Keçid linkləri

2024, 28 Mart, Cümə axşamı, Bakı vaxtı 22:35

Erməni deputat: Moskva Avropaya görə 'qısqanclıq səhnəsi' qurub


Vigen Xaçatryan
Vigen Xaçatryan

Ermənistan parlamentində hakim “Vətəndaş müqaviləsi” fraksiyasının deputatı Vigen Xaçatryan əmin olduğunu bildirib ki, Rusiya XİN-in Qərbin və Ermənistanın ünvanına tənqidləri “qısqanclıq səhnəsindən” başqa bir şey deyil.

AzadlıqRadiosunun Erməni xidməti - Azatutyun yazır ki, Brüsselin Ermənistanın Azərbaycanla həmsərhəd bölgələrinə müşahidəçilər missiyası göndərmək qərarından qəzəblənən Moskva yanvarın 26-da bu məsələyə sərt reaksiya verib.

Rusiya XİN bəyan edib ki, Avropa İttifaqının nümayəndələri regiondakı sabitliyə yalnız ziyan vura bilərlər:

“Ermənistanın sərhədyanı bölgələrində, artıq ABŞ və NATO-nun əlavəsinə çevrilən və MDB məkanında qarşıdurma siyasəti yürüdən Avropa İttifaqı nümayəndələrinin görünməsi regiona yalnız geosiyasi qarşıdurma gətirə və mövcud ziddiyyətləri kəskinləşdirə bilər”.

Paşinyan 'Laçın dəhlizinə beynəlxalq missiya gəlsin' deyir
Gözlə

No media source currently available

0:00 0:02:53 0:00

Rusiya XİN-in bəyanatında daha sonra deyilir:

“Avropa İttifaqının nəyin bahasına olursa olsun Ermənistanda möhkəmlənmək və Rusiyanı sıxışdırıb çıxarmaq cəhdləri ermənilərin və azərbaycanlıların regionu dinc inkişafa qaytarmaq yolunda köklü maraqlarına ziyan vura bilər”.

Moskvanın bəyanatında deyilir ki, “Dağlıq Qarabağdakı Rusiya sülhməramlıları və Ermənistan sərhədlərində keşik çəkən Rusiya sərhədçiləri yaxın gələcəkdə regionun sabitlik və təhlükəsizliyi üçün əsas faktor olaraq qalırlar”.

Azatutyunun yazdığına görə iqtidar deputatı Xaçatryan deyib ki, Rusiya sadəcə olaraq öz fəaliyyətsizliyinə haqq qazandırmağa çalışır:

“Rusiyanın və KTMT-nin (Kollektiv Təhlükəsizlik Müqaviləsi Təşkilatı - red) öz missiyalarını yerinə yetirmələri üçün bütün imkanları var və onlar çoxdan nəsə edə bilərdilər, amma heç nə etməyiblər. Əgər onlar öz öhdəliklərini yerinə yetirsəydilər, bu problem ümumiyyətlə yaranmazdı”.

Rusiya Aİ müşahidəçilərini təhdid edir

Rusiya XİN-in bəyanatında xəbərdarlıq edilir ki, “Rusiya sülhməramlı kontingenti yerində hadisələrin inkişafından asılı olaraq Aİ müşahidəçilərinin davranışlarına reaksiya verəcək”.

Moskvanın bəyanatında qeyd olunur ki, “Ermənistan KTMT missiyası istiqamətindəki işini məntiqi sonluğa çatdırmaq əvəzinə Aİ-nin xeyrinə seçim edib”.

Lakin Xaçatryan bu bəyanatla bağlı deyib:

“Ümumiyyətlə onların bizim xarici siyasətimizə qiymət vermək cəhdi düzgün deyil və mən bunu qeyri-diplomatik hərəkət hesab edirəm”.

Ermənistan XİN hələki Moksvanın bu bəyanatına reaksiya verməyib.

Avropa İttifaqı bu həftənin əvvəlində Ermənistanın Azərbaycanla həmsərhəd bölgələrinə mülki müşahidə missiyası göndərmək barədə qərar qəbul edib.

Associated Press agentliyi bildirir ki, missiya barəsində qərar separatçı Qarabağda Ermənistanın təbirincə deyilərsə, “humanitar böhranın” yaşandığı dövrə təsadüf edir.

AP yazır ki, Aİ-nin bu addımı rəsmi Bakı tərəfindən də tənqid olunub, amma ABŞ missiyaya dəstək bildirib.

Qarabağdakı separatçı rejim: 'Az da olsa, dəhlizdən mal buraxılır'
Gözlə

No media source currently available

0:00 0:03:50 0:00

Aİ-dən Rusiyaya sərt cavab

Belə görünür ki, Rusiya Avropa İttifaqı missiyasının məqsədlərini düzgün başa düşmür. Rusiya yanlış olaraq düşünür ki, bizim qonşu regionumuza bu missiyamız ona qarşı yönəlib.

Bunu yanvarın 27-də Avropa İttifaqı Xarici Fəaliyyət Xidmətinin nümayəndəsi Peter Stano Rusiya XİN-in bəyanatına cavab olaraq deyib:

“Ən mühümü budur ki, bu, Rusiyanın borcuna qalmayıb. Aİ missiyası Ermənistan hakimiyyətinin sorğusu və azad qərarı əsasında başlanıb”.

Stano vurğulayıb ki, Aİ bu məsələ ilə bağlı Azərbaycanla da danışıb.

O qeyd edib ki, Ermənistan və Azərbaycan arasında münasibətlərin normallaşdırılması prosesi ayrı-ayrı siyasi oyunçuların "girovuna" çevrilməməlidir.

Xatırlatma

Ötən ilin dekabrın 12-dən Şuşa şəhəri yaxınlığında Laçın-Xankəndi yoluna toplaşıb özlərini eko-fəallar kimi təqdim edən Azərbaycan vətəndaşları növbəli aksiya keçirirlər.

Etirazçıların sözlərinə görə onlar yolu bağlamayıblar, humanitar və təcili tibbi yardım maşınlarının keçməsinə imkan yaradırlar.

Onlar Qarabağdakı qızıl və mis yataqlarında monitorinq keçirilməsini tələb edirdilər.

Ermənistan tərəfi isə Azərbaycanı bu aksiyanın arxasında durmaqda, Qarabağ ermənilərini blokadaya almaqda və "humanitar böhran" yaratmaqda ittiham edir.

2020-ci ildə 44 günlük İkinci Qarabağ Müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa etmişdi.

Həmin il Azərbaycan, Ermənistan və Rusiya rəhbərliyinin imzladığı birgə bəyanatla döyüşlər dayandırılandan sonra Laçın dəhlizində və Qarabağdakı təmas xəttində Rusiya sülhməramlıları yerləşdirilib.

1988-ci ildə başlayan Qarabağ münaqişəsi Azərbaycan və Ermənistan arasında döyüşlərə səbəb olmuşdu.

1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG