Keçid linkləri

2024, 24 May, Cümə, Bakı vaxtı 18:29

Azərbaycan xəbərləri

Gəncədə Aşura günü həbs edilənlərə cəza istənilib

Gəncədə Aşura
Gəncədə Aşura

Gəncə şəhərinin Kəpəz Rayon Məhkəməsində 2017-ci ildə Aşura mərasimi zamanı baş vermiş olaylarda həbs edilmiş şəxslərin məhkəməsi yekunlaşır. Sonuncu məhkəmə iclasında dövlət ittihamçısı təqsirləndirilənlərə cəza istəyib.

Məhkəmə prosesi haqda «Turan» agentliyinə təqsirləndirilənlərdən Firudin Zeynalovun yaxınları məlumat verilib. Onların deməsinə görə, sentyabrın 18-də keçirilmiş prosesdə hakim Yaşar Həşimov məhkəmə istintaqının yekunlaşdırılması ilə bağlı təqsirləndirilənlərə, onların müdafiəçilərinə söz verib.

Müdafiə tərəfi məhkəmə istintaqının davam etdirilməsini istəyib. Vəkillər bildiriblər ki, 2017-ci ildə Gəncədə Aşura mərasiminin görüntüləri məhkəmədə izlənildikdən sonra yeni xüsusatlar ortaya çıxıb. Onlar habelə deyiblər ki, görüntülərlə zərərçəkmiş şəxslərin, şahidlərin ifadələrində ciddi uyğunsuzluqlar üzə çıxıb. Bunu əsas gətirən vəkillər zərərçəkmiş və şahidlərin bir neçəsinin məhkəmədə yenidən dindirilməsi barədə vəsatət veriblər.

F.Zeynalovun yaxınlarının qeyd etməsinə görə, ancaq məhkəmə heyəti həmin vəsatətləri rədd edib.

Gəncədə Aşura mərasimi
Gözlə

No media source currently available

0:00 0:01:05 0:00

Ardınca dövlət ittihamçısı çıxış edib. Cinayət işi materiallarının məhkəmədə öz təsdiqini tapdığını deyən ittihamçı təqsirləndirilənlərə cəza istəyib.

Bildirildiyinə görə, Aşura mərasimi olayları ilə bağlı həbs edilən 7 nəfərə 6 ildən 8 ilədək azadlıqdan məhrumetmə cəzası istənilib.

Məhkəmə prosesinin sentyabrın 24-də yekunlaşması gözlənilir. Həmin gün təqsirləndirilən şəxslər, onların vəkilləri yekun çıxış edəcəklər.

Aşura hicri təqvimində Məhərrəm ayının 10-cu günüdür. Miladi təqvimi ilə 680-ci ilin həmin günü Kərbəlada Məhəmməd Peyğəmbərin nəvəsi, İmam Əlinin oğlu İmam Hüseyn öz tərəfdarları ilə birlikdə qətlə yetirilib. Aradan XIII əsr keçsə də, islam aləmində həmin gün hələ də faciə kimi qeyd edilir. «Aşura» sözü ərəbcə 10-cu deməkdir. Söhbət Məhərrəm ayının 10-dan gedir

Xatırlatma

2017-ci il sentyabrın 30-da Gəncədəki «İmamzadə» ziyarətgahında qarşıdurma baş verdiyi bildirilirdi. Yerli sakinlərin həmin vaxt verdikləri məlumatlara görə, polis insanları incidərək mərasim keçirməyə buraxmayıb və bu zaman insident yaranıb.

Qafqaz Müsəlmanları İdarəsinin (QMİ) Gəncə bölgəsi üzrə səlahiyyətli nümayəndəsi Seyid Tahir Qarabaği isə bildirmişdi ki, Gəncədə Aşura mərasimləri ilə bağlı «İmamzadə» kompleksində böyük bir insident baş verməyib, bir anlaşılmazlıq olub.

«Bu vaxt «İmamzadə» kompleksinə çoxsaylı insan gəlib. Kişilər daxil olan yolda adam çox olduğu üçün onlar qadınlar olan tərəfdən içəri keçmək istəyiblər, polis buna icazə verməyib. Amma dediyim kimi, 4-5 dəqiqə ərzində bu insident aradan qalxıb və odur ki, hər hansı qarşıdurmadan danışmaq olmaz». – T.Qarabaği belə demişdi.

Ancaq rəsmi qurumlar baş verənləri bəzi şəxslərin polisə müqaviməti və xuliqanlıq kimi dəyərləndirib. Gəncə şəhər Prokurorluğu həmin olaylara görə Cinayət Məcəlləsinin 315 (Hakimiyyət nümayəndəsinə müqavimət göstərmə) və 221 (Xuliqanlıq) maddələri ilə cinayət işi başlamışdı.

Bütün xəbərləri izləyin

Ələsgər Məmmədli doğum günündə ev dustaqlığına buraxılmadı

Ələsgər Məmmədli
Ələsgər Məmmədli

Bu gün, mayın 24-də "Toplum" internet televiziyasının həbsdə olan təsisçisi Ələsgər Məmmədli barəsində seçilmiş həbs-qətimkan tədbirinin ev dustaqlığı ilə əvəzlənməsi ilə bağlı vəsatət təmin olunmayıb.

Bu barədə vəkil Aqil Layıc məlumat verib. Onun sözlərinə görə, Ə.Məmmədlinin səhhəti pis olduğu üçün o, xəstəxana şəraitində müayinə edilməli və müalicə almalıdır, bu da həbsdə mümkün deyil: "Təəssüf ki, Xətai rayon Məhkəməsi vəsatətimizi təmin etmədi".

Vəkil qeyd edib ki, Ə.Məmmədlinin qalxanabənzər vəzində olan şiş onda boğulmalar yaradır: "Ələsgər bəy deyir ki, bu şiş onun qan təzyiqinə da təsir edir və vəziyyət artıq idarəolunmaz hal alıb".

Müdafiə tərəfi məhkəmə qərarını antihumanist hesab edir və qərardan apellyasiya şikayəti verəcəklərini bildirirlər.

Bu açıqlamaya Xətai rayon Məhkəməsi və başqa rəsmi qurumlardan münasibət almaq mümkün olmayıb.

Bu gün, mayın 24-də Ələsgər Məmmədlinin 56 yaşı tamam olub.

16 may

Ələsgər Məmmədlinin analiz cavabları açıqlanıb

"Toplum" internet televiziyasının (ToplumTV) təsisçisi Ələsgər Məmmədlinin analiz cavabları məlum olub.

Bu barədə "Turan"a vəkil Aqil Layıc məlumat verib. Onun sözlərinə görə, Ədliyyə Nazirliyinin Baş Tibb İdarəsindən gələn məktubda bildirilir ki, aprelin 26-da Ə.Məmmədli əlavə müayinələrə cəlb edilib: "Cavabda yazılıb ki, qanda hormonların səviyyəsi norma civarında olub. Qeyd olunur ki, Milli Onkologiya Mərkəzinin onkoloqu ilə konsultasiya edilib və onkoloq hazırda kəskin onkoloji prosesin izlənilmədiyini, sitoloji təhlil üçün düyünün histoloji müayinəsinin təcili aparılmasına zərurət olmadığını, planlı qaydada keçirilməsinin mümkünlüyünü bildirib. Həmçinin yazıblar ki, Ələsgər Məmmədlinin səhhəti ilə bağlı şikayəti olmayıb".

Məktubda yazılanlara şübhə

Vəkil məktubda yazılanlarla bağlı sonra da bunları bildirib: "Qalxanabənzər vəzində olan düyünün ölçüsü 23 millimetrdir. Bu da həmin şişin histoloji müayinəsini zəruri edir. Ələsgər bəy qeyd edir ki, onunla bağlı ciddi müayinə aparmayıblar, histoloji müayinənin aparılmasına, ümumiyyətlə, texnikaları yoxdur. Ələsgər bəy həkimə deyib ki, artıq onun boğazında olan düyünlər onu yatmağa belə qoymur, boğulmalar baş verir".

A.Layıc Ə.Məmmədlinin biopsiya müayinəsi üçün yenidən Baş Tibb İdarəsinə müraciət edib.

Bu açıqlamaya, hələlik, Ədliyyə Nazirliyinin Baş Tibb İdarəsindən münasibət almaq mümkün olmayıb.

Ələsgər Məmmədli martın 8-də həbs olunub. Ona qarşı Cinayət Məcəlləsinin 206.3.2 (qaçaqmalçılıq) maddəsi ilə ittiham verilib, barəsində 4 aylıq həbs-qətimkan tədbiri seçilib. O, ittihamı qurama sayır.

Xatırlatma

Son aylar Azərbaycanda aralarında "ToplumTV", habelə "Abzas Media" nəşrinin əməkdaşları da olmaqla qruplar halında 20-yə qədər jurnalist, ictimai fəal qaçaqmalçılıq ittihamı ilə həbs edilib. Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə siyasi sifarişlə basqılara məruz qalmır.

Yerli hüquq-müdafiə təşkilatlarının hazırladığı siyahılara görə, hazırda Azərbaycanda 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri də qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə mühakimə ediliblər.

Azərbaycan Qazaxın dörd kəndinə nəzarəti bərpa etdi

Azərbaycan və Ermənistan arasında ilk sərhəd dirəkləri
Azərbaycan və Ermənistan arasında ilk sərhəd dirəkləri

Ermənistan-Azərbaycan sərhədində sərhədçilər yerləşdirilir.

Mayın 24-də Azərbaycan sərhədçiləri Qazax rayonunun Bağanıs Ayrım, Aşağı Əskipara, Xeyrımlı və Qızılhacılı kəndlərini nəzarətə götürüb.

Ötən əsrin 90-cı illərində işğal olunan bu kəndlərin bu il aprelin 19-da dövlət sərhədinin delimitasiyası üzrə komissiyaların 8-ci görüşündə Azərbaycanın nəzarətinə keçəcəyi ilə bağlı razılıq əldə edildiyi açıqlanmışdı. Həmin vaxt Azərbaycan və Ermənistan öz aralarında sərhədin 1991-ci il Almatı bəyannaməsi əsasında müəyyən edilməsini də razılaşdırmışdılar.

"Delimitasiya işləri nəticəsində 12.7 km uzunluğunda sərhəd xətti müəyyən edilmiş və bununla Azərbaycan Respublikasının Qazax rayonunun dörd kəndinin: Bağanıs Ayrım, Aşağı Əskipara, Xeyrımlı və Qızılhacılının ərazilərinin (6.5 kv.km) Azərbaycana qaytarılması təmin edilib", - rəsmi məlumatda bildirilir.

Buna qədər Azərbaycan ümumilikdə səkkiz, Ermənistan isə 31 kəndinin ərazilərinin işğal edildiyini acılayıb.

Ermənistan da...

Bu il mayın 24-də Ermənistan Milli Təhlükəsizlik Xidmətinin (MTX) sərhəd qoşunları Tavuş vilayətində dövlət sərhədinin Berkaber kəndi yaxınlığında 1.9 km, Voskepar və Bağanis kəndlərində isə 4.9 km hissəsinin mühafizəsini öz üzərinə götürüb.

MTX-nin məlumatına görə, dövlət sərhədinin Kirants (Ermənistan) – Xeyrımlı (Azərbaycan) istiqamətindəki 5.8 km-lik hissəsinin mühafizəsi iyulun 24-dək keçid sxemi üzrə həyata keçiriləcək.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu.

Azərbaycan təqribən 20 faiz ərazisinin, Ermənistan isə bəzi kəndlərinin işğal edildiyini bildirirdi.

2020-ci ildə 44 günlük müharibə və ötən ilin sentyabrında bir günlük hərbi əməliyyat nəticəsində rəsmi Bakı bütün ölkədə suverenliyini bərpa etdiyini açıqladı.

Bakı Qarabağda bir günlük əməliyyatı "lokal antiterror tədbirlər"i, Yerevan isə "etnik təmizlənmə" kimi dəyərləndirib.

