Tramp: İranla bu həftə yeni danışıqlar keçirilə bilər

İranın Səhiyyə Nazirliyi ABŞ-nin son hücumları nəticəsində ölənlərin sayının 18-ə çatdığını bildirib.

Qurumun sözçüsü Hüseyn Kirmanpur "X" sosial şəbəkəsində yazıb ki, avqustun 30-u saat 20:30-dan sentyabrın 2-si saat 20:30-dək hücumlar nəticəsində 18 nəfər ölüb, 142 nəfər yaralanıb.

Ölənlərin hərbçi və ya mülki şəxs olduğu göstərilməyib. Ancaq həlak olanlar arasında iki qadın və bir uşağın olduğu bildirilir.

Bundan əvvəl Hörmüzgan vilayətində toy mərasiminə zərbə nəticəsində biri uşaq olmaqla, dörd nəfərin öldüyü açıqlanmışdı. İran Qızıl Aypara Cəmiyyəti ABŞ-nin gerçəkləşdirdiyi bildirilən hücum zamanı qəlpələrin toy məclisinin keçirildiyi yaşayış evinə düşdüyünü bildirib.

Xuzistan valiliyinin rəsmisi Əhvaz və Ağacaridə yeddi nəfərin öldüyünü açıqlayıb. İran İslam İnqilabı Keşikçiləri Korpusuna (SEPAH) yaxın xəbər agentlikləri isə Kirmanşahda SEPAH-ın aerokosmik qüvvələrinin dörd zabitinin, Lavan adasında isə "Bəsic" qüvvələrinin üç üzvünün öldürüldüyünü xəbər veriblər.

İran ordusu sentyabrın 3-də səhər saatlarında Küveyt və Birləşmiş Ərəb Əmirliklərindəki (BƏƏ) ABŞ bazalarına raket və dron hücumları həyata keçirdiyini açıqlayıb.

Ordu bildirir ki, Küveytdəki "Əhməd əl-Cabir" bazasında ABŞ ordusunun peyk rabitəsi sistemləri, avadanlıq anbarları, döyüş təyyarəsi anqarları raket və dronlarla vurulub.

Rəsmi məlumatlara görə, BƏƏ-dəki "Əl-Minhad" hərbi bazasında isə ABŞ qüvvələrinin yerləşdiyi ərazi və radar sistemlərinə raket və dron zərbələri endirilib.

Küveyt ordusu sentyabrın 3-də İranın raket və dron hücumlarına məruz qaldığını təsdiqləsə də, BƏƏ ölkəyə edilən yeni zərbələr barədə hələlik rəsmi açıqlama verməyib.

Küveytin Xarici İşlər Nazirliyi İranın yeni hücumlarını kəskin pisləyib. Nazirlik hücumları "Küveytin təhlükəsizliyinə və sabitliyinə, eləcə də ölkə vətəndaşları və sakinlərinin təhlükəsizliyinə birbaşa təhdid", "beynəlxalq hüququn kobud şəkildə pozulması" adlandırıb.

Qətər də İranın Küveytə son hücumlarını pisləyib, onları beynəlxalq hüququn pozulması və regionda "təhlükəli eskalasiya" adlandırıb.

İsrailin baş naziri Binyamin Netanyahu deyir ki, İranla müharibə başlayandan altı ay sonra ölkəsinin qarşısında duran əsas vəzifə İran rəhbərliyini devirməkdir və bu məqsəd əlçatandır.

"Bu rejim hazırda sarsılır. O, heç vaxt belə zəif olmayıb, sağ qalmağa çalışır", – Netanyahu sentyabrın 3-də İsrail ordusunun rəhbərliyi ilə keçirilən tədbirdə deyib.

"Əminəm ki, bu təhlükəni birdəfəlik aradan qaldıra, bu rejimi devirə bilərik. Bu, qarşıda duran əsas vəzifədir və ona yaxınıq. Bu, qeyri-mümkün deyil, əlçatandır", – o bildirib.

"Bizi məhv etməyə çalışan və bizi yox etmək üçün nüvə bombaları ilə silahlanmaq istəyən bir rejimin yaratdığı təhlükə ilə üz-üzə idik. Bu təhlükəni, digər təhdidləri geri oturtduq", – Netanyahu vurğulayıb.

Baş nazir bildirib ki, Tehrandakı rejimin zəifliyi İranın artıq İsrailə hücum etməməsinin əsas səbəbidir.

İranın ali rəhbəri Əli Xamenei fevralın 28-də ABŞ və İsrailin İrana hava zərbələrinin ilk günündə öldürülüb. Sonradan rejimin və ordunun onlarla digər rəhbər şəxsi də hücumlar nəticəsində öldürülüb.

ABŞ prezidenti Donald Tramp bildirib ki, İranın nüvə silahı əldə etməsinin qarşısını almaq müharibənin əsas məqsədidir. Amma o, son vaxtlar Hörmüz boğazının yenidən açılmasını da əsas hədəflərdən biri kimi göstərib.

ABŞ İranın İslam İnqilabı Keşikçiləri Korpusunun (SEPAH) Kiber-Elektron Komandanlığının rəsmisi Əmir Yaryabın kimliyi və ya yeri barədə məlumata görə 10 milyon dollaradək mükafat elan edib. Mükafatı Dövlət Departamentinin "Ədalət naminə mükafat" proqramı təyin edib.

Yaryab qurumun Kiberəməliyyatlar Komandanlığına rəhbərlik edir.

Dövlət Departamenti bildirir ki, Yaryab SEPAH-ın Kiber-Elektron Komandanlığının "Şəhid Hemmət" və "Şəhid Şüştəri" daxil, bir neçə strukturuna da rəhbərlik edir. Məlumata görə, bu qruplar ABŞ, Avropa və Yaxın Şərqdə mühüm infrastruktur sahələrinə qarşı kiberəməliyyatlar həyata keçiriblər.

Açıqlamada deyilir ki, Yaryab SEPAH-ın Kiber-Elektron Komandanlığına bağlı "CyberAv3ngers", "Dadeh Afzar Arman" (DAA) və "Mehrsam Andişeh Saz Nik" (MASN) qruplarının əməliyyatlarına da nəzarət edir, onları idarə edir. Dövlət Departamentinin məlumatına görə, bu qruplar dünyanın müxtəlif yerlərində mülki infrastruktura qarşı zərərli proqramlardan istifadə ediblər.

"Ədalət naminə mükafat" proqramı bildirib ki, xarici hökumətin göstərişi və ya nəzarəti altında ABŞ-nin kritik infrastrukturuna qarşı zərərli kiberfəaliyyətlərdə iştirak edən istənilən şəxs barədə məlumata görə 10 milyon dollaradək mükafat təklif olunur.