Hörmüz boğazında raket iddiası: Tehran 'vurduq' deyir, Vaşinqton təkzib edir
İranın dövlət televiziyasının yaydığı məlumata görə, mayın 4-də ölkənin Hərbi Dəniz Qüvvələri ABŞ hərbi gəmilərinin Hörmüz boğazına daxil olmasının qarşısını alıb. "Fars" xəbər agentliyi isə bildirir ki, xəbərdarlıqlara məhəl qoymayan ABŞ hərbi gəmisi Oman körfəzində, Cask sahilləri yaxınlığında iki raketlə hədəf alınıb və geri çəkilməyə məcbur edilib.
"Reuters" bu məlumatları müstəqil şəkildə təsdiqləyə bilmədiyini yazır.
ABŞ Mərkəzi Komandanlığı (CENTCOM) xəbəri təkzib edib. "ABŞ donanmasının heç bir gəmisi vurulmayıb. ABŞ qüvvələri "Azadlıq layihəsi"ni dəstəkləyir və İran limanlarına qarşı dəniz blokadasını qüvvədə saxlayır", – CENTCOM X platformasında paylaşımında bildirib.
Mayın 4-də İran ABŞ qüvvələrini strateji su yoluna daxil olmamağa çağırmışdı. Bundan əvvəl isə ABŞ prezidenti Donald Tramp Körfəz sularında qalan gəmiləri çıxarmağa kömək edəcəyini bildirmişdi.
İranın vahid komandanlığının rəhbəri Əli Abdullahi isə bəyan edib, Hörmüz boğazında təhlükəsizlik İranın nəzarətindədir və gəmilərin keçidi mütləq şəkildə razılaşdırılmalıdır.
"Xəbərdarlıq edirik ki, istənilən xarici hərbi birləşmə, xüsusilə aqressiv ABŞ ordusu Hörmüz boğazına yaxınlaşmağa və daxil olmağa cəhd edərsə, hücuma məruz qalacaq", – o vurğulayıb.
İran ABŞ hərbi gəmisini dayandırdığını bildirdi, neft kəskin bahalandı
Mayın 4-də "Brent" markalı neftin fyuçersləri 5 dollardan çox bahalanıb və bir barelin qiyməti 113.65 dollara çatıb. Bu, İran donanmasının ABŞ hərbi gəmisinin Hörmüz boğazına daxil olmasının qarşısını aldığını bildirməsindən sonra baş verib.
Təhlilçilərin fikrincə, yüksək qiymətlər uzunmüddətli olmayacaq, çünki bu, tələbata və iqtisadiyyata mənfi təsir göstərir.
"Erlen Capital Management" şirkətinin idarəedici tərəfdaşı Bruno Şneller "Reuters" agentliyinə bildirib: "Hazırda bazarda iki əks meyl müşahidə olunur: bir tərəfdən geosiyasi risklər neftin qiymətini artıraraq inflyasiya qayğılarını yenidən gündəmə gətirir, digər tərəfdən isə xüsusilə ABŞ-də iqtisadi artım tempinin zəifləməsi müşahidə edilir".
Onun sözlərinə görə, bu vəziyyət səhmlər, istiqrazlar və valyuta bazarlarında böyük dalğalanmalar yaradır.
UKMTO: Hörmüz boğazında vəziyyət kritik olaraq qalır
Regional hərbi əməliyyatların davam etdiyi bir vaxtda Hörmüz boğazından keçid şərtləri gərgin olaraq qalmaqdadır. Bu barədə Böyük Britaniyanın dəniz ticarətini və təhlükəsizliyini izləyən UKMTO qurumu məlumat yayıb. Təşkilat regionda hərbi gəmilərin sayının artdığını, hərəkət intensivliyinin yüksəldiyini və təhlükəsizlik qüvvələrinin gəmiləri VHF (UQD) radioəlaqə vasitəsilə tez-tez yoxlaya biləcəyini vurğulayır.
UKMTO bildirir ki, ABŞ əsas gəmi yollarının cənubunda xüsusi təhlükəsizlik zonası yaradıb. Gəmilərə tövsiyə olunur ki, Oman suları ilə hərəkət etsinlər və lazımi təşkilatlarla əlaqəli şəkildə işləsinlər.
Mayın 4-də yayılmış xəbərdarlıqda deyilir ki, gəmiçilik zolaqlarının yaxınlığında mina təhlükəsi olduğuna dair məlumatlar var, bu isə hərəkəti son dərəcə riskli edir. Gəmi operatorlarına riskləri diqqətlə qiymətləndirmək və marşrutları bu təhlükələrə uyğun planlaşdırmaq tapşırılıb.
CENTCOM: ABŞ bayrağı ilə üzən iki gəmi Hörmüz boğazından keçib
ABŞ bayrağı altında üzən iki gəmi Hörmüz boğazından “uğurla keçib və təhlükəsiz şəkildə yola davam edir”. Bunu Yaxın Şərqdə ABŞ qüvvələrinə nəzarət edən ABŞ Mərkəzi Komandanlığı (CENTCOM) bildirib.