Daha sonra Qarabağdan Ermənistana əhali köçü başlayıb.

Müəllimlərin etik davranış Qaydaları tənqidlərə səbəb oldu

Dükanlara bir ətək borcu olan müəllim...
Gözlə

No media source currently available

0:00 0:02:49 0:00

"Təhsilverənlər qanunçuluq, vicdanlı davranış, loyallıq, mədəni davranış, qərəzsizlik, ictimai etimad prinsiplərinə riayət etməlidir".

Bu, mayın 15-də, Elm və Təhsil Nazirliyinin kollegiyasının təsdiqlədiyi "Təhsilverənlərin etik davranış Qaydaları"nda öz əksini tapıb.

Qaydalarda təhsilverənlərin sosial mediada davranış qaydalarından da bəhs edilir. Qaydaların 2.3.2. bəndində vurğulanır ki, təhsilverən öz fəaliyyəti ilə bağlı mediada və sosial şəbəkələrdə çıxışlarında çalışdığı müəssisədə müəyyən olunmuş qaydalara əməl etməlidir.

Sənədin 4.3 bəndinə əsasən isə, təhsilverən sosial media hesablarında onun və işlədiyi müəssisənin adına xələl gətirən, nüfuzunu aşağı salan audio və videomateriallar, təsvirlər paylaşmamalıdır.

Əvvəlki "Təhsilverənlərin etik davranış Qaydaları"nda bu məsələlərin yer almadığı bildirilir.

İndi bəzi sosial şəbəkə istifadəçiləri bu qaydaların bir sıra bəndləri ilə bağlı narahatlıqlarını ifadə edirlər. Onların sözlərinə görə, bu vaxta qədər müəllimlər məktəblərdəki qüsurlardan çox nadir hallarda, ehtiyatla danışırdılar. Həmin şəxslər vurğulayırlar ki, nöqsanlardan sosial şəbəkələrdə bəhs edən müəllimlər sonradan başqa bəhanələrlə cəzalandırılırdılar. Onlar hesab edirlər ki, yeni qaydalar yeni təzyiqlərə yol aça bilər.

"Senzuraya oxşayır"

Təhsil eksperti Fərid İmanovun deməsinə görə, qaydaları oxuyanda görünür ki, onlar senzuraya xidmət edir: "Bu etimad prinsiplərini, təhsilverənlərin etik davranışlarını rəhbərlik müəyyən edir. İndi həmin qaydalardan istifadə edib neqativ addımları işıqlandıranlara qarşı təzyiqlər göstəriləcək. Həm də ictimai-siyasi fəaliyyət ilə məşğul olan tələbələrin də buna əsasən problemlər yaşayacaqlarını demək olar. Bu qaydalar ifadə azadlığına müdaxilədir".

Hələlik, belə fikirlərə Elm və Təhsil Nazirliyi və başqa rəsmi qurumlardan münasibət almaq mümkün olmayıb.

Əfv Komissiyası müraciətlərə baxılmasını yekunlaşdırıb

Əliməmməd Nuriyev
Əliməmməd Nuriyev

Bugün, mayın 22-də Azərbaycan Prezidenti yanında Əfv Məsələləri Komissiyasının növbəti iclası keçirilib.

Bu barədə Əfv Məsələləri Komissiyasının üzvü, Konstitusiya Araşdırmaları Fondunun rəhbəri Əliməmməd Nuriyev " Turan"a məlumat verib.

Onun sözlərinə görə, son iclasda 100-dən çox ərizəyə baxılıb.

Ümumilikdə isə son bir ayda komissiya 700 ərizəyə baxıb.

Onun vurğulamasına görə, Komissiya işini yekunlaşdıraraq, nəticələrini Azərbaycan prezidentinə təqdim edəcək.

Komissiyanın son bir aydakı iclaslarının 28 May – Müstəqillik Günü ilə əlaqədar nəzərdə tutulan əfvlə bağlı keçirildiyi bildirilir.

Azərbaycanda sön əfv sərəncamı 2023-cü il mayın 8-də imzalanmışdı.

Sərəncama əsasən 801 məhkum əfv olunmuşdu. Onlardan 463-ü azadlıqdan məhrum etmə cəzasından, 220-i azadlıqdan məhrum etmə cəzasının çəkilməmiş hissəsinin yarısından, 118-i də azadlıqdan məhrum etmə ilə bağlı olmayan digər cəzalardan (azadlığın məhdudlaşdırılması, islah işləri, cərimə cəzaları və cəzaya şərti məhkum edilmiş şəxslər) azad edilib.

Azadlığa çıxanlardan yalnız bir neçə nəfər hüquq müdafiəçilərinin siyasi məhbus siyahılarında yer alırdı.

Bəzi yerli hüquq-müdafiə təşkilatlarının hazırladıqları siyahıya görə, hazırda isə Azərbaycan həbsxanalarında 250-300 siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.

Xalq Cəbhəsi üzvünə 30 sutka verildiyi deyilir

İmran Qurbanlı
İmran Qurbanlı

Azərbaycan Xalq Cəbhəsi Partiyasının (AXCP) üzvü İmran Qurbanlıya 30 sutka müddətinə inzibati qaydada həbs verildiyi bildirilir.

Bu barədə Azadlıq Radiosuna mayın 22-də AXCP-dən məlumat verilib.

Məlumata görə, o, İnzibati Xətalar Məcəlləsinin 535.1-ci (Polis işçisinin və ya hərbi qulluqçunun qanuni tələbinə qəsdən tabe olmama) maddəsi ilə təqsirli sayılıb.

Partiyadan bunu hakimiyyətinin növbəti şərləmə aktı kimi dəyərləndiriblər: "İmran Qurbanlı sosial şəbəkələrdə hökuməti tənqid edirdi. Ona görə də Türkiyədən Azərbaycana dönən kimi onu həbs ediblər".

Bu açıqlamaya, hələlik, Naxçıvan MR Daxili İşlər Nazirliyi və başqa cavabdeh rəsmi qurumlardan münasibət öyrənmək mümkün olmayıb.

Xalq Cəbhəsi üzvü Naxçıvanda saxlanıb

Azərbaycan Xalq Cəbhəsi Partiyasının (AXCP) üzvü İmran Qurbanlı saxlanıb.

Bu barədə AXCP-dən məlumat verilib.

Partiyadan bildirilib ki, İ.Qurbanlı mayın 21-də səhər saatlarında saxlanıb: "İmran bəy Türkiyədə yaşayıb işləyir. İldə bir neçə dəfə Naxçıvana ailəsinə baş çəkmək üçün gəlir. Bu gün səhər saat 10 radələrində özü bizimlə əlaqə saxlayıb dedi ki, qapıda altı-yeddi polis əməkdaşı var, onu Şərur rayon polis şöbəsinə aparırlar".

AXCP-dən qeyd olunub ki, bir neçə saatdır ailəsi ondan xəbər tuta bilmir.

Partiyadan hesab edirlər ki, o, sosial şəbəkələrdə yazdığı tənqidlərə görə saxlanıb.

İ.Qurbanlının saxlanılması barədə məlumatı "Turan"a Naxçıvan Muxtar Respublikası (MR) Daxili İşlər Nazirliyinin Mətbuat xidmətindən də təsdiqləyiblər. Bildirilib ki, həmin şəxs saxlanıb, barəsində araşdırma aparılır. Amma nazirlikdən ətraflı məlumat almaq mümkün olmayıb.

Naxçıvan MR Azərbaycanın eksklavı sayılır. O, ölkənin əsas ərazisindən aralıda yerləşir və digər dövlətlərlə (Türkiyə, İran, Ermənistan) əhatə edilib. Muxtar respublikanın bir çox şəxslərinin işləmək üçün qonşu Türkiyəyə üz tutduğu bildirilir.

Xatırlatma

Hazırda AXCP-nin 10-a qədər fəali uzunmüddətli həbsdədir. Onlar müxtəlif ittihamlarla üzləşsələr də, partiya onların siyasi sifarişlə həbs edildiyini açıqlayıb. Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 250-300 siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.

Əliyev və Zelenski regional təhlükəsizlikdən danışıblar

Volodimir Zelenski və İlham Əliyev Moldovada Avropa Siyasi Birliyinin sammitində.
Volodimir Zelenski və İlham Əliyev Moldovada Avropa Siyasi Birliyinin sammitində.

Ukrayna prezidenti Volodimir Zelenski mayın 21-də Azərbaycan prezidenti İlham Əliyevə zəng edib.

Azərbaycan prezidentinin Mətbuat xidmətinin məlumatına görə, telefon danışığı əsnasında dövlət başçıları regional təhlükəsizlik, enerji, ticarət və digər sahələrdə ikitərəfli əməkdaşlıq məsələlərini müzakirə ediblər.

"Söhbət zamanı hər iki ölkənin aidiyyəti qurumlarına birgə əməkdaşlıq layihələrinin həyata keçirilməsi ilə əlaqədar müvafiq tapşırıqların veriləcəyi bildirilib", - məlumatda əlavə edilir.

2022-ci il fevralın 24-də Rusiya Ukraynaya yenidən təcavüzə başlayıb. Səkkiz il əvvəl də Rusiya Ukraynanın bir hissəsini-Krımı tutmuşdu. Onda Rusiyaya sanksiyalar tətbiq edilməyə başlanmışdı. Yeni müharibədən sonra Qərb və dünyanın bir sıra ölkələri Rusiyaya sanksiyaları genişləndirib.

Amma Azərbaycan bu sanksiyalara qoşulmur. Bununla belə, Ukraynaya humanitar yardım göstərdiyini və onun ərazi bütövlüyünü tanıdığını açıqlayıb.

Başqa tərəfdən, 2022-ci il fevralın 22-də Moskvada "Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə" imzalanıb. Bu sənəddə iki ölkə arasında siyasi, iqtisadi və daha bir çox sahələrdə əməkdaşlığın inkişaf etdirilməsindən bəhs olunur.

Qubad İbadoğlunun ev dustaqlığı polisin nəzarətinə verilmə ilə əvəzləndi

Qubad İbadoğlu
Qubad İbadoğlu

İqtisadçı Qubad İbadoğlunun cinayət işi üzrə istintaq müddəti avqustun 20-nə qədər uzadılıb.

Bu barədə onun qardaşı Qalib Toğrul məlumat verib. O xatırladıb ki, həbs-qətimkan tədbiri olmadığına görə istintaq müddətinin uzadılması barədə qərarı istintaq orqanı özü verə bilər: "Üç ay uzadılması barədə qərar qəbul edilib".

Q.Toğrul qeyd edib ki, Q.İbadoğlu barəsində aprelin 22-də seçilmiş ev dustaqlığı müstəntiqin qərarı ilə polisin nəzarətinə verilmə ilə əvəz olunub.

Onun sözlərinə görə, qətimkan tədbirinin dəyişdirilməsi nəticəsində Q.İbadoğlunun ayağına vurulmuş elektron qolbaq mayın 20-də çıxarılıb: "Elektron qolbaq olduğuna görə qardaşım müayinələrdən keçə bilmirdi. Bu həftədən başlayaraq polisin nəzarəti altında olmaqla müayinələrdən keçməsini planlaşdırırıq".

Q.Toğrulun bu dediklərini istintaqı aparan Daxili İşlər Nazirliyindən (DİN) dəqiqləşdirmək mümkün olmayıb.

Xatırlatma

Q.İbadoğlu ötən il iyulun 23-də həbs edilib. O, Cinayət Məcəlləsinin (CM) 204.1-ci (Satış məqsədi ilə saxta pul... və ya xarici valyuta hazırlama, əldə etmə və ya satma - mütəşəkkil dəstə tərəfindən törədildikdə) maddəsi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb.

Q.İbadoğlu ittihamları saxta adlandırıb.

Bu il aprelin 22-də onun barəsində seçilmiş həbs-qətimkan tədbiri ev dustaqlığı ilə əvəz olunub.

