İranda işçilər gəlirsiz qalıblar
Tikinti sənayesi nümayəndəsi deyir ki, inşaat layihələrinin dayandırılması səbəbindən bu sektorda çalışan işçilərin 80-90 faizi işsiz qalıb və bir çox tikinti sahələri bağlanıb.
Tikinti İşçiləri Assosiasiyası İdarə Heyətinin üzvü Mikayıl Sədiqi hökumətin lazımi dəstəyi göstərmədiyini, müharibə şəraitində işçilərin gəlir və dolanışıqsız qaldığını bildirib: "Düyü və bitki yağı kimi əsas malların həddindən artıq baha qiymətləri və 200-300 faizlik inflyasiya nəzərə alınmaqla, bu cüzi qazancın böyük hissəsi kirayə haqqına gedir".
"Bir işçinin belə bir maaşla belə bir şəraitdə necə yaşaması tamamilə anlaşılmazdır. Biz bu əməkhaqqı səviyyəsi ilə bağlı narazılığımızı açıq şəkildə bildirmişik", - o, sözlərinə əlavə edib.
İranda SEPAH-ın sözçüsü öldürülüb
İsrailin hava hücumu zamanı İran İslam İnqilabı Keşikçiləri Korpusunun (SEPAH) rəsmi sözçüsü Əli Məhəmməd Naini həlak olub.
"Naini martın 20-si səhər ABŞ və İsrailin cinayətkar və qorxaq hücumu nəticəsində şəhid olub", - SEPAH-ın məlumatında bildirilir.
Bundan bir neçə saat əvvəl SEPAH-a yaxın "Fars" agentliyi Naininin bəyanatını yayımlamışdı. Orada o, İranın hətta müharibə şəraitində belə raket istehsalını davam etdirdiyini və silah ehtiyatları ilə bağlı problem olmadığını bildirirdi.
İsrail və ABŞ fevralın 28-də İrana qarşı hərbi əməliyyata başlayıb. Cavab olaraq İran ABŞ hərbi bazalarına və Vaşinqtonun Fars körfəzindəki müttəfiqlərinin infrastrukturuna zərbələr endirir.
İranda hava zərbələri nəticəsində Ali lider Əli Xamenei, Ali Milli Təhlükəsizlik Şurasının katibi Əli Laricani, kəşfiyyat naziri İsmayıl Xətib və yarımhərbi "Bəsic" qüvvələrinin komandiri Qulamrza Süleymani həlak olub.
Bundan əlavə, ölkənin yeni Ali lideri Müctəba Xamenei yaralanıb. Xəsarətlərinin yüngül olduğu deyilir. İran Xarici İşlər Nazirliyi (XİN) ötən həftə onun özünü yaxşı hiss etdiyini bildirib.
İsrail hərbçisi İrana casusluq ittihamı ilə həbs edilib
İsrailin "Dəmir Qübbə" kimi tanınan hava hücumundan müdafiə sistemini idarə edən ehtiyatda olan hərbçi İrana məlumat ötürməsi şübhəsi ilə həbs olunub. Onun 26-yaşlı Qüds sakini Raz Koen olduğu müəyyən edilib.
Rəsmi versiyaya görə, o, bir neçə ay İran kəşfiyyatı agentləri ilə əlaqə saxlayıb və onların göstərişi ilə məxfi məlumatların ötürülməsi də daxil, təhlükəsizliklə bağlı müxtəlif tapşırıqları yerinə yetirib.
"The Times of Israel" yazır ki, Koen Telegram vasitəsilə "verbovka" olunub, bazaların koordinatlarını və məsul şəxslərin adlarını ötürüb.
Netanyahu: SEPAH komandirləri şəxsən təqib olunacaq
İsrailin baş naziri Binyamin Netanyahu martın 22-də bildirib ki, İran İslam İnqilabı Keşikçiləri Korpusunun (SEPAH) yüksəkrütbəli komandirləri şəxsən təqib ediləcək.
"Biz rejimi təqib edirik. SEPAH-ı, bu cinayətkar dəstəni təqib edirik", – Netanyahu ölkənin cənubundakı Arad şəhərinə İranın raket zərbəsindən bir gün sonra etdiyi səfəri zamanı deyib.
"Onları, onların liderlərini, obyektlərini, iqtisadi aktivlərini şəxsən təqib edirik", – o əlavə edib.
İsrail ordusu bildirib ki, İran müharibənin ilk üç həftəsi ərzində İsrailə 400-dən çox ballistik raket atıb, onların təxminən 92 faizi zərərsizləşdirilib.