Keçid linkləri

Təcili xəbərlər
2022, 06 İyul, çərşənbə, Bakı vaxtı 22:28

Azərbaycan xəbərləri

Rauf Mirqədirovun apellyasiya şikayətinə baxılacaq

Rauf Mirqədirov

İyunun 5-də Bakı Apellyasiya Məhkəməsində həbsdə olan jurnalist Rauf Mirqədirovun apellyasiya şikayətinə baxılacaq.

Bu haqda AzadlıqRadiosuna vəkil Fuad Ağayev məlumat verib.

Apelyasiya şikayəti Səbail rayon məhkəməsinin qərarından verilib. Şikayət Rauf Mirqədirova ailə üzvləri ilə görüşə, telefon əlaqəsi yaradılmasına və istədiyi qəzetləri almasına qadağa qoyulması ilə bağlıdır.

Məhkəmədə Rauf Mirqədirov da iştirak edəcək. Məhkəmə prosesi qapalı keçiriləcək.

Bütün xəbərləri izləyin

İctimai birliyinin sədri mühakimə olunur

İyulun 6-da Yasamal rayon məhkəməsində "Bakı Birlik Təşkilatı" ictimai birliyinin sədri, KİM.TV YouTube kanalının aparıcısı Abid Qafarova qarşı xüsusi ittihamı qaydasında şikayətə baxılmasına başlanıb

İyulun 6-da Yasamal rayon məhkəməsində "Bakı Birlik Təşkilatı" ictimai birliyinin sədri, KİM.TV YouTube kanalının aparıcısı Abid Qafarova qarşı xüsusi ittihamı qaydasında şikayətə baxılmasına başlanıb.

Ona qarşı İkinci Qarabağ Müharibəsi veteranlarından ibarət qrup iddia qaldırıb. Onlar böhtan və təhqirlə üzləşdiklərini bildirirlər. Qafarovun verdiyi məlumata görə, əvvəlcə şikayətçilərin sayı 7 nəfər olub, sonradan onlardan dördü şikayətini geri çəkib.

Müdafiə tərəfinə görə, Qafarov internetdəki çıxışında veteranları təhqir etməyib, sadəcə ad çəkmədən öz hüquqları uğurunda mübarizə aparmadıqlarına görə, onları qınayıb.

İyulun 6-da keçirilən prosesdə linqvistik ekspertizanın təyin edilməsi barədə qərar qəbul edilib. Bununla əlaqədar məhkəmə qeyri-müəyyən müddətə təxirə salınıb.

Abid Qafarov çıxışlarında müharibə veteranlarına qarşı böhtan (cinayət məcəlləsinin 147-ci maddəsi) və təhqirdə (148-ci maddədə) günahlandırılır.

Qafarov "Tərtər işi"ndə işgəncə və zorlama kimi halların olması iddiası ilə bağlı çıxışları ilə tanınır.

2017-ci ildə açılan və ötən il yenilənən həmin cinayət işində bir çox hərbi qulluqçular dövlətə xəyanətdə günahlandırılıblar. Sonradan həmin işdə təqsirilndirilən bir çox hərbi qulluqçuların işgəncəyə məruz qalmasını Baş prokurorluqdan da bildiriblər.

Buna görə, əlavə həbs edilənlərin də olduğu açıqlanıb. Hazırda yenilənən istintaqın davam etdiyi və zərərçəkənlərin sayının artdığı deyilir.

Amma həmin zaman həlak olan və sonradan bəraət alan ( bəraət almayanlar da var) bəzi hərbi qulluqçuların yaxınları iddia edirlər ki, işgəncələrdə əsas məsuliyyət daşıyanlar cəzadan kənarda qalıb.

Ceyhun Bayramov İbrahim Rəisi ilə görüşüb

Ceyhun Bayramov

Bugün, iyulun 4-də İrana səfəri çərçivəsində Azərbaycan xarici işlər naziri Ceyhun Bayramov bu ölkənin prezidenti Seyid İbrahim Rəisi ilə görüşüb.

Bu barədə Azərbaycan Xarici İşlər Nazirliyi məlumat yayıb.

Məlumata görə, nazir Ceyhun Bayramov iki ölkə arasında energetika, nəqliyyat, kommunikasiya sahələrində həyata keçirilən birgə layihələrdən söz açıb.

Bildirildiyinə görə, bu xüsusda Şərqi Zəngəzur iqtisadi rayonu (Azərbaycanın Zəngilan, Qubadlı, Cəbrayıl, Laçın və Kəlbəcər rayonları daxildir) ilə Naxçıvan Muxtar Respublikası (Azərbaycanla onun bir hissəsi olan Naxçıvan arasında quru sərhədi yoxdur) arasında yeni kommunikasiya bağlantılarının yaradılmasının əhəmiyyəti vurğulanıb.

Bugün, iyulun 4-də Azərbaycan xarici işlər naziri Ceyhun Bayramov İran İslam Respublikasına səfər edib. O,bu səfər çərçivəsində daha əvvəl İranın Xarici İşlər naziri ilə görümüşdü.

***

Bugün, iyulun 4-də Azərbaycan Xarici İşlər naziri Ceyhun Bayramov İran İslam Respublikasına səfər edib.

Bu barədə Xarici İşlər Nazirliyinin (XİN) Mətbuat xidməti Twitter-də məlumat yayıb.

Səfər çərçivəsində C.Bayramovun İran rəsmiləri ilə görüşlərinin keçirilməsi nəzərdə tutulub.

Şarl Mişel İlham Əliyevə zəng vurub

İ.Əliyev və Ş.Mişel

Bu gün, iyulun 4-də Avropa İttifaqı Şurasının Prezidenti Şarl Mişel Azərbaycan Prezidenti İlham Əliyevə zəng edib.

Bu barədə Azərbaycan Prezidentinin mətbuat xidməti məlumat yayıb.

Açıqlamaya görə, Ş.Mişel Cənubi Qafqazda sabitlik, sülh və təhlükəsizliyin təmin olunmasının Avropa İttifaqı üçün vacibliyini vurğulayıb. O, Avropa İttifaqının Ermənistanla Azərbaycan arasında münasibətlərin normallaşdırılması, sülh müqaviləsinin imzalanması, sərhədlərin delimitasiyası və nəqliyyat-kommunikasiya xətlərinin açılması istiqamətində səylərini davam etdirəcəyini bildirib.

Bildirildiyinə görə, İ.Əliyev də danışıqların real nəticələrə gətirib çıxaracağına ümidvar olduğunu ifadə edib.

Avropa Birliyi Qarabağ üçün nələr edə bilər?
Gözlə

No media source currently available

0:00 0:03:43 0:00

Ötən ilin dekabrından bəri Avropa İttifaqı Şurasının Prezidenti Ş.Mişelin təşəbbüs və iştirakı ilə Azərbaycanla Ermənistan liderlərinin üç görüşü keçirilib. Sonuncu görüş mayın 22-də olub. Ardınca mayın 23-də hər iki lider dövlət sərhədlərinin delimitasiyası üzrə dövlət komissiyasının yaradılması haqqında sərəncam imzalayıb.

Bundan əvvəl iki ölkə arasında aparılan danışıqlarda, əsasən, Rusiya, ikinci Qarabağ müharibəsindən öncə isə ATƏT-in Minsk qrupu vasitəçilik edib. (ABŞ, Rusiya və Fransa qurumda həmsədrlərdir)

Xatırlatma

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr ( 9 noyabr) razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Büdcəyə dəyişikliklər təsdiqləndi

İlham Əliyev

Prezident İlham Əliyev "Azərbaycan Respublikasının 2022-ci il dövlət büdcəsi haqqında" Qanuna dəyişiklik edilməsi barədə qanunu təsdiqləyib.

Dəyişikliklə 2022-ci il dövlət büdcəsinin gəlirləri 29 milyard 197 milyon 800 min manat, xərcləri isə 32 milyard 303 min 800 min manat təsdiq edilib.

Bu ilin büdcəsinə ölkə parlamenti ötən həftə dəyişiklik etmişdi. Onda gəlirlər 26 milyard 816 milyon, xərclər 29 milyard 879 milyon manat idi.

Yeni sənəddə neftin bir bareli də 45 dollardan 85 dollara qaldırılıb.

'Ədalətli, şəffaf, açıq məhkəmə' şüarı ilə aksiya olub

Məhkəmə-Hüquq Şurasının binası qarşısında aksiya

Bu gün, iyulun 1-də "Müdafiə Xətti" hüquq müdafiə təşkilatının təşkilatçılığı ilə Bakıda Məhkəmə-Hüquq Şurasının binası qarşısında "açıq və ədalətlə məhkəmə" tələbi ilə aksiya keçirilib.

Hüquq müdafiəçilərinə bəzi jurnalistlər, siyasi partiyaların fəalları və ayrı-ayrı məhbus yaxınları da qoşulub.

Aksiya iştirakçıları bildirib ki, son zamanlar jurnalistlərin, hüquq müdafiəçilərinin məhkəmə proseslərinə buraxılması bir qədər də çətinləşib. Xüsusilə də apelyasiya məhkəmələri və Ağır Cinayətlərə Dair İşlər üzrə Məhkəmədən şikayətlər dilə gətirilib. Hüquq müdafiəçiləri vurğulayıblar ki, artıq rayon məhkəmələri də məhdudiyyətləri artırmaqdadır.

Aksiya iştirakçıları deyiblər ki, Azərbaycanda ədalət, qanun qarşısında bərabərlik yoxdur, hakimiyyət qolları arasındakı balans pozulub, məhkəmə və qanunverici hakimiyyət ali icra hakimiyyətinin əlavəsinə çevrilib.

Aksiyada "Məhkəməyə jurnalistlər buraxılsın" yazılmış plakat qaldırılıb. "Hakimlər Konstitusiyasını qoyurlar kənara və Prezident Administrasiyasından gələn tapşırığı yerinə yetirirlər", - deyə habelə vurğulanıb.

Aksiya iştirakçılarının sözlərinə görə, açıq məhkəmə proseslərinə jurnalistlərin buraxılmaması Avropa Konvensiyasına ziddir və Məhkəmə-Hüquq Şurası bu məsələdə birbaşa məsuliyyət daşıyır. Onlar "Ədalətli, şəffaf, açıq məhkəmə" şüarı səsləndiriblər.

Məhkəmə-Hüquq Şurasının binası qarşısında aksiya
Məhkəmə-Hüquq Şurasının binası qarşısında aksiya

Aksiyanın sonunda bəyanat oxunub.

Piket insidentsiz başa çatıb. Orada səslənən fikirlərə, hələlik, Məhkəmə-Hüquq Şurasından münasibət almaq mümkün olmayıb.

Rəsmilər son illər, bir qayda olaraq, deyirlər ki, ölkədə məhkəmə-hüquq sahəsində islahatlar aparılır.

Keçmiş icra başçısına 13 il həbs istəndi

Bentley, Range Rover və pullar- İcra başçısı əməliyyatla həbs edildi
Gözlə

No media source currently available

0:00 0:02:23 0:00

Prokuror İmişlinin keçmiş icra başçısı Vilyam Hacıyevə 13 il həbs cəzası istəyib. O bu təklifini iyulun 1-də keçirilən məhkəmədə dilə gətirib.

Prokurorun fikrincə, sabiq icra başçısına verilən külli miqdarda yeyinti, rüşvətalma, vəzifə səlahiyyətlərindən sui-istifadə ittihamları məhkəmədə sübuta yetirilib.

Dövlət ittihamçısı Vilyam Hacıyevə məxsus, ancaq üzərində həbs olan 6 milyon manatdan çox pul və əmlaklarının da müsadirə olunaraq yeyintilərdən dəymiş ziyanın ödənilməsinə yönəldilməsini istəyib.

Məhkəmə istintaqının yekunlaşmasına etiraz edən Vilyam Hacıyev və vəkili yetərincə araşdırma aparılmadığını bildiriblər. Ekspert rəyləri obyektlərə, binalara baxış keçirilmədən, yalnız Maliyyə Nazirliyinin tərtib etdiyi yoxlama aktları əsasında verilib. Onlar təkrar ekspertiza keçirilməsini istəsələr də, məhkəmə bu məsələyə "yox" deyib.

Məhkəmə iyulun 8-də vəkilin çıxışı, sabiq icra başçısının son sözü ilə yekunlaşacaq.

Vilyam Hacıyev 2004-2006-cı illərdə Göygölün, 2006-2012-ci illərdə Samuxun, 2012-2020-ci illərdə isə İmişlinin icra başçısı vəzifəsində çalışıb. O, 2020-ci ilin mayında bu vəzifədə çalışarkən DTX əməkdaşlarının keçirdiyi əməliyyatda həbs edilib.

Vilyam Hacıyev özünü təqsirli bilmir, ittihamların şər-böhtan olduğunu, sifarişlə həbs edildiyini bildirir.

Sərhəddə axtarışda olan 216 nəfər aşkarlanıb

Sərhəd

Bu ilin iyununda dövlət sərhədini pоzmaqda günahlandırılan 38 nəfər saxlanıb.

Bu barədə Azərbaycan Dövlət Sərhəd Xidməti məlumat yayıb.

Açıqlamaya görə, onlardan 18 nəfəri Azərbaycan, 5-i İran, 2-si Hindistan, 1-i Özbəkistan, 6-sı Mərakeş, 2-si Pakistan, 1-i Qazaxıstan və 3-ü Əfqanıstan vətəndaşları olub.

Habelə bildirilir ki, hesabat dövründə Azərbaycan hüquq-mühafizə orqanlarının axtarışında olan 216 nəfər aşkarlanaraq aidiyyəti orqanlara təhvil verilib.

Azərbaycan 'Azadlıq' qəzetinə görə təzminat ödəyəcək

Qənimət Zahid

Avropa İnsan Haqları Məhkəməsi (AİHM) iyunun 30-da "Azadlıq" qəzeti və "Qənimət Zayidov Azərbaycana qarşı" iş üzrə qərarını elan edib.

Hüquqşünas Xalid Ağalıyevin məlumatına görə, AİHM ərizəçilərin ifadə azadlığı hüququna müdaxilə olunduğuna qərar verib: "Pozuntunun tanınmasının ərizəçiyə dəymiş mənəvi zərəri kompensasiya etdiyi qənaətinə gələn məhkəmənin qərarına görə, hökumət hüquqi məsrəflər ilə bağlı ərizəçilərin vəkilinə 1 min 500 avro ödəyəcək".

Bu işdə ərizəçilər "Azadlıq" qəzeti və həmin qəzetin redaktoru Qənimət Zayidov (Zahid) idi.

Hüquqşünas bildirir ki, şikayət "Prezident köməkçisinin korrupsiya aparatı" sərlövhəli məqaləyə görə ərizəçilərə qarşı qaldırılmış mülki məhkəmə iddiaları ilə bağlı idi. Sözügedən məqalədə Azərbaycanın keçmiş prezidentinin keçmiş köməkçilərindən Tariyel Ağayevdən, onun qohumlarından bəhs edilir.

T.Ağayev məqalədəki məlumatların yalan olduğunu, onun nüfuzunu zədələdiyini bildirərək qəzeti və qəzetin baş redaktorunu məhkəməyə vermişdi. Yerli məhkəmələr cavabdehlərin yayılmış məlumatların doğruluğunu sübut edə bilməməsi əsası ilə iddiaçının xeyrinə qərar vermişdi – dəymiş mənəvi ziyana görə qəzet 40 min, qəzetin baş redaktoru isə 25 min manat cərimələnmişdi. Yuxarı məhkəmələr ərizəçilərin həmin qərardan şikayətlərini rədd etmişdi.

Qərara qarşı tərəfin və Azərbaycan Məhkəmə-Hüquq Şurasının münasibətini almaq mümkün olmayıb.

Xatırlatma

Qənimət Zahid hazırda mühacirətdədir. O, 2007-ci ildə həbs edilib. Xuliqanlıq ittihamı ilə 4 il müddətinə azadlıqdan məhrum edilən redaktor 2010-cu ildə əfv sərəncamı ilə azadlığa çıxmışdı.

"Azadlıq" qəzetinin isə nəşri dayanıb. Üstəlik, qəzetin saytına da girişə Azərbaycandan məhdudiyyət qoyulub. Bu qərar saytın həqiqətdən uzaq məlumatlar yayması ilə izah edilib. Qəzetin rəhbərliyi isə bunu qəbul etməyərək verilən qərarı siyasi basqı kimi dəyərləndirib.

Azərbaycan əsgəri vəfat edib

Əsgər

Dünən, iyunun 29-da Əlahiddə Ümumqoşun Ordusunda xidmət edən əsgər Fazil Məmmədli vəfat edib.

Bu barədə məlumatı Baş Prokurorluğun Mətbuat xidmətindən də təsdiq ediblər.

"Əsgər Məmmədli Fazil Məzahir oğlunun xüsusi texnika ilə ehtiyatsız davranılması nəticəsində aldığı xəsarətlərdən ölməsi faktı ilə bağlı Cinayət Məcəlləsinin müvafiq maddəsi ilə cinayət işi başlanmaqla hazırda Hərbi Prokurorluqda istintaq aparılır", - deyə bildirilib.

Rəsmi açıqlamaya, hələlik, əsgərin yaxınlarından münasibət almaq mümkün olmayıb.

Əliyev Aşqabadda Putinlə görüşüb

Xəzəryanı dövlətlərin dövlət başçılarının VI zirvə toplantısı. 29 iyun 2022

İyunun 29-da Aşqabadda Azərbaycan Prezidenti İlham Əliyevin Rusiya Prezidenti Vladimir Putin ilə görüşü olub.

AZƏRTAC-ın xəbərinə görə, görüş Xəzər Sammiti çərçivəsində gerçəkləşib.

Əlaqələrin genişləndiyini və hazırkı səviyyəsinin çox yaxşı olduğunu deyən Rusiya prezidenti razılaşdırılan bütün məsələlərin icra edildiyini vurğulayıb. Deyib ki, ticarət dövriyyəsi artır. Bu artım keçən il 16 faizdən çox, bu ilin üç ayının nəticələrinə görə 5.5 faiz təşkil edib.

V.Putinin sözlərinə görə, regional təhlükəsizlik, o cümlədən Qarabağ məsələsinin nizamlanması barədə də Azərbaycan dövlətinin başçısı ilə müzakirə aparılıb.

Azərbaycan prezidenti də iki ölkə arasında ticarət dövriyyəsinin artmasından, eyni zamanda, sənaye kooperasiyası, nəqliyyat və energetika sahələrində əməkdaşlığın genişlənməsindən məmnunluğunu ifadə edib. İ.Əliyev bu görüşün regional məsələlərin müzakirəsi üçün də yaxşı imkanlar yaratdığını deyib.

Azərbaycan Prezidenti İ.Əliyev Xəzəryanı dövlətlərin dövlət başçılarının VI zirvə toplantısında iştirak etmək üçün iyunun 29-da Türkmənistana səfər etmişdi. Onun səfəri artıq başa çatıb.

Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. 2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr (9 noyabr) razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.

Azərbaycan və İran prezidentlərinin Aşqabad görüşü
Azərbaycan və İran prezidentlərinin Aşqabad görüşü

İran prezidenti Azərbaycana gələcək

Azərbaycan prezidentinin İrana, İran prezidentinin isə Azərbaycana səfər etmək planları var.

AZƏRTAC-ın xəbərinə görə, bunu iyunun 29-da Aşqabadda Azərbaycan Prezidenti İlham Əliyevlə görüşən İran İslam Respublikasının Prezidenti Seyid İbrahim Rəisi deyib. "İki ölkə arasında münasibətlərin potensialı hazırda mövcud olandan daha çoxdur. Hesab edirəm ki, biz münasibətlərimizdə olan bir çox potensialdan tam istifadə edə bilməmişik. Düşünürəm ki, iki ölkə arasındakı siyasi, iqtisadi münasibətlər, ticarət, mədəniyyət əlaqələri mövcud olan vəziyyətdən daha da inkişaf etdirilə bilər", - o vurğulayıb.

Azərbaycan prezidenti də deyib ki, bir sıra məsələlərlə bağlı çox yaxşı irəliləyiş var: "Xüsusilə nəqliyyat, energetika və digər sahələrdə".

Azərbaycan Prezidenti İlham Əliyev Xəzəryanı dövlətlərin dövlət başçılarının VI zirvə toplantısında iştirak etmək üçün iyunun 29-da Türkmənistana səfər edib. Həmin səfər çərçivəsində o, bir sıra görüşlər də keçirib.

Xəzərin suyu geri qayıdacaqmı? EKSPLEYNER
Gözlə

No media source currently available

0:00 0:03:22 0:00

update

Azərbaycan-Türkiyə-Qazaxıstan nazirlərinin görüşü keçirilib

Görüş

İyunun 27-də Azərbaycan-Türkiyə-Qazaxıstan xarici işlər və nəqliyyat nazirlərinin ilk üçtərəfli görüşü keçirilib.

AZƏRTAC-ın xəbərinə görə, tədbiri giriş sözü ilə açan Azərbaycanın Xarici İşlər naziri Ceyhun Bayramov üçtərəfli görüşün əhəmiyyətindən danışıb. C.Bayramov bu görüşün üç ölkəni maraqlandıran məsələlərdə mövcud koordinasiyanı və qarşılıqlı fayda əsasında regional əlaqəni gücləndirmək məqsədi daşıdığını qeyd edib.

Sonra üçtərəfli görüşün gündəliyi təqdim olunub.

Növbəti üçtərəfli görüş Qazaxıstanda olacaq

Azərbaycan, Türkiyə və Qazaxıstan nazirlərinin üçtərəfli görüşü Bakı Bəyannaməsinin imzalanması ilə başa çatıb.

Müzakirələrin əsas mövzusu üçtərəfli və regional əməkdaşlığın genişləndirilməsi, Xəzər dənizi vasitəsilə Şərq-Qərb orta dəhlizinin potensialının inkişaf etdirilməsi olub.

Növbəti üçtərəfli görüş Qazaxıstanda keçiriləcək.

Bundan öncə nəqliyyat qurumları üçtərəfli işçi qrup formalaşdıracaqlar.

İctimai fəala 30 sutka verilib

Elçin İbrahimli

Klassik Xalq Cəbhəsi Partiyası (KXCP) Ali Məclisin üzvü, ictimai fəal Elçin İbrahimlinin saxlanıb 30 sutka inzibati qaydada həbs edildiyi bildirilir.

Bu barədə AzadlıqRadiosuna partiyanın rayon təşkilatın sədri Faiq Cəfərzadə məlumat verib. Onun sözlərinə görə, ötən həftə, iyunun 23-də gecə saatlarında polislər gəlib Elçin İbrahimlini evindən aparıblar: "İyunun 24-də səhər məhkəmə olub. Onu 30 sutka həbs ediblər. Elçin İbrahimli sosial şəbəkələrdə aktiv idi. Onu siyasi və ictimai fəaliyyətinə görə həbs ediblər. Hazırda rayon polis təcridxanasında yatır. O, şəkər xəstəsidir".

DİN-in açıqlaması...

Bu məsələ ilə bağlı Daxili İşlər Nazirliyinin (DİN) Mətbuat xidmətinin Lənkəran regional qrupundan isə bunları bildirdilər: "Elçin İbrahimli ilə bağlı polis şöbəsinə vətəndaşların müraciətləri olub. Elçin İbrahimli dəfələrlə polis şöbəsinə dəvət olunsa da, gəlməyib. Polisin tələblərinə tabe olmadığına görə barəsində toplanmış materiallar rayon məhkəməsinə göndərilib".

Nazirlikdən bildirildiyinə görə, o, İnzibati Xətalar Məcəlləsinin (İXM) 535-ci (polis işçisinin və ya hərbi qulluqçunun qanuni tələbinə qəsdən tabe olmama) maddəsi ilə günahlandırılıb.

Dövlət Departamentinin sözçüsü Əli Əliyev barədə suala cavab verib 

Əli Əliyev

İynun 23-də VİP-in sədri Əli Əliyevin həbs müddəti daha 6 ay uzadılıb

“Biz Azərbaycan Konstitusiyası ilə təmin edilən əsas azadlıqlardan istifadə etmək hüququnu, habelə hökumətin beynəlxalq öhdəliklərini tam dəstəkləyirik”

“Turan” İnformasiya Agentliyinin xəbərinə görə, bunu Amerika Birləşmiş Ştatları Dövlət Departamentinin sözçüsü iyunun 24-də sorğuya cavab olaraq bildirib.

Agentliyin müxbiri ondan Vətəndaş və İnkişaf Partiyasının (VİP) sədri Əli Əliyevlə bağlı son hökmə münasibət bildirməsini xahiş edib.

Dövlət Departamentinin sözçüsü deyib:

“Biz hakimiyyəti siyasi partiyaların, müstəqil medianın, qeyri hökumət təşkilatlarının, dini qurumların və vəkillərin sərbəst fəaliyyət göstərməsinə imkan verməklə insan hüquqlarının həyata keçirilməsi üçün əlverişli mühit yaratmağa çağırırıq”.

İynun 23-də VİP-in sədri Əli Əliyevin həbs müddəti daha 6 ay uzadılıb. Yasamal rayon Məhkəməsində hakim Yeni Azərbaycan Partiyasının (YAP) Binəqədi rayon təşkilatının sabiq sədri Ramiz Göyüşovun iddiası əsasında onun haqqında yeni hökm çıxarılıb.

Hökmə əsasən, partiya sədri cinayət məcəlləsinin 148-ci (təhqir) maddəsi ilə təqsirli bilinib və ona 6 ay azadlıqdan məhrumetmə cəzası təyin edilib. Bu da ona kəsilmiş 6 aylıq əvvəlki cəza ilə birləşdirilib. Beləliklə, Əliyevin üzərində qəti olaraq 1 il azadlıqdan məhrumetmə cəzası saxlanılıb. Bu cəzanın əvvəli isə VİP sədrinin həbs olunduğu gündən – 13 yanvar 2022-ci ildən hesablanır.

Xatırlatma

Əli Əliyev yanvarın 13-də Dövlət Sərhəd Xidmətinin (DSX) polkovniki Emil Cəfərovun xüsusi ittiham qaydasında qaldırdığı iddia əsasında Yasamal rayon Məhkəməsinin hökmü ilə 5 ay azadlıqdan məhrum edilmişdi. O, DSX polkovnikinə böhtan atmaqda suçlanıb.

Cəfərov noyabrın 30-da qəzaya uğramış helikopterdən sağ çıxdığı deyilən iki hərbçidən biridir. Apreldə ikinci hərbçi Ramin Cəbrayılovun da eyni məzmunlu iddiası əsasında partiya sədrinin cəzası artırılıb və 6 ay olmuşdu.

Lakin Əliyev özünü təqsirli bilmir, həbsini siyasi sifariş və ona qarşı təzyiqlərin davamı hesab edir. O, məhkəmədə bildirib ki, susmayacağı halda, həbs olunacağı barədə əvvəlcədən xəbərdar edilmişdi.

Qeyd edilən həmin helikopter qəzasında 14 şəxs həlak olmuşdu.

23 nəfər xəstəxanalara yerləşdirilib

Ələt-Astara-İran dövlət sərhədi avtomobil yolunun Masallı rayonunun Əhmədli kəndindən keçən hissəsində  bir neçə avtomobilin toqquşması nəticəsində ağır yol qəzası baş verib

İyunun 23-də axşam saatlarında Ələt-Astara-İran İslam Respublikası dövlət sərhədi avtomobil yolunun Masallı rayonunun Əhmədli kəndindən keçən hissəsində bir neçə avtomobilin toqquşması nəticəsində ağır yol qəzası baş verib.

Tibbi Ərazi Bölmələrini İdarəetmə Birliyindən (TƏBİB) “Turan”a verilən məlumata görə, qeydə alınan hadisə nəticəsində yaralanan 23 nəfər müxtəlif növ bədən xəsarətləri ilə onların tabeliyindəki tibb müəssisələrinə yerləşdirilib.

Bildirildiyinə görə, yaralananlardan 17-si (2-i uşaq) Masallı Rayon Mərkəzi Xəstəxanasına yerləşdirilib, onlardan beşinin vəziyyəti ağır, digərlərinin vəziyyəti orta-ağırdır.

Cəlilabad Rayon Mərkəzi Xəstəxanasına yerləşdirilən qalan 6 nəfərdən ikisinin isə vəziyyətinin ağır, digərlərinin vəziyyətlərinin də orta-ağır qiymətləndirildiyi deyilir.

Rəsmi açıqlamaya görə, hazırda yaralılara zəruri tibbi yardım göstərilir.

Qəzanın səbəbi, hələlik, açıqlanmayıb. Yaralananlar və onların yaxınları ilə danışmaq mümkün olmayıb.

Taleh Bağırovun aclığı dayandırdığı deyilir

Taleh Bağırov

Müsəlman Birliyi Hərəkatının (MBH) həbsdə aclıq aksiyası keçirdiyi deyilən sədri Taleh Bağırovun onu dayandırdığı bildirilir.

Bu barədə MBH-dən məlumat verilib. Açıqlamaya görə, T.Bağırov bu gün, iyunun 23-də yaxınlarına zəng vuraraq bu barədə bildirib.

"Aclıq aksiyasının dayandırılmasının səbəbi kimi çoxsaylı çağırışlar, həbsxanalarda onun aksiyasına qoşulan şəxslərin səhhətlərində yaranan problemlər və onların ailələrinin narahatçılığı göstərilib", - MHB-dən qeyd ediblər.

Bu məlumatı, hələlik, rəsmi qurumlardan dəqiqləşdirmək mümkün olmayıb.

Vəkil Taleh Bağırovla görüşüb

Vəkil Fəxrəddin Mehdiyev bu gün, iyunun 20-də Müsəlman Birliyi Hərəkatının həbsdə olan sədri Taleh Bağırovla görüşüb. Vəkilin sözlərinə görə, T.Bağırov aclıq aksiyasını davam edir: "Davam etməkdə də israrlıdır".

F.Mehdiyev qeyd edib ki, T.Bağırovun səhhətində problem var: "Aclığın 18-ci günüdür və artıq onun nəticəsi özünü göstərir. Taleh Bağırov arıqlayıb, sifəti ağarıb, səsi zəifləyib. Həmçinin, qızdırması düşmür".

Vəkil bildirib ki, T.Bağırov həkim nəzarəti altındadır.

Amma bu deyilənləri, hələlik, Penitensiar Xidmətdən dəqiqləşdirmək mümkün olmayıb.

Taleh Bağırova dəstək aksiyası
Taleh Bağırova dəstək aksiyası

Taleh Bağırova dəstək aksiyası olub

İyunun 17-də Ədliyyə Nazirliyinin qarşısında Müsəlman Birliyi Hərəkatının həbsdə aclıq aksiyası keçirdiyi bildirilən sədri Taleh Bağırova təkadamlıq dəstək aksiyası keçirilib.

Fariz Əliyev kimi özünü təqdim edən bir şəxs əlində plakat tutaraq "Fikrət Məmmədov (ədliyyə naziri) çıx, cavab ver. İnsanın həyatı ilə oynamayın" şüarı səsləndirib.

O bildirib ki, T.Bağırov artıq 14 gündür aclıq edir. "Ədliyyə Nazirliyi susqundur. Mən Fikrət Məmmədova etiraz edirəm. Bu mənim konstitusion hüququmdur", - o vurğulayıb.

F.Əliyev özü də artıq iki gündür aclıq aksiyası keçirdiyini qeyd edib.

Ədliyyə Nazirliyinin əməkdaşları onu qəbul şöbəsinə dəvət etsələr də, o bundan imtina edib.

F.Əliyevi aksiya yerindən uzaqlaşmaq istəyərkən polis əməkdaşları saxlayıb. Sonradan onun sərbəst buraxıldığı açıqlanıb.

Taleh Bağırovun aclıq aksiyasını davam etdirdiyi bildirilir

İyunun 13-də Müsəlman Birliyi Hərəkatının həbsdə 10 gündür aclıq aksiyası keçirdiyi bildirilən rəhbəri Taleh Bağırov ailəsinə zəng vurub.

Bu barədə onun həyat yoldaşı Leyla Bağırova keçirdikləri mətbuat konfransında məlumat verib. Onun vurğulamasına görə, dünən, iyunun 12-də həyat yoldaşı ilə görüşmək istəyib: "Buna icazə verilmədi. Bu gün, iyunun 13-də zəng vurdu, bildirdi ki, iki gündür qızdırması var, gözləri qaralır. Həkim deyib ki, bu, təhlükəli haldır…".

Hüquq müdafiəçisi Rüfət Səfərov isə İnsan Hüquqları üzrə Müvəkkilə-Ombudsmana müraciət edib ki, məsələni nəzarətə götürsünlər: "Heç olmasa, sabah Qobustan Qapalı Həbsxanasına getsinlər, vəziyyətlə maraqlansınlar".

Mətbuat konfransında vurğulanıb ki, T.Bağırovun aksiyasına həbsxanada başqa qoşulanlar da var.

Bu deyilənlərə, hələlik, Ombudsman Aparatı və rəsmi qurumlardan münasibət almaq mümkün olmayıb.

Taleh Bağırovun aclıq aksiyası keçirdiyi bildirilir

Müsəlman Birliyi Hərəkatının sədri Taleh Bağırovun iyunun 3-dən aclıq aksiyasına başladığı deyilir. Onun həyat yoldaşı Leyla İsmayılzadənin verdiyi məlumata görə, əri iyunun 3-də aclıq aksiyasına başlaması ilə bağlı Qobustan Qapalı Həbsxanasının rəhbərliyini rəsmi qaydada məlumatlandırıb.

L.İsmayılzadə iyunun 5-də həyat yoldaşı ilə telefonla danışıb: "O, səhhətində hələ problem olmadığını bildirdi".

Verilən məlumatlara görə, T.Bağırovun aclıq aksiyası inanclı insanların son günlər saxlanması zamanı işgəncə və təhqirlərlə üzləşməsi şikayətləri ilə bağlıdır. Amma bu deyilənləri, hələlik, Penitensiar Xidmətlə dəqiqləşdirmək mümkün olmayıb.

Daxili İşlər Nazirliyi isə son günlər Müsəlman Birliyi Hərəkatının saxlanıb sərbəst buraxılan üzvlərinin işgəncə və təhqirlərlə üzləşməsi ilə bağlı şikayətlərini təkzib edib.

Mayın 20-də Bakı Ağır Cinayətlər Məhkəməsində Müsəlman Birliyi Hərəkatının üzvü Razi Abbasov barəsində hökm oxunub. O, narkotik maddə saxlamaqda ittiham edilərək 6 il azadlıqdan məhrum edilib. Bu zaman polis prosesi izləmək üçün gələn, məhkəmənin qarşısında toplaşan şəxsləri oradan uzaqlaşdırıb. Beş nəfər saxlanılıb, Müsəlman Birliyi Hərəkatının üç üzvü - İmran Məmmədli, Elgiz Məmmədov Ağəli Yəhyayev polisə müqavimət ittihamı ilə təqsirləndirilərək 1 aylıq inzibati həbsə məhkum edilib, digər iki fəal saxlanıldıqdan bir neçə saat sonra sərbəst buraxılıb.

Onlardan biri - Mail Kərimov deyib ki, onu məhkəmənin qarşısında saxlayıb əvvəlcə 22-ci polis bölməsinə, sonra isə Baş Mütəşəkkil Cinayətkarlıqla Mübarizə İdarəsinə aparıblar. Kərimov həm yolda, həm də idarədə işgəncələrə məruz qaldığını bildirib. Hərəkatın digər fəalı Süleyman Ələkbərov da buna bənzər bəyanat verib. Daxili İşlər Nazirliyi isə öz növbəsində bu bəyanatları əsassız və yalan adlandırıb.

Xatırlatma

Taleh Bağırov 2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyatda həbs olunub. İkisi polis olmaqla, altı nəfərin həlak olduğu həmin əməliyyat nəticəsində ilahiyyatçı ilə yanaşı, daha bir çox şəxs saxlanılıb. Onlara qətl və bir çox başqa cinayətlərlə bağlı ittihamlar verilib. T.Bağırov 20 il həbs cəzası alıb. O və tərəfdarları məhkəmədə bütün ittihamları yalanlayaraq polisləri də onların güllələmədiklərini vurğulayıblar.

Aclıq aksiyasına qoşulanların olduğu deyilir

İyunun 3-də Qobustan Qapalı Həbsxanasında aclığa başladığı deyilən Taleh Bağırovun aksiyasına həbsdən qoşulanların olduğu da bildirilir. Bunların Müsəlman Birliyi Hərəkatının üzvləri Abbas Hüseynov, Cabbar Cabbarov, həmçinin jurnalist Polad Aslanov olduğu deyilir.

Bu barədə həmin məhbusların yaxınları məlumat yayıblar. Amma bu məlumata, hələlik, Penitensiar Xidmətdən münasibət almaq mümkün olmayıb.

A.Hüseynov və C.Cabbarov da Nardaran hadisələri ilə bağlı mühakimə ediliblər. A.Hüseynov 20, C.Cabbarov 19 il həbs cəzası alıb.

2019-cu ildə tutulan P.Aslanov isə Cinayət Məcəlləsinin 274-cü maddəsi ilə - dövlətə xəyanətdə təqsirli bilinərək 16 il həbs cəzası alıb.

Onların heç biri həbsini düzgün saymır.

Beyləqanda pambıq tarlasında kütləvi zəhərlənmə şübhəsi var

12 qəpiyə pambıq yığan qadınlar: 'Yaşayış deyil'
Gözlə

No media source currently available

0:00 0:05:05 0:00

Beyləqan rayonunda pambıq sahəsində kütləvi zəhərlənmə baş verdiyi bildirilir. Bu barədə yerli sakinlər məlumat verib. Onların sözlərinə görə, pambıq becərməklə məşğul olan təqribən 15 nəfər zəhərlənmə simptomları ilə rayon xəstəxanasına aparılıb.

Tibbi Ərazi Bölmələrini İdarəetmə Birliyindən ( TƏBİB) isə "Turan"a bildirilib ki, Beyləqanda zəhərlənmə şübhəsi ilə xəstəxanaya yerləşdirilən şəxslərin vəziyyəti stabildir: "Həmin şəxslər hazırda stasionar nəzarətdədir. Gün ərzində həmin şəxslər ambulator müalicə üçün evə buraxılacaqlar".

Faktla bağlı Beyləqan rayon Prokurorluğunda araşdırma aparılır.

Bundan 4-5 il əvvəl də Azərbaycanın bir sıra rayonlarında (Saatlı, Tərtər, İmişli və s.) pambıq tarlalarında bir çox kütləvi zəhərlənmə halı baş vermişdi. Həmin hadisələrlə bağlı 10-a yaxın müəyyən vəzifəli şəxs mühakimə edilmişdi. Onlar Cinayət Məcəlləsinin 222.1-ci (təhlükəsizlik qaydalarını insanların həyat və sağlamlığı üçün real təhlükə yaradan həddə pozma) maddəsi üzrə ittiham olundular. Bəzi şəxslərə müxtəlif cəzalar verildi. Onlar xidməti vəzifələrinin icrası zamanı pestisidlərin dövriyyəyə buraxılmasına dair reqlament və təlimatın tələblərini, eləcə də dərmanlanma işlərinin görülməsi ilə əlaqədar texniki təhlükəsizlik qaydalarını pozmaqda günahlandırılırdılar. Həmin vaxt həbs edilənlərdən bəzilərinin yaxınları bildirmişdilər ki, bu məsələlərlə bağlı əsas təqsirkar şəxslər məsuliyyətdən kənarda saxlanılır, elə də təqsiri olmayanlar cəzalandırılır.

Goranboyda Ağcakənd qəsəbəsindən sel keçib

Bugün, iyunun 22-də yağan leysan Goranboy rayonunda güclü selə səbəb olub və yaşayış məntəqələrinə ziyan vurub

Bugün, iyunun 22-də yağan leysan Goranboy rayonunda güclü selə səbəb olub və yaşayış məntəqələrinə ziyan vurub.

Yerli sakinlərin bildirməsinə görə, ən çox ziyan Ağcakənd qəsəbəsinə dəyib. Orada selin bir sıra tikililəri dağıtdığı, yaşayış binalarına ziyan vurduğu bildirilir.

İlkin məlumatlara görə, insanlar xəsarət almayıb, ev heyvanları tələf olub, bir sıra yardımçı tikililər dağılıb. “Yollar yuyulub, elektrik dirəkləri sökülüb”, sakinlər qeyd edib.

Fövqəladə Hallar Nazirliyindən verilən məlumata görə, hazırda dəymiş ziyanın qiymətləndirilməsi və aradan qaldırılması istiqamətində tədbirlər davam etdirilir.

Gömrük generalının həbs edildiyi deyilir

İllüstrativ foto

“Azərterminalkompleks” birliyinin sabiq direktoru, gömrük general-mayoru Ehtiram Xəlilov barəsində həbs qətimkan tədbirinin seçildiyi bildirilir

“Azərterminalkompleks” birliyinin sabiq direktoru, gömrük general-mayoru Ehtiram Xəlilov barəsində həbs qətimkan tədbirinin seçildiyi bildirilir.

Bu barədə “Turan” İnformasiya Agentliyinə Səbail Rayon Məhkəməsindən məlumat verilib.

Məlumata görə, istintaq orqanın onunla bağlı vəsatəti təmin edilib.

Xəbərə görə, Ehtiram Xəlilovun nədə ittiham olunduğu ilə bağlı isə məhkəmədən heç nə deməyiblər.

Onun həbs edilməsi ilə bağlı məlumatı APA agentliyi də yayıb.

Həmin məlumatda isə onun rüşvət və vəzifə səlahiyyətlərini aşmaqda ittiham edildiyi bildirilir.

Amma bütün bu məlumatlara, hələlik, Ehtiram Xəlilovun vəkili və ya yaxınlarından münasibət almaq mümkün olmayıb.

Buzovnada Xəzər sahilində hasarlar sökülür

Fatmayi qəsəbəsindəki hasarlar

Şikayətlərə görə, dəniz sahili sahilkənarı villa və restoran sahiblərinin ortaq istifadəsi üçün  hasarlanmışdı

Bu gün, iyunun 22-də Bakı Şəhər İcra Hakimiyyəti paytaxt Bakıdan 36 km məsafədə yerləşən Buzovna qəsəbəsindəki çimərlikdə vətəndaşların dənizə çıxışını məhdudlaşdıran hasarları sökməyə başlayıb.

Şikayətlərə görə, dəniz sahili sahilkənarı villa və restoran sahiblərinin ortaq istifadəsi üçün hasarlanmışdı.

Hasarların söküntüsü və sahilin təmizlənməsi yerli sakinlərin “Xəzərin Buzovna hissəsinin qanunsuz hasarlardan azad edilməsi” üzrə kampaniyaya başlamasından sonra başlayıb.

Bu ilin mayında Buzovnadan olan fəallar Xəzər rayon İcra Hakimiyyətinin dəstəyi ilə əhalinin dənizə çıxışını bağlayan bir neçə hasarın sökülməsinə nail olub.

Fəal Seyfulla Azər bildirib ki, ərazisi qumlu sahilə, qayalıq massivə çıxan heç bir torpaq sahibi şəhərsalma və arxitektura haqqında qanuna riayət etmir.

Onun xatırlamasına görə, qanunvericiliyə əsasən, dənizin 20-50 metrlik zolağı özəlləşdirilə və ictimai istifadə üçün bağlana bilməz.

İyunun 12-də ictimai fəallar da bu məsələlərlə bağlı Azərbaycan prezidenti İlham Əliyevə müraciət etmişdilər.

Hələlik, baş verənlərə hasarlanmanı aparan qurum və şəxslərdən isə münasibət almaq mümkün olmayıb.

Azərbaycan və Özbəkistan tərəfdaşlıgı gücləndirir

Özbəkistan Prezidenti Şavkat Mirziyoyevin Azərbaycana səfəri. 2019

İyunun 21-də Azərbaycan və Özbəkistan arasında Strateji tərəfdaşlığın dərinləşdirilməsi və hərtərəfli əməkdaşlığın genişləndirilməsi haqqında Bəyannamə imzalanıb.

AZƏRTAC-ın məlumatına görə, sənədi Azərbaycan Prezidenti İlham Əliyev və Özbəkistan Prezidenti Şavkat Mirziyoyev imzalayıblar.

Daşkənddə həmçinin, Azərbaycan ilə Özbəkistan arasında hərbi sahədə əməkdaşlıq haqqında da saziş imzalanıb.

Bu sənədi isə Azərbaycanın müdafiə naziri Zakir Həsənov və Özbəkistanın müdafiə naziri Baxodir Kurbanov imzalayıblar.

Bundan başqa, iki ölkə arasında məşğulluq, nəqliyyat, sənaye mülkiyyətinin mühafizəsi, qanunsuz miqrasiyaya və başqa sahələrlə bağlı da əmkdaşlıq sazişləri qəbul edilib.

Azərbaycan prezidenti Özbəkistana gedib

Azərbaycan Prezidenti İlham Əliyev iyunun 21-də Özbəkistana səfər edib. Özbəkistan Prezidenti Şavkat Mirziyoyevin dəvəti ilə gerçəkləşən bu səfər iki gün davam etməlidir.

"İki dövlət lideri qarşılıqlı ticarət həcminin artırılmasına, biznes və regionlar səviyyəsində əməkdaşlığın gücləndirilməsinə, iqtisadiyyatın müxtəlif sahələrində birgə investisiya layihələrinin təşviqinə, nəqliyyat-tranzit sahəsində imkanlardan səmərəli istifadəyə… xüsusi diqqət yetirəcəklər", - Özbəkistan prezidentinin mətbuat xidmətinin məlumatda bildirilir.

Danışıqların yekunlarına görə sənaye, nəqliyyat, kənd təsərrüfatı, energetika, elm və innovasiyalar, turizm sahəsində əməkdaşlığa dair ikitərəfli sənədlər paketinin imzalanması nəzərdə tutulur.

Karantin uzadılıb, toylara dair tələb ləğv edilir

Azərbaycanda xüsusi karantin rejiminin müddəti uzadılıb, toylara dair tələb ləğv edilir.

Azərbaycanda xüsusi karantin rejiminin müddəti uzadılıb, toylara dair tələb ləğv edilir.

Nazirlər Kabineti bugün, iyunun 20-də “Xüsusi karantin rejiminin müddətinin uzadılması və bəzi məhdudiyyətlərin aradan qaldırılması ilə bağlı əlavə tədbirlər haqqında” qərar verib.

Qərara əsasən, koronavirus (COVID-19) infeksiyasının yayılmasının, onun törədə biləcəyi fəsadların qarşısının alınması məqsədilə Azərbaycan ərazisində xüsusi karantin rejiminin müddəti bu il sentyabrın 1-i saat 06:00-dək uzadılıb.

Bəzi mədudiyyətlə götürülür

2022-ci il iyunun 21-dən etibarən xüsusi karantin rejimi ilə bağlı aşağıdakı məhdudiyyətlər ləğv edilir:

- ictimai yerlərdə, o cümlədən küçələrdə, bulvarlarda, parklarda və digər yerlərdə şəxslərin (yaxın qohumlar, yəni ata-ana, nənə-baba, uşaqlar və bacı-qardaşlar istisna olmaqla) 10 nəfərdən artıq qruplarda cəmləşməsinin qadağan olunması tələbi;

- şənlik mərasimlərinin təşkili və keçirilməsi zamanı məlumatların “icaze.e-gov.az” portalına daxil edilməsi, həmçinin şənlik mərasiminin sahibi və şənlik mərasiminin keçirildiyi məkanın sahibi arasında müştərək məsuliyyət barədə imzalanan iltizamnamə tələbi.

Azərbaycanda koronavirus pandemiyası ilə bağlı 2020-ci ilin martından karantin rejimidir.

Bu müddət ərzində yoluxma sayından asılı olaraq bəzən rejim sərtləşdirilsə də, yenidən yumşalmalar olub.

Amma ölkənin qonşuları ilə quru yolla gediş-gəlişə hələ də icazə verilmir.

Xatırlatma

2019-cu ilin sonlarında dünyada yeni koronavirus aşkar edilib.

2020-ci il martın 11-də Dünya Səhiyyə Təşkilatı koronavirusu pandemiya elan edib.

Dünyada sürətlə yayılan bu virusdan indiyə qədər 6,3 milyona yaxın şəxsin vəfat etdiyi açıqlanıb.

Azərbaycanda isə indiyə kimi 800 minə yaxın insanın bu visusa yoluxduğunun aşkarlandığı, onlardan 9 min 700-dən çox şəxsin vəfat etdiyi bildirilib.

Büdcədə neftin qiyməti 70 faiz artırılır

Hökumət dövlət büdcəsinin Neft Fondundan asılılığına son qoya bilmir
Gözlə

No media source currently available

0:00 0:04:10 0:00

Azərbaycan hökuməti 2022-ci ilin dövlət büdcəsində neftin qiymətini artırmağa hazırlaşır.

Hazırda qüvvədə olan büdcə haqqında qanunda "Azeri Light" markalı Azərbaycan neftinin 1 barelinin qiyməti 50 ABŞ dollarından götürülüb. Bu rəqəmin 35 dollar artırılaraq 85 dollara çatdırılması nəzərdə tutulur. Hazırda bununla bağlı layihə Milli Məclisin İqtisadi siyasət, sənaye və sahibkarlıq və Əmək və sosial siyasət komitələrinin birgə iclasında müzakirə edilir.

Layihədə büdcənin gəlir və xərclərinin də artırılması nəzərdə tutulur. Mövcud sənəddə gəlirlər 26 mlrd. 816 mln. manat, xərcləri isə 29 mlrd. 879 mln. manat proqnozlaşdırılıb. Müzakirəyə çıxarılan layihədə isə gəlirlər 29 mlrd. 198 mln. manat, xərclər 32 mlrd. 304 mln. manat müəyyən edilib.

Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili müzakirələr zamanı deyib ki, bu ilin beş ayında Azərbaycan neftinin orta ixrac qiyməti bir barelə görə 106.3 dollar təşkil edib.

Hazırda Azərbaycan neftinin bir bareli 120 dollardan yüksəkdir.

Azərbaycan Kəlbəcər istiqamətində atəş açıldığını, Ermənistan da bir hərbçisinin həlak olduğunu bildirir

Azərbaycan, Müdafiə Nazirliyinin binası, arxiv foto

Ermənistan Müdafiə nazirliyi təfərrüatları daha sonra təqdim edəcəyinə söz verib

Azərbaycanın Müdafiə Naziriyi gün ərzində atəşkəs pozuntusu ilə bağlı ikinci dəfə xəbər yayıb.

Nazirlik bildirir ki, bu dəfə Ermənistan silahlı qüvvələri eyni istiqamətdən Azərbaycan ordusunun Kəlbəcər rayonunun Zivel yaşayış məntəqəsi istiqamətində yerləşən mövqelərini snayper tüfəngi və atıcı silahlardan atəşə tutub.
***

Müdafiə Nazirliyi (MN) Kəlbəcər istiqamətində Azərbaycan mövqelərinin intensiv atəşə tutulduğunu bildirir.

Nazirlitin iyunun 19-da yaydığı məlumatda deyilir: "İyunun 18-i axşam saatlarında və 19-na keçən gecə Ermənistan silahlı qüvvələrinin bölmələri dövlət sərhədinin Basarkeçər (Vardenis) rayonunun Zərkənd (Kut) və Yuxarı Şorca (Verin Şorca) yaşayış məntəqələrində yerləşən mövqelərindən Kəlbəcər rayonunun Yuxarı Ayrım, Barmaqbinə və Zivel yaşayış məntəqələri istiqamətlərində yerləşən Ordumuzun mövqelərini iri çaplı atıcı silahlardan intensiv atəşə tutub" Azərbaycan Müdafiə Nazirliyinin məlumatında bildirilir.

Məlumatda Azərbaycan ordusunun "adekvat cavab tədbirləri" gördüyü vurğulanır.

Ermənistan bir hərbçisinin həlak olduğunu bildirir

Ermənistan Müdafiə Nazirliyi atəşkəs pozuntusunu təsdiqləyib. AzadlıqRadiosunun erməni xidməti ölkənin Müdafiə Nazirliyinə istinadla Azərbaycan-Ermənistan sərhədində bir hərbçinin həlak olduğunu təsdiqləyib. Xəbərdə deyilir ki, nazirlik təfərrüatları daha sonra təqdim edəcəyinə söz verib.

Xatırlatma

2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr ( 9 noyabr) razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.

Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Ceyhun Bayramov Lavrovla danışıb

Azərbaycan xarici işlər naziri Ceyhun Bayramov (sağda) və Rusiya xarici işlər naziri Sergey Lavrov (Arxiv fotosu)

Azərbaycan Xarici İşlər Nazirliyinin (XİN) məlumatına görə,  onlar ikitərəfli gündəliyin aktual məsələləri ətrafında fikir mübadiləsi aparıblar.

Bugün, iyunun 17-də Azərbaycan xarici işlər naziri Ceyhun Bayramov və Rusiya xarici işlər naziri Sergey Lavrov arasında telefon danışığı baş tutub.

Azərbaycan Xarici İşlər Nazirliyinin (XİN) məlumatına görə, onlar ikitərəfli gündəliyin aktual məsələləri ətrafında fikir mübadiləsi aparıblar.

XİN-in açıqlamasına görə, bölgədəki cari vəziyyəti, o cümlədən Ermənistan və Azərbaycan arasında münasibətlərin normallaşması məsələlərini müzakirə edən tərəflər, üçtərəfli bəyanatların tam icrasının vacibliyini vurğulayıblar:

“Telefon danışığı zamanı, müzakirələrin Rusiya Xarici İşlər nazirinin Azərbaycana səfəri çərçivəsində davam etdirilməsi razılaşdırılıb.”

Gələn həftə, iyunun 23-də Rusiya Xarici İşlər naziri Sergey Lavrovun Azərbaycana səfəri gözlənir.

2020-ci ildə, İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.

Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.

Ötən il də tərəflər bölgədə iqtisadi və nəqliyyat əlaqələrinin bərpası ilə bağlı daha iki bəyanat imzalayıblar.

Ötən ilin sonundan isə Azərbaycan və Ermənistan arasında sülh danışıqları əsasən Avropa İttifaqının vasitəçiliyi ilə aparılır.

Xatırlatma

Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Niyaməddin Əhmədova həbsdə işgəncə verildiyi deyilir

Niyaməddin Əhmədov Bakıda etiraz aksiyasında

Azərbaycan Xalq Cəbhəsi Partiyasının (AXCP) sədri Əli Kərimlinin həbsdə olan mühafizəçisi Niyaməddin Əhmədova saxlandığı cəzaçəkmə müəssisəsində təzyiq olunduğu bildirilir.

AXCP-dən deyilib ki, saxlandığı 12 saylı Cəzaçəkmə Müəssisəsinin (CÇM) əməkdaşları N.Əhmədovu döyərək ona işgəncə veriblər: "Onun saçını qırxıb bir gecə cərimə kamerasında saxladıqdan sonra iyunun 16-da "barak"a qaytarıblar".

Partiyadan qeyd olunub ki, N.Əhmədova növbəti dəfə töhmət verilib və Qobustandakı Qapalı Həbsxanaya göndərilməklə hədələnib.

AXCP hesab edir ki, N.Əhmədov heç bir qanunsuz əmələ yol verməyib.

Bu deyilənlərə, hələlik, Penitensiar Xidmətdən münasibət öyrənmək mümkün olmayıb. Amma qurumdan bundan əvvəl oxşar şikayətlərlə bağlı vurğulanıb ki, Azərbaycandakı həbsxanalarda məhbuslarla qanun çərçivəsində davranılır.

Xatırlatma

N.Əhmədov 2020-ci ilin aprelindən həbsdədir. Öncə o, karantin qaydalarını pozma ittihamıyla bir ay inzibati həbsdə saxlanıb. Bu cəza bitən gün isə Cinayət Məcəlləsinin 214-1 (terroru maliyyələşdirmə) maddəsi ilə barəsində yeni iş başlanıb. Ötən il məhkəmədə ona 13 il həbs verilib.

İttihamda iddia edilir ki, Almaniyada siyasi mühacir olan və sosial şəbəkələrdə Azərbaycan hakimiyyətinin ünvanına sərt çıxışlar səsləndirən Qabil Məmmədov terror məqsədilə ona pul göndərib. N.Əhmədov və Q.Məmmədov iddiaları yalanlayıb.

AXCP də bəyan edib ki, Əhmədovun həbsinin səbəbi 2019-cu ildə Milli Şuranın şəhər rəhbərliyi ilə razılaşdırılmayan və sosial, siyasi tələblərlə keçirilən etiraz aksiyasında AXCP sədri tutulana qədər onu tək buraxmamasıdır.

Amma rəsmilər ölkədə siyasi sifarişli həbslərin olması ilə bağlı fikirləri qəbul etmirlər. Onlar deyirlər ki, siyasi məhbus siyahısına salınanlar sırf törətdikləri əmələ görə məsuliyyətə cəlb ediliblər.

Davamı

XS
SM
MD
LG