Q.İbadoğlu dövlət qeydiyyatına alınmayan Azərbaycan Demokratiya və Rifah Partiyasına (ADR) rəhbərlik edib. Amma ev dustaqlığına buraxılandan sonra səhhəti ilə bağlı siyasi fəaliyyətinə fasilə verdiyini açıqlayıb.

Avropadan qayıdan Mehdi Xəlilbəyli Bakıda həbs olunub

Mehdi Xəlilbəyli
Mehdi Xəlilbəyli

Müsavat Partiyasının üzvü, uzun illər Almaniyada siyasi mühacir kimi yaşamış Mehdi Xəlilbəyli həbs olunub. Onun apreldə, Almaniyadan Azərbaycana gələrkən Bakıda hava limanında saxlandığı bildirilir.

"Ölkəyə daxil olanda pasport yoxlanışında onun axtarışda olduğu bildirilib. Sərhəd xidmətinin əməkdaşı onu saxlayıb, prokurorluğa təhvil verib. İki aya yaxındır ki, Kürdəxanıda - Bakı İstintaq Təcridxanasındadır", - onun yaxınları AzadlıqRadiosuna belə deyiblər.

M.Xəlilbəylinin 54 yaşı var. O, 2003-cü ilin oktyabrında prezident seçkisinin sonucları ilə bağlı etirazlar üzündən axtarışa verilib. Həmin hadisələrlə əlaqədar müsavatçıya Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya iştirak), 221-ci (xuliqanlıq) və 315-ci (hakimiyyət nümayəndəsinə qarşı müqavimət göstərmə, zor tətbiq etmə) maddələri ilə ittiham verilib. O, etirazlar zamanı "Lider TV"nin əməkdaşı Sahil Kərimliyə xəsarət yetirməkdə suçlanır.

M.Xəlilbəyli haqqında ilkin istintaq dövrü üçün 3 aylıq həbs-qətimkan tədbiri seçilib. Bu bilgini Binəqədi rayon Məhkəməsindən AzadlıqRadiosuna təsdiqləyiblər.

M.Xəlilbəyli ittihamları rədd edir.

Müsavat Partiyası Avropa Koordinasiya Mərkəzinin (AKM) üzvü olan M.Xəlilbəyli 2019-cu ildə Almaniyada qanunsuz miqrasıya hallarının təşkili (mühacir alveri) ilə bağlı araşdırmalar çərçivəsində tutulmuş, 2020-ci ilin yanvarında azadlığa buraxılmışdı.

Xatırlatma

2003-cü ilin oktyabr hadisələrindən sonra Azərbaycanda kütləvi həbslər yaşanmışdı. Həbs olunanlar arasında Müsavat Partiyasının keçmiş başqanı Arif Hacılı, Ümid Partiyasının sədri İqbal Ağazadə, "Yeni Müsavat" qəzetinin baş redaktoru Rauf Arifoğlu və başqaları vardı.

Ağdam, Füzuli və Cəbrayılın 29 kəndinin... sakinlərinə aylıq müavinət dayandırılıb

'Ağalı kəndində yayda pomidorun kilosu 6 manat idi'
Gözlə

No media source currently available

0:00 0:06:03 0:00

Füzuli rayonunun Horadiz şəhəri, 21 kəndi, Ağdam rayonunun yeddi, Cəbrayıl rayonunun isə bir kəndində (2017-ci ildə bərpa olunmuş Cocuq Mərcanlı) daimi yaşayan vətəndaşlara vahid aylıq müavinətin ödənilməsi mayın 1-dən dayandırılıb.

Bu barədə "Turan"a Qaçqınların və Məcburi Köçkünlərin İşləri üzrə Dövlət Komitəsinin Mətbuat xidmətindən məlumat verilib.

Qurumdan bildirilib ki, amma qalan məcburi köçkünlərə vahid aylıq müavinətin verilməsi davam edəcək. Onların hələ üç il müavinət alacaqları gözlənilir.

Məcburi köçkünlər üçün yemək xərci, kommunal və digər xidmətlər üzrə dövlət büdcəsindən ödənişlər əvəzinə vahid aylıq müavinətin verilməsinə 2017-ci il fevralın 1-dən başlanılıb. Müavinətin məbləği qazlaşdırma vəziyyətindən asılı olaraq, adambaşına 33 və 60 manat məbləğində müəyyən olunub.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu.

Azərbaycan münaqişə dövründə təqribən 20 faiz ərazisinin, Ermənistan isə bəzi kəndlərinin işğal edildiyini bildirib.

2020-ci ildə 44 günlük müharibə və ötən ilin sentyabrında bir günlük hərbi əməliyyat nəticəsində rəsmi Bakı bütün ölkədə suverenliyini bərpa etdiyini açıqlayıb.

Bakı Qarabağda bir günlük əməliyyatı "lokal antiterror tədbirləri", Yerevan isə "etnik təmizlənmə" kimi dəyərləndirib.

Daha sonra Qarabağdan Ermənistana əhali köçü başlayıb.

Qubad İbadoğlu siyasi fəaliyyətinə fasilə verib

Qubad İbadoğlu
Qubad İbadoğlu

Azərbaycan Demokratiya və Rifah Partiyasının (ADR) sədri Qubad İbadoğlu siyasi fəaliyyətinə qeyri-müəyyən müddətə fasilə verib.

Bu barədə onun özü “Turan” Agentliyinə danışıb.

O, habelə bildirib ki, mayın 14-də ADR İdarə Heyətinin toplantısında “Siyasi partiyalar haqqında” Azərbaycan Qanununun 4.7.-ci maddəsinin tələblərinin nəzərə alınması barədə qərar qəbul edilib.

Partiya fəaliyyətini dayandırırmı?

Siyasətçinin sözlərinə görə, qanunun 4.7-ci maddəsinə görə, siyasi partiyanın dövlət qeydiyyatına alınmadan fəaliyyət göstərməsinə yol verilmir:

"ADR-in fəaliyyəti Qanunun bu maddəsinə uyğun tənzimlənməlidir. Toplantıda İdarə Heyəti ADR-in fəaliyyətini "Siyasi Partiyalar haqqında" Qanunun 4.7-ci maddəsinə uyğunlaşdırmaq barədə qərar qəbul edib və buna uyğun olaraq partiya fəaliyyətini dayandırıb".

“Biz partiyanın qeydiyyata alınması ilə bağlı...”

Amma həmin qərar partiyada bir qədər fərqli də təqdim edilir. ADR-in sədr müavini Ellada Məmmədli isə bildirib ki, mayın 14-də Qubad İbadoğlunun iştirakı ilə iclas keçirilib:

"İclasda Qubad bəyin sağlamlıq məsələsi müzakirə olundu. Onun sağlamlıq vəziyyəti yazılanlardan da pisdir və o bizdən sağlamlığını bərpa etmək üçün fəaliyyətində fasilə verilməsi üçün izn istədi. Bizim üçün onun sağlamlığı hər şeydən üstündür və bərpa müddəti ərzində biz partiyanın qeydiyyata alınması üçün mümkün addımlarımızı müzakirə etdik. Qubad bəyin sağlamlığının bərpası uzun müddət çəkə bilər. Onun bərpası ərəfəsində biz partiyanın qeydiyyata alınması ilə bağlı addımlar atacağımızı razılaşdıq".

Qubad İbadoğlunun siyasi fəaliyyətinə fasilə verilməsi 9 aylıq həbs həyatından sonra səhhətindəki ciddi neqativ dəyişikliklər, xüsusilə ürəyindəki problemlər göstərilir.

Hələlik, açıqlanan qərarlara rəsmi qurumlardan münasibət almaq mümkün olmayıb.

Azərbaycan Demokratiya və Rifah Partiyası

İqtisadçı Qubad İbadoğlunun sədrlik etdiyi partiya 2015-ci ildən fəaliyyət göstərmiş Azərbaycan Demokratiya və Rifah Hərəkatının bazasında yaradılıb.

Təsis qurultayı 2021-ci il oktyabrın 17-də keçirilib, sənədlər həmin il noyabrın 11-də dövlət qeydiyyatı üçün Ədliyyə Nazirliyinə təqdim edilib. Amma nazirlik həm onda, həm də daha sonra bir neçə dəfə partiyanın qeydiyyatından imtina edib.

Buna səbəb kimi ADR-in öz nizamnaməsində seçkilərdə iştirakla bağlı əsasları göstərmədiyi vurğulanıb. Partiyada isə bu izah əsassız sayılıb.

Azərbaycanda ötən ilin əvvəlində “Siyası Partiyalar haqqında” yeni qanun qüvvəyə minib. Yeni qanuna görə, qeydiyyatsız fəaliyyət göstərən partiyaları cəzalar gözləyir.

Azərbaycanda həmin qanunun qəbuluna qədər 50-dən çox partiya olub. Onların təqribən ancaq yarısı təkrar qeydiyyatdan keçib.

Xatırlatma

Qubad İbadoğlu ötən il iyulun 23-də həbs olunmuşdu. O, Cinayət Məcəlləsinin (CM) 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma) və həmin maddənin əlavə olaraq 3.1-ci (eyni əməllər mütəşəkkil dəstə tərəfindən törədildikdə) bəndi ilə ittiham olunub.

Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb. Siyasətçi irəli sürülən bütün ittihamları saxta adlandırıb. Bir sıra beynəlxalq təşkilatlar da Azərbaycan hökumətini Q.İbadoğlunun işinə obyektiv baxmağa, onun hüquqlarının qorunmasına çağırıblar.

O, aprelin 22-də ev dustaqlığına buraxılıb.

Müdafiə tərəfi hesab edirdi ki, İbadoğluna verilən ittihamlar əsassızdır və üstəlik, onun səhhəti həbsdə saxlanmasına imkan vermir.

Qusar bələdiyyəsinin sədri həbs olunub

'Dövlət büdcəsindən hər bələdiyyəyə cəmi 400 manat ayrılır' - Korrupsiyanı doğuran nədir?
Gözlə

No media source currently available

0:00 0:09:41 0:00

Qusar rayon bələdiyyəsinin sədri həbs olunub.

Bu barədə bu gün, mayın 16-da Azərbaycan Baş Prokurorluğu məlumat yayıb.

Məlumatda bildirilir ki, Qusar bələdiyyəsinin sədri Əlfəddin İbrahimovun vəzifə səlahiyyətlərini aşmaqla torpaq sahələrini qanunsuz satmasına, bilə-bilə qanunsuz hərəkətlərə görə külli miqdarda rüşvət almasına və vəzifə saxtakarlığı törətməsinə əsaslı şübhələr yaranıb: "Əlfəddin İbrahimov Cinayət Məcəlləsinin 309.2 (vəzifə səlahiyyətlərini aşma ağır nəticələrə səbəb olduqda), 311.3.3 (külli miqdarda rüşvət alma) və 313-cü (vəzifə saxtakarlığı) maddələri ilə təqsirləndirilən şəxs qismində cəlb edilib... Məhkəmənin qərarı ilə barəsində həbs qətimkan tədbiri seçilib".

Hələlik, ittihamlara İbrahimov və yaxınlarından münasibət almaq mümkün olmayıb. Həmin ittihamlar üzrə şəxsə 12 ilə qədər həbs cəzası verilə bilər.

Bələdiyyə — qanunla müəyyən edilmiş ərazi hüdudları daxilində yerli özünüidarəetmə formasıdır. Azərbaycanda bələdiyyələr 1999-cu ildən fəaliyyət göstərir. Hazırda ölkədə min 605 bələdiyyə var.

Növbəti bələdiyyə seçkilərinin bu ilin sonlarında keçirilməsi gözlənir.

Ruben Vardanyanın da həbs müddəti artırılıb

Ruben Vardanyan
Ruben Vardanyan

Qarabağdakı tanınmayan qurumun keçmiş "dövlət naziri" Ruben Vardanyan barəsində seçilmiş həbs-qətimkan tədbirinin müddəti 5 ay uzadılıb.

