Kəşfiyyat: İran raket gücünü itirməyib – Tramp 'xəyanət' dedi
ABŞ kəşfiyyatının yeni qiymətləndirmələrinə görə, İran Birləşmiş Ştatlar və İsrail ilə aylarla davam edən silahlı münaqişəyə baxmayaraq, strateji raket imkanlarının əhəmiyyətli hissəsini qoruyub saxlayıb.
"The New York Times" və "The Washington Post" qəzetlərinin yazdığına görə, Tehran müharibədən əvvəlki raket arsenalının və mobil buraxılış qurğularının təxminən 70 faizini hələ də əlində saxlayır. Bundan başqa, İslam Respublikasının Hörmüz boğazı yaxınlığındakı strateji obyektlər də daxil olmaqla, yeraltı raket bazalarının 3/4-ü üzərində nəzarəti yenidən bərpa etdiyi bildirilir.
Bu məlumatlar Tramp administrasiyasının İranın hərbi cəhətdən, demək olar ki, çökdürülməsi ilə bağlı iddiaları ilə kəskin ziddiyyət təşkil edir.
ABŞ prezidenti Donald Tramp İranın hələ də döyüş qabiliyyətini qoruduğuna dair xəbərləri "saxta xəbərlər" adlandıraraq kəskin tənqid edib. O, mayın 12-si axşam "Truth Social" platformasında etdiyi paylaşımda bu cür məlumatları "faktiki XƏYANƏT" kimi dəyərləndirib. Tramp, konkret hansı xəbərləri nəzərdə tutduğunu açıqlamayıb.
Bu açıqlamalar münaqişənin sona çatdırılması ilə bağlı danışıqların dayandığı, Vaşinqtonda isə müharibənin maliyyə yükü ətrafında mübahisələrin gücləndiyi bir dövrə təsadüf edir.
Mayın 12-də müdafiə naziri Pit Heqset müharibənin ABŞ-nin sursat ehtiyatlarını təhlükəli həddə azaltdığı barədə iddiaları qətiyyətlə rədd edib. "Bizə lazım olan hər şeydən yetərincə var", - deyə o vurğulayıb.
Pentaqon: İranla müharibənin dəyəri 29 milyard dollara çatıb
Pentaqon ABŞ-nin İranla müharibəsinin ümumi dəyərinin təxminən 29 milyard dollar olduğunu açıqlayıb. Bu rəqəm iki həftə əvvəl açıqlanandan 4 milyard dollar çoxdur.
Məlumat mayın 12-də Vaşinqtonda keçirilən büdcə dinləmələrində səsləndirilib.
Müdafiə naziri Pit Heqset bildirib ki, məbləğin artması yenilənmiş təmir və əməliyyat xərcləri ilə birbaşa bağlıdır. "Birləşmiş Qərargah komandası və maliyyə nəzarəti komandası bu hesablamanı davamlı olaraq yenidən nəzərdən keçirir", — o əlavə edib.
Müharibənin maliyyə yükünün getdikcə artması aralıq seçkilərə cəmi aylar qalmış prezident Donald Tramp administrasiyası və Respublikaçılar Partiyasına siyasi təzyiqlərin gücləndiyi bir dövrə təsadüf edir. Demokratlar ölkədə yaşayış xərclərinin yüksəlməsini müharibə ilə əlaqələndirirlər.
Qətərin ikinci LNG tankeri Hörmüz boğazını keçib
Qətərin mayeləşdirilmiş təbii qaz (LNG) daşıyan ikinci tankeri İran və Pakistan arasında əldə olunmuş xüsusi razılaşma çərçivəsində Hörmüz boğazını uğurla keçib. Regionda münaqişə risklərinə baxmayaraq, enerji tədarükünün davam etdirilməsi istiqamətində atılan bu addımlar diqqət çəkir.
London Fond Birjası Qrupunun məlumatlarına görə, "Mihzem" gəmisi mayın 11-də Qətərin Ras Laffan terminalından yola düşüb və ertəsi gün strateji əhəmiyyətli su yolunu arxada qoyaraq Pakistanın Qasım limanına istiqamətlənib.
Həftəsonu isə "Əl Xaraitiyat" tankeri artıq Hörmüz boğazından keçmişdi.
Məsələdən xəbərdar olan mənbə "Reuters" agentliyinə bildirib ki, İran həmin yüklərin Pakistana göndərilməsinə razılıq verib. Qeyd edək ki, Pakistan kəskin qaz çatışmazlığı ilə üz-üzədir. İslamabad hökumətlərarası saziş çərçivəsində Qətərdən LNG tədarükünün fasiləsizliyini təmin etmək üçün əlavə zəmanətlər əldə etməyə çalışır.
Tramp: ABŞ İran məsələsində Çinin köməyinə möhtac deyil
ABŞ prezidenti Donald Tramp bildirib ki, Çin lideri Si Cinpin İran müharibəsi məsələsində "nisbətən yaxşı" mövqe tutub, lakin Vaşinqton Pekinin dəstəyinə ehtiyac duymur.
Tramp bu açıqlamaları Çinə səfərindən əvvəl jurnalistlərə verib. "İran məsələsində hər hansı bir köməyə ehtiyacımız olduğunu düşünmürəm. Biz bu müharibədən qalib çıxacağıq – ya sülh yolu ilə, ya da digər vasitələrlə", –prezident vurğulayıb.
O, Çinə səfəri zamanı Si ilə İran mövzusunda ətraflı müzakirə aparacağını bildirib. Tramp Çin liderini "dost" adlandırıb və onunla yaxşı dil tapdıqlarını qeyd edib.
Tramp mayın 13-ü axşam saatlarında Çinə çatıb. Prezidentin mayın 14–15-də Si ilə danışıqlar aparması və bir sıra rəsmi tədbirlərdə iştirak etməsi gözlənilir. O, Çinə ən son 2017-ci ildə səfər etmişdi.
Bundan əlavə, Tramp İranın atəşkəslə bağlı son təklifini rədd edərək onu "tamamilə qəbuledilməz" və "inanılmaz dərəcədə zəif" adlandırıb.
ABŞ prezidentinin Çinə səfəri ilkin olaraq mart ayına planlaşdırılmışdı, lakin İran müharibəsi səbəbindən təxirə salınmışdı.