb.

Rusiya ötən il Estoniyanın hava məkanını dörd dəfə pozub, Rusiyanın müvəqqəti işlər vəkilinə etiraz bildirilib.

Estoniya NATO-nun və Avropa İttifaqının üzvüdür. Ötən il Rusiya dronları NATO və Aİ üzvləri - Polşa və Rumıniya ərazisinə də girib.

Pakistanın Kabildə xəstəxanaya hava hücumu azı 400 nəfərin ölümünə, 250 nəfərin yaralanmasına səbəb olub. Bu məlumatı Əfqanıstan Talibanı yayıb. Pakistan isə iddiaları rədd edib.

Kabildə 2 min çarpayılıq Omid Xəstəxanasının Pakistanın hava hücumuna martın 16-da məruz qaldığı bildirilir.

Xilasetmə işləri, meyitlərin çıxarılması prosesi davam edir, Taliban hökumətinin sözçü müavini Həmdullah Fitrat deyib.

O, X-də yazıb ki, Pakistan qüvvələri narkotik asılılığının müalicə olunduğu Omid xəstəxanasına hava hücumu gerçəkləşdirib, xəstəxananın xeyli hissəsi dağıdılıb.

Pakistanın İnformasiya Nazirliyi isə bildirib ki, zərbə Kabildə və Nəngərhar əyalətində hərbi obyektləri hədəf alıb, mülki şəxslər qəsdən vurulmayıb.

"Kabildə iki yerdə texniki dəstək infrastrukturu və sursat anbarları məhv edilib", – bunu Pakistanın informasiya naziri Attaullah Tarar X paylaşımında yazıb.

Tərəflərin iddialarını müstəqil qaynaqlardan təsdiqlətmək mümkün olmayıb.

Bu zərbə sərhədyanı toqquşmaların davam etdiyi Əfqanıstan və Pakistan arasında gərginliyi kəskin artırıb.

Rusiya 2024-cü ildə Moskvada törədilmiş terror hücumu ilə bağlı 15 nəfəri ömürlük həbsə məhkum edib.

Həmin ilin martında Moskva yaxınlığındakı "Crocus City Hall" konsert mərkəzinə hücumda 149 nəfər öldürülmüşdü. Tacikistanın dörd vətəndaşı terror hücumunu həyata keçirməkdə təqsirli bilinib. Onlarla əlbirlikdə təqsirləndirilən 11 nəfər də ömürlük həbsə məhkum edilib.

Ümumilikdə, bu iş üzrə 19 nəfərə ittiham irəli sürülmüşdü.

Digər dörd təqsirləndirilənə 19 ildən 22 ilə qədər həbs cəzası verildiyi bildirilir.

Hücuma görə məsuliyyəti "İslam Dövləti–Xorasan" (ISIS-K) qruplaşması üzərinə götürmüşdü.

Təqsirləndirilənlərdən Dalerjon Mirzoyevin anası Qulrakat Mirzoyeva AzadlıqRadiosunun tacik xidmətinə məhkəmə qərarını ədalətsiz saydığını deyib: "Böhtandır, hamısı yalandır. Bizi heç dəvət etmədilər, bizimlə danışmadılar. Bu, oğluma böhtandır. O bunları etməyib. Etirafları işgəncə və döyülmə ilə alıblar".

Məhkəmə qapalı keçirilib.

Rusiyanın İstintaq Komitəsi istintaqın əvvəlində bildirmişdi ki, dörd silahlının Ukrayna ilə əlaqəsi olduğuna dair sübutlar var. Kiyev və Vaşinqton bu iddianı rədd edib.

ABŞ prezidentinin xüsusi elçiləri Stiv Uitkoff və Cared Kuşner, Ağ evin müşaviri Coş Qruenbaum Floridada Rusiya prezidentinin təmsilçisi Kirill Dmitriyev ilə görüşüblər.

Dmitriyevin dediyinə görə, tərəflər Rusiya-ABŞ münasibətlərinin bərpasına kömək edə biləcək layihələri və qlobal enerji bazarlarında böhran vəziyyətini müzakirə ediblər.

"Bu gün bir çox ölkələr, ilk növbədə ABŞ Rusiya nefti və qazının dünya iqtisadiyyatında sabitliyinin təmin edilməsində əsas sistemyaradan rolunu, Rusiyaya qarşı sanksiyaların səmərəsiz və dağıdıcı xarakterini daha yaxşı anlamağa başlayır", – o, Telegram-kanalında yazıb.

Uitkoffun ofisi yalnız tərəflərin bir sıra məsələləri müzakirə etdiyini, təmasları saxlamaqla bağlı razılığa gəldiyini bildirib.

Daha öncə yayılmış məlumata görə, ABŞ dünya enerji bazarındakı təzyiqi azaltmaq üçün Rusiya neftinə sanksiyaları zəiflətməyi nəzərdən keçirir. Bazar ABŞ və İsrailin İrana qarşı müharibəsindən dolayı şok yaşayır.

Hindistanın neft emalı zavodlarına artıq dənizdə olan Rusiya neftini almağa müvəqqəti icazə verilib. ABŞ maliyyə naziri Skott Bessent bunun Rusiyanın Ukraynadakı təcavüzkar müharibəni maliyyələşdirməsinə kritik təsir göstərməyəcəyini bildirib.

Rusiya və Ukrayna bu gün və sabah hər tərəfdən 500 hərbi əsir dəyişəcəklər. Açıqlamanı Kremlin köməkçisi Vladimir Medinski verib.

Medinski Telegram-kanalında yazıb ki, Ukrayna və Rusiya martın 5-6-da hərbi əsirləri "500-ə 500" formulu üzrə dəyişəcək və bu, Cenevrədə əldə edilmiş razılaşmalar çərçivəsində gerçəkləşəcək.

Rusiya Xarici İşlər Nazirliyinin (XİN) məlumatına görə, martın 5-də 200 rusiyalı hərbçi Rusiyaya qaytarılıb. Martın 6-da isə "300-ə 300" formulu üzrə mübadilə planlaşdırılıb.

Ukrayna hələlik bu məlumatları şərh etməyib.

Əvvəlki əsir mübadiləsi fevralın 5-də "157-yə 157" formulu üzrə aparılıb. Ukrayna prezidenti Volodimir Zelenski onda 150 hərbçi və 7 mülki ukraynalının azad edildiyini, onların arasında yaralı hərbçilərin də olduğunu demişdi.