Əraqçi Səudiyyəyə: 'ABŞ qüvvələrini çıxarmağın vaxtıdır'
İranın xarici işlər naziri Abbas Əraqçi Səudiyyə Ərəbistanı rəsmilərinə məktubunda ABŞ qüvvələrini çıxarmağın vaxtı çatdığını yazıb.
Martın 30-da X-də dərc olunmuş paylaşımda Əraqçi qeyd edib ki, "İran Səudiyyə Ərəbistanı Krallığına hörmət edir və onu qardaş ölkə sayır".
ABŞ və İsrail İrana hava zərbələrinə başlayandan İslam İnqilabı Keşikçiləri Korpusu (SEPAH) Birləşmiş Ərəb Əmirlikləri (BƏƏ) və Səudiyyə Ərəbistanı daxil, Fars körfəzindəki digər ərəb ölkələrinə qisas hücumları gerçəkləşdirir.
İran Fars körfəzi ölkələrindəki ABŞ bazalarına raket və dron hücumları edir, aeroport, otel kimi mülki hədəfləri, həmçinin neft-qaz obyektlərini vurur.
ABŞ-nin İsfahanda sursat anbarını vurduğu deyilir
ABŞ və İsrail martın 31-nə keçən gecə İsfahan ostanının bir neçə şəhərinə, həmçinin Tehrana hücumlar gerçəkləşdirib.
Sosial mediada yayılan görüntülərdə İsfahan ətrafında çox böyük partlayışların baş verdiyi görünür. ABŞ prezidenti Donald Tramp həmin videolardan birini özünün "Truth Social" sosial media platformasında şərhsiz paylaşıb.
İsfahanın təhlükəsizlik və hüquq-mühafizə rəsmisi deyib ki, martın 30-da axşam Amerika və İsrail qırıcı təyyarələri İsfahan, Nəcəfabad, Mübarəkə, Kaşan və Şahreza şəhərlərini hədəfə alıb. Həmin rəsmi martın 31-də səhər İsfahandakı bəzi hərbi hədəflərin vurulduğunu deyib, amma detallı danışmayıb.
"The Wall Street Journal" qəzeti isə bir rəsmiyə istinadla ABŞ-nin İranın İsfahan şəhərindəki böyük bir sursat anbarına 2 min funtluq bunkerqıran bombalar atdığını yazıb.
Sosial mediada martın 31-də səhər Tehran, İsfahan, Zəncan və Şirazda çoxsaylı partlayışların baş verdiyi bildirilir.
İsrail İrana qarşı əməliyyatları 'həftələrlə' davam etdirməyə hazırdır
İsrail ordusu bildirir ki, İranla müharibəni həftələrlə davam etdirməyə hazırdır. Bundan öncə isə baş nazir Binyamin Netanyahu müharibənin yarıdan keçdiyini demişdi.
Netanyahu "Newsmax"a bildirib ki, bu, hərbi hədəflər üzrə irəliləyişə aiddir, zamana deyil, zamanla bağlı qrafik müəyyən etmir.
Ordunun sözçüsü Nadav Şoşani isə deyib ki, münaqişənin müddətini siyasi liderlər müəyyən edəcək. Ancaq İsrail əməliyyatları həftələrlə davam etdirməyə hazırdır: "Bunun üçün hədəflərimiz, sursatımız və canlı qüvvəmiz var".
ABŞ-nin dövlət katibi Marko Rubio da martın 30-da bildirib ki, müharibə hələ həftələrlə çəkə bilər.
Tramp müttəfiqlərə: 'ABŞ bunu yadda saxlayacaq'
ABŞ prezidenti Donald Tramp Hörmüz boğazının açılması üçün Birləşmiş Ştatlara kömək göstərməkdən imtina edən və hazırda təyyarə yanacağı qıtlığı ilə üzləşən ölkələrə deyir ki, ya Amerikadan neft alsınlar, ya da bu tranzit marşrutuna gedərək onu "sadəcə tutsunlar".
ABŞ prezidenti martın 31-də sosial media paylaşımında Böyük Britaniyanı ABŞ və İsrailin İrana qarşı kampaniyasında iştirakdan imtina etdiyinə görə tənqid edib.
Bir çox ölkələr, o cümlədən ABŞ-nin müttəfiqləri Kanada, Böyük Britaniya, Almaniya və Yaponiya Hörmüz boğazının açılmasında iştirakdan imtina ediblər. Amma onların bəziləri bildiriblər ki, İranla müharibə bitərsə, bu təşəbbüsə qoşula bilərlər.
Tramp başqa bir paylaşımında Fransanı hədəf götürüb, hərbi təchizatla yüklənmiş və İsrailə gedən təyyarələrə Fransa ərazisindən uçuş icazəsi vermədiyinə görə onu tənqid edib. "ABŞ bunu YADDA SAXLAYACAQ", – o yazıb.
