Keçid linkləri

Təcili xəbərlər
2018, 23 Aprel, Bazar ertəsi, Bakı vaxtı 02:18

Hadi Rəcəbli bu məktəbdə oxumayıb... [fotolar]


Viravul kəndi, 2 saylı məktəb.

“Hər il bu məktəbin onlarla məzunu ali məktəblərə daxil olur. Bu məktəbin şagirdləri rayonda keçirilən təhsil yarışlarında həmişə ən yüksək göstəricilərlə birinci yerə çıxırlar. Di gəl, hökumət belə məzunları olan məktəbə diqqət ayırmır”.

Lənkəranın Viravul kəndindəki 2 saylı orta məktəb qəzalı vəziyyətdədir. Məktəb Əfqanıstanda hərbi xidmət borcunu yerinə yetirərkən həlak olmuş məzununun - Canəli Əzimovun adını daşıyır.

Buna da bax:​ Hadı Rəcəbli: 'Bircə kəlmə deyirəm, yalandır!'

“Hadı Rəcəbliyə də məktub yazmışıq”

Kənd sakini Tamara Əliyeva deyir, hər səhər evdən yola saldığı azyaşlı övladlarından nigaran qalır:

“Məktəb elə vəziyyətdədir, deyərsən, indi dağılar, bu saat dağılar... Deputat Hadı Rəcəbli də bu məktəbdə oxuyub. Ona da məktub yazmışıq. Hər yerə yazmışıq. Prezidentə, Heydər Əliyev Fonduna, təhsil nazirinə...”

Fövqəladə Hallar Nazirliyi məktəbin qəzalı olması barədə rəy verib. Ancaq hökumət hələ də tədbir görməyib.

Viravul doğumlu Əzizə Salmanova deyir:

“Özüm Bakıda yaşayıram. Bacımın uşaqları o məktəbdə ibtidai sinifdə oxuyur. Kənddə olanda uşaqları məktəbdən götürməyə getdim. Gözlərimə inanmadım. Maraqlandım, dedilər, bu binanı tikəndə ferma üçün nəzərdə tutublar. Sonradan nə fikirləşiblərsə, məktəb ediblər. Elə quruluşu da fermaya bənzəyir. Sınıq-salxaq partalar, çürümüş döşəmələr... Örtüyü bir küləyə bənddir ki, “uçub getsin”. Sinif otaqları buz kimi... Dəhlizlərdə siçovullar qaçışır. Məktəb deyil, xəstəlik mənbəyidir. Uşaqlar da xəstəliklərə yoluxmağa həssasdırlar”.

Buna da bax:​ Məktəbdə uşağı soyuqdan xəstələnən atanın şikayəti

Ferma kimi tikilib, məktəbə çevrilib?

Yağış yağanda, qar əriyəndə məktəb binasının qarşısında iri və dərin gölməçə əmələ gəlir. Məktəbə gələn və məktəbdən gedən uşaqlar həmin gölməçədən keçir, su ayaqqabılarına dolur, corablarına qədər yaş olurlar.

Ötən əsrin ortalarında tikilən və ömrünü çoxdan başa vuran məktəb binasında 400-ə yaxın şagirdin təhsil aldığı bildirilir. Vəziyyətdən müəllimlər də narazıdır. Onlar da yeni məktəb binası üçün dəfələrlə müxtəlif qurumlara müraciət ediblər.

Sakinlərin sözlərinə görə, məktəbin bir hissəsi 5 il öncə çöküb. O zamandan yuxarı sinif şagirdlərinə yaxınlıqda yerləşən bələdiyyə binasında yer ayrılıb. Bina yeni olsa da, otaqlar kiçikdir deyə, tədrisə əlverişli deyil, şagirdlər oraya normal yerləşə bilmirlər.

Buna da bax: "Bizim uşaqlar özlərini siçovul yuvasında hiss edirlər"

“Sırası çatanda daha bir məktəb tikiləcək”

Kənddə 1 saylı orta məktəb də var. Yeni tikilib və şagird tutumu az olduğundan, heç kəs övladını aparıb o məktəbə düzəldə bilmir.

Lənkəran Şəhər İcra Hakimiyyətindən “Qaynar xətt”ə bildirilib ki, 2012-ci ildə Nazirlər Kabinetinin xüsusi komissiyası kəndlərdəki 89 məktəbə baxış keçirib. 34 bina qəzalı kimi qeydiyyata alınıb. İndi bu qəzalı məktəblərin yerində yeniləri tikilir. Ancaq məktəblər növbəli qaydada inşa olunur. Viravuldakı 2 saylı tam orta məktəb də siyahıdadır:

“Orda bir məktəb tikilib istifadəyə verilib, növbəsi çatanda daha bir məktəb tikiləcək və 2 saylı məktəb söküləcək”.

Viravullularsa deyirlər ki, 5 il əvvəl onlara məktəb binasının 2013-cü ildə tikiləcəyini vəd ediblər. Hətta məktəbin yaxınlığında yeni məktəb binasının təməli də qazılıb. Sonradan onlara məlum olmayan səbəblərdən işlər yarımçıq qalıb.

Buna da bax:​ "Gərək bina uça uşaqların başına?"

“Hadı Rəcəbli o məktəbdə oxumayıb”

Bu şikayəti AzadlıqRadiosu-na göndərən oxucu sözügedən məktəbdə deputat Hadı Rəcəblinin də oxuduğunu yazıb. Dəqiqləşdirərkən üzə çıxıb ki, MM üzvü həmin kənddəki başqa məktəbdə təhsil alıb və orta təhsilini Lənkəran şəhərində tamamlayıb.

Veravul kənd məktəbinin kənardan görünüşü, 11 fevral 2017
Veravul kənd məktəbinin kənardan görünüşü, 11 fevral 2017

Viravul kənd 1 saylı tam orta məktəbinin direktoru Azər Akifoğlu fevralın 12-də AzadlıqRadiosuyla əlaqə saxlayıb (yazının şərhlər hissəsində onun şərhini tam mətnini oxuya bilərsiniz – red.). O, deputat Hadı Rəcəblinin 2 saylı deyil, 1 saylı məktəbdə ilk ibtidai təhsil aldığını, sonradan Lənkəran şəhərindəki 2 saylı məktəbi bitirdiyini qeyd edir.

A.Akifoğlu direktoru olduğu məktəbdə 240-dan çox şagirdin təhsil aldığını, bu təhsil ocağında istənilən qədər şagird qəbuluna imkanın olduğunu vurğulayır.

Buna da bax:​ Hadı Rəcəbli: 'Məcburi köçkünlər pəncərəni açıq qoyurdular...'

Deputat Hadı Rəcəbli də yerli mediaya açıqlamasında 1 saylı məktəbdə oxuduğunu təsdiqləyib və həmin məktəbin fotolarını və hətta videosunu da yayıb.

Viravuldakı 2 saylı məktəbinsə hələ durumu dəyişməyib. Fotolara baxmaq, yetər...

Sənin fikrin

Şərhləri göstər

Günün bütün mövzuları

XS
SM
MD
LG