Kallas: İranın Qətərə hücumları eskalasiyasını artırır
Avropa İttifaqının (Aİ) xarici siyasət rəhbəri Kaya Kallas xəbərdarlıq edir ki, İranın Qətərin enerji infrastrukturuna hücumları regionda qeyri-sabitliyi artırır.
"İranın Qətərin enerji infrastrukturuna hücumları xaosu gücləndirir. Aydındır ki, bu müharibədən çıxmaq lazımdır, eskalasiya yox", – o, martın 19-da Brüsseldə Aİ Şurasının iclasından öncə jurnalistlərə deyib.
"Bu, Ukrayna üçün də eyni dərəcədə vacibdir, çünki Rusiya İran müharibəsindən qazanc gözləyir", – Kallas X paylaşımında yazıb.
ABŞ tankerlərdəki İran neftinə sanksiyaları qaldıra bilər
Vaşinqton tankerlərdə qalmış təxminən 140 milyon barel İran neftinə sanksiyaları tezliklə ləğv edə bilər. Bunu ABŞ-nin maliyyə naziri Skott Bessent deyib. Məqsəd İranın Hörmüz boğazını bağlaması fonunda qlobal tədarükü artırmaq, qiymətləri aşağı salmaqdır.
Bessent martın 19-da “Fox Business Network”ə müsahibəsində deyib ki, əlavə neft "10 gündən iki həftəyə qədər tədarükü" qarşılaya, bazarların sabitləşməsinə kömək edə bilər.
Bessent əlavə edib ki, ABŞ Strateji Neft Ehtiyatından dövriyyəyə daha çox neft buraxa bilər. Onun sözlərinə görə, hökumət boğazdan təhlükəsiz keçidin təmin edilməsi üçün Yaponiya ilə danışıqlar aparır, Tokio da öz ehtiyatlarından neft buraxılmasını artıra bilər.
Maliyyə naziri Vaşinqtonun maliyyə bazarlarına müdaxilə etməyəcəyini deyib. Ancaq çatışmazlıqların kompensasiyası üçün fiziki təchizatın artırılmasına fokuslanacağını vurğulayıb.
Bessent xəbərdarlıq edib ki, Çin emal olunmuş yanacaqların "etibarsız" təchizatçısına çevrilib. O, reaktiv yanacaq kimi məhsulların ixracının azaldığını, bunun Asiyada təchizata təzyiqi artırdığını bildirib.
İran İsrailin neft emalı zavodunu vurub
İran İsrailin şimalındakı Hayfa şəhərində neft emalı zavoduna zərbə endirib. İsrail mediası və şahidlərin məlumatına görə, zavodda yanğın baş verib, Hayfada elektrik kəsintiləri başlayıb.
Martın 18-də İsrail İrana qarşı hazırkı əməliyyatlar başlayandan bəri ilk dəfə ölkənin qaz infrastrukturu obyektlərinə, xüsusən də "Cənubi Pars" yatağına zərbə endirib. İran buna cavab olaraq region ölkələrinin, o cümlədən Qətər və Səudiyyə Ərəbistanın enerji obyektlərini vurmağa başlayıb.
Pentaqon İranla müharibə üçün 200 milyard dollar istəyir
ABŞ prezidenti Donald Tramp İrana qarşı hərbi əməliyyatları maliyyələşdirmək üçün Konqresdən əlavə 200 milyard dollar istəyə biləcəyini təsdiqləyib. Pentaqonda belə bir sorğunun hazırlandığı barədə daha əvvəl "The Washington Post" və "The New York Times" xəbər vermişdi.
Hərbçiləri lazım olan hər şeylə təmin etmək üçün bu, "kiçik bir qiymətdir", - CNN Trampdan sitat gətirir. O qeyd edib ki, bu məbləğə İrana qarşı müharibə ilə bağlı olmayan digər xərclər də daxildir.
İranın neft tranziti üçün strateji əhəmiyyətli Hörmüz boğazını faktiki olaraq bağlaması fonunda Birləşmiş Ştatların mümkün quru əməliyyatı ilə bağlı xəbərlər yayılmağa başlayıb. Prezident Tramp jurnalistlərə deyib ki, heç yerə qoşun göndərmir, göndərmək qərarına gəlsəydi belə, jurnalistləri agah etməzdi.