"Turan"ın məlumatına görə, mayın 16-da Səbail rayon Məhkəməsi cinayət işi üzrə istintaqın aparıldığı Dövlət Təhlükəsizliyi Xidməti İstintaq Baş İdarəsinin vəsatətini və ibtidai araşdırmaya prosessual rəhbərliyi həyata keçirən prokurorun təqdimatını təmin edib.

Qərara əsasən, R.Vardanyanın həbsdə saxlanma müddəti daha 5 ay uzadılıb.

R.Vardanyana Cinayət Məcəlləsinin 214-1 (terrorçuluğu maliyyələşdirmə), 279.3 (qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak etmə) və 318.1-ci (Azərbaycan Respublikasının dövlət sərhədini qanunsuz olaraq keçmə) maddələri ilə ittiham verilib.

Qərara, hələlik, Vardanyanın özündən və yaxınlarından münasibət almaq mümkün olmayıb.

Amma o, ittihamları qəbul etmir. Müdafiə tərəfi ötən ay onun aclıq aksiyası keçirdiyini, özünün və Qarabağda digər həbs olunanların azadlığı buraxılmasını tələb etdiyini açıqlamışdı. Sonradan ailəsinin bəyanatında vurğulanırdı ki, Vardanyanı səhhətinin pisləşməsi və saxlanma şəraiti ilə əlaqədar aclığı dayandırmağa razı sala biliblər.

Azərbaycanın rəsmi qurumları onun aclıq aksiyası keçirməsini nə təsdiq, nə də təkzib etmişdilər.

Bako Saakyan, Arkadi Qukasyan, David İşxanyan
Bako Saakyan, Arkadi Qukasyan, David İşxanyan

Qarabağ separatçılarının liderlərinin həbs müddəti artırılıb

Ötən il Qarabağda saxlanaraq Bakıya gətirilən separatçı qurumun bəzi liderlərinin həbs müddəti artırılıb.

Bu barədə Azərbaycan Baş Prokurorluğunun mayın 15-də yayılan məlumatında bildirilir.

Açıqlamaya görə, həmin qurumun "prezidentləri" olmuş Arkadi Qukasyan, Bako Saakyan, Arayik Harutyunyan, sabiq "xarici işlər naziri" Davit Babayan, "parlament sədri" David İşxanyan, generallar Lyova Mnatsakanyan, David Manukyan və digərləri barəsində həbs-qətimkan tədbirlərinin müddətinin uzadılması ilə bağlı vəsatətə baxılıb. Vəsatət Binəqədi rayon Məhkəməsində təmin edilib: "... Ümumilikdə 15 nəfər Cinayət Məcəlləsinin müxtəlif maddələri ilə məsuliyyətə cəlb olunub. Məhkəmənin qərarına əsasən, qeyd olunan şəxslər barəsində seçilmiş həbs-qətimkan tədbirinin müddəti 5 ay uzadılıb".

Hələlik, bu qərara sözügedən şəxslərin və ya vəkillərinin münasibətləri bəlli deyil. Hazırda Dövlət Təhlükəsizliyi Xidmətinin (DTX) İstintaq təcridxanasında saxlanılan həmin şəxslər terrorçuluqda, terrorçuluğu maliyyələşdirmədə, qanunsuz silahlı birləşmələr yaratmaqda və başqa qanunsuz əməllərdə ittiham olunurlar.

Onların ayrılıqda ittihamlara münasibətini öyrənmək mümkün olmayıb.

Ermənistan hökuməti separatçı liderlərin həbsini pisləyib və onların azad olunması üçün beynəlxalq ictimaiyyətə müraciət edib.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi, ətraf 7 rayonu işğal edilmişdi.

2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib. Regiona Rusiya sülhməramlı kontingenti yerləşdirilib.

Bakı ötən il sentyabrın 19-20-də isə Qarabağda "lokal antiterror tədbirlər" elan edib. Yerevan bunu "etnik təmizlənmə" kimi dəyərləndirib. Daha sonra da Qarabağdan Ermənistana əhali köçü başlayıb. İndi haqqında bəhs edilən şəxslər də həmin vaxt saxlanaraq Bakıya gətirilmişdilər.

Bəzi kəndlərə dair protokol imzalandı, ziyana düşən ermənilərə kompensasiya veriləcək

Azərbaycan baş nazirinin müavini Şahin Mustafayev və Ermənistan baş nazirinin müavini Mher Qriqoryan
Azərbaycan baş nazirinin müavini Şahin Mustafayev və Ermənistan baş nazirinin müavini Mher Qriqoryan

Bugün, mayın 15-də Azərbaycanla Ermənistan arasında dövlət sərhədinin müəyyən edilməsi və təhlükəsizliyi məsələləri üzrə komissiyalarının doqquzuncu görüşü keçirilib.

AZƏRTAC-ın yaydığı məlumata görə, görüş iki ölkənin sərhədində Azərbaycan baş nazirinin müavini Şahin Mustafayev və Ermənistan baş nazirinin müavini Mher Qriqoryanın sədrliyi ilə gerçəkləşib.

Xəbərdə bildirilir ki, tərəflər bundan əvvəl aprelin 19-da gerçəkləşən görüşün protokoluna uyğun olaraq görülmüş işləri müzakirə ediblər:

“... Bağanıs Ayrım (AR) - Bağanis (ER), Aşağı Əskipara (AR) - Voskepar (ER), Xeyrımlı (AR) – Kirants (ER) və Qızılhacılı (AR) - Berkaber (ER) yaşayış məntəqələri arasında sərhəd xəttinin hissələrinin SSRİ Silahlı Qüvvələri Baş Qərargahının... 1976-cı il tarixli topoqrafik xəritəsinə uyğun yerdəki geodeziya ölçmələri əsasında koordinatların dəqiqləşdirilməsi nəzərə alınmaqla birgə tərtib olunmuş Protokol-təsvirini razılaşdırıblar.”

Görüşün yekunu olaraq müvafiq protokol imzalandığı qeyd olunur.

Komissiyaların bundan əvvəl ötən ay gerçəkləşən görüşündə Azərbaycan və Ermənistanın delimitasiya prosesində 1991-ci il Almatı Bəyannaməsinə əsaslanacağının razılaşdırıldığı açıqlanmışdı.

Qeyd edildiyinə görə, tərəflər ona uyğun olaraq Azərbaycanın nəzarətində olmayan həmin bəhs edilən 4 kəndin geri qaytarılmasını razılaşdırmışdılar.

Azərbaycan buna qədər ümumilikdə 8 kəndinin, Ermənistan isə 31 kəndinin ərazilərinin işğalda qaldığını bildirirdi.

Paşinyanın ofisi demarkasiyanın çətinlikləri barədə məlumat verib

Ermənistan baş nazirinin administrasiyasından Armenpress dövlət xəbər agentliyinə verilən məlumatda deyilir ki, Ermənistan-Azərbaycan sərhədinin Tavuş-Qazax sektorunda aparılan demarkasiya ilə bağlı bəzi çətinliklər yaranır.

Sərhədin ən çox mübahisələrə səbəb olan hissəsi Ermənistanın Kirants kəndi yaxınlığından keçir.

Baş nazirin ofisindən verilən məlumatda deyilir:

"Kirantsın üç koordinatı kompüterləşdirilib və daha sonra bura sərhəd dirəkləri vurulacaq. Kirants üçün yaxşı xəbər budur ki, son 33 ildə kitantslılar üçün əlçatmaz olan 25 hektarlıq kənd təsərrüfatı əhəmiyyətli torpaq kəndə qaytarılacaq”.

Demarkasiya 1976-cı ilə aid SSRİ xəritəsi ilə aparılır və bu zaman Kirants yolunun yerinin dəyişdirilməsi zərurəti ortaya çıxır.

Baş nazirin ofisindən bildirilib ki, yolun dəyişdirilməsi 2-3 ay ərzində icra oluna bilər.

Kirants kəndinin icra başçısı və kəndlilər deyirdilər ki, Nikol Paşinyanın sözlərinə görə Kirantsda demarkasiya üçün üç həssas nöqtə var. Bunlardan biri kənd məktəbidir. Kənd sakinlərinin dediyinə görə burada sərhəd məktəbin lap yaxınlığından keçəcək. Digər iki nöqtə körpüyə və Azərbaycana qaytarılacaq ərazidə ermənilər tərəfindən tikilmiş fərdi evlərə düşür.

Baş nazirin ofisi israr edir ki, mülkiyyət məsələsi o qədər də böyük deyil və hökumət demarkasiya nəticəsində ziyana düşən Ermənistan vətəndaşlarına ya pul, ya da yeni evlər vasitəsilə kompensasiya verəcək.

Bu da vurğulanıb ki, hökumət nümayəndələri elə bugündən (mayın 15-dən) bütün mümkün problemlərin siyahısını tərtib edəcək və Kirants sakinləri ilə müzakirələrə başlayacaqlar.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu.

Azərbaycan təqribən 20 faiz ərazisinin, Ermənistan isə bəzi kəndlərinin işğal edildiyini bildirirdi.

2020-ci ildə 44 günlük müharibə və ötən il sentyabrında 1 günlük hərbi əməliyyat nəticəsində rəsmi Bakı bütün ölkədə əsasən suverenliyi bərpa etdiyini açıqladı.

Bakı Qarabağda 1 günlük əməliyyatı "lokal antiterror tədbirlər"i, Yeravan isə “etnik təmizlənmə” kimi dəyərləndirib.

Daha sonra Qarabağdan Ermənistana əhali köçü başlayıb.

MN: Sülhməramlıların Azərbaycandan çıxarılması yaxınlarda yekunlaşacaq

Qarabağda Rusiya sülhməramlıları
Qarabağda Rusiya sülhməramlıları

"Rusiya sülhməramlılarının Azərbaycan ərazisini tərk etməsi prosesi hazırda da davam etdirilir və yaxın vaxtlarda yekunlaşacaq".

Bunu mayın 15-də Müdafiə Nazirliyinin Mətbuat xidmətinin rəhbəri Anar Eyvazov Xocalı rayonunda yerləşən Rusiya sülhməramlılarının yola salınma mərasimi zamanı jurnalistlərə açıqlamasında deyib.

26.04.2024

Türkiyə-Rusiya Birgə Monitorinq Mərkəzi fəaliyyətini dayandırıb [Video]

Ağdamda yerləşən Türkiyə-Rusiya Birgə Monitorinq Mərkəzi bu gün, aprelin 26-da fəaliyyətini dayandırıb.

Bu münasibətlə Azərbaycan Müdafiə Nazirliyinin təşkilatçılığı ilə Türkiyə-Rusiya Birgə Monitorinq Mərkəzində mərasim keçirilir.

Mərasimdə Azərbaycan Ordusunun Baş Qərargah rəisi Kərim Vəliyev, Türkiyə, Rusiya səfirləri və digər şəxslər iştirak edirlər.

Bununla əlaqədar bir qrup media nümayəndəsi üçün media-tur təşkil olunub.

Bu mərkəz Azərbaycan hökumətinin razılığı əsasında 2021-ci il yanvarın 30-da Türkiyə ilə Rusiya arasında imzalanan Memorandumla yaradılmışdı. Məqsədinin Qarabağda atəşkəsin təmin edilməsi ilə bağlı monitorinq aparmaq olduğu açıqlanmışdı.

23 aprel

Sülhməramlılar Qarabağdan Ermənistana getdi – Rəsmi izahat

Dağlıq Qarabağdan olan Rusiya sülhməramlıları Ermənistanın Qoris və Sisian şəhərlərində müvəqqəti dislokasiya məntəqələrinə onların bağlanması ilə bağlı işlərin təşkili üçün gəliblər, - Ermənistan Təhlükəsizlik Şurasının katibi Armen Qriqoryan bildirib.

