Bəhreyn atəşkəs elanından bir neçə saat sonra İranın zərbə endirdiyini bildirir
Bəhreyn Tehran və Vaşinqton arasında atəşkəs elan olunmasından cəmi bir neçə saat sonra İranın zərbə endirdiyini bildirib. Tərəflər hərbi əməliyyatları iki həftəlik dayandırmaq barədə razılığa gəliblər. Atəşkəsin bir şərti də İranın region ölkələrinə hücum etməməsidir.
Bəhreynin Daxili İşlər Nazirliyi hücumdan əvvəl vətəndaşlara xəbərdarlıq edib, onları sakit qalmağa və ən yaxın təhlükəsiz yerə getməyə çağırıb. Az sonra isə qurum X platformasında ölkənin Mülki Müdafiə Xidmətinin İranın hücumu nəticəsində obyektdə başlanan yanğını söndürdüyünü bildirib.
Məlumata görə, iki vətəndaş yüngül xəsarət alıb, İran dronunun zərərsizləşdirilməsi zamanı yerə düşən qəlpələr Sitra bölgəsində bir sıra evə ziyan vurub.
Qalibaf-Vens görüşü gözlənir
Aprelin 10-da Pakistandakı danışıqlarda İranı parlamentin spikeri Məhəmməd Baqer Qalibaf təmsil edəcək. Bu haqda İranın yarırəsmi ISNA agentliyi məlumat yayıb.
"Axios" isə ABŞ nümayəndə heyətinə vitse-prezident Cey Di Vensin başçılıq edəcəyini yazıb.
Bakı ABŞ-İran atəşkəsini alqışlayır
Rəsmi Bakı Amerika Birləşmiş Ştatları (ABŞ) və İran arasında atəşkəsi alqışlayır.
Bu barədə Azərbaycan Xarici İşlər Nazirliyinin (XİN) bəyanatında deyilir.
Bakı bu atəşkəsin regionda gərginliyin azaldılmasına, eləcə də davamlı sülh və sabitliyin bərqərar olmasına töhfə verəcəyinə ümid edir. "Tərəfləri mövcud məsələlərin həlli istiqamətində və qarşılıqlı etimadın yaradılmasına yönəlmiş məhsuldar dialoqa çağırırıq", - XİN vurğulayır.
"Azərbaycan hər zaman regionda davamlı sülhün, təhlükəsizliyin və əməkdaşlığın möhkəmləndirilməsinə yönəlmiş təşəbbüsləri dəstəkləməyə hazırdır", - bəyanatın sonunda əlavə edilir.