Rzayi Çin səfiri ilə görüşdə Hörmüzün açılması şərtlərini deyib
Hörmüz boğazının yenidən açılması üçün ABŞ İranla müharibəni dayandırmalı, İranın dondurulmuş vəsaitlərini geri qaytarmalıdır. Bunu İranın Ali Milli Təhlükəsizlik Şurasının yeni katibi Möhsün Rzayi bu vəzifəyə təyin olunandan sonra ilk açıqlamasında deyib.
İran mediasına görə, Rzayi Tehranda Çin səfiri ilə görüşüb. O deyib ki, Hörmüzün açılması üçün ABŞ "davranışını dəyişməli və İranın şərtlərini qəbul etməlidir".
O, müharibənin dayandırılmasını və dondurulmuş pulların geri qaytarılmasını əsas şərtlər kimi sadalayıb.
Rzayinin sələfi Məhəmməd Baqir Zülqədr də ötən həftə oxşar şərtlərdən danışırdı.
ABŞ prezidenti Donald Tramp isə bir gün əvvəl jurnalistlərə demişdi ki, ABŞ Hörmüz boğazını bütünlükdə minalardan təmizləyib və faktiki ona nəzarəti ələ keçirib.
Rzayi İranla Omanın Hörmüz boğazından keçidlə bağlı apardığı danışıqlara da münasibət bildirib. O deyib ki, iki ölkə razılığa gəlsə, "bu razılaşma Hörmüz boğazının bağlı qalması məsələsindən ayrı qiymətləndirilməlidir".
Münaqişə başlayandan İran boğazdan keçidi məhdudlaşdırıb. Hazırda boğazdan müharibədən əvvəlkinin kiçik bir hissəsi sayda gəmi keçir.
Qırmızı dənizdə husilərin hücumunda 3 pakistanlı həlak olub
İranın dəstəklədiyi husi üsyançıların avqustun 11-də Bab əl-Məndəb boğazı yaxınlığında Misirə məxsus yük gəmisinə zərbələrindən ölən altı nəfərdən üçü Pakistan vətəndaşı olub. Bunu avqustun 12-də Pakistanın xarici işlər naziri İshaq Dar bildirib.
"Pakistan husilərin kommersiya gəmisinə hücumunu qətiyyətlə pisləyir", – Dar X platformasında yazıb. O, daha bir Pakistan vətəndaşının yaralandığını əlavə edib.
Birinci zərbədən gəmidə yanğın baş verib, ona böyük ziyan dəyib. Gəmidəki dörd dənizçi həlak olub. Xilasedicilər gəmidəki insanları təxliyə edərkən ikinci zərbə endirilib, iki xilasedici həlak olub.
Husilər iyulda Səudiyyə Ərəbistanına dəniz blokadası elan ediblər. Bundan əvvəl Yəməndə atəşkəs pozulub, döyüşlərin yenidən başlayıb. İlk dəfədir husilərin gəmilərə hücumları nəticəsində insan ölümü qeydə alınır.
Hörmüz boğazına kim nəzarət edir? — Tramp və İranın söz davası
İranın "Bəsic" qüvvələrinin yeni rəhbəri Hörmüz boğazının İranın tam nəzarətində olduğunu bəyan edib. Vaşinqton isə bundan əvvəl ABŞ qüvvələrinin bu vacib su yoluna nəzarət etdiyini bildirmişdi.
Fevralın sonunda ABŞ və İsrail İranla müharibəyə başlayandan Tehran boğazdan gəmilərin hərəkətini dayandırıb. Bu isə neft ehtiyatlarının azalmasına və dünya üzrə enerji qiymətlərinin yüksəlməsinə səbəb olub.
ABŞ prezidenti Donald Tramp isə israr edir ki, boğaza Amerika nəzarət edir. "Tam nəzarət bizdədir. Ora bizimdir", – Tramp avqustun 12-də jurnalistlərə söyləyib.
İslam İnqilabı Keşikçiləri Korpusunun (SEPAH) kəşfiyyat təşkilatının keçmiş rəhbəri Hüseyn Taib Trampın bu açıqlaması ilə razılaşmayıb. Taib ötən həftə SEPAH-ın "Bəsic" təşkilatının rəhbəri təyin edilib.
"Hörmüz boğazı İran İslam Respublikasının nəzarəti və idarəçiliyi altındadır, ölkə tam təhlükəsizlik şəraitində öz yoluna davam edir", – Taib avqustun 13-də müqəddəs Qum şəhərində dini liderlərlə görüşdə deyib.
İran bu kritik su yolunu bağlayıb, Vaşinqtonla danışıqlarda bundan əsas təzyiq vasitələrindən biri kimi istifadə edir.
Tramp İranla müharibə başlayanda əsas məqsədin Tehranın nüvə təhdidini aradan qaldırmaq olduğunu bildirib. Son həftələr isə diqqət Hörmüzdən gəmilərin sərbəst keçidinin təmin edilməsinə yönəldib. Müharibədən əvvəl dünyada neft və təbii qaz tədarükünün 20 faizi bu boğazdan keçirdi.
Heqset: İrana qarşı dəniz blokadası 'qeyri-müəyyən müddətə' qala bilər
ABŞ qüvvələrinin İran limanlarına dəniz blokadasını lazım olduğu qədər saxlamağa yetəcək resursları var. Bunu ABŞ müdafiə naziri Pit Heqset avqustun 13-də bildirib. Bu arada Vaşinqtonla Tehran Hörmüz boğazına nəzarətlə bağlı fərqli açıqlamalar verirlər.
"ABŞ Hərbi Dəniz Qüvvələri blokadanı qeyri-müəyyən müddətə davam etdirə bilər", – Heqset Panamada jurnalistlərə deyib. O, PANAMAX-2026 çoxmillətli hərbi təlimləri zamanı "USS Gridley" esminesinin heyəti qarşısında çıxışından sonra danışıb. İdarəolunan raketlərlə təchiz edilmiş "USS Gridley" bundan əvvəl Yaxın Şərqdə yerləşdirilmişdi.
Heqset əlavə edib ki, ABŞ bölgədəki gəmilərini rotasiya qaydasında saxlamaqla blokadanı davam etdirə bilir və ehtiyac yarandıqca qüvvələrini yenidən qruplaşdırmağa davam edəcək.
Bu arada prezident Donald Tramp ABŞ-nin boğaza nəzarət etdiyini israrla bildirir. İran hərbi rəsmiləri isə bu iddianı rədd edir, nəzarətin hələ də Tehranın əlində olduğunu, İranın boğazda gəmilərin hərəkətini idarə etdiyini deyirlər.