Sosial şəbəkələrdə sülhməramlılardan ibarət karvanın Dağlıq Qarabağı Ermənistanla birləşdirən Laçın dəhlizinin başladığı Həkəri körpüsündən keçərək Ermənistan ərazisinə gəlməsi ilə bağlı video yayılıb.

Qriqoryan əlavə edib ki, qoşunlar Dağlıq Qarabağı tərk etdiyi üçün "onlar təbii olaraq Ermənistan Respublikasının ərazisində də qala bilməzlər".

18 aprel

'Rusiya ordusunun Cənubi Qafqazda sülhə töhfə verdiyini görməmişik' – Dövlət Departamenti

"Açığı, biz Rusiya ordusunun daha dinc və stabil Cənubi Qafqaz regionuna töhfə verdiyini göstərən heç nə görməmişik".

Bu fikirləri ABŞ Dövlət Departamentinin sözçüsünün birinci müavini Vedant Patel Rusiya sülhməramlılarının Azərbaycan ərazilərindən çıxarılmasına dair sualı cavabındırarkən səsləndirib.

"Ötən ilin payızında Dağlıq Qarabağda baş verənlər bu baxımdan Rusiyanın etibarlı müttəfiq və ya tərəfdaş olmadığının başqa bir bariz nümunəsidir", - deyən Patel vurğulayıb ki, Vaşinqton davamlı, ləyaqətli sülh əldə etmək üçün Ermənistan və Azərbaycanın səylərini qətiyyətlə dəstəkləyir.

17 aprel

Rusiya sülhməramlıları Azərbaycandan gedir

"Rusiya sülhməramlılarının Azərbaycan ərazisindən vaxtından əvvəl çıxarılması barədə hər iki ölkənin ali rəhbərliyi qərar qəbul edib".

Bunu Azərbaycan prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Rusiya sülhməramlılarının Azərbaycan ərazisindən çıxarılması barədə məlumatla əlaqədar AZƏRTAC-ın sualını cavablandırarkən deyib.

"2020-ci il noyabrın 10-da imzalanmış üçtərəfli bəyanata əsasən, Azərbaycan ərazisində müvəqqəti olaraq yerləşdirilmiş Rusiya Federasiyası sülhməramlılarının ölkəmizin ərazisindən vaxtından əvvəl çıxarılması barədə hər iki ölkənin ali rəhbərliyi tərəfindən qərar qəbul edilib. Artıq proses başlanılıb, Azərbaycan və Rusiya müdafiə nazirlikləri həmin qərarın icrası ilə bağlı müvafiq tədbirləri həyata keçirirlər", - H.Hacıyev bildirib.

Arayış

İkinci Qarabağ savaşından sonra 10 noyabr anlaşması ilə Qarabağın dağlıq hissələrinə və Laçın dəhlizinə yerləşdirilən rusiyalı sülhməramlıların sayı ilə bağlı müxtəlif məlumatlar yayılıb. Razılaşmada onların sayı min 960 nəfər nəzərdə tutulsa da, Azərbaycanda bunun bir qədər çox olduğu ilə bağlı iddialar da səslənib.

Texnikaya gəldikdə isə, onun 90 zirehli transportyor, 380 avtomobil, xüsusi texnika, dörd "Mi-8", dörd "Mi-24" helikopteri və yeddi pilotsuz uçan aparatdan ibarət olduğu bildirilirdi.

Qarabağda xidməti vəzifələrini icra edərkən səkkiz Rusiya sülhməramlısının həlak olduğu açıqlanıb.

+++

Kreml Rusiya sülhməramlı qüvvələrinin Qarabağdan çıxarılmasının başlandığı barədə məlumatları təsdiqləyib.

"Interfax"ın məlumatına görə, Rusiya prezidentinin mətbuat katibi Dmitri Peskov "Bəli, bu, həqiqətən də belədir" deyib.

Aprelin 16-da sosial şəbəkələrdə Tərtər, Goranboy və Gədəbəy rayonlarında hərəkət etdiyi iddia olunan Rusiya hərbi texnikasının görüntüləri yayılıb. Qeyri-rəsmi mənbələr bildirir ki, Rusiya sülhməramlı kontingenti Azərbaycandan çıxarılaraq Dağıstana gedir.

Rusiya sülhməramlı kontingenti 2020-ci ildə Azərbaycana gəlib. Ondan əvvəl Rusiya ordusu 1993-cü ildə - Əbülfəz Elçibəyin prezidentliyi dövründə Azərbaycanı tərk etmişdi.

Azər Qasımlı
Azər Qasımlı

Rusiya sülhməramlılarının getməsi ilə bağlı: "Razılaşmalar nədir, onu bilmirik"

Siyasi Menecment İnstitutunun rəhbəri Azər Qasımlı hesab edir ki, rəsmi açıqlamada bütün suallara aydınlıq gətirilməlidir: "Biz bilməliyik, sülhməramlılar tam olaraq çıxarılır, yoxsa bir hissəsi qalacaq? Başqa suallar da var".

Onun fikrincə, əsas məsələ burasındadır ki, Azərbaycan Rusiyanın yaxın müttəfiqidir: "Onun da hazırda həyata keçirdiyi siyasət anti-Qərb siyasətidir və hər şeyi edir ki, Qərb bu bölgəyə gəlməsin. Mən düşünürəm ki, Azərbaycan və Rusiya iqtidarları arasında müəyyən razılaşmalar var. Bu belə olmur ki, günün bir günü 2025-ci il gəlmədən əvvəl qərar verdilər ki, Qarabağdan gedirik. Bu, müəyyən razılaşmalardan keçir. Biz də bu razılaşmalar nədir, onu bilmirik".

Ekspert hesab edir ki, bunun fonunda Qərblə Azərbaycanın münasibətləri olduqca pisdir: "Fikirləşirəm ki, hər şey böyük müharibəyə doğru gedir və regionu ona sürükləyən Rusiyadır".

"Müddəti uzatmaq niyyətimiz yox idi"

Milli Məclisin deputatı Elman Nəsirov isə 'Turan"a bildirib ki, Azərbaycan tərəfinin mövqeyi bəlli idi: "Bizim bu müddəti uzatmağa niyyətimiz yox idi, amma 5 illik müddəti gözləməli idik. Belə yanaşmalar da var idi ki, sülhməramlıların missiyası daha erkən bitəcək".

Onun sözlərinə görə, bu mövqeyi şərtləndirən amil o idi ki, sülhməramlıları Qarabağa gətirən səbəb artıq yoxdur: "Onlar ona görə gəlmişdilər ki, Qarabağda yaşayan ermənilərin təhlükəsizliyini təmin etsinlər. Keçən il sentyabrın 19-da aparılan antiterror əməliyyatından sonra ermənilər Qarabağı könüllü tərk ediblər və artıq orada ermənilər yaşamır. Belə olan halda, sülhməramlıların əsas missiyası aktuallığını itirib. Kreml rəhbərliyi, yəqin ki, bu reallıqları ölçüb-biçib və qərara gəlib ki, sülhməramlıları burada saxlamağın mənası yoxdur".

Rusiya sülhməramlıları Azərbaycandan başqa daha hansı bölgələrdədir?
Gözlə

No media source currently available

0:00 0:03:00 0:00

+++

Bütün bunlarla belə, təqribən iki həftə əvvəl Azərbaycan Minatəmizləmə Agentliyi (ANAMA) İdarə Heyətinin sədri Vüqar Süleymanov bildirmişdi ki, Rusiya sülhməramlılarının Xocalıda minatəmizləmə əməliyyatlarına cəlb edilməsi planlaşdırılır. O, sülhməramlı kontingentin minatəmizləmə əməliyyatlarına qoşulması ilə bağlı müəyyən sənədləşmə işlərinin aparıldığını vurğulamışdı: "Artıq onlar akkreditasiyadan keçirilir. Texnikalar, itlər və canlı qüvvələr yaxın vaxtlarda Xocalıda minatəmizləmə prosesinə cəlb olunacaq".

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi, ətraf 7 rayonu işğal edilmişdi.

2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib. Regiona (Laçın dəhlizi və Qarabağda təmas xəttinə) 5 illik Rusiya sülhməramlı kontingenti yerləşdirilib. (onun müddəti tərəflərin razılığı ilə artırıla bilər)

Bakı ötən il sentyabrın 19-20-də Qarabağda "lokal antiterror tədbirlər" elan edib. Yerevan bunu "etnik təmizlənmə" kimi dəyərləndirib. Qarabağdakı separatçı qurumun rəhbəri yeni ilə qədər bu qurumun fəaliyyətini dayandıracağını açıqlamışdı. Daha sonra da Qarabağdan Ermənistana əhali köçü başlayıb. Bundan sonra Rusiya sülhməramlılarının regionda qalma səbəbi mübahisələndirilməyə başlanmışdı.

İtkin düşmüş Müsavat fəalı qətlə yetirilib

Natiq Mehdi (Ulubəy)
Natiq Mehdi (Ulubəy)

Musavat fəalının ölümü ilə bağlı cinayət işi açılıb

İtkin düşmüş Müsavat Partiyası fəalı Natiq Mehdinin ölümü ilə bağlı Xətai rayon prokurorluğunda Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsilə cinayət işi başlanıb.

Bu barədə Baş Prokurorluq və Daxili İşlər Nazirliyinin bugün, mayın 14-də yaydıqları birgə məlumatda bildirilir.

Məlumata görə, bu il mayın 9-da Bakı şəhərinin Xətai rayonu ərazisində yerləşən məktəblərdən birində mühafizəçi işləyən 1964-cü il təvəllüdlü Natiq Mehdi Məhəmməd oğlunun itkin düşməsi barədə məlumat alıblar.

Rəsmi qurumlar əlavə edir ki, istintaq və əməliyyat-axtarış tədbirləri nəticəsində onu həmin gün, saat 23 radələrində bir iş yoldaşının Xətai rayonu ərazisində “şəxsi münasibətlər zəminində" aralarında yaranmış mübahisə zamanı qəsdən öldürməsinə əsaslı şübhələr yaranıb.

Açıqlamada habelə qeyd edilir ki, Natiq Mehdinin meyiti saxlanan iş yoldaşının istintaqa verdiyi ifadə əsasında müəyyən olunaraq prokuror-kriminalistin və ekspertin iştirakı ilə çıxarılıb.

Hələlik, rəsmi açıqlamaya Natiq Mehdi və saxlanan şəxsin yaxınlarından münasibət almaq mümkün olmayıb.

***

İtkin düşmüş Müsavat Partiyası fəalının qətlə yetirildiyi bildirilir.

Daxili İşlər Nazirliyindən (DİN) "Turan"a bildirilib ki, Natiq Mehdinin itkin düşməsi barədə polisə daxil olmuş müraciət üzrə araşdırma aparılıb.

Vurğulandığına görə, polis müəyyən edib ki, 1964-cü il təvəllüdlü N.Mehdi qətlə yetirilib.

DİN bu məsələ ilə bağlı onun bir iş yoldaşının saxlanaraq istintaqa təhvil verildiyini deyir.

Hələlik, adı açıqlanan həmin saxlanan şəxsin və ya vəkilinin ittihama münasibətini öyrənmək mümkün olmayıb.

Müsavatçının günlərdir itkin düşdüyü bildirilir

Azərbaycanda müxalif Müsavat Partiyasının fəalı Natiq Mehdinin (Ulubəy) yoxa çıxdığı deyilir.

Bu barədə partiyanın mətbuat xidmətindən məlumat verilib.

Bildirilib ki, N.Mehdi mayın 10-da yaşadığı Bakı şəhərində öz şəxsi avtomobili ilə birlikdə yoxa çıxıb, onun haqqında məlumat almaq mümkün deyil: "Yaxınları məsələ ilə bağlı 37-ci polis bölməsinə ərizə ilə müraciət ediblər. Biz də məsələ ilə bağlı Daxili İşlər Nazirliyi ilə əlaqə saxladıq, amma, hələlik, heç bir məlumat yoxdur. Onun telefonuna da zəng çatmır".

Bu deyilənlərə hüquq-mühafizə orqanlarından münasibət öyrənmək mümkün olmayıb.

N.Mehdi Müsavat Partiyasının başqanlığına öz namizədliyini irəli sürmüşdü, qurultaya bir neçə gün qalmış namizədliyini geri götürmüşdü.

Müsavat Partiyasının qurultayı mayın 4-də olub. Orada 1992-ci ildən 2014-cü ilə qədər bu partiyaya rəhbərlik edən İsa Qəmbər yenidən Müsavat başqanı seçilib.

Azərbaycan və Ukrayna xarici işlər nazirləri danışıb

Bugün, mayın 13-də Azərbaycan xarici işlər naziri Ceyhun Bayramov ilə Ukrayna xarici işlər naziri Dmitro Kuleba arasında telefon danışığı olub.

Azərbaycan Xarici İşlər Nazirliyinin məlumatına görə, tərəflər iki ölkə arasında nəqliyyat, enerji və humanitar sahələrdə əməkdaşlıq məsələlərini müzakirə ediblər:

“Telefon danışığı zamanı Azərbaycanla Ukrayna arasında strateji tərəfdaşlıq münasibətlərinin hazırkı səviyyəsindən məmnunluq ifadə olunub”

Əlavə edildiyinə görə, habelə qeyd edilib ki, münasibətlər daim beynəlxalq hüquqa, o cümlədən ərazi bütövlüyü və suverenliyə hörmət əsasında inkişaf edir.

Xatırlatma

2022-ci il fevralın 24-də Rusiya Ukraynaya yenidən tacavüzə başlayıb. 8 il əvvəl də Rusiya Ukraynanın bir hissəsini-Krımı tutmuşdu.

Onda Rusiyaya sanksiyalar tətbiq edilməyə başlanmışdı.Yeni müharibədən sonra Qərb və dünyanın bir sıra ölkələri Rusiyaya sanksiyaları genişləndirib.

Amma Azərbaycan bu sanksiyalara qoşulmur. Bununla belə Ukraynaya humanitar yardım göstərildiyi açıqlanıb.

Başqa tərəfdən 2022-ci il fevralın 22-də Moskvada “Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə” imzalanıb.

Bu sənəddə isə iki ölkə arasında siyasi, iqtisadi və daha bir çox sahələrdə əməkdaşlığın inkişaf etdirilməsindən bəhs edilir.

Ailəsi Ruslan İzzətlinin səhhətindən narahatdır

Ruslan İzzətli
Ruslan İzzətli

III Respublika Platformasının həbsdə olan qurucu üzvlərdən biri Ruslan İzzətlinin səhhətində problemlərin artdığı bildirilir.

Bu barədə onun həyat yoldaşı Günel Manaflı məlumat verib. Onun sözlərinə görə, saxlandığı 1 saylı Bakı İstintaq Təcridxanasında R.İzzətlidən götürülən analizlərin cavabında qanda şəkərin və xolesterinin artdığı göstərilib: "Digər problemlər də var. Əvvəllər də şəkəri olub, müalicə almışdı. Görünür, xəstəlik yenidən baş qaldırıb. Təkrar analiz və müalicəyə ehtiyac var. Analizi göstərdiyim həkim nəticəyə əsasən bildirdi ki, müalicə olunmazsa, gələcəkdə damar tıxanıqlığı, infarkta səbəb ola bilər. Həmçinin, ürəyinin də yoxlanılmasına ehtiyac olduğunu dedi".

G.Manaflı siyasətçinin ödündəki daşların da həyati təhlükə yaratdığını bildirir: "Müayinə nəticəsində ödündə daşların olduğunu təcridxananın həkimlərinin özləri də təsdiqləyiblər".

O vurğulayıb ki, R.İzzətlinin həyatına təhlükə var.

Hələlik, bu açıqlamaya rəsmi qurumlardan münasibət almaq mümkün olmayıb. Yaxınları R.İzzətlinin həbsindən öncə və həbsinin ilk günlərində də onun səhhəti ilə bağlı narahatlıqlarını ifadə ediblər.

R.İzzətli martın 8-də saxlanılıb və növbəti gün pul qaçaqmalçılığı ittihamı ilə 4 ay müddətinə həbs olunub.

Xatırlatma

Son aylar Azərbaycanda 20-yə qədər jurnalist, ictimai fəal sırf qaçaqmalçılıq ittihamı ilə həbs edilib. Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim peşə fəaliyyətinə görə siyasi sifarişlə basqılara məruz qalmır. Hüquq-müdafiə təşkilatlarının hazırladığı siyahılara görə, hazırda Azərbaycanda 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri də qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə mühakimə ediliblər.

XİN: 'Tərəflər... danışıqları davam etdirməyə razılaşıblar'

Ermənistan və Azərbaycanın xarici işlər naziri Ararat Mirzoyan və Ceyhun Bayramov danışıqlar aparmaq üçün Almatıya gəliblər. Qazaxıstanın xarici işlər naziri Murat Nurtleu onları qarşılayıb.
Ermənistan və Azərbaycanın xarici işlər naziri Ararat Mirzoyan və Ceyhun Bayramov danışıqlar aparmaq üçün Almatıya gəliblər. Qazaxıstanın xarici işlər naziri Murat Nurtleu onları qarşılayıb.

Mayın 11-də Qazaxıstanın Almatı şəhərində Azərbaycan xarici işlər naziri Ceyhun Bayramov ilə Ermənistan xarici işlər naziri Ararat Mirzoyan arasında bir gün əvvəl başlayan danışıqlar davam edib.

Azərbaycan Xarici İşlər Nazirliyinin (XİN) məlumata görə, nazirlər delimitasiya üzrə irəliləyişi və bununla bağlı əldə edilmiş razılaşmaları alqışlayıblar.

Habelə bildirilir ki, iki gün sürən danışıqlarda onlar sülh sazişi layihəsinin müddəalarının müzakirəsini davam etdiriblər: "Tərəflər hələ də fikir ayrılıqlarının mövcud olduğu açıq qalan məsələlər üzrə danışıqları davam etdirməyə razılaşıblar".

Bu görüş iki ölkə arasında sərhədlərin delimitasiya və demarkasiya prosesi fonunda gerçəkləşib. Bu həftənin əvvəlində bildirilmişdi ki, Azərbaycan ilə Ermənistan arasındakı sərhəddə koordinatların dəqiqləşdirilməsi işləri çərçivəsində aparılan geodeziya ölçmələri əsasında 2024-cü il mayın 6-dək 40 sərhəd dirəyi quraşdırılıb.

Hər iki ölkənin bununla bağlı komissiyaları bundan əvvəl bütün sərhədin 1991-ci il Almatı Bəyannaməsi bazasında delimitasiya olunacağına dair razılaşma əldə edildiyini açıqlayıblar. Azərbaycan ilkin razılaşmaya görə, nəzarətində olmayan dörd kəndinin ona qaytarılacağını bildirib. Yerevandan isə deyilib ki, həmin kəndlərdən birinin ərazisi tam, digərinin isə qismən onsuz da buna qədər Azərbaycanın nəzarətində idi. Azərbaycan ümumilikdə səkkiz kəndinin işğalda olduğunu deyirdi. Ermənistan isə hələ də 31 kəndinin ərazilərinin işğalda olduğunu bildirir. Amma rəsmi Bakı indiyə kimi bunu təsdiqləməyib.

***

Mayın 10-da Qazaxıstanın Almatı şəhərində Azərbaycan xarici işlər naziri Ceyhun Bayramov ilə Ermənistan xarici işlər naziri Ararat Mirzoyanın görüşü keçirilib.

Görüş ərəfəsində Azərbaycan Xarici İşlər Nazirliyi bildirmişdi ki, iki ölkə arasında "Sülhün və dövlətlərarası münasibətlərin təsis edilməsi haqqında ikitərəfli Saziş" layihəsi üzrə danışıqların növbəti raundu gerçəkləşəcək.

Daha əvvəl isə Ermənistan Xarici İşlər Nazirliyindən yerli mediaya bildirilmişdi ki, bu görüşün gündəliyinə tərəflərin öhdəliklərinin təsdiqi, eləcə də regional nəqliyyat infrastrukturu və ticarət marşrutlarının bərpası ilə bağlı məsələlər daxil edilib.

Son illər Azərbaycan və Ermənistan arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazişi imzalanmayıb. Amma ötən ildən başlayaraq iki ölkə arasında birbaşa danışıqlar da gerçəkləşib. Hazırda bu formatda onların arasında sərhədlər müəyyənləşdirilməkdədir.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycanın Qarabağ bölgəsi, ətraf 7 rayonu işğal edilmişdi.

Azərbaycan 2020-ci ildə 44 günlük müharibə və 2023-cü ildə birgünlük əməliyyatla ərazilərinə nəzarəti bərpa edib.

Son illər iki ölkə arasında həm Avropa İttifaqı, həm də Rusiyanın ayrılıqda vasitəçiliyi ilə sülh danışıqları aparılır.

Məhkəmə 'AbzasMedia işi' üzrə üç jurnalisti həbsdə saxladı

Ülvi Həsənlinin saxlanması: Abzas media korrupsiya araşdırmalarına davam edəcək
Gözlə

No media source currently available

0:00 0:06:51 0:00

Mayın 9-da Bakının Xətai rayon Məhkəməsində "AbzasMedia" nəşrinin direktoru Ülvi Həsənli, baş redaktoru Sevinc Vaqifqızı və meclis.info onlayn platformasının rəhbəri İmran Əliyevin ev dustaqlığına buraxılması barədə vəsatətlərə ayrıca baxılıb. Prosesə Fuad Axundov sədrlik edib.

Məhkəmə vəsatətləri təmin etməyərək jurnalistləri həbsdə saxlayıb.

Vəkillər bildiriblər ki, jurnalistləri həbsdə saxlamaq üçün maddi, prosessual əsaslar yoxdur və onlar siyasi motivlərlə həbs olunublar.

Məhkəmə qərarlarından apellyasiya instansiyasına şikayət veriləcək.

2023-cü ilin noyabrından 2024-cü ilin yanvarına qədər Azərbaycanda "AbzasMedia işi" ilə əlaqəli səkkiz jurnalist və media əməkdaşı həbs olunub. Onlar qaçaqmalçılıqda ittiham edilirlər. Ümumilikdə isə son aylar ölkədə qaçaqmalçılıq ittihamı ilə 20-yə qədər jurnalist, ictimai fəal həbs edilib. Onların hamısı ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə basqılara məruz qalmır.

Yerli hüquq-müdafiə təşkilatlarının hazırladığı siyahılara görə, hazırda Azərbaycanda ümumilikdə 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri də qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə mühakimə ediliblər.

Anar Məmmədli evə buraxılmadı

Anar Məmmədli
Anar Məmmədli

Seçkilərin Monitorinqi və Demokratiyanın Tədrisi Mərkəzinin həbsdə olan rəhbəri Anar Məmmədli ev dustaqlığına buraxılmayıb.

Vəkil Elmar Süleymanov "Turan"a bildirib ki, mayın 8-də Xətai rayon Məhkəməsində Məmmədli barəsində seçilmiş həbs-qətimkan tədbirinin ev dustaqlığı ilə əvəz olunması barədə vəsatətə baxılıb, amma təmin edilməyib.

Vəkil qeyd edib ki, müdafiə tərəfi Məmmədlinin həbsi üçün heç bir əsas görmür: "Biz Anar Məmmədli barəsində həbs-qətimkan tədbirinin seçilməsi ilə razı deyilik. Amma madam ki, məhkəmə onun barəsində həbs-qətimkan tədbirini seçib və apellyasiya şikayətimiz da təmin olunmadı, biz Anar Məmmədlinin ev dustaqlığına buraxılması üçün müraciət etmişik".

Süleymanov bildirib ki, Məmmədlinin himayəsində azyaşlı uşağı, səhhəti zəif olan yaşlı anası və atası var: "Eyni zamanda, o, tanınmış hüquq müdafiəçisidir və onun istintaqdan yayınmaq niyyəti yoxdur. Amma, təəssüf ki, məhkəmə bizim əsaslarımızı eşitmədi və vəsatətimizi təmin etmədi".

Vəkilin sözlərinə görə, məhkəmə qərarından apellyasiya şikayəti veriləcək.

Müdafiə tərəfinin açıqlamasına, hələlik, rəsmi qurumlardan münasibət almaq mümkün olmayıb.

Britaniya səfiri Anar Məmmədlinin həbsindən yazdı

Böyük Britaniyanın Azərbaycandakı səfiri Ferqus Old Anar Məmmədlinin həbsi ilə bağlı narahatlığını bildirib.

"Biz Azərbaycanda vətəndaş cəmiyyəti fəallarının, o cümlədən Anar Məmmədlinin həbsindən narahatıq. Biz Azərbaycanı insan hüquqlarının müdafiəsi ilə bağlı beynəlxalq öhdəliklərinə əməl etməyə çağırırıq. Vətəndaş cəmiyyətinə dəstəyimiz Britaniya-Azərbaycan münasibətlərinin əsas sütunudur", - səfir X sosial platformasında yazıb.

Vəkil Anar Məmmədli ilə görüşüb

Vəkil Elmar Süleymanov mayın 1-də 1 saylı Bakı İstintaq Təcridxanasında Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli ilə görüşüb.

Vəkilin sözlərinə görə, Məmmədli özünü normal hiss edir.

Eyni zamanda, Məmmədli ona qarşı irəli sürülən ittihamı rədd edir.

Məmmədlinin başına torba keçirilərək məhkəməyə gətirilməsinə dair sosial şəbəkələrdə yayılan məlumatlara münasibət bildirən vəkil bildirib ki, hüquq müdafiəçisi bu məlumatı təsdiqləməyib: "Anar Məmmədli bildirdi ki, o, məhkəməyə əllərinə arxadan qandal vurulmuş, başı aşağı əyilmiş halda gətirib-aparıblar. Lakin başına torba taxılmayıb".

Məmmədli istintaq təcridxanasında rəftardan şikayəti olmasa da, karantində antisanitar şəraitin olduğunu qeyd edib.

Hələlik, vəkilin bu açıqlamasına rəsmi qurumlardan münasibət almaq mümkün olmayıb.

Anar Məmmədli barəsində 3 ay 28 günlük həbs qərarı verilib

Aprelin 30-da Seçkilərin Monitorinqi və Demokratiyanın Tədrisi (SMDT) mərkəzinin rəhbəri Anar Məmmədli barəsində Xətai rayon Məhkəməsində 3 ay 28 gün müddətinə həbs qətimkan tədbiri seçilib.

Bu barədə vəkil Ramil Süleymanov məlumat verib.

Vəkil qərarı qanunsuz hesab etdiklərini və qərardan apellyasiya şikayəti veriləcəyini bildirib.

Məmmədli Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham olunur, amma ittihamı qurama sayır.

Anar Məmmədlinin həbsinə AŞPA-dan reaksiya: 'Nə indi, nə də yanvarda...'

Almaniyanın Avropa Şurası Parlament Assambleyasındakı (AŞPA) nümayəndə heyətinin sədri Frank Şvabe Anar Məmmədlinin həbsindən sonra Azərbaycanın bu quruma qayıtmasını qeyri-mümkün hesab edir.

"Azərbaycanın Parlament Assambleyasına geriyə yolu yoxdur. Nə indi, nə də yanvarda", - o, X platformasında öz hesabında yazıb.

Şvabe ölkə vətəndaşlarının hüquq və azadlıqlarının pozulmasını səbəb göstərərək Azərbaycan nümayəndə heyətinin AŞPA-da səs hüququndan məhrum edilməsinin təşəbbüskarı olub.

2024-cü ilin yanvarında qış sessiyasında AŞPA üzvləri bu barədə qətnamə qəbul edərək Azərbaycan nümayəndə heyətinin mandatını bir illiyinə dondurub. Qətnamədə deyilir ki, Azərbaycan hakimiyyəti siyasi məhbusları azad etsə və insan hüquqlarının pozuntularına son qoysa, səs hüququ qaytarıla bilər.

Azərbaycan hökuməti təmsilçiləri isə bununla bağlı tənqidləri qərəzli və əsassız sayır.

Anar Məmmədlinin də qaçaqmalçılıqda günahlandırıldığı deyilir

Seçkilərin Monitorinqi və Demokratiyanın Tədrisi (SMDT) Mərkəzinin rəhbəri Anar Məmmədliyə qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürüldüyü bildirilir.

Bu barədə onun yaxınları məlumat verir.

Məmmədlinin ailə üzvləri həmçinin onun "AbzasMedia işi" üzrə prosesə cəlb edildiyini vurğulayıblar.

Onların sözlərinə görə, Məmmədlinin vəkili, hələlik, onunla görüşə bilməyib: "Anar Məmmədli gecəni Xətai rayon Polis İdarəsinin Müvəqqəti Saxlanma Təcridxanasında keçirib. İstintaqı Bakı şəhər Baş Polis İdarəsi aparır".

Hələlik, bütün bu deyilənlərə Daxili İşlər Nazirliyi və başqa rəsmi qurumlardan münasibət almaq mümkün olmayıb.

+++

Birləşmiş Ştatların Azərbaycandakı səfirliyi Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədlinin saxlanmasına münasibət bildirib.

"Azərbaycan vətəndaş cəmiyyəti üzvlərinin - ən son isə Anar Məmmədlinin, - həbslərinin davam etməsi bizi çox narahat edir. Biz Azərbaycan hökumətini haqsız yerə həbs olunan bütün şəxsləri dərhal azad etməyə çağırırıq", - ABŞ səfirliyinin mətbuat katibi Vanessa Zenci "Amerikanın Səsi"nin sorğusuna cavabda bildirib.

Məmmədlinin atasının evində də axtarış aparılıb

Aprelin 29-da Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin öz evi ilə yanaşı, atasının evində də axtarış aparıldığı bildirilir. (O da Bakı şəhərindədir)

Məmmədlinin bacısı Şəfa Məmmədli "Amerikanın Səsi" radiosuna deyib ki, atasının evindən köhnədən qalan sənədlər aparılıb: "Həmçinin, guya Anarın köynəyinin cibindən çıxan qəbzləri, mənim kompüterimi, fleş-kartımı götürüblər. Axtarışdan sonra Anarın evində də oldum. Onun kompüterini, telefonunu aparıblar. Bir də biz hesab edirik ki, pul qoyublar. Anarın evində pulun bağlandığı iplər qalıb".

***

Seçkilərin Monitorinqi və Demokratiyanın Tədrisi Mərkəzinin sədri Anar Məmmədlinin "AbzasMedia işi" çərçivəsində istintaqa şahid qismində cəlb edildiyi bildirilir.

Bunu vəkil Elçin Sadıqov deyib. Amma, hələlik, bu məlumatı rəsmi qurumlar təsdiqləməyiblər.

Son aylar Azərbaycanda aralarında AbzasMedia nəşrinin rəhbərliyi və bir neçə əməkdaşı da daxil 20-yə qədər jurnalist, ictimai fəal qaçaqmalçılıq ittihamı ilə həbs edilib. Onlar ittiham ilə razılaşmır, bunu peşə fəaliyyətləri və siyasi sifarişlə izah edirlər. Amma rəsmilər də bildirir ki, ölkədə heç kim sırf peşə fəaliyyətinə görə siyasi sifarişlə həbs edilmir.

+++

Anar Məmmədlinin saxlanması ilə yanaşı, onun Bakı şəhərində evində axtarış başladığı bildirilir.

Bu barədə onun yaxınları məlumat verib.

Anar Məmmədlinin evində axtarış
Gözlə

No media source currently available

0:00 0:00:16 0:00

+++

Vəkil Anar Məmmədli ilə görüşə bilmir.

Vəkil Elçin Sadıqovun bildirməsinə görə, orderi və vəsiqəsi ilə birlikdə Məmmədlinin evinə yaxınlaşsa da, polis görüşə, habelə axtarış götürmədə iştirakına icazə vermir.

Vəkilin dediklərinə Azərbaycan Daxili İşlər Nazirliyindən, hələlik, münasibət almaq mümkün olmayıb.

DİN təsdiqləyir

Seçkilərin Monitorinqi və Demokratiyanın Tədrisi Mərkəzinin sədri Anar Məmmədlinin saxlanmasını Daxili İşlər Nazirliyi (DİN) Mətbuat xidmətinin əməkdaşı İbrahim Əmiraslanlı da təsdiqləyib. O, "Turan"a bildirib ki, Məmmədli barəsində araşdırma aparılır, əlavə məlumat veriləcək

Anar Məmmədli saxlanıb

Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli saxlanıb.

Bu barədə onun yaxınları məlumat verib.

Onların sözlərinə görə, Məmmədlini aprelin 29-da saat 15 radələrində Bakı şəhəri, Teymur Əliyev küçəsində mülki geyimli şəxslər saxlayaraq naməlum istiqamətə aparıblar.

Xatırlatma

Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədli bundan əvvəl 2013-cü ilin sonlarında saxlanıb. O, vergidən yayınma və başqa ittihamlar ilə 5 il 6 ay müddətə həbs edilib. Amma ittihamları qəbul etməyib. Bir sıra yerli və beynəlxalq təşkilatlar onu siyasi məhbus kimi tanıyıblar.

Məmmədli 2016-cı il martın 17-də əfv sərəncamı ilə azadlığa buraxılıb.

SMDT o azadlığa çıxdıqdan sonra da fəaliyyət göstərib. Azərbaycanda bir çox seçkilərin monitorinqini aparan bu təşkilatın hesabatları, bir qayda olaraq, tənqidi xarakter daşıyıb.

Azərbaycan rəsmiləri isə ölkədə seçkilərin azad və ədalətli keçirilmədiyinə aid tənqidləri qəbul etmir.

Məhkəmə Qubad İbadoğlunun üzərindən elektron qolbağı çıxarmaqdan imtina edib

Qubad İbadoğlu ev dustaqlığına buraxıldıqdan sonra
Qubad İbadoğlu ev dustaqlığına buraxıldıqdan sonra

Mayın 7-də Bakının Nərimanov rayon Məhkəməsində Azərbaycan Demokratiya və Rifah Partiyasının (ADR) sədri Qubad İbadoğlunun üzərindən elektron qolbağın çıxarılması barədə vəsatətə baxılıb.

"Xahiş etdik ki, Qubad İbadoğlunun üzərindən elektron bilərziyi çıxarsınlar. Buna ehtiyac yoxdur. O, Kompüter Tomoqrafiyası (KT) və Maqnetik Rezonans Tomoqrafiya (MRT) müayinəsindən keçməlidir, elektron cihaz isə maneə yaradır. Bundan əlavə, Qubadda şəkərli diabet var və qan dövranının pisləşməsi səbəbindən uzun müddət cihaz taxmaq toxuma nekrozuna səbəb ola bilər",- qardaşı Qalib Bayramov deyib.

Onun sözlərinə görə, məhkəmə vəsatəti təmin etməyib, bu qərardan apellyasiya şikayəti veriləcək.

Məsələ ilə bağlı rəsmi qurumlarla danışmaq mümkün olmayıb.

Qubad İbadoğlunun ayağına elektron qolbaq taxılıb

Mayın 4-də Sumqayıtda polis əməkdaşları məhkəmənin qərarını icra edərək ötən ay ev dustaqlığına buraxılan Azərbaycan Demokratiya və Rifah Partiyasının (ADR) sədri Qubad İbadoğlunun ayağına onun hərəkətlərinə məsafədən nəzarət etməyə imkan verən elektron qolbaq bağlayıblar.

