İran Küveytə zərbə endirib. Bir nəfər həlak olub
İyulun 30-da İranın Küveytin şimalına zərbəsi nəticəsində Çin şirkətinə məxsus binaya raket düşüb. Küveyt rəsmilərinin bildirdiyinə görə, bir işçi həlak olub, binaya isə ciddi ziyan dəyib.
Həlak olan şəxsin vətəndaşlığı hələlik açıqlanmayıb.
Küveyt Müdafiə Nazirliyi hadisəni "İranın iyrənc təcavüzü" adlandırıb, zərbənin binaya ağır maddi ziyan vurduğunu bildirib.
İordaniya ordusu isə iyulun 30-da hava hücumundan müdafiə sistemlərinin İran ərazisindən buraxıldığı bildirilən beş raketi vurduğunu açıqlayıb. Xəsarət alan olmadığı bildirilir.
ABŞ Mərkəzi Komandanlığı (CENTCOM) və Küveyt hakimiyyəti hələlik bu iddiaya münasibət bildirməyib.
İran hücumu iyulun 29-na keçən gecə ABŞ-nin həyata keçirdiyi zərbələrə cavab kimi qiymətləndirib. Həmin hücumlar zamanı Qeşm adasında yaşayış məhəlləsinin də vurulduğu, İran mediasının iyulun 30-da yaydığı məlumatlara görə, bir neçə mülki şəxsin həlak olduğu bildirilir.
Küveytdəki ABŞ hərbi bazaları İranın son hücum dalğasında əsas hədəflərdən biri sayılır. İranın İslam İnqilabı Keşikçiləri Korpusu (SEPAH) və İran ordusu son günlər, demək olar ki, hər gün bu bazalara raket və pilotsuz uçuş aparatları ilə zərbələr endirdiyini bildirir.
Misir: Aralıq dənizindəki limanda yanğına dron səbəb olub
Misir iyulun 30-da bildirib ki, bir gün öncə ölkənin əsas qaz limanı olan Dəmiyyədə iki gəmidə yanğına mənşəyi naməlum dron səbəb olub. Bunu ilkin araşdırma üzə çıxarıb.
Şübhəli hücuma görə hələlik heç bir tərəf məsuliyyəti üzərinə götürməyib. Misir hakimiyyəti bildirib ki, hadisənin başvermə şəraitini müəyyənləşdirmək, milli təhlükəsizliyi təmin etmək məqsədilə araşdırmalar gedir.
Yanğın mayeləşdirilmiş qazın yenidən qaza çevrildiyi gəmidə və saxlama gəmisində yük boşaldılması zamanı baş verib. Hadisə nəticəsində ölən və ya xəsarət alan olmayıb.
Bu insident ABŞ ilə İran arasında gərginliyin daha da artdığı bir dövrdə baş verib.
ABŞ ordusu İrana zərbələr dalğasını yekunlaşdırdı
ABŞ Mərkəzi Komandanlığı (CENTCOM) iyulun 30-da bildirib ki, İranın ABŞ hərbi qüvvələrinə raket hücumları cəhdinə cavab olaraq İrana "genişmiqyaslı" zərbələr dalğasını başa çatdırıb.
"CENTCOM qüvvələri İranda İslam İnqilabı Keşikçiləri Korpusunun (SEPAH) onlarla hədəfini, o cümlədən hərbi komanda mərkəzlərini, raket və dron obyektlərini, sahil müşahidə və müdafiə məntəqələrini, həmçinin dəniz əməliyyatları üçün nəzərdə tutulan infrastrukturu vurub", – ABŞ ordusu X platformasında bildirib.
İranın dövlət mediası ölkənin cənub-qərbində yerləşən Xuzistan əyalətinin bir neçə şəhərinə, eləcə də Fars körfəzindəki Qeşm adasına zərbələr endirildiyini bildirib.
CENTCOM-un məlumatına görə, SEPAH qüvvələri iyulun 28-də Yaxın Şərqdəki ABŞ qüvvələrinə qəfil hücum cəhdi edərək İran ərazisindən bir neçə ballistik raket buraxıb. Komandanlıq İranın buraxdığı bütün raketlərin uğurla zərərsizləşdirildiyini açıqlayıb.
ABŞ İordaniyadakı bazaya hücumdan sonra İrana zərbələr endirib
ABŞ ordusu iyulun 29-u gecə saatlarında İrana zərbələr endirib. Vaşinqton əməliyyatın İranın Yaxın Şərqdə yerləşən ABŞ qüvvələrinə hücumlarına cavab olduğunu bildirib.
"Dünən İranın Yaxın Şərqdə yerləşən ABŞ qüvvələrinə hücum cəhdlərinə güclü cavab veririk", – ABŞ Mərkəzi Komandanlığı (CENTCOM) bildirib.
İranın dövlət mediası ölkənin bir sıra bölgələrində ardıcıl partlayışların qeydə alındığını xəbər verib.
ABŞ rəsmilərinin sözlərinə görə, əməliyyat SEPAH-ın iyulun 28-də İordaniyadakı ABŞ hərbi bazasına beş raket atmasından sonra həyata keçirilib. Bir neçə saat sonra ABŞ və Səudiyyə Ərəbistanı İraqda İranın dəstəklədiyi silahlı qruplaşmalara zərbələr endirib və bu, regionda gərginliyi daha da artırıb.
ABŞ prezidenti Donald Tramp iyulun 29-da "Fox News"a müsahibəsində hərbi əməliyyatın qaçılmaz olduğuna işarə etmişdi. O bildirmişdi ki, ABŞ İranın iddia edilən hücumuna qətiyyətlə cavab verəcək.
Tramp həmin gün Ağ evdə jurnalistlərə deyib ki, artıq zərbə endirmək növbəsi ABŞ ordusundadır: "Onlar bunun gələcəyini bilirlər. Bizdən bunu etməməyimizi xahiş edirlər, amma dünən gecə bizə atəş açmağa cəhd göstərdilər".
Həftəsonu Tramp Tehranla mümkün diplomatik təmaslara imkan yaratmaq məqsədilə İrana qarşı hərbi əməliyyatları müvəqqəti dayandırmışdı.
ABŞ-nin hərbi əməliyyatları bərpa etməsi regionda münaqişənin daha da genişlənə biləcəyi sarıdan narahatlıqları gücləndirib.