"İşgəncə yuvası"
Bəzi müxalif qəzetlər isə həbsxanalarda müəmmalı ölüm hallarından bəhs edirlər. Bu mövzuda olan məqalələrdə qeyd edilir ki, son günlərdə 6 saylı həbsxanada iki məhkum döyülərək öldürülüb. «Azadlıq» qəzeti bu mövzuda «Ölkə həbsxanaları işgəncə yuvasına çevrilir» adlı məqalə də dərc edib.
Həmin məqalədə yazılır ki, hakimiyyət Ağ Evi tənqid edəndə arqument kimi Quantanamo həbsxanasını göstərir. «Azadlıq» qəzeti ölüm hallarının baş verdiyi həbsxananı «Azərbaycan Quantanamo»su adlandırır:
«Ölkə həbsxanalarında baş verənlər göstərir ki, Azərbaycan özü Quantanamoya çevrilib. Ölkə həbsxanalarında acınacaqlı vəziyyətlə bağlı tez-tez ortaya faktlar çıxır və məhbusların öldürülməsinin şahidi oluruq».
Neft yenə düşməyə başladı
Xam neftin qiyməti ötən cüməki sıçrayışdan sonra bazar ertəsi enməyə başlayıb. Səbəb də böyük istehsalçıların hasilatı azaldacağı sarıdan şübhələrdir. Fevralın 15-də Nyu-York birjasında mart fyuçerslərində xam neftin barreli 29.11 dollara düşüb. Londonun «ICE Futures» birjasında isə «Brent»in barrelinin aprel qiyməti 0.40 sent azalaraq 32.96 dollara düşüb.
«The Wall Street Journal»da Jenny Hsu yazır ki, neftin qiymətinin birgünlük sıçrayışının səbəbi bir açıqlama idi. Birləşmiş Ərəb Əmirliklərinin enerji naziri dedi ki, OPEC üzvləri əməkdaşlığa hazırdır.
İran kitab paytaxtını seçir
İranda 2-ci İran Kitab Paytatı Festivalı keçirilir. 100 şəhərin namizəd olduğu festivalda 15 şəhər yarım-finala qalıb.
Festivalın katibi İbrahim Heydəri deyib ki, festivalın əvvəlində 100 şəhər 1400-ə yaxın proqram ilə namizəd olub, bu proqramlar kitab oxumaq mədəniyyətini yaymaq üçün yazılıb. Şəhərlərin seçimində dini-milli dəyərlər, yerli ənənələr, özəl sektordan və xalqdan gələ biləcək maddi dəstək kimi meyarlar əsas götürülüb.
Yarım-finala qalan 15 şəhər bunlardır: İsfahan, Buşəhr, Təbriz, Hurmoc, Dezful, Ramhürmüz, Rəşt, Səbzəvar, Sircan, Rey, Şehrekürd, Şiraz, Kaşan, Nişabur və Yəzd.
İndi "qiymətləndirmə aparılacaq və yalnız 5 şəhər finala qalacaq, aralarından biri İranın mədəniyyət paytaxtı olacaq."
Tibb İdarəsi 1 məhbusun öldüyünü təsdiqləyir
Ədliyyə Nazirliyinin Baş Tibb İdarəsinin rəis müavini İftixar Qurbanov Nurani İbrahimovun ölüm faktını təsdiq edib. İbrahimovun ölümünün səbəblərinə gəlincə, o, bununla bağlı Məhkəmə Tibb Ekspertizasının rəy verəcəyini bildirib .
Penitensiar Xidmət isə bu xəbərə hələ münasibət bildirməyib. Xidmətin İctimaiyyətlə Əlaqələr Mərkəzi AzadlıqRadiosunun sorğusunu cavabsız qoyub.
Tibb idarəsinin rəis müavini İftixar Qurbanov xəbərlərdə adıçəkilən digər məhbus Sahib Abbasovun ölməsi və daha iki məhbusun ağır durumda müalicə müəssisəsinə yerləşdirilməsi barədə deyilənləri isə təsdiq etməyib.