Azərbaycanda prezident seçkiləri keçirilir
Bu gün, aprelin 11-də Azərbaycanda prezident seçkisi keçirilir. Səsvermə saat 8:00-da başlayır.
Mərkəzi Seçki Komissiyasının (MSK) sədri Məzahir Pənahov deyib ki, məntəqələr saat 7:50-dən açıq olacaq.
Bir müddət öncə MSK-dan açıqlamışdılar ki, ölkədə ümumilikdə 5 milyon 192 min 42 səsvermə hüququ olan şəxs var.
MSK-nın məlumatına görə, ölkədə 5 min 426 daimi seçki məntəqəsi təşkil edilib.
Ümumilikdə səkkiz namizəd prezidentlik uğrunda mübarizə aparır. Bunlar Azərbaycan Demokrat Partiyasının sədri Sərdar Cəlaloğlu, Milli Dirçəliş Hərəkatı Partiyasının sədri Fərəc Quliyev, Müasir Müsavat Partiyasının rəhbəri Hafiz Hacıyev və «Cəbhəçilərin təşəbbüs qrupu»dan Razi Nurullayevdir. Habelə, Yeni Azərbaycan Partiyasının sədri, hazırkı prezident İlham Əliyevin, deputat Zahid Orucun, Sosial Demokrat Partiyasının sədri Araz Əlizadənin və Bütöv Azərbaycan Xalq Cəbhəsi Partiyasının rəhbəri Qüdrət Həsənquliyevin də namizədliyi qeydə alınıb.
Bu il Azərbaycanda prezident seçkisi altı ay önə çəkilib. Aprelin 11-nə təyin edilən seçkilər oktyabrda keçirilməli idi.
Bir sıra müxalif qüvvələr-Milli Şura, Müsavat Partiyası, Klassik Xalq Cəbhəsi Partiyası, NİDA Vətəndaş Hərəkatı isə seçkilərin azad və ədalətli keçirilməsindən ötrü şəraitin olmadığını bəyan edərək onu boykot ediblər. Liderləri həbsdə olan REAL Hərəkatı da seçkiyə qatılmayıb.
Ancaq MSK sədri M.Pənahov deyib ki, Azərbaycanda azad və ədalətli seçkilərdən ötrü bütün imkanlar var.
Səsvermə başlayıb
Mərkəzi Seçki Komissiyasının (MSK) sədri Məzahir Pənahov Seçkilər İnformasiya Mərkəzində keçirdiyi mətbuat konfransında seçkilərə hazırlıq prosesi barədə məlumat verib. O, hazırlığın yüksək səviyyədə olduğunu bildirib.
M.Pənahov seçki prosesinin Seçki Məcəlləsinə uyğun keçməsindən ötrü MSK-nın bütün lazımi tədbirləri gördüyünü nəzərə çatdırıb.
Dəqiqləşdirilmiş son vahid seçici siyahısına əsasən, xaricdəki seçicilər də daxil olmaqla, ümumilikdə 5 milyon 309 min 434 seçici var. Seçicilərin 50.78 faizi qadın, 49.22 faizi kişidir. Azərbaycanın 32 ölkədə yerləşən diplomatik nümayəndəlikləri və konsulluqlarında 41 məntəqədə seçki keçirilməlidir.
Mərkəzi Seçki Komissiyası səsvermənin gedişi ilə bağlı gün ərzində 5 dəfə - 10.00, 12.00, 15.00, 17.00, 19.00-da ilkin məlumatlar yayacaq.
Səsvermə saat 19.00-da başa çatacaq.
M.Pənahov: «Səsvermədə hər kəsin hüquqları gözlənilməlidir»
«Hər kəs istənilən məsələ barədə Mərkəzi Seçki Komissiyası ilə əlaqə saxlaya bilər».
Bunu Mərkəzi Seçki Komissiyasının (MSK) sədri Məzahir Pənahov deyib. O bildirib ki, səsvermədə hər kəsin hüquqları gözlənilməlidir:
«Axırıncı seçici məntəqəni tərk etdikdən sonra məntəqədə qapı bağlanmalıdır. Seçki məntəqələri saat 7-də (19:00-da) bağlanacaq. Məntəqədə olan müşahidəçiləri və jurnalistləri heç kim məntəqəni tərk etməyə məcbur edə bilməz».
MSK sədri deyib ki, səsvermə başa çatdıqdan sonra hansı KİV təmsilçisi səslərin sayılması prosesində qalıb iştirak etmək istəsə, onlara şərait yaradılmalıdır.
M.Pənahov vurğulayıb ki, məntəqələrdən nəticələr gəldikcə Seçkilər İnformasiya Mərkəzinin monitorlarında həmin məlumatlar əks olunacaq. Onun deməsinə görə, saat 21 radələrində protokollara əsasən məlumatlar əldə ediləcək.
Seçkidə 'exit-poll'un da keçiriləcəyi açıqlanıb
Növbədənkənar prezident seçkilərində «exit-poll»un keçirilməsindən ötrü 4 qurum