Keçid linkləri

Təcili xəbərlər
2024, 25 Fevral, bazar, Bakı vaxtı 16:34

Azərbaycan xəbərləri

Prezident İstiqlaliyyət abidəsini ziyarət edib

İ.Əliyev İstiqlaliyyət abidəsi önündə. 27 may 2019
İ.Əliyev İstiqlaliyyət abidəsi önündə. 27 may 2019

Bu gün, mayın 27-də prezident İlham Əliyev Azərbaycan Xalq Cümhuriyyətinin şərəfinə paytaxtın İstiqlaliyyət küçəsində ucaldılmış abidəni Respublika Günü münasibətilə ziyarət edib.

AZƏRTAC-ın xəbərinə görə, dövlət başçısı abidənin önünə əklil qoyub.

Sabah, mayın 28-də Azərbaycanda Respublika Günü qeyd ediləcək.

1918-ci il mayın 28-də Azərbaycan Xalq Cümhuriyyəti yaradılıb.

1920-ci il aprelin 27-də Rusiyanın silahlı müdaxiləsi ilə Cümhuriyyət süqut edib. 1991-ci ildə elan edilən Azərbaycan Respublikasının XC-nin varisi olduğu açıqlanıb.

Bütün xəbərləri izləyin

Samir Rzayev AZAL-ın prezidenti təyin edilib

Samir Rzayev “Azərbaycan Hava Yolları” Qapalı Səhmdar Cəmiyyətinin (AZAL) prezidenti təyin edilib.

Bu barədə prezident İlham Əliyev fevralın 22-də sərəncam imzalayıb.

Dövlət başçısının digər sərəncamı ilə Samir Rzayev bu qurumun birinci vitse-prezidenti vəzifəsindən azad edilib.

Ötən ilin sentyabrında Cahangir Əsgərov AZAL prezidenti vəzifəsindən azad edilmişdi.

Elə bu vəzifənin icrası müvəqqəti olaraq Samir Rzayevə həvalə edilmişdi.

Cahangir Əsgərov isə həmin vəzifəni 2008-ci il mayın 1-dən tuturdu.

Təyyarə biletlərini ucuzlaşmağa kim qoymur? AZAL-ın bitməyən monopoliyası
Gözlə

No media source currently available

0:00 0:09:52 0:00

Samir Rzayev kimdir?

Samir Musa oğlu Rzayev Azərbaycan Dövlət İqtisad Universitetində oxuyub və magistr dərəcəsini Böyük Britaniyanın Durham Universitetində davam etdib.

O, 2009-2017-ci illərdə Azərbaycan İpoteka və Kredit Zəmanət Fondunda Maliyyə şöbəsinin müdiri, daha sonra isə “Paşa Holdinq”ə məxsus "Azərbaycan Supermarket" MMC-nin “Bravo” supermarketlər şəbəkəsində satış müdiri vəzifəsində işləyib.

2022-ci ildə Prezident İlham Əliyevin müvafiq sərəncamı ilə “Azərbaycan Hava Yolları” Qapalı Səhmdar Cəmiyyətinin birinci vitse-prezidenti təyin edilib.

Yeni kütləvi saxlananlar var?

Mediada 'casus' damğası. Amma rəsmi ittiham narkotik. Ailələr hər iki iddianı yalanlayır
Gözlə

No media source currently available

0:00 0:04:20 0:00

Son günlər Azərbaycanda dindar kəsimdən olan onlarca şəxsin yenidən saxlandığı ilə bağlı məlumatlar var. Yaxınlarının həbs edildiyini deyən bəzi adlarının çəkilməsini istəməyən şəxslərin sözlərinə görə, bu proses fevralın 19-dan başlayıb və kütləvi xarakter alıb: "Gəncədə elə hal olub ki, bir küçədən 7 nəfəri bir gündə saxlayıblar".

Onların sözlərinə görə, belə hallar Bakıda, Biləsuvarda, Neftçalada, Gəncədə, Astarada və Masallıda olub: "Həbs olunanların hamısını narkotiklə ittiham edirlər. Əslində onları nə vaxtsa Kərbəlaya gedib şəkil çəkdirib, qoyub, Qumda oxuyub deyə tuturlar".

“Müsəlman Birliyi” Hərəkatından da “ Turan” Agentliyinə belə saxlananlardan bəzilərinin onların üzvləri olduğunu deyiblər.

Amma bütün bu deyilənlərlə bağlı, hələlik, hüquq-mühafizə orqanlarından münasibət öyrənmək mümkün olmayıb.


Xatırlatma

Azərbaycan mediasında yer alan müxtəlif məlumatlara görə, keçən ildə paytaxt Bakı və bölgələrdə dindar kəsimdən olan şəxslərin kütləvi həbsi həyata keçirilib. Onda da saxlananlara qarşı əsasən narkotik ittihamının verildiyi deyilirdi.

Amma yerli mediada bütün bu həbslər Azərbaycanın İranla münasibətlərinin gərginləşməsi ilə izah edilirdi. Sonradan iki ölkə arasında münasibətlə normallaşdıqca belə həbslərin də azaldığı bildirilmişdi.

İsveç xarici işlər naziri Qubad İbadoğludan danışıb

Tobias Billström
Tobias Billström

İsveçin xarici işlər naziri Tobias Billström həbsdə olan müxalifətçi Qubad İbadoğlu ilə bağlı isveçli deputat Erik Helsbornun sualını cavablandırıb. Nazir noyabrın 30-da ATƏT-in Şimali Makedoniyada keçirilən toplantısında Q.İbadoğlunun məsələsini qaldırdığını bildirir.

Açıqlamada deyilir ki, insan haqlarına hörmət İsveçin bütün beynəlxalq kontaktlarının əsasını təşkil edir: "Hökumət Qubad İbadoğlunun ciddi sağlıq problemləri ilə bağlı məlumatlardan narahatdır. İsveçin nümayəndələri Qubad İbadoğlunun qohumları ilə müxtəlif səviyyələrdə təmasdadırlar".

Nazirin sözlərinə görə, İsveç Bakıdakı səfirliyi vasitəsilə məsələni Azərbaycan rəsmiləri ilə müzakirə edib. Noyabrın 30-da Azərbaycanın xarici işlər naziri Ceyhun Bayramov ilə görüşündə isə digər məsələlərlə yanaşı, Q.İbadoğluya adekvat tibbi xidmət göstərilməsinin vacibliyini vurğulayıb: "Hökumət bu məsələni Azərbaycanla ikitərəfli təmaslarda qaldırmağa davam edəcək, fəaliyyətimizi Aİ daxilindəki tərəfdaşlarımızla əlaqələndirəcəyik".

Qubad İbadoğlu kimdir və nə üçün həbs edilib?
Gözlə

No media source currently available

0:00 0:04:39 0:00

Qubad İbadoğlunun həbs müddəti artırılıb

Fevralın 15-də Nərimanov rayon Məhkəməsi Azərbaycan Demokratiya və Rifah Partiyasının (ADR) sədri Qubad İbadoğlu barəsində seçilmiş həbs-qətimkan tədbirinin müddətini daha üç ay uzadıb.

Bu barədə vəkil Zibeydə Sadıqova məlumat verib.

Müdafiə tərəfi bu qərarı əsassız hesab edir və ondan şikayət vermək niyyətindədir.

Vəkil vurğulayıb ki, həbsdə olan siyasətçinin səhhəti pisdir və həbs həyatı onun sağlamlığı üçün təhlükəli sayılır.

Onun səhhəti ilə bağlı bu deyilənlərə, hələlik, Penitensiar Xidmət və başqa rəsmi qurumlardan münasibət almaq mümkün olmayıb.

Q.İbadoğlu ötən il iyulun 23-də həbs olunub. O, Cinayət Məcəlləsinin 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma) və həmin maddənin əlavə olaraq 3.1-ci (eyni əməllər mütəşəkkil dəstə tərəfindən törədildikdə) bəndi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb.

Siyasətçi məhkəmədə irəli sürülən bütün ittihamları saxta adlandırıb. Bir sıra beynəlxalq təşkilatlar da Azərbaycan hökumətini Q.İbadoğlunun işinə obyektiv baxmağa, onun hüquqlarının qorunmasına çağırıblar.

Əziz Orucovun həbs müddəti uzadılıb

Əziz Orucov
Əziz Orucov

"Kanal 13" internet televiziyasının icraçı direktoru Əziz Orucov barəsində seçilmiş həbs qətimkan tədbirinin müddəti daha 1 ay uzadılıb.

Bu qərarı bu gün, fevralın 21-də Səbail Rayon Məhkəməsi qəbul edib.

Bu barədə məlumat verən vəkili Bəhruz Bayramov qeyd edib ki, həbs müddəti martın 27-nə qədər uzadılıb. Onun haqqında məhkəməyə qədər həbs müddəti fevralın 26-da başa çatırdı.

