İrana bağlı hakerlər Amerika şirkətinə hücum edib
"Handala" haker qrupu ABŞ-də tibbi texnologiya şirkətinə kiberhücuma görə məsuliyyəti üzərinə götürdüyünü açıqlayıb. Bu qrupun İranın Kəşfiyyat Nazirliyi ilə əlaqəli olduğu bildirilir.
Hücuma məruz qalan "Stryker" şirkəti Miçiqan ştatında yerləşir, geniş çeşiddə tibbi avadanlıq və texnologiyalar istehsal edir.
Şirkət əməkdaşı NBC telekanalına anonim deyib ki, işçilərə şirkətin verdiyi mobil telefonlar işləməyib, həmkarlarla əlaqə tamamilə kəsilib.
Hücumun necə gerçəkləşdirilməsinin detalları məlum deyil. Açıq məlumatlara görə, hakerlər şirkətin "Microsoft" hesabına giriş əldə etmiş ola bilərlər. Bir mütəxəssisin sözlərinə görə, "Handala" bu hesabdan bəzi əməkdaşların cihazlarını zavod parametrlərinə sıfırlayıb.
NBC bu hadisəni iki ölkə arasında müharibə başlayandan İranın ABŞ şirkətinə qarşı ilk ciddi kiberhücumu olduğunu bildirir.
İtaliyanın İraqdakı bazası raketlə vurulub
İtaliyanın İraqın şimalında, İran sərhədinə yaxın yerləşən Ərbil şəhərindəki bazası raket zərbəsinə məruz qalıb. Məlumatı İtaliya Müdafiə Nazirliyi yayıb.
"İtaliyalı personalı arasında ölən və ya yaralanan yoxdur", – nazirlik martın 12-də X platformasında qeyd edib.
Tehranda İsveçrə səfirliyi bağlanıb
İsveçrə Tehrandakı səfirliyini müvəqqəti bağlayıb, bunu təhlükəsizlik riskinin artması ilə izah edib.
"Mövcud qeyri-sabit vəziyyətə görə hazırda konsulluq xidmətlərinin nə vaxt bərpa olunacağı bəlli deyil", – səfirlik saytında bildirir.
Vaşinqton və Tehran arasında diplomatik münasibətlər olmadığından İsveçrə onilliklərdir İranda ABŞ-nin maraqlarını təmsil edir.
ABŞ-nin Berndəki səfirliyi Vaşinqtonun İsveçrə hökumətinin qərarına hörmətlə yanaşdığını bildirib.
İsveçrə hökuməti ABŞ ilə İran arasında açıq kommunikasiya xəttini qoruyub saxlayacağını qeyd edib.
BMT Təhlükəsizlik Şurası İranın hücumlarını pisləyib
Martın 11-də BMT Təhlükəsizlik Şurası Tehranın Körfəz ölkələrinə, regiondakı digər dövlətlərə hücumlarını pisləyib. Rusiya və Çin səsvermədə bitərəf qalıb.
Qətnamədə İrandan Körfəz ölkələrinə hücumları dərhal dayandırmaq tələb olunur. Qeyd edilir ki, bu zərbələr beynəlxalq hüququ pozur, beynəlxalq sülh və təhlükəsizliyə ciddi təhdid yaradır.
İran İslam Respublikasının Bəhreyn, Küveyt, Oman, Qətər, Səudiyyə Ərəbistanı, Birləşmiş Ərəb Əmirlikləri və İordaniyaya bütün hücumları "dərhal" dayandırması tələb edilir.
Qətnamənin mətnini Şuranın daimi üzvü olmayan Bəhreyn təqdim edib, Təhlükəsizlik Şurasının 15 üzvündən 13-ü mətnin lehinə səs verib.
ABŞ və İsrailin İrana hava zərbələrinə cavab olaraq Tehran ABŞ-nin Körfəzdəki ərəb müttəfiqlərini raket və dronlarla vurur.
İran qətnaməni pisləyib, bunu "Təhlükəsizlik Şurasından sui-istifadə" adlandırıb.