Q.İbadoğlunun qanuni təmsilçiləri deyirlər ki, Azərbaycanda elektron nəzarət hətta məhkəmə qərarı ilə də nisbətən az hallarda tətbiq olunur. Onun qardaşı Qalib Toğrul məsələ ilə bağlı bunları deyib: "Gördüyünüz kimi, qardaşıma xüsusi münasibət göstərilir. Polis Qubadoğlunun istintaq təcridxanasında 9 ay saxlandığı zaman zədələnmiş ayağını bu cür "müalicə" edir".

Bu arada 50-dək beynəlxalq təşkilat, habelə Oksford, Kembric, Ekseter, Susseks, Nottinqem, Lankaster, Nyukasl, Dublin universitetlərin professorları London İqtisadiyyat Məktəbinin baş elmi işçisi, doktor Q.İbadoğlu ilə əlaqədar Böyük Britaniyanın xarici işlər naziri Devid Kemerona məktub göndəriblər. Həmin məktubda nazirdən İbadoğlunun işinə dəstək verilməsi istənilir.

Qubad İbadoğlu: 'Heç bir cinayət törətməmişəm'

Qubad İbadoğlu ona qarşı irəli sürülən ittihamlar üzrə özünü təqsirli bilmədiyini söyləyib. Onun sözlərinə görə, həbsi siyasi sifariş idi: "Mən həmişə fəaliyyətimi qanun və Konstitusiya çərçivəsində göstərmişəm. Heç bir cinayət törətməmişəm".

İbadoğlu bildirib ki, səhhətində problemlər var: "Mən həbs olunanda şəkərli diabet, onurğada, ürək-damar sistemində problem var idi. Həbsdə o problemlər daha da dərinləşdi, çünki qapalı şəraitdə saxlanırdım. Ev dustaqlığına buraxılmağımın səbəbi, yəqin ki, elə də budur".

O, eyni zamanda yerli və beynəlxalq ictimaiyyətin, medianın onun ev dustaqlığına buraxılmasında böyük rolu olduğunu deyib.

Q.İbadoğlunun bu dediklərinə, hələlik, rəsmilərin münasibətini almaq mümkün olmayıb. Amma rəsmilər, bir qayda olaraq, ölkədə siyasi həbslərlə bağlı deyilənləri qəbul etmirlər.

Qubad İbadoğlu ev dustaqlığına buraxılıb

Bundan əvvəl verilən xəbərdə deyilirdi ki, Azərbaycan Demokratiya və Rifah Partiyasının (ADR) sədri Qubad İbadoğlunun həbsi ev dustaqlığı ilə əvəz olunub. İstintaq müddətində o, ev dustaqlığında olacaq.

Bu barədə vəkil Bəhruz Bayramov məlumat verib.

Onun sözlərinə görə, vəsatətə bu gün, aprelin 22-də Nərimanov rayon Məhkəməsində baxılıb.

Vəkil vurğulayıb ki, məhkəmə müdafiə tərəfinin arqumentləri ilə razılaşaraq vəsatəti təmin edib.

Q.İbadoğlu məhkəmədən sonra evinə gedə biləcək.

B.Bayramov AzadlıqRadiosuna açıqlamasında deyib ki, müdafiə tərəfi vəsatətdə Q.İbadoğlunun səhhətinə diqqət çəkib. Vəkillər hesab edir ki, həm ittihamlar əsassızdır, həm də onun səhhəti həbsdə saxlanmasına imkan vermir.

Xatırlatma

Q.İbadoğlu ötən il iyulun 23-də həbs olunub. O, Cinayət Məcəlləsinin (CM) 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma) və həmin maddənin əlavə olaraq 3.1-ci (eyni əməllər mütəşəkkil dəstə tərəfindən törədildikdə) bəndi ilə ittiham olunub. Daha sonra ona qarşı CM-in 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb.

Siyasətçi irəli sürülən bütün ittihamları saxta adlandırıb. Bir sıra beynəlxalq təşkilatlar da Azərbaycan hökumətini Q.İbadoğlunun işinə obyektiv baxmağa, onun hüquqlarının qorunmasına çağırıblar.

ADR dövlət qeydiyyatından keçməyib.

Zaqatalada kütləvi zəhərlənmə...

Ambulans
Ambulans

Dünən, mayın 7-də Zaqatala rayonunda aralarında uşaqlar da olmaqla bir çox şəxslərin səhhətində pisləşmə qeydə alınıb.

"Turan"ın məlumatına görə, yerli xəstəxanaya qısa zaman kəsiyində 40 nəfərə yaxın sakin tibbi yardım üçün müraciət edib.

Mayın 8-də Tibbi Ərazi Bölmələrini İdarəetmə Birliyindən (TƏBİB) də agentliyə deyilib ki, dünən saat 17:40-dan başlayaraq zəhərlənmə şübhəsi ilə 34 nəfər Zaqatala rayon Mərkəzi Xəstəxanasının Təcili yardım şöbəsinə daxil olub: "Onlardan 15-i uşaqdır. Hər birinə zəruri tibbi xidmət göstərilib, 16 nəfər artıq evə buraxılıb. Digərlərinin vəziyyəti stabil olaraq qiymətləndirilir və gün ərzində evə buraxılmaları nəzərdə tutulur".

Azərbaycan Qida Təhlükəsizliyi Agentliyindən isə bildirilib ki, Zaqatalada baş verən hadisənin səbəbləri, həmçinin qida zəhərlənməsi olub-olmaması ilə bağlı araşdırmalar başlanılıb.

Baş Prokurorluğun Mətbuat xidmətindən də verilən məlumata görə, artıq bu məsələ ilə bağlı Zaqatala rayon Prokurorluğunda araşdırma aparılır.

Səhhətləri pisləşən şəxslər və ya onların yaxınları ilə danışmaq mümkün olmayıb.

ToplumTV-nin əməkdaşı Elmir Abbasov polisdə ifadə verib

Elmir Abbasov
Elmir Abbasov

“Toplum” internet televiziyasının əməkdaşı Elmir Abbasovun mayın 7-də Bakı Şəhər Baş Polis İdarəsində "Abzas Media" işi üzrə ifadə verdiyi bildirilir.

Bu barədə onun özü məlumat verib.

Abbasovun sözlərinə görə, ona verilən müəyyən sualları cavablandırıb. O, iltizam sənədinə imza atdığına görə, sualların nə ilə bağlı verildiyini açıqlaya bilməyəcəyini qeyd edib. Dindirmə onun dediyinə görə, təxminən saat yarım çəkib.

O, hər hansı təzyiqlə üzləşmədiyini bildirir.

Məsələ ilə bağlı Daxili İşlər Nazirliyi ilə isə danışmaq mümkün olmayıb.

Elmir Abbasov "Toplum TV işi” üzrə təqsirləndirilən şəxs qismində tanınıb. Onun barəsndə polis nəzarəti qətimkan tədbiri seçilib

Son aylar Azərbaycanda aralarında “Toplum” internet televiziyası, habelə “Abzas Media” nəşrinin əməkdaşları da olmaqla müəyyən qruplar halında 20-yə qədər jurnalist, ictimai fəal qaçaqmalçılıq ittihamı ilə həbs edilib.

Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Amma rəsmilər vurğulayırlar ki, ölkədə heç kim sırf peşə fəaliyyətinə görə, siyasi sifarişlə basqılara məruz qalmır.

Yerli hüquq-müdafiə təşkilatlarının hazırladığı siyahılara görə, hazırda Azərbaycanda ümumilikdə 250-300 arasında siyasi məhbus var. Amma rəsmilər ölkədə siyasi məhbusların olması ilə bağlı fikirləri qəbul etmirlər. Onlar deyirlər ki, həmin siyahılarda yer alan şəxslər sırf törətdikləri əmələ görə, mühakimə ediliblər.

ABŞ səfiri: 'Mən Şuşada olmaqdan xoşbəxtəm'

Səfir Mark Libbi və xanımı Şuşada
Səfir Mark Libbi və xanımı Şuşada

Amerika Birləşmiş Ştatlarının (ABŞ) Azərbaycandakı səfiri Mark Libbi bu gün, mayın 6-da Şuşa şəhərinə səfər edib.

"Mən bu gün Şuşada olmaqdan xoşbəxtəm", - bu barədə Libbi Cıdır düzündən yayımladığı videomüraciətində bildirib.

"Biz iki aya yaxındır ki bu səfərə hazırlaşırdıq və mən şadam ki, bu səfər, nəhayət ki, baş tutdu… Qonaqpərvərliyinizə görə təşəkkür edirəm… Azərbaycanın bütün bölgələrinə səfərlərimi davam etdirməyi səbirsizliklə gözləyirəm", - səfir qeyd edib.

Mayın 3-də ABŞ-ın Azərbaycandakı səfiri Libbiyə jurnalistlərlə keçirilən dəyirmi masada Şuşa şəhəri işğaldan azad olunandan (2020) sonra niyə bir çox səfirlərdən fərqli olaraq oranı ziyarət etməməsi ilə bağlı sual ünvanlanmışdı. Səfir zamanı çatanda Şuşanı ziyarət edəcəyini bildirmişdi. Bununla bağlı hökumətyönlü mediada səfirə qarşı genişmiqyaslı kampaniya başlamışdı...

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olmuşdu. Azərbaycan ərazilərinin təqribən 20 faizinə nəzarəti itirmişdi. Amma 2020-ci ildə 44 günlük müharibə və ötən il Qarabağda birgünlük hərbi əməliyyatlar nəticəsində rəsmi Bakı bütün ölkə ərazisində suverenliyinin bərpa olunduğunu açıqlayıb.

Ötənilki birgünlük hərbi əməliyyatı Bakı "lokal antiterror tədbirləri", Yerevan isə "etnik təmizlənmə" kimi dəyərləndirib. Daha sonra da Qarabağdan Ermənistana əhali köçü başlayıb.

Almatı görüşünün tarixi açıqlanıb

Ceyhun Bayramov və Ararat Mirzoyan
Ceyhun Bayramov və Ararat Mirzoyan

Azərbaycan və Ermənistan xarici işlər nazirlərinin Qazaxıstanın Almatı şəhərində gözlənilən görüşünün tarixi açıqlanıb.

Bu barədə Azərbaycan Xarici İşlər Nazirliyinin (XİN) sözçüsü Ayxan Hacızadə məlumat yayıb.

Onun sözlərinə görə, görüş mayın 10-da Almatıda baş tutacaq.

Amma, hələlik, görüşün dəqiq gündəliyi açıqlanmır.

Bir müddət öncə Azərbaycan və Ermənistan rəsmiləri belə bir görüşün keçirilməsinə razılıq verildiyini bildirmiş, lakin onun tarixinin, hələlik, bəlli olmadığı vurğulanmışdı.

Son illər bu iki ölkə arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazişi imzalanmayıb. Üstəlik, ötən ildən başlayaraq iki ölkə arasında birbaşa danışıqlar da gerçəkləşib. Hazırda iki ölkə arasında sərhədlər müəyyənləşdirilməkdədir.

Xatırlatma

1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycanın Qarabağ bölgəsi, ətraf 7 rayonu işğal edilmişdi. Amma 2020-ci ildə 44 günlük müharibə nəticəsində Bakı həmin 7 rayona, Qarabağın isə bir hissəsinə nəzarətini bərpa edib.

Bakı, üstəlik, ötən il sentyabrın 19-20-də Qarabağda "lokal antiterror tədbirlər" elan edib. Yerevan bunu "etnik təmizlənmə" kimi dəyərləndirib. Daha sonra da Qarabağdan Ermənistana əhali köçü olub.

Davamı

AzadlıqRadiosu Jurnalistika üzrə Təqaüd Proqramı elan edir

AzadlıqRadiosunda iş

Azad Avropa/Azadlıq Radiolarına

İcraçı prodüser

Sosial media reportyoru/prodüseri

Sosial media redaktoru

tələb olunur

AzadlıqRadiosunu Rusiya hökuməti "arzuolunmaz təşkilat" elan edib

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG