Tramp İranla atəşkəsi uzatmaq niyyətində olmadığını bildirib
ABŞ prezidenti Donald Tramp İranla hazırda qüvvədə olan ikihəftəlik atəşkəs rejiminin müddətini uzatmaq niyyətində olmadığını bəyan edib.
D.Tramp "ABC News"un müxbiri Conatan Karla müsahibəsində hadisələrin istənilən ssenari ilə bitə biləcəyini vurğulayıb: "Lakin hesab edirəm ki, razılaşma daha məqsədəuyğundur. Yalnız bu halda onlar özlərini bərpa edə bilərlər".
Tərəflər keçən həftəsonu İslamabadda keçirilən sülh danışıqlarına şərait yaratmaq məqsədilə aprelin 7-də hərbi əməliyyatları dayandırmaq barədə razılığa gəliblər. Lakin aprelin 11-12-də baş tutan danışıqlar fevralın 28-də ABŞ və İsrailin İrana endirdiyi hava zərbələri ilə başlayan müharibəni sonlandıracaq bir sazişlə nəticələnməyib.
Buna baxmayaraq, aprelin 14-də Tramp İranla yeni danışıqlar raundunun bir-iki gün ərzində yenidən başlaya biləcəyini istisna etməyib.
Tramp: ABŞ-İran danışıqları iki günə Pakistanda davam edə bilər
ABŞ prezidenti Donald Tramp bildirib ki, ABŞ-İran danışıqları iki günə Pakistanda davam edə bilər. Bu haqda "The New York Post" aprelin 14-də məlumat yayıb.
"Əslində, siz orada qalmalısınız, çünki yaxın iki gün ərzində nəsə baş verə bilər və biz başqa yerə deyil, ora getməyə daha çox meylliyik", – "Post" Trampın İslamabadda olduğu bildirilən jurnalistə belə dediyini yazıb.
"Bunun ehtimalı böyükdür. Bilirsiniz niyə? Çünki feldmarşal əla iş görür", – Tramp Pakistan ordusunun başçısı Asim Munirə eyhamla deyib.
Aprelin 11-12-də Pakistanın ev sahibliyi və vasitəçiliyi ilə ABŞ və İran arasında yüksəksəviyyəli görüş keçirilib. ABŞ-nin nümayəndə heyətinə vitse-prezident Cey Di Vens rəhbərlik edib. Bu, tərəflər arasında təxminən yarım əsrdə ilk belə yüksəksəviyyəli görüş idi.
Görüşdə razılaşma əldə olunmayıb, aprelin 12-də danışıqlar vaxtından əvvəl dayandırılıb və ABŞ nümayəndə heyəti İslamabadı tərk edib.
ABŞ və İran aprelin 7-də ikihəftəlik atəşkəslə bağlı razılıq əldə ediblər. Müharibə fevralın 28-də ABŞ və İsrailin İrana hava zərbələri ilə başlayıb.
BVF-dən üç ssenari
Beynəlxalq Valyuta Fondu İran müharibəsi fonunda dünya iqtisadiyyatının artım tempi ilə bağlı üç ssenari təqdim edib. Xəbəri "Reuters" yayıb.
Nikbin ssenariyə görə, İran müharibəsi qısamüddətli olacaq, dünyanın ümum daxili məhsulunun (ÜDM) artımı 3.1 faiz, neftin orta qiyməti isə 82 dollar təşkil edəcək.
Mənfi ssenariyə görə, konflikt daha uzun çəkəcək, neftin qiyməti 2026-cı ildə 100 dollar civarında, gələn il isə 75 dollar təşkil edəcək. Qlobal ÜDM-nin artım tempi 2.5 faizə qədər geriləyəcək.
Ən pis ssenariyə görə, müharibə genişlənəcək, neft daha da bahalanacaq, əsas maliyyə bazarlarında kəsintilər olacaq, maliyyə şərtləri ağırlaşacaq, ÜDM-nin artımı 2 faizə düşəcək. BVF bunun qlobal durğunluğa yaxınlaşmaq anlamına gələcəyini bildirib.
İran: Müharibənin ilkin ziyanı 270 milyard dollardır
İlkin hesablamalara görə, ABŞ və İsrailin İrana hücumları təxminən 270 milyard dollarlıq ziyan vurub. Bunu İran hökumətinin sözçüsü bildirib.
"Danışıqlar qrupumuzun diqqətdə saxladığı məsələlərdən biri, İslamabad danışıqlarında da qaldırılan məsələ müharibə təzminatları ilə bağlıdır", – Fatimə Məhacirani Rusiyanın "RİA Novosti" dövlət agentliyinə deyib.
"İlkin və çox kobud hesablamalara görə, indiyədək dəyən zərər 270 milyard dollar civarındadır", – o deyib. Sözçü bu rəqəmin yekun olmadığını, zərərlərin bir neçə səviyyədə araşdırılmalı olduğunu vurğulayıb.
ABŞ və İsrailin İranla müharibəsi altı həftəyə yaxın davam edib, İranın bir çox hərbi və təhlükəsizlik mərkəzləri hədəfə alınıb. ABŞ və İsrail hərbçilərinin məlumatına görə, 16 mindən çox hədəfə zərbələr endirilib.
İranda polad zavodları, Məhşəhr və Əsəluyeh şəhərlərindəki neft-kimya kompleksləri, körpülər hədəfə alınıb, nəticədə fəaliyyətini tam dayandırıb.
İranın BMT-dəki daimi nümayəndəliyi də quruma məktubunda ölkəsinin Yaxın Şərqin beş ölkəsindən təzminat tələb etdiyini bildirib. Bəhreyn, Səudiyyə Ərəbistanı, Qətər, Birləşmiş Ərəb Əmirlikləri və İordaniyadan müharibədə iştiraklarına görə təzminat istənildiyi bildirilir.
İran da müharibə zamanı həmin ölkələrdə müxtəlif hərbi və iqtisadi obyektləri hədəfə alıb. Hörmüz boğazını bağlayaraq Fars körfəzindən qlobal bazarlara neft, qaz və digər məhsulların daşınmasının qarşısını alıb.