Müdafiə tərəfi qərarı əsassız sayır və apellyasiya şikayəti veriləcəyini bildirir:

"Əziz Orucov da bunu və ümumiyyətlə öz həbsini jurnalistika fəaliyyəti ilə əlaqələndirir".

“Kanal 13” internet televiziyasının icraçı direktoru Əziz Orucov ötən ilin noyabrın 27-də həbs olunub.

Ona qarşı Cinayət Məcəlləsinin 188.2 (Mülkiyyət, istifadə və ya icarə hüququ olmadan torpaq sahəsi üzərində özbaşına tikinti və ya quraşdırma işləri aparma) maddəsilə ittiham irəli sürülmüşdü.

Dekabrın 19-da isə Əziz Orucova Cinayət Məcəlləsinin 206.3.2 (qaçaqmalçılıq - qabaqcadan əlbir olan bir qrup şəxs tərəfindən törədildikdə) maddəsilə əlavə ittiham verildi.

Son aylar Azərbaycanda 5-dən çox jurnalist həbs edilib. Onlara əsasən qaçaqmalçılıq ittihamı verilib. Onların heç biri ittihamları qəbul etmir, həbslərini peşə fəaliyyətləri ilə bağlayırlar. Halbuki, rəsmilər ölkədə jurnalistlərin peşə fəaliyyəti ilə bağlı həbs edilmələrinə aid deyilənləri qəbul etmirlər.

Ailəsi Nazim Bəydəmirlinin səhhətindən narahatdır

Nazim Bəydəmirli
Nazim Bəydəmirli

Həbsdə olan işadamı, keçmiş deputat Nazim Bəydəmirlinin səhhətində problemlər yarandığı bildirilir.

Bu barədə N.Bəydəmirlinin həyat yoldaşı Fəridə Bəydəmirli məlumat verib. Onun sözlərinə görə, bu gün, fevralın 21-də N.Bəydəmirli ilə telefonla danışıb: "Dedi ki, özümü çox pis hiss edirəm, səhhətimdə problemlər yaranıb. Zatən Nazim həmişə noyabr ayında fizioterapiyaya başlayırdı, çünki onun bronxlarında problem var idi".

F.Bəydəmirli qeyd edib ki, fevralın 19-da həyat yoldaşını Penitensiar Xidmətin tibb məntəqəsinə gətiriblər: "Özü bunun üçün müraciət etmədiyini dedi. Nazimi rentgen ediblər, qan təzyiqini ölçüblər. Qan təzyiqi çox yüksək olub, halbuki heç vaxt onun qan təzyiqi olmayıb. Bir də laboratoriya analizini məsləhət görüblər, Nazim razı olmayıb".

İşadamının həyat yoldaşı vurğulayıb ki, o öz inandığı həkimlərin saxlandığı təcridxanaya gəlməsini istəyir: "Bunun üçün rəsmi müraciət edəcəyik".

Bu deyilənlərə Ədliyyə Nazirliyinin Baş Tibb İdarəsindən münasibət öyrənmək mümkün olmayıb.

N.Bəydəmirli ötən il iyulun 4-də Cinayət Məcəlləsinin 182.2.4-cü (xeyli miqdarda əmlak əldə etmək məqsədilə hədə-qorxu ilə tələb etmə) maddəsi ilə ittiham olunaraq saxlanıb. Ertəsi gün məhkəmə onu 4 ay müddətinə həbs edib. Bəydəmirli ittihamı rədd edib, onu uydurma və hüquqi əsaslardan məhrum adlandırıb. Müdafiə tərəfinin bildirməsinə görə, N.Bəydəmirli hesab edir ki, o, ekologiya məhbusudur və həbsinin səbəbi Söyüdlü hadisələrini pərdələmək üçündür. Sentyabrın 1-də Bəydəmirliyə qarşı CM-in 182.2.2-ci (təhdid yolu ilə tələb etmə, dəfələrlə törədildikdə) maddəsi ilə daha bir ittiham irəli sürülüb. O, bu ittihamı da qəbul etmir.

Onun həbs müddəti məhkəməyə qədər bir neçə dəfə artırılıb.

Polis nəzarətində olan Söyüdlüdən səslər: 'Evimizdə dustağa çevrilmişik'
Gözlə

No media source currently available

0:00 0:05:57 0:00

Xatırlatma

Ötən il iyunun 20-də Gədəbəy rayonunun Söyüdlü sakinləri "Gədəbəy" qızıl yatağından çirkab suları üçün ikinci süni gölün qurulmasına ekoloji tələblərlə etiraz ediblər. Polis etirazlara gözyaşardıcı qazdan istifadə olunmaqla müdaxilə edib, saxlananlar, həbs edilənlər olub (onların dəqiq sayı rəsmi açıqlanmır).

İyulun 11-də prezident İlham Əliyev hökumətin iclasında Söyüdlüdəki etirazlardan danışarkən vətəndaşların qanuna tabe olmalı olduğunu vurğulayıb. Bu çıxışdan iki gün sonra Söyüdlüdə qızıl yatağının istismarının müvəqqəti dayandırıldığı açıqlanıb.

Rəsmi monitorinqlərin nəticələrinə görə, ərazidə su obyektlərində bir sıra göstəricilərin normadan artıq olduğu aşkarlanıb. Bununla belə, ötən il sentyabrın 26-da mədənin mərhələlərlə fəaliyyətə başlaması məqbul sayılıb.

update

Kamil Zeynallı sərbəst buraxılıb

Kamil Zeynallı
Kamil Zeynallı

Ermənistan Daxili İşlər Nazirliyinin sözçüsü Narek Sarkisyan deyib ki, Ermənistanın hərbi cinayətdə ittiham etdiyi Zeynallı saxlanandan az sonra Moskva Yerevanla əlaqəyə girərək bu xəbəri təsdiq edib.

AzadlıqRadiosunun Erməni xidməti – Azatutyun yazır ki, Sarkisyan ittihamın detalları barədə məlumat verməyib.

Erməni tərəfi ittihamın Zeynallının 44 günlük müharibəı zamanı Hadrutda yaşlı bir nəfərin başını kəsməsi iddiası ilə bağlı olduğunu bildirir.

Sarkisyan habelə Azatutyuna deyib ki, nazirlik şübhəlinin mümkün ekstradisiyası üçün laızm olan bütün sənədləri toplayaraq Rusiya hüquq-mühafizə orqanlaırna vermişdi.

Ermənistanın beynəlxalq hüquq ekspertlərindən Ara Qazaryan bu addımı mənasız adlandırıb.

Qazaryan Moskvanın şübhəlini sərbəst buraxmaq qərarının siyasi motivli olduğunu deyib. Ekspert bildirib ki, insident Rusiya-Ermənistan münasibətlərində artmaqda olan gərginliyi əks etdirir.

***

Bundan əvvəl verrilən xəbərdə deyilirdi ki, fevralın 21-də Moskvada saxlanılan Kamil Zeynallı sərbəst buraxılıb.

Bu barədə məlumatı Azərbaycan Xarici İşlər Nazirliyindən də "Turan"a təsdiqləyiblər.

+++

Azərbaycanlı fitnes məşqçisi Kamil Zeynallı fevralın 21-də gecə saatlarında Moskvanın "Domodedovo" hava limanında saxlanılıb.

Bu barədə onun özü videomüraciət yayıb.

K.Zeynallının sözlərinə görə, polis əməkdaşları ötən ilin mayında Ermənistan tərəfindən beynəlxalq axtarışa verildiyini və onu həmin ölkəyə ekstradisiya edə biləcəklərini deyiblər: "May ayından mən üç dəfə Rusiyaya gəlmişəm, indi saxladılar. Ümid edirəm ki, dövlət qurumlarımız mənə dəstək olarlar".

Onun dediklərini, hələlik, Rusiyanın müvafiq hüquq-mühafizə orqanlarından dəqiqləşdirmək mümkün olmayıb.

Ermənistan təsdiqləyir

Bununla belə, Ermənistan Daxili İşlər Nazirliyinin mətbuat katibi Narek Sarqsyan AzadlıqRadiosunun erməni xidmətinə adıçəkilən şəxsi qətl ittihamı ilə beynəlxalq axtarışa verdiklərini təsdiqləyib.

Azatutyun-un məlumatına görə, K.Zeynallı 2020-ci ildə müharibə zamanı Hadrutun iki sakininin öldürülməsində ittiham olunur.

Azərbaycan Xarici İşlər Nazirliyindən isə məsələ ilə bağlı "Turan"a bunları deyiblər: "Bu məsələ səfirliyimizin nəzarətindədir. Vətəndaşa müvafiq dəstək göstərilir. Əlavə məlumat, hələlik, yoxdur".

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa etmişdi. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.

Ötən il sentyabrın 19-20-də Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.

Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.

Sentyabrın 28-də tanınmayan qurum fəaliyyətini dayandıracağını elan edib.

Həbsdəki 'Abzas Media' əməkdaşlarına bəzi məhdudiyyətlər götürülüb

'Azərbaycanda həbslər davam edəcək': AbzasMedia İşində son vəziyyət
Gözlə

No media source currently available

0:00 0:05:34 0:00

"Abzas Media işi" üzrə həbs olunmuş jurnalistlərin yaxınları ilə telefon danışığı və görüşlərinə məhdudiyyət götürülüb.

Bu barədə vəkil Şəhla Hümbətova məlumat verib.

Bundan əvvəl "Abzas Media"çılar telefon danışığı və görüşlərinə məhdudiyyət qoyulduğunu bildirmişdilər. Onlar hətta bununla bağlı məhkəməyə də üz tutmuşdular.

Onlar habelə vurğulayırdılar ki, bir çox yaxınlarının pensiya, bank kartlarına da məhdudiyyətlər tətbiq edilib. Həmin şikayətləri bəzi banklar təsdiqləsə də, məsələyə rəsmi qurumlardan münasibət almaq mümkün olmamışdı.

Ofeliya Məhərrəmova
Ofeliya Məhərrəmova

"Üç aydır danışmırdıq"

Jurnalistlərin ailə üzvləri də onların telefon danışığı və görüşlərinə qadağanın aradan qaldırıldığını təsdiqləyiblər.

"AbzasMedia" nəşrinin baş redaktoru Sevinc Abbasovanın (Vaqifqızı) anası Ofeliya Məhərrəmova AzadlıqRadiosuna bildirib ki, fevralın 19-da qızı ilə telefonla danışıblar: "Qadağa qoyulduğuna görə üç aydır danışmırdıq. Düzü, mənim üçün də gözlənilməz oldu. Dedi ki, "lap yaxşıyam, mənə görə narahat olmayın". Amma göndərdiyimiz bəzi şeylər ona çatmayıb. Nə göndəririksə, siyahıda da yazırıq. Baxıb ki, siyahıda olanların bəziləri verilməyib. Məsələn, dörd kitabdan biri, gigiyenik vasitələr...".

O.Məhərrəmovanın bu dediklərinə Penitensiar Xidmətdən münasibət almaq mümkün olmayib.

Xatırlatma

Noyabrın 20-də "Abzas Media" nəşrinin direktoru Ülvi Həsənli və onun müavini olduğu bildirilən Məhəmməd Kekalov saxlanıb. Ertəsi gün "Abzas Media"nın baş redaktoru Sevinc Vaqifqızı tutulub. Daha sonra jurnalistlər Hafiz Babalı, Nərgiz AbsalamovaElnarə Qasımova da eyni iş üzrə saxlanıb. Onların hamısı qaçaqmalçılıqda ittiham olunub və istintaq müddətində həbs ediliblər. Həbs olunanlar ittihamları rədd ediblər, öz həbslərini peşəkar jurnalist fəaliyyəti və "Abzas Media"nın korrupsiya araşdırmaları ilə əlaqələndiriblər.

Beynəlxalq təşkilatlar da "Abzas Media"nın əməkdaşları ilə bağlı narahatlıqlarını ifadə ediblər. Rəsmilər isə ölkədə jurnalistlərin peşə fəaliyyətlərinə görə həbs olunmaları ilə bağlı deyilənləri qəbul etmirlər.

Türkiyə-Azərbaycan Universiteti yaradılacaq

İlham Əliyevin və Rəcəb Tayyib Ərdoğanın təkbətək görüşü
İlham Əliyevin və Rəcəb Tayyib Ərdoğanın təkbətək görüşü

Fevralın 19-də Ankarada Azərbaycan prezidenti İlham Əliyevlə Türkiyə prezidenti Rəcəb Tayyib Ərdoğanın təkbətək və geniş tərkibdə görüşləri olub. Daha sonra onların iştirakı ilə bir neçə sənəd imzalanıb.

Sənədlərdən biri Türkiyə-Azərbaycan Universitetinin yaradılmasına dair Anlaşma Memorandumu olub.

Habelə, iki ölkə arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında saziş imzalanıb.

+++

Azərbaycan prezidenti İlham Əliyev fevralın 18-də Türkiyəyə səfər edib. Səfər Türkiyə prezidenti Rəcəb Tayyib Ərdoğanın dəvəti ilə gerçəkləşib.

Türkiyə, Azərbaycan dövlət başçıları və hökumət rəhbərlərinin seçkilərdən sonra ilk olaraq bir-birlərinə səfər etmək ənənəsi var. 21 ildir ölkəyə rəhbərlik edən İ.Əliyevin də bu ay keçirilən növbəti prezident seçkisindən qalib ayrıldığı açıqlanıb. Amma o, bu səfərdən iki gün əvvəl Münxen Təhlükəsizlik Konfransının işinə də qatılmışdı.

Nazirlər Kabinetinin yeni tərkibində Fikrət Məmmədov və Mübariz Qurbanlı yoxdur

Fikrət Məmmədov
Fikrət Məmmədov

Prezident İlham Əliyev fevralın 16-da Nazirlər Kabinetinin yeni tərkibini təsdiqləyib.

Yeni tərkibin üzvləri elə əvvəlki siamlardır. Amma bəzi əskiklər var. Məsələn, ədliyyə naziri və Dini Qurumlarla İş üzrə Dövlət Komitəsinin sədri vəzifələrini tutanlar orada yer almırlar.

Ədliyyə naziri təyin olunanadək həmin vəzifənin icrası müavin Azər Cəfərova həvalə edilib. Bu postu 2000-ci ildən Fikrət Məmmədov tuturdu.

Dini Qurumlarla İş üzrə Dövlət Komitəsinin sədri vəzifəsinin müvəqqəti icrası isə birinci müavin Səyyad Salahlıya tapşırılıb. Bu postu 10 il idi Mübariz Qurbanlı tuturdu.

Əli Əsədov baş nazir postunda qaldı

Milli Məclisin bu gün, fevralın 16-da keçirilən iclasında Əli Əsədovun yenidən baş nazir təyin edilməsinə razılıq verilməsi məsələsi müzakirəyə çıxarılıb.

Prezident İlham Əliyev bu vəzifəyə yenidən onun namizədliyini irəli sürüb.

Ə.Əsədovun namizədliyinin irəli sürülməsini spiker Sahibə Qafarova elan edib.

Milli Məclis prezidentin təqdimatına əsasən Ə.Əsədovun baş nazir təyin edilməsinə razılıq verib.

Ə.Əsədov 2019-cu ildən bu postu tutur. Ölkəyə 21 ildir rəhbərlik edən İ.Əliyev fevralın 7-də keçirilən növbədənkənar prezident seçkisində qalib sayıldıqdan sonra o, konstitusiyaya uyğun olaraq istefa vermişdi.

Prezident: Əgər Ermənistan öz qanunvericiliyini normal qaydaya salmasa, sülh müqaviləsi olmayacaq

“Əgər bizə qarşı ərazi iddialarına son qoyulmazsa, əgər Ermənistan öz qanunvericiliyini normal qaydaya salmazsa, təbii ki, sülh müqaviləsi olmayacaq”

AZƏRTAC-ın xəbərinə görə, bu fikirləri prezident İlham Əliyev fevralın 14-də keçirilən andiçmə mərasimindəki nitqində söyləyib.

O nitqində Ermənistanla sülh müqaviləsinə də toxunub.

Bu fikirlərə, hələlik, Ermənistan rəsmiləri münasibət bildirməyiblər.

Ermənistan Konstitusiyasında ölkənin 1990-cı il Müstəqillik Bəyannaməsinə istinad edilir. Öz növbəsində bu bəyannamədə Sovet Ermənistanı ilə Azərbaycanın keçmiş Dağlıq Qarabağ Muxtar Vilayətinin birləşdirilməsinə dair 1989-cu il aktına istinad olunur.

Ermənistan baş naziri Paşinyan bir müddət öncə indiki konstitusiyanı tənqid etmişdi. O, bildirmişdi ki, bu müddəalar ana qanunda qaldıqca Ermənistan və Azərbaycan arasında heç vaxt sülh olmayacaq.

Amma Ermənistan müxalifəti dəyişikliyin əleyhinədir.

“Vətəndaş cəmiyyətinin yaradılması ilə bağlı addımlar atacağıq”

Prezident İlham Əliyev çıxışında həmçinin deyib ki, bundan sonra da Azərbaycanda vətəndaş cəmiyyətinin yaradılması ilə bağlı addımlar atacağıq.

Azərbaycan müxalifəti və bəzi hüquq müdafiəçiləri hesab edirlər ki, İlham Əliyevin 21 illik hakimiyyəti dönəmində vətəndaş cəmiyyətinə böyük basqılar olub.

Onlar həm qanunvericilik sahəsində mənfi dəyişikliklərin olduğunu söyləyir, həm də siyasi həbslərin artdığını deyirlər.

Hərçənd, rəsmilər ölkədə siyasi həbslərin olması ilə bağlı fikirləri qəbul etmirlər.

Ötən həftə, fevralın 7-də Azərbaycanda Prezident seçkisi keçirilib. Azərbaycan Mərkəzi Seçki Komissiyasının açıqlamasına görə, İlham Əliyev bütün rəqiblərini qabaqlayaraq səslərin 90 faizindən çoxunu qazanıb.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib.

2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa etmişdi. Ancaq tərəflər sülh sazişi ( danışıqlar həm Avropa İttifaqının, həm də Rusiyanın ayrılıqda vasitəçilikləri ilə aparılır) imzalamayıb.

Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.

Ötən il sentyabrın 19-20-də isə Bakı Qarabağda "lokal antiterror tədbirlər" elan edib. Yeravan bunu “etnik təmizlənmə” və “təcavüz” kimi dəyərləndirib.

Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb. Separatçı qurumun bir çox liderləri də saxlanaraq Bakıya gətirilib.

ADR üzvünün oğlu saxlanıb

Əyyub Çələbi
Əyyub Çələbi

Fevralın 10-da Azərbaycan Demokratiya və Rifah (ADR) Partiyasının Gənclər Təşkilatının üzvü Əyyub Çələbiyə 30 sutka inzibati həbs cəzası verildiyi bildirilir.

Bu barədə AzadlıqRadiosuna Əyyub Çələbinin atası Xəyyam Çələbi danışıb

X.Çələbi ADR Partiyasının Səbail rayon təşkilatının sədridir.

Onun sözlərinə görə, oğlu Ə.Çələbi evdən çıxıb məhəllədəki dükandan çörək almaq istəyib, amma geri qayıtmayıb: "Qonşulardan öyrəndim ki, oğlumu evimizin həyətində üç nəfər mülki geyimli şəxs saxlayaraq aparıb. Müxtəlif polis bölmələrində olanda Əyyubun Bakı şəhər Baş Polis İdarəsinə aparıldığını bildim. Yalnız Qaradağ rayon Polis İdarəsinin 10-cu Polis Bölməsində mənə dedilər ki, Əyyubu saxlayıblar. Bölmədən söylədilər ki, arxayın olun, uşaq sağdır. O, cinayət işi ilə bağlı saxlanılmayıb".

X.Çələbi bildirib ki, Əyyubun ürəyində qüsur olduğundan hərbi xidmətə də aparılmayıb.

"Oğlumun saxlanılması siyasi sifarişdir, çünki mənə görə saxlayıblar. Özüm də I qrup əliləm, Qarabağ müharibəsində əlil olmuşam, hər iki ayağım yoxdur. Bu səbəbdən mənə cəza verə bilmirlər. Təzyiq kimi oğlumu cəzalandırırlar. Ola bilər ki, oğlum da tənqidi nəsə paylaşıb. O yazdığı yazıları, hətta ondan sərt yazıları hər kəs yazır", - X.Çələbi əlavə edib.

Daxili İşlər Nazirliyinin (DİN) mətbuat xidmətindən də "Amerikanın Səsi"nə bildirib ki, Ə.Çələbini polis əməkdaşları saxlayıb. Onun məhkəmə qərarı ilə 30 sutka inzibati qaydada həbs edildiyi deyilir. Amma işin detallarını dəqiqləşdirmək mümkün olmayıb.

Xatırlatma

ADR sədri Qubad İbadoğlu 2023-cü il iyulun 24-də həbs edilib. O, Cinayət Məcəlləsinin 204.3.1 (… saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə), 167-3.1 (dini ekstremist materialları hazırlama, saxlama, yayma) maddələri ilə ittiham olunur.

Q.İbadoğlu ittihamları siyasi sayır. Hərçənd rəsmilər ölkədə siyasi həbslərin olması ilə bağlı fikirləri qəbul etmirlər.

Həcc ziyarəti bu il də bahalaşıb

Kəbə
Kəbə

Qafqaz Müsəlmanları İdarəsi (QMİ) 2024-cü ildə Həcc ziyarətinə getmək istəyən zəvvarlar üçün qiymətləri açıqlayıb.

İdarənin yaydığı məlumata görə, bir nəfər üçün ziyarət paketinin qiyməti 5 min 850 ABŞ dolları təşkil edir: "Ziyarət vahid formada təşkil olunacaq və hava nəqliyyatı ilə həyata keçiriləcək".

Bu, 2023-cü ildə Həcc ziyarəti qiyməti ilə müqayisədə 100 dolar çoxdur. Ötən il bir nəfərlik ziyarət paketinin qiyməti 5 min 750 dollar təşkil edirdi.

Ümumiyyətlə, son beş ildə ziyarətin qiyməti 1 min 300 dollardan çox artıb.

Koronavirus pandemiyası səbəbindən 2020-2021-ci illərdə Azərbaycandan Həcc ziyarətinə gedən olmayıb.

Azərbaycanda Həcc ziyarətini Qafqaz Müsəlmanları İdarəsi təşkil edir. Son illər Azərbaycanda zəvvarların sayında azalma, qiymətdə bahalaşma var.

İslamda Həcc ziyarəti vacib şərtlərdən sayılır. Söhbət Səudiyyə Ərəbistanının Məkkə şəhərində Kəbənin ziyarətindən gedir.

Ermənistan mina sahələrinə dair 8 formulyarı Azərbaycana verib

Mina xəritələri qeyri-dəqiqdir? 'Təbiət hadisəsi də ola bilər'
Gözlə

No media source currently available

0:00 0:03:42 0:00

Ermənistan işğaldan azad edilmiş ərazilərdə mövcud olan mina sahələrinə dair 8 formulyarı Azərbaycana təqdim edib.

Bu barədə "Turan"a bu gün, fevralın 12-də Azərbaycan Minatəmizləmə Agentliyindən (ANAMA) məlumat verilib.

Məlumata görə, təqdim olunan formulyarlar, əsasən, Kəlbəcər rayonu Murovdağ silsiləsini əhatə edən minalanmış ərazilərə dair qeydlərdən ibarətdir: "Formulyarlar üzərində təhlil və emal işləri aparıldıqdan sonra qeyd edilən məlumatların real mina sahələri ilə uzlaşmadığı, istinad nöqtələrinin koordinatlarının yanlış və yararsız olduğu müəyyən edilib".

Qurumdan habelə vurğulanıb ki, Ermənistan tərəfindən Ağdam, Füzuli, Cəbrayıl və Zəngilan rayonlarında basdırılan mina sahələrinə dair 2021-ci ildə verilmiş məlumatların dəqiqliyi 25 faiz təşkil edib.

Son açıqlamaya, hələlik, Ermənistan rəsmilərinin münasibəti bəlli deyil.

Son dörd ilin statistikası

Azərbaycanın rəsmi qurumlarının bildirməsinə görə, 10 noyabr sazişindən sonra ölkənin 65-dən çox vətəndaşı minaya düşərək həlak olub, 270 civarında şəxs isə müxtəlif xəsarət alıblar.

2021-ci ildə Ermənistan Azərbaycanda saxlanılan hərbçilərindən bəzilərinin geri verilməsi əvəzi işğaldan azad olunan bir sıra rayonların minalanmış ərazilərinin xəritələrini təqdim etmişdi. Hərçənd sonra da Azərbaycan rəsmiləri bu xəritələrin böyük ölçüdə reallığı əks etdirmədiyini vurğuladılar. Buna cavab olaraq da Ermənistan baş naziri demişdi ki, onlar əllərində olan yaxşı xəritələri özlərində saxlayıb Azərbaycana pisini verməyiblər.

Xatırlatma

1990-cı illərin əvvəllərində Azərbaycanın Qarabağ bölgəsi və ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona və Qarabağın bir hissəsinə nəzarətini bərpa edib. Ancaq tərəflər sülh sazişi imzalamayıb. Azərbaycan, Rusiya və Ermənistan arasında razılaşma (10 noyabr) ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.

Ötən il sentyabrın 19-20-də Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib. Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb. Sentyabrın 28-də tanınmayan qurum fəaliyyətini dayandıracağını elan edib.

ATƏT Nik Quqqer ilə bağlı Azərbaycandan cavab gözləyir

Ouen Mörfi
Ouen Mörfi

Avropada Təhlükəsizlik və Əməkdaşlıq Təşkilatının (ATƏT) Demokratik Təsisatlar və İnsan Hüquqları Bürosunun (DTİHB) İsveçrədən olan müşahidəçisi Nik Quqqerin (Nick Gugger) Azərbaycana buraxılmaması ilə əlaqədar dövlət orqanlarına sorğu göndərilib.

Bu barədə ATƏT DTİHB-nin müşahidə missiyasının rəhbəri İoğan Mörfi (Eoghan Murphy) AzadlıqRadiosunun sualına cavab olaraq bildirib: "Bəli, bizim qısamüddətli müşahidəçilərimizdən biri ölkəyə dəvət olunsa da, icazə verilmədi. Bununla bağlı dövlət qurumları ilə mən danışmışam və sorğu göndərmişəm".

N.Quqqerin fevralın 3-də Bakıdakı hava limanında ölkəyə buraxılmayaraq geri qaytarıldığı bildirilir.

İsveçrə mediası qeydiyyatdan keçmiş ATƏT müşahidəçisinin ölkəyə buraxılmamasını "diplomatik təhqir" kimi qiymətləndirib. Belə hadisələrin nadir hallarda baş verdiyi vurğulanıb. Quqqerin Azərbaycana buraxılmamasının onun Avropa Şurasındakı fəaliyyəti ilə bağlı olması istisna edilməyib.

Azərbaycan Xarici İşlər Nazirliyi (XİN) bu olaya şərh verməsə də, mediada yer alan iddialara görə, isveçrəli müşahidəçi Qarabağ ilə bağlı mövqeyinə görə Bakıda qadağa ilə üzləşib.

Xatırlatma

Azərbaycanda fevralın 7-də növbədənkənar prezident seçkiləri keçirilir. Qanunvericiliyə əsasən, növbəti prezident seçkiləri 2025-ci ildə keçirilməli idi. Prezident İlham Əliyev seçkinin tarixinin bir il önə çəkilməsini artıq Azərbaycanın bütün ərazilərində suverenliyin bərpa olunması ilə izah edib. (2020-ci ildə Ermənistanla 44 günlük savaş, ötən il isə qısa hərbi əməliyyatlarla Dağlıq Qarabağ və ətraf 7 rayon işğaldan azad edilib)

Azərbaycan Xalq Cəbhəsi Partiyası (AXCP), Müsavat kimi bəzi müxalifət qüvvələri bunu "qəfil seçki" adlandıraraq hakimiyyətin əslində rəqabətli, sivil mübarizəyə hazır olmadığını bəyan edirlər. Onlar bu seçkilərdə iştirak etməyəcəklərini açıqlayıblar.

ATƏT 2018-ci ilin aprelində növbədənkənar prezident seçkilərinin məhdudlaşdırıcı siyasi mühitdə, fundamental hüquq və azadlıqları məhdudlaşdıran qanunlar çərçivəsində keçirildiyini bildirmişdi.

AXCP üzvünə fiziki təzyiq göstərildiyi deyilir

Elnur Həsənov
Elnur Həsənov

Həbsdə olan Azərbaycan Xalq Cəbhəsi Partiyasının (AXCP) üzvü Elnur Həsənovun fiziki təzyiqə məruz qaldığı bildirilir.

Bu barədə partiyadan məlumat veriblər.

AXCP-dən qeyd olunub ki, Bakı İstintaq Təcridxanasında saxlanılan E.Həsənov yanvarın 25-də Xətai rayon Polis İdarəsinə gətirilib: "Orada heç bir səbəb olmadan dörd polis əməkdaşının onu döydüyü bildirilir. Səhərisi gün isə Elnur bəy yenidən təcridxanaya aparılıb".

E.Həsənovun vəkili Nemət Kərimli "Turan"a deyib ki, həmin şikayətlə bağlı prokurorluğa müraciət ediləcək.

İddialara Daxili İşlər Nazirliyindən münasibət öyrənmək mümkün olmayıb.

E.Həsənov ötən il noyabrın 28-də Cinayət Məcəlləsinin 234.4.3-cü (küllü miqdarda qanunsuz olaraq narkotik vasitələri,... hazırlama, istehsal etmə, əldə etmə, saxlama, daşıma, göndərmə və ya satma) maddəsi ilə həbs olunub. O, ittihamı qəbul etmir və həbsini yol polisindəki nöqsanlar barədə kəskin çıxışları ilə əlaqələndirir.

E.Həsənov bundan əvvəl də inzibati qaydada həbs edilib. O, xırda xuliqanlıq və polisin qanuni tələbinə tabe olmamaqda günahlandırılaraq 30 sutka inzibati həbs almışdı. AXCP üzvü onda da ittihamı qurama sayırdı.

Müxalifətdə olan AXCP-nin hazırda beşə qədər üzvü uzunmüddətli həbsdədir. Onlar müxtəlif ittihamlarla həbs edilsə də, AXCP-dən onların siyasi sifarişlə şərləndiklərini açıqlayıblar. Hərçənd ölkə rəsmiləri siyasi həbslərlə bağlı deyilənləri qəbul etmirlər.

update

Bloqer Rəşad Ramazanov 5 il 4 ay azadlıqdan məhrum edilib

Rəşad Ramazanov
Rəşad Ramazanov

Bloqer Rəşad Ramazanov bu gün, fevralın 5-də Bakı Ağır Cinayətlər Məhkəməsində 5 il 4 ay azadlıqdan məhrum edilib.

Bu barədə Azadlıq Radiosuna onun yoldaşı Könül Ramazanova məlumat verib. Onun sözlərinə görə, məhkəmə prosesi tələm-tələsik bitib: "Hələ dindiriləsi bir şahid var idi. Bu gün gəlməmişdi, amma buna baxmayaraq bir gün içində həm dövlət ittihamçısı çıxış elədi, 10 il həbs istədi, həm də məhkəmə qərarı oldu".

K.Ramazanova qeyd edib ki, yoldaşına geniş son söz deməyə imkan yaradılmayıb: "Elə sadəcə hakim soruşub ki, özünə bəraət istəyirsən? Rəşad deyib, bəli, istəyirəm. Vəssalam".

Bloqerin yoldaşı bildirib ki, qərardan apellyasiya şikayəti verəcəklər: "Yoldaşım günahsızdır. Hətta məhkəməyə gələnlər ona qarşı ifadə verməyiblər. Yoldaşımın həbsinin hər bir günü uşaqlarının ömründən oğurlanıb. Yoldaşıma azadlıq tələb edirəm".

Xanımının bu açıqlamasına, hələlik, Bakı Ağır Cinayətlər Məhkəməsi və başqa rəsmi qurumlardan münasibət almaq mümkün olmayıb.

Bloqer R.Ramazanov 2022-ci il mayın 20-də həbs olunmuşdu. Ona qarşı Cinayət Məcəlləsinin 234.4.3-cü ( küllü miqdarda qanunsuz olaraq narkotik vasitələri,... hazırlama, istehsal etmə, əldə etmə, saxlama, daşıma, göndərmə və ya satma) maddəsi ilə ittiham irəli sürülmüşdü.

Bu, onun ikinci həbsidir.

Bloqer dövlət ittihamçısına etiraz edib

Bloqer Rəşad Ramazanovun məhkəməsində narahatlıq doğuran halın baş verdiyi deyilir. Dövlət ittihamçısı R.Ramazanova cəza istəyərkən onun buna etiraz olaraq masada olan elektron cihazın batareyasını udduğu bildirilir.

"Turan"ın xəbərinə görə, bu barədə müdafiə tərəfi məlumat verib.

Bu deyilənlərə və bloqerin hazırda səhhəti ilə bağlı Penitensiar Xidmətdən münasibət almaq mümkün olmayıb.

Xatırlatma

R.Ramazanov birinci dəfə 2013-cü ilin mayında həbs olunub və daha sonra külli miqdarda narkotik vasitələrin qanunsuz dövriyyəsi ittihamı ilə 9 il azadlıqdan məhrum edilib. Yerli hüquq-müdafiə təşkilatları onun həbsinin sosial şəbəkələrdə hakimiyyəti tənqid etməsi ilə əlaqələndiriblər və onu siyasi məhbus kimi tanıyıblar. O, həbsindən əvvəl həm də dini mövzuda yazıları və tənqidləri ilə yadda qalıb. Beynəlxalq hüquq müdafiə təşkilatı "Amnesty International" R.Ramazanovu "vicdan məhbusu" kimi tanıyıb.

2019-cu ilin martında R.Ramazanov əfv sərəncamı ilə vaxtından əvvəl azad edilib.

Amma rəsmilər ölkə həbsxanalarında siyasi məhbusların olması fikrini qəbul etmirlər. Onlar deyirlər ki, siyasi məhbus sayılan şəxslər sırf törətmiş olduqları əmələ görə məsuliyyətə alınıblar.

Hesabat: Azərbaycanın Avropa İnsan Haqları Məhkəməsi üzrə göstəriciləri pisləşib

Avropa İnsan Haqları Məhkəməsi
Avropa İnsan Haqları Məhkəməsi

Avropa İnsan Hüquqları Məhkəməsinin sədri yanvarın sonlarında 2023-cü il üçün illik hesabatını və statistikanı təqdim edib.

Hesabatda deyilir ki, AİHM-in bütün ölkələrdən icraata götürdüyü işlər 2022-ci ildəki 45,500-dən 2023-cü ildə 34,600-a düşüb.

Bu göstəriciyə görə Azərbaycana aid icraata götürülən işlərin sayı isə 24 faiz artıb

Bu rəqəm 2022-ci ildə 389 idisə, 2023-cü ildə 438 olub. 2021-ci ilin göstəricisi 425 idi.

AİHM-in icraata götürdüyü işlərin sayı üzrə birinci üç yeri Türkiyə (8,341), Rumıniya (2,821) və Ukrayna (2,531) bölüşürlər.

AİHM-in aidiyyəti hökumətlərlə kommunikasiya, yəni rəy mübadiləsi etdiyi işlərin sayı ümumilikdə 2022 və 2021-ci illərlə müqayisədə azalsa da, Azərbaycanla kommunikasiya edilən işlərin sayında əhəmiyyətli artım qeydə alınıb.

2023-ci ildə Azərbaycanla kommunikasiya edilən şikayətlər 613 olub, halbuki bu rəqəm 2022-ci ildə 237 idi.

Bütünlükdə AİHM üzrə barəsində qərar verilmiş şikayətlərin sayı 2022-ci illə müqayisədə 2023-cü ildə 39,570-dən 38,260-a düşüb.

2023-cü ildə Azərbaycan üzrə 77 şikayət barəsində qərar çıxaırlıb. Bu rəqəm 2022-ci ildə 51 idi.

İlham Əliyevin bəyanatı

Azərbaycan tərəfindən Avropa Şurası və Avropa İnsan Haqları Məhkəməsində iştirak məsələsinə yenidən baxıla bilər.

AZƏRTAC-in xəbərinə görə, bunu prezidenti İlham Əliyev fevralın 1-də Parlamentlərarası İttifaqın baş katibi Martin Çunqonqu qəbul edərkən deyib.

O, Avropa Şurası Parlament Assambleyasında (AŞPA) Azərbaycan nümayəndə heyətinin mandatının təsdiqlənməməsi ilə bağlı təşəbbüsün dialoqa xidmət etmədiyini vurğulayıb.

Yanvarın 24-də AŞPA Azərbaycan nümayəndə heyətini bir il müddətinə mandatdan məhrum edib. Buna əsas kimi ölkədə insan haqlarının pozulması, siyasi məhbusların sayının artması və Azərbaycanın AŞPA-nın qarşısındakı öhdəlikləri yerinə yetirməməsi göstərilib.

Azərbaycanın AŞPA-dakı nümayəndə heyəti, öz növbəsində, qurumla əməkdaşlığını qeyri-müəyyən vaxta qədər dayandırdığını bəyan edib. Rəsmi Bakı AŞPA-nı qərəzdə ittiham edib.

Azərbaycan Avropa Məhkəməsində iştirak məsələsinə yenidən baxa bilər

Prezident İlham Əliyev AŞPA sessiyasında çıxış edir. 2014
Prezident İlham Əliyev AŞPA sessiyasında çıxış edir. 2014

Azərbaycan tərəfindən Avropa Şurası və Avropa İnsan Haqları Məhkəməsində iştirak məsələsinə yenidən baxıla bilər.

AZƏRTAC-in xəbərinə görə, bunu prezidenti İlham Əliyev fevralın 1-də Parlamentlərarası İttifaqın baş katibi Martin Çunqonqu qəbul edərkən deyib.

O, Avropa Şurası Parlament Assambleyasında (AŞPA) Azərbaycan nümayəndə heyətinin mandatının təsdiqlənməməsi ilə bağlı təşəbbüsün dialoqa xidmət etmədiyini vurğulayıb. "Azərbaycan nümayəndə heyətinin hüquqlarının bərpa edilməli olduğunu deyən dövlət başçısı diqqətə çatdırıb ki, Azərbaycan nümayəndə heyətinin hüquqları bərpa olunmayacağı təqdirdə, Azərbaycan tərəfindən də Avropa Şurası və Avropa İnsan Haqları Məhkəməsində iştirak məsələsinə yenidən baxılacaq", - xəbərdə bildirilir.

Bu fikirlərə, hələlik, AŞPA-dan münasibət almaq mümkün olmayıb.

Yanvarın 24-də AŞPA Azərbaycan nümayəndə heyətini bir il müddətinə mandatdan məhrum edib. Buna əsas kimi ölkədə insan haqlarının pozulması, siyasi məhbusların sayının artması və Azərbaycanın AŞPA-nın qarşısındakı öhdəlikləri yerinə yetirməməsi göstərilib.

Azərbaycanın AŞPA-dakı nümayəndə heyəti, öz növbəsində, qurumla əməkdaşlığını qeyri-müəyyən vaxta qədər dayandırdığını bəyan edib. Rəsmi Bakı AŞPA-nı qərəzdə ittiham edib.

Xatırlatma

Azərbaycan 2001-ci ildə Avropa Şurasının üzvüdür. Ölkə bu quruma üzv olarkən insan hüquqları, demokratiya və bir sıra başqa məsələlərlə bağlı öz üzərinə öhdəliklər götürüb. Aradan 23 il keçsə də, Azərbaycan hələ də qurumun monitorinqi altındadır. Azərbaycan 2002-ci ildə Avropa İnsan Hüquqları Konvensiyası və onun Protokollarını ratifikasiya edib.

Əliyev Ermənistan konstitusiyasının dəyişdirilməsinin sülhə faydasından danışıb

Prezident İlham Əliyev Parlamentlərarası İttifaqın baş katibini qəbul edir
Prezident İlham Əliyev Parlamentlərarası İttifaqın baş katibini qəbul edir

Prezident İlham Əliyev bu gün, fevralın 1-də Parlamentlərarası İttifaqın baş katibi Martin Çunqonqu qəbul edərkən deyib ki, Ermənistanın müstəqillik haqqında Bəyannaməsində Qarabağın Ermənistanla birləşdirilməsinə birbaşa çağırışlar var və bu sənədə istinadlar da Ermənistanın Konstitusiyasında öz əksini tapıb.

Onun sözlərinə görə, bu iddialara son qoyulduğu, Ermənistan Konstitusiyasında və digər normativ hüquqi sənədlərdə dəyişikliklər edildiyi halda, sülhə nail oluna bilər.

"Ermənistanda bunun tez bir vaxtda həyata keçirilməsinin vacibliyini bildirən dövlət başçısı vurğuladı ki, hazırda Ermənistanda bu mövzuda ölkədaxili müzakirələrin başlanması müsbət addım kimi qiymətləndirilir və bu, sülh prosesinin tezliklə yekunlaşdırılması üçün yaxşı imkan yarada bilər", - rəsmi məlumatda vurğulanır.

Ermənistanda müzakirələr...

Bu açıqlamaya, hələlik, Ermənistan rəsmilərinin münasibəti bəlli deyil. Amma ötən həftə Ermənistanın baş naziri Nikol Paşinyan ölkəsinin tamamilə yeni konstitusiyaya ehtiyacı olduğunu demişdi. O izah etmişdi ki, regionda yaranmış yeni geosiyasi mühitdə bu, olduqca mühüm məsələdir.

Ermənistan müxalifəti və bir sıra şərhçilər isə bunu belə yozmuşdular ki, "Paşinyan Türkiyə və Azərbaycanın saysız-hesabsız tələblərindən daha birini qəbul etmək üçün zəmin hazırlayır".

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa etmişdi. Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.

Ötən il sentyabrın 19-20-də Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib. Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.

Sentyabrın 28-də tanınmayan qurum fəaliyyətini dayandıracağını elan edib.

Ancaq tərəflər sülh sazişi imzalamayıb.

Nazim Bəydəmirlinin həbsi iki ay da uzadılıb

Nazim Bəydəmirli
Nazim Bəydəmirli

Yanvarın 31-də Bakının Nərimanov rayon Məhkəməsində sahibkar, keçmiş deputat Nazim Bəydəmirlinin həbs müddəti iki ay uzadılıb. Bu barədə onun yaxınları bildiriblər.

Müdafiə tərəfi məhkəmənin qərarını əsassız hesab edir və ondan şikayət vermək niyyətindədir.

N.Bəydəmirli ötən il iyulun 4-də Cinayət Məcəlləsinin 182.2.4-cü (xeyli miqdarda əmlak əldə etmək məqsədilə hədə-qorxu ilə tələb etmə) maddəsi ilə ittiham olunaraq saxlanıb. Ertəsi gün məhkəmə onu 4 ay müddətinə həbs edib. Bəydəmirli ittihamı rədd edib, onu uydurma və hüquqi əsaslardan məhrum adlandırıb.

Müdafiə tərəfinin bildirməsinə görə, N.Bəydəmirli hesab edir ki, o, ekologiya məhbusudur və həbsinin səbəbi Söyüdlü hadisələrini pərdələmək üçündür.

Sentyabrın 1-də Bəydəmirliyə qarşı Cinayət Məcəlləsinin 182.2.2-ci (təhdid yolu ilə tələb etmə, dəfələrlə törədildikdə) maddəsi ilə daha bir ittiham irəli sürülüb. O, bu ittihamı da qəbul etmir.

Onun ötən il noyabrın 1-də də həbs müddəti 3 ay uzadılmışdı.

Polis nəzarətində olan Söyüdlüdən səslər: 'Evimizdə dustağa çevrilmişik'
Gözlə

No media source currently available

0:00 0:05:57 0:00

Xatırlatma

Ötən il iyunun 20-də Gədəbəy rayonunun Söyüdlü sakinləri "Gədəbəy" qızıl yatağından çirkab suları üçün ikinci süni gölün qurulmasına ekoloji tələblərlə etiraz ediblər. Polis etirazlara gözyaşardıcı qazdan istifadə olunmaqla müdaxilə edib, saxlananlar, həbs edilənlər olub (onların dəqiq sayı rəsmi açıqlanmır).

İyulun 11-də prezident İlham Əliyev hökumətin iclasında Söyüdlüdəki etirazlardan danışarkən vətəndaşların qanuna tabe olmalı olduğunu vurğulayıb. Bu çıxışdan iki gün sonra Söyüdlüdə qızıl yatağının istismarının müvəqqəti dayandırıldığı açıqlanıb.

Rəsmi monitorinqlərin nəticələrinə görə, ərazidə su obyektlərində bir sıra göstəricilərin normadan artıq olduğu aşkarlanıb. Bununla belə, ötən il sentyabrın 26-da mədənin mərhələlərlə fəaliyyətə başlaması məqbul sayılıb.

Bakı və Yerevan sərhəddə görüş barədə çox qısa bəyanat veriblər. Xəritə məsələsimi müzakirə edilib?

Mher Qriqoryan və Şahin Mustafayev
Mher Qriqoryan və Şahin Mustafayev

Bugün, yanvarın 31-də Azərbaycanla Ermənistan arasında dövlət sərhədinin delimitasiyası üzrə Dövlət Komissiyasının, habelə dövlət sərhədinin delimitasiyası və sərhəd təhlükəsizliyi məsələləri üzrə Komissiyanın altıncı görüşü olub.

Bu barədə Azərbaycan Xarici İşlər Nazirliyi (XİN) məlumat yayıb.

Məlumatda qeyd edilir ki, görüş Azərbaycan Baş nazirinin müavini Şahin Mustafayev və Ermənistan Baş nazirinin müavini Mher Qriqoryanın sədrliyi altında gerçəkləşib.

Amma görüşün detalları, hələlik, açıqlanmır. Yerli mediada bu iclasın Ermənistan-Azərbaycan sərhədində - Qazaxda keçirildiyi bildirilmişdi.

Tərəflər arasında bundan əvvəl belə bir görüş (beşinci) ötən il noyabrın 30-da gerçəkləşmişdi.

Həmin görüşdən sonra açıqlanmışdı ki, tərəflər delimitasiya məsələlərinin müzakirəsini davam etdirib, bir sıra təşkilati və prosedur məsələləri nəzərdən keçiriblər.

Habelə vurğulanmışdı ki, görüşdə komissiyalar arasında iclasların, birgə işçi görüşlərin təşkili və keçirilməsi Reqlamentinin mətni ilkin olaraq razılaşdırılıb.

Bu iki ölkə arasında son illər həm Rusiya, həm də Avropa İttifaqının vasitəçiliyi ilə sülh danışıqları da aparılsa da, hələlik, nəticə əldə edilməyib.

Xəritə məsələsimi müzakirə edilib?

AzadlıqRadiosunun Erməni xidməti – Azatutyun da bildirir ki, əvvəlki görüşlərdən fərqli olaraq sözü gedən görüşdən sonra Ermənistan nümayəndə heyəti də heç bir əlavə açıqlama ilə çıxış etməyib.

Azatuyun yazır ki, hələ bu görüşdən əvvəl, yanvarın 31-də səhər Ermənistan Milli Məclisinin spikeri Alen Simonyan demişdi ki, o delimitasiya komisiyalarından məsələyə aydınlıq gətirilməsini gözləyir.

O işarə etmişdi ki, tərəflər delimitasiya üçün ortaq xəritə məsələsində hələ ki razılığa gələ bilməyiblər.

Bundan əvvəl xəbər verilmişdi ki, Yerevan sərhədin delimitasiyası üçün 1975-ci ilə aid sovet xəritələrinin əsas götürülməsini istəyir.

Azərbaycan prezidenti İlham Əliyev isə bu xəritələrin Azərbaycan üçün məqbul olmadığını demişdi. Amma o konkret olaraq hər hansı xəritə təklif etməmişdi.

Eyni zamanda Əliyev Azərbaycanın işğal altında olan 8 kəndinin qaytarılması tələbini bir daha səsləndirmiş və demişdi ki, delimitasiya komissiyalarının yanvarda keçiriləcək görüşündə bu məsələ gündəliyin əsas məsələsi olacaq.

Azatutyunun yazdığına görə görüşün gündəliyi barədə Ermənistan tərəfi fərqli bəyanat vermişdi.

Ermənistan komissiyasının sədri, baş nazirin müavini Mher Qriqoryan demişdi ki, bu görüşdə delimitasiya üçün hansı sənədlərdən və xəritələrdən istifadə olunacağı müəyyənləşməlidir:

"Biz metodologiyanı müəyyənləşdirməli və xəritə deyərkən onun daha spesifik açımını verməliyik. Bu və bizim hüquqi sənəd dedikdə nəyi nəzərdə tutduğumuz çox mühüm məsələdir”.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilib.

2020-ci ildə qısa müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib.

Azərbaycan, Rusiya və Ermənistan arasında razılaşma ilə Laçın dəhlizinə və Qarabağda təmas xəttinə Rusiya hərbçiləri yerləşdirilib.

Ötən il sentyabrın 19-20-də isə Bakı Qarabağda "lokal antiterror tədbirlər" elan edib. Yerevan bunu "etnik təmizlənmə" və "təcavüz" kimi dəyərləndirib.

Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Daha sonra Qarabağdan Ermənistana əhali köçü başlayıb.

Sentyabrın 28-də tanınmayan qurum fəaliyyətini dayandıracağını elan edib.

İşçilərin hüquqlarını müdafiə edən ictimai fəala 3 il həbs cəzası kəsildi

Elvin Mustafayev
Elvin Mustafayev

İşçi Masası Həmkarlar İttifaqları Konfederasiyasının həbsdəki üzvlərindən Elvin Mustafayevə 3 il həbs cəzası kəsilib. Yanvarın 31-də Bakı Ağır Cinayətlər Məhkəməsində ona hökm oxunub.

E.Mustafayevə bir qrup şəxs tərəfindən satış məqsədilə külli miqdarda narkotik daşıma ittihamı verilmişdi. Məhkəmə bu ittihamı dəyişib. Oradan “satış məqsədi” və “bir qrup şəxsin əlbir olması” məsələsi çıxarılıb. İctimai fəal satış məqsədi olmadan külli miqdarda narkotik əldə edib saxlamaqda təqsirli bilinib.

Cinayət işinin materiallarında iddia edilir ki, ictimai fəal Binəqədi rayonu, Cəfər Xəndan küçəsində özünü şübhəli apardığına görə saxlanılıb. İdarədə üstündə axtarış vaxtı təxminən 3 qram narkotik tapılıb.

E.Mustafayevə istintaq dövründə verilən maddələrdə 5 ildən 12 ilədək həbs cəzası nəzərdə tutulmuşdu. Məhkəmə onu Cinayət Məcəlləsinin 234.1-1-ci maddəsilə təqsirli bildiyindən, indən belə həbs müddəti 3 ildən 8 ilədəkdir.

E.Mustafayev bu hökmü də qəbul etmir. İctimai fəal təqsirsiz olduğunu, narkotiki cibinə polislərin qoyduğunu deyir. O, hökmdən öncə son sözündə də ictimai fəaliyyətinə görə şərləndiyini vurğulayıb:

"Marketdən çıxanda 4 nəfər zorbalıqla mənə hücum elədi. Dərhal telefonumu götürdülər. Məni idarəyə gətirdilər. Dedilər ki, bunu boynuma götürməsəm, üzümə qadın qoyub, zorlama ilə ittiham eləyəcəklər. Yaxud “İran agenti” ittihamıyla həbsə göndərəcəklər..."

Xatırlatma

E.Mustafayev ötən ilin martında da Saatlı rayon Məhkəməsinin qərarıyla xırda xuliqanlıq və polisə müqavimətdə suçlanmış, inzibati qaydada 25 sutka həbs olunmuşdu.

O zaman da ittihamları qəbul etməyən gənc fəal bildirmişdi ki, Saatlıda sakinlərin su tələbilə keçirdiyi etiraz aksiyasında polislərin davranışını, digər yerli hakimiyyət təmsilçilərinin bu problemə reaksiyasını tənqid etməsi üzündən cəzalandırılıb.

Ötən il avqustun 1-də İşçi Masası Həmkarlar İttifaqları Konfederasiyası və Kuryer Birliyi Həmkarlar İttifaqı etiraz aksiyası keçirib.

Onlar kuryerliklə məşğul şəxslərin mopedlərinin kütləvi şəkildə cərimə meydançasına aparılmasına etiraz ediblər.

Elə həmin gün İşçi Masası Həmkarlar İttifaqları Konfederasiyasının sədri Afiyəddin Məmmədova polisə müqavimət və xırda xuliqanlıq ittihamıyla 30 sutka inzibati həbs cəzası verilib. O, inzibati həbsdən buraxılandan az sonra – sentyabrın 20-də yenidən həbs edilib. Bu dəfə onun haqqında cinayət işi başlanıb və o, bir nəfərə bıçaqla xəsarət yetirməkdə suçlanıb. Hazırda ona verilən ittihamlarda 11 ilədək həbs cəzası nəzərdə tutulub.

A.Məmmədov isə deyir ki, bu ittiham yalandır, ümumiyyətlə, heç kimə xəsarət yetirməyib. Əksinə, özü yaşadığı evin blokundan çıxanda hücuma məruz qalıb və dərhal da ətrafdan polislər çıxaraq, onu tutub aparıblar.

Həbsdə olan həmkarlar işçisi saxlanma şəraitindən narazıdır

Ayxan İsrafilov
Ayxan İsrafilov

İşçi Masası Həmkarlar İttifaqları Konfederasiyasının İdarə heyətinin həbsdə olan üzvü Ayxan İsrafilovun saxlanılma şəraitindən narazı olduğu bildirilir.

Bu barədə onun ailə üzvləri məlumat veriblər.

Onların sözlərinə görə, A.İsrafilov Şüvəlandakı 3 saylı İstintaq Təcridxanasında 10 nəfər üçün nəzərdə tutulmuş kamerada 16 nəfərlə birgə saxlanılır.

Ayxan İsrafilovun ailə üzvləri qeyd ediblər ki, onun səhhətində problemlər var:

"Ayxan 3-cü qrup əlildir, ayağında problem var. Hələ azadlıqda olarkən həkim ona tez-tez gəzişmək lazım olduğunu deyib, amma hazırda saxlanıldığı şəraitdə buna imkan yoxdur və bu Ayxanın səhhətində əlavə problemlər yaradır".

Onların sözlərinə görə, onu 1 saylı Bakı İstintaq Təcridxanaslna köçürülməsi ilə bağlı aidiyyatı qurumlara müraciət etsələr də, cavab almayıblar.

Ədliyyə Nazirliyinin Penitensiar Xidmətindən isə “Turan”a bildirilib ki, məsələ araşdırılacaq və bununla bağlı məlumat veriləcək.

A.İsrafilov Cinayət Məcəlləsinin 234.1-1 (satış məqsədi olmadan külli miqdarda narkotik əldə etmə, daşıma, saxlama) maddəsilə ittiham olunur. Bu maddədə 3 ildən 8 ilədək həbs cəzası nəzərdə tutulub.O, ittihamı qəbul etmir.

Xatırlatma

Ötən il avqustun 1-də İşçi Masası Həmkarlar İttifaqları Konfederasiyası və Kuryer Birliyi Həmkarlar İttifaqı etiraz aksiyası keçirib. Onlar kuryerliklə məşğul olan şəxslərin mopedlərinin kütləvi şəkildə cərimə meydançasına aparılmasına etiraz ediblər.

Elə həmin gün bu konfederasiyasın sədri Afiyəddin Məmmədova polisə müqavimət və xırda xuliqanlıq ittihamıyla 30 sutka inzibati həbs cəzası verilib. O, inzibati həbsdən buraxılandan az sonra yenidən saxlanıb. Bu dəfə onun haqqında cinayət işi başlanıb və hazırda da həbsdədir.

Bunun ardından, avqustun 4-də İşçi Masası Həmkarlar İttifaqları Konfederasiyasının üzvü Elvin Mustafayev narkotik ittihamıyla həbs edilib. Bakı Ağır Cinayətlər Məhkəməsində onun da mühakiməsi davam edir.Elvin Mustafayevdən bir neçə gün sonra isə Ayxan İsrafilov həbs edilib.

Adları çəkilən ictimai fəalların hamısı ittihamların saxta olduğunu, işçilərin hüquqlarını müdafiə etdiklərinə, ölkədəki özbaşınalıqlara etirazlarına görə şərləndiklərini deyir.

Hökumət rəsmiləri də ölkədə heç kimin ictimai-siyasi fəaliyyətinə görə təqib olunmadığını iddia edirlər.

Binəqədidəki partlayış-yanğınla bağlı 2 nəfər  həbs olunub

Yanğından sonra
Yanğından sonra

Bu il yanvarın 15-də Azərbaycan paytaxtı Bakının Binəqədi rayonunda mebel sexində baş vermiş partlayış-yanğınla bağlı 2 nəfər həbs olunub.

Bu barədə bugün, yanvarın 30-da Azərbaycan Baş Prokurorluğu məlumat yayıb.

Məlumatda vurğulandığına görə, istintaqla müəyyən olunub ki, partlayış taxta materialların emalı zamanı yaranmış taxta tozunun və kimyəvi tərkibli materialların buxar qarışığının təmizlənməməsi səbəbindən minimum konsentrasiya limitinin aşılması nəticəsində baş verib.

Həbs edilənlər rəsmi məlumatda “Bakı Ağac Emalı” Açıq Səhmdar Cəmiyyətinin səhmdarı, faktiki sahibi kimi təqdim edilən Tağı İbrahimov və ASC-ni idarə etdiyi qeyd olunan Toğrul Rzayevdir:

“ İş üzrə Tağı İbrahimov Cinayət Məcəlləsinin 314.3-cü (səhlənkarlıq, ehtiyatsızlıqdan iki və daha çox şəxsin ölümünə səbəb olduqda), Toğrul Rzayev isə həmin Məcəllənin 225.3-cü (yanğın təhlükəsizliyi qaydalarını pozma, ehtiyatsızlıqdan iki və daha çox şəxsin ölümünə səbəb olduqda) maddəsi ilə təqsirləndirilən şəxs qismində cəlb edilib... Məhkəmənin qərarı ilə hər iki təqsirləndirilən şəxs barəsində həbs qətimkan tədbirləri seçilib.”

Baş prokurorluq xatırladır ki, yanvarın 15-də baş verən bu hadisə nəticəsində 10 nəfər ölüb, 23 nəfər müxtəlif dərəcəli bədən xəsarətləri alıb.

Hələlik, bu açıqlamaya həbs edilən şəxslərdən, onların vəkillərindən və zərərçəkən tərəfdən münasibət almaq mümkün olmayıb.

Bloqer Arzu Sayadoğlu həbs olunub

Arzu Sayadoğlu
Arzu Sayadoğlu

Bloqer, "Xalqa Xidmət" Hərəkatının rəhbəri Arzu Sayadoğlunun (Məmmədovun) həbs olunduğu bildirilir.

Elektron Məhkəmə Portalında olan məlumata görə, onun barəsində Səbail rayon Məhkəməsində həbs-qətimkan tədbiri seçilib.

Bəzi media orqanlarında A.Sayadoğlunun CM-in 182.2.4-cü (Hədə‐qorxu ilə tələb etmə) maddəsi ilə məsuliyyətə cəlb olunduğu və barəsində 4 aylıq həbs-qətimkan tədbirinin seçildiyi xəbəri yayılıb. Amma onun ittiham edildiyi maddəni rəsmi qurumlarla dəqiqləşdirmək, hələlik, mümkün olmayıb.

Bloqerin bir həftədən çoxdur yoxa çıxdığı bildirilirdi. Hüquq müdafiəçiləri deyir ki, o, həbsi ərəfəsində bloqer Tural Sadıqlının canlı efirində hökuməti sərt tənqid edib.

Xatırlatma

Son aylar Azərbaycanda 10-a yaxın jurnalist həbs edilib. Onlara, əsasən, qaçaqmalçılıq ittihamı verilib. Həbs edilən jurnalistlərin heç biri ittihamları qəbul etmir və bunu peşə fəaliyyətləri ilə əlaqələndirirlər. Hərçənd, rəsmilər ölkədə jurnalistlərin peşə fəaliyyəti ilə bağlı təqib və həbs olunmaları ilə bağlı deyilənləri qəbul etmirlər.

Davamı

XS
SM
MD
LG