Milli Məclis media qanununu sərtləşdirdi

«Ailə, Qadın və Uşaq problemləri Komitəsinə əlavə səlahiyyət verilməlidir»

Deputat Fazil Mustafa: «Azərbaycanda son vaxtlar məişət zəminində cinayət halları artır. Bəlkə Ailə, Qadın və Uşaq problemləri Komitəsinə əlavə səlahiyyət verilsin ki, onlar münaqişəli ailələrə müdaxilə edə bilsinlər. Həm də sahə müvəkkiləri bu işdə aktiv olsun, araşdırılsın ki, hansı ailədə narkoman, hansında alkoqolik var, önləyici tədbirlər görülsün. Bunu etməsək ailə institunda ciddi problemlər yaşanacaq».

«Dağlıq Qarabağ məsələsində Rusiya öz sözünü deməlidir»

«Türkiyə və Rusiyada aviasiya neftinin qiymətində çox ciddi qiymət düşümləri baş verir» deyən millət vəkili Vahid Əhmədov Azərbaycanda bunun hiss olunmadığını bildirib. Millət vəkili deyib ki, Tarif Şurası bunu nəzərə almalıdır.

V. Əhmədov son zamanlar Rusiya və Azərbaycan arasında əlaqələrin  inkişaf etdiyini də vurğulayıb: «Bu, sevindirici haldır. Lakin Dağlıq Qarabağ məsələsində Rusiya öz sözünü deməlidir və Azərbaycana güzəştə getməlidir. Çünki Azərbaycan Rusiyaya çox güzəştə gedir».

Vahid Əhmədov onu da qeyd edib ki, bu gün neftin qiyməti 60 dollara yaxınlaşır, bununla bağlı qonşu Gürcüstanda, Rusiyada, hətta Türkiyədə benzinin qiymətində ciddi enmələr baş verir: «Azərbaycan Aİ-95 markalı premium benzini xaricdən idxal edir. Hesab edirəm ki, İqtisadi İnkişaf Nazirliyi və Tarif Şurası benzinin qiyməti məsələsinə baxmalıdır».

Deputat həmçinin dərman vasitələri ilə bağlı da fikirlərini bildirib. «Ölkəyə dərman gətirilməsi monopoliayadır. Bunu hər kəs bilir. Hnasısa sahibkar istəsə, gedib Türkiyədən və ya başqa yerdən dərman gətirə bilməz. Təklif edilən dərman təchizatı ilə bağlı qanun layihəsi qaranlıq görünür. Dövlət qeydiyyatına alınmış dərman vasitələrinin qiymətlərinin tənzimlənməsi necə olacaq? Bu qanun dərmanların qiymətinə təsir etməyəcək. Əgər biz Rəqabət Məcəlləsini qəbul etsək, dərmanların qiyməti düşəcək. Bu qanun layihəsinin üzərində hələ işləmək lazımdır».