İsmayıllıda yaşayan, bir sıra media orqanları ilə bölgə müxbiri kimi əməkdaşlıq edən Elçin İsmayıllı 9 il azadlıqdan məhrum edilib. Sentyabrın 18-də Şəki Ağır Cinayətlər Məhkəməsində Rəşid Hüseynovun sədrlik etdiyi hakimlər kollegiyası bu haqda hökm çıxarıb.
CM-nin 182 (hədə-qorxu ilə tələb etmə) və 308-ci (vəzifə səlahiyyətlərindən sui-istifadə) maddələri ilə təqsirli sayılan E.İsmayıllıya həmçinin, 3 il müəyyən vəzifə tutmaq qadağan olunub.
***Buna da bax-10 il həbs istənilən jurnalist: 'Mənim heç bir günahım yoxdur...'
E.İsmayıllının vəkilləri hökmün əsassız olduğunu, ittihamın məhkəmədə sübuta yetirilmədiyini deyir. Vəkil Elçin Sadıqov AzadlıqRadiosuna bildirib ki, əksinə, məhkəmə jurnalistin İsmayıllı rayon İcra Hakimiyyətinin başçısı Mirdaməd Sadıqov vasitəsilə təxribat nəticəsində həbs olunduğunu ortaya qoydu. Vəkil hökmdən apellyasiya şikayəti verəcək.
E.İsmayıllı 17 fevral 2017-ci ildə İsmayıllı rayonunda həbs olunub. O, İsmayıllı rayonunda vəzifəli şəxslərdən haqqında rüsvayedici məlumat yaymaq hədəsi ilə pul tələb etməkdə ittiham olunur.
E.İsmayıllı özünü təqsirli bilmir. Saxlanılarkən üzərində olan 1000 manatı illərdir tanıdığı Azər Abbasovdan borc aldığını deyir.
***Buna da bax-Hal şahidləri jurnalistin necə pul almasını görmədiklərini söylədilər
2016-cı ilin noyabrına qədər İsmayıllı Rayon Mədəniyyət və Turizm Şöbəsinin rəhbəri olmuş Azər Abbasov məhkəmədə zərərçəkmiş qismində ifadəsində deyib ki, həmin vəsaiti ona icra başçısı Mirdaməd Sadıqov verib Elçinə çatdırmasını istəmişdi.
İcra başçısının adı şahidlər siyahısında olsa da, məhkəmə onu çağırıb dindirməkdən imtina etdi.