Vens Erməni Soyqırımı Xatirə Kompleksini ziyarət edib
ABŞ vitse-prezidenti Cey Di Vens xanımı ilə birlikdə Tsitsernakaberd Erməni Soyqırımı Xatirə Kompleksini ziyarət edib.
Ermənistan Birinci Dünya müharibəsi dövründə Osmanlı imperiyasında çoxsaylı erməninin öldürülməsini soyqırımı sayır. Bir sıra ölkələr həmin hadisələri soyqırımı kimi tanıyıb.
ABŞ-nin əvvəlki prezident Co Bayden həmin olaylar barədə "soyqırımı" ifadəsini işlətsə də, indiki prezident Donald Tramp bunu etməyib və ABŞ-dəki erməni diasporu onu sərt tənqid edib.
Osmanlı İmperiyasının varisi olan Türkiyə isə "soyqırımı" sözünün işlənməsinə qarşı çıxır, həmin qətlləri "1915-ci il hadisələri" adlandırır. Ankara 500 minədək erməninin vətəndaş müharibəsi, xəstəlik və aclıqdan qırıldığını, bunun planlaşdırılmış soyqırımı olmadığını deyir. Türkiyə həmin hadisələr zamanı Anadoluda yüz minlərlə müsəlmanın da öldürüldüyünü bildirir.
ABŞ Ermənistanın nüvə enerjisinə 9 milyard dollar yatıracaq
Ermənistanla Birləşmiş Ştatların imzaladığı dinc nüvə əməkdaşlığı sazişi birinciyə ilkin 5 milyard dollaradək ixracın gerçəkləşməsinə, həmçinin yanacaq tədarükü və texniki xidmət üzrə 4 milyard dollar dəyərində əlavə uzunmüddətli kontraktlar bağlamağa imkan verəcək.
"Reuters" yazır ki, enerji təchizatına görə Moskva ilə Tehrandan asılı olan Ermənistan indi ABŞ, Rusiya, Çin, Fransa və Cənubi Koreya şirkətlərinin təkliflərini nəzərdən keçirir. Yerevan SSRİ dönəmində inşa olunmuş Metsamor Atom Elektrik Stansiyası (AES) əvəzinə yeni nüvə reaktoru tikmək istəyir.
Hələlik seçim edilməsə də, fevralın 9-da imzalanan saziş Amerika layihəsinə yol açır. "Reuters" bunu Rusiyaya zərbə sayır.
Rusiya xarici işlər nazirinin müavini Mixail Qaluzin "İzvestiya" nəşrinə müsahibədə deyib ki, yeni atom elektrik stansiyası ilə bağlı Rusiyanın təklifi ən yaxşı variantdır, "Rosatom" dövlət nüvə korporasiyası onun icrasına başlamağa hazırdır.
Vens Paşinyanın yenidən seçilməsinə dəstək bildirib
ABŞ-nin vitse-prezidenti Cey Di Vens Ermənistana səfəri zamanı baş nazir Nikol Paşinyanı tərifləyib, 7 iyun parlament seçkilərində ona dəstək bildirib.
Vens deyib ki, Paşinyanın yenidən seçilməsi Vaşinqtonun vasitəçiliyi ilə əldə olunmuş Ermənistan-Azərbaycan razılaşmalarının gerçəkləşməsi üçün vacibdir. Ətraflı
Trampın dəvətini "məmnunluqla" qəbul edib
Paşinyan Vensin səfərinin "tarixi və simvolik" əhəmiyyət daşıdığını deyib. O, Ermənistanın ABŞ-nin sülh səylərinə, eləcə də Sülh Şurasına sadiqliyini təsdiqləyib, bu ay Şuranın ilk iclasına qatılmaq üçün Trampın dəvətini "məmnunluqla" qəbul etdiyini deyib.
"Vitse-prezidentlə söhbət zamanı münasibətlərimizin daha da inkişafı üçün böyük potensialın mövcudluğunu vurğuladıq. Bu gün ən yüksək səviyyədəyik, amma qeyd etdiyimiz gündəliyin gerçəkləşməsi əməkdaşlığımızın miqyasını dəfələrlə artıracaq. Biz strateji tərəfdaşlıq qurmuşuq,... artıq bu tərəfdaşlığı konkret və görünən şəkildə göstərə bilərik", – Paşinyan vurğulayıb.