AzadlıqRadiosunun valideynlər arasında keçirdiyi sorğu göstərir ki, bir körpənin aylıq xərci orta hesabla 450–500 manat təşkil edir. Uşaq xəstələndikdə isə bu məbləğ 700 manata qədər yüksələ bilir. İqtisadçı Rəşad Həsənov bildirir ki, uşağa ayrılan büdcə birbaşa ailənin gəlir səviyyəsindən asılıdır. Bununla belə, qiymət artımı mühüm rol oynayır: "Uşaq qidası üçün nəzərdə tutulan quru süd qarışıqlarının qiyməti 2020-ci ilin aprelində 33 manat 30 qəpik idisə, hazırda bu göstərici 44 manat 10 qəpiyə yüksəlib. Bu isə həmin qrup məhsullarda 32.5 faizlik qiymət artımı deməkdir".