«Beynəlxalq təşkilatlarda Azərbaycanın maliyyələşdirdiyi tərcüməçilər çalışmalıdır»
Milli Məclisin 16 dekabr iclasında millət vəkili Musa Quliyev təklif edib ki, beynəlxalq təşkilatlarda Azərbaycan dilindən istifadə olunsun:
«Nümayəndə heyətimizin öz dilində çıxış etməsinin vaxtı çatıb. Bunun üçün gələn ilin büdcəsindən vəsait ayrılmasını da nəzərdə tutmaq olar. Yetər ki, bütün beynəlxalq təşkilatlarda Azərbaycanın maliyyələşdirdiyi tərcüməçilər çalışsın, Azərbaycan dilində də çıxışlar olsun».
Spiker Oqtay Əsədov deputatın təklifini dəstəklədiyini bildirib: «Yaxşı ideyadır, beynəlxalq təşkilatlarla danışıb həll etmək olar».
Milli Məclisin üzvü Asəf Hacıyev Qara Dəniz İqtisadi Əməkdaşlıq Təşkilatı Parlament Assambleyasının baş katibi seçilib.
#MM «Dünyada insan haqları carçısı özü işgəncələrə yol verir» http://t.co/DjFE4iciZA http://t.co/RYtvNFBrgH
— AzadliqRadiosu (@RadioAzadliq) 16.12.2014
«Dağlıq Qarabağ məsələsində Rusiya öz sözünü deməlidir»
«Türkiyə və Rusiyada aviasiya neftinin qiymətində çox ciddi qiymət düşümləri baş verir» deyən millət vəkili Vahid Əhmədov Azərbaycanda bunun hiss olunmadığını bildirib. Millət vəkili deyib ki, Tarif Şurası bunu nəzərə almalıdır.
V. Əhmədov son zamanlar Rusiya və Azərbaycan arasında əlaqələrin inkişaf etdiyini də vurğulayıb: «Bu, sevindirici haldır. Lakin Dağlıq Qarabağ məsələsində Rusiya öz sözünü deməlidir və Azərbaycana güzəştə getməlidir. Çünki Azərbaycan Rusiyaya çox güzəştə gedir».
Vahid Əhmədov onu da qeyd edib ki, bu gün neftin qiyməti 60 dollara yaxınlaşır, bununla bağlı qonşu Gürcüstanda, Rusiyada, hətta Türkiyədə benzinin qiymətində ciddi enmələr baş verir: «Azərbaycan Aİ-95 markalı premium benzini xaricdən idxal edir. Hesab edirəm ki, İqtisadi İnkişaf Nazirliyi və Tarif Şurası benzinin qiyməti məsələsinə baxmalıdır».
Deputat həmçinin dərman vasitələri ilə bağlı da fikirlərini bildirib. «Ölkəyə dərman gətirilməsi monopoliayadır. Bunu hər kəs bilir. Hnasısa sahibkar istəsə, gedib Türkiyədən və ya başqa yerdən dərman gətirə bilməz. Təklif edilən dərman təchizatı ilə bağlı qanun layihəsi qaranlıq görünür. Dövlət qeydiyyatına alınmış dərman vasitələrinin qiymətlərinin tənzimlənməsi necə olacaq? Bu qanun dərmanların qiymətinə təsir etməyəcək. Əgər biz Rəqabət Məcəlləsini qəbul etsək, dərmanların qiyməti düşəcək. Bu qanun layihəsinin üzərində hələ işləmək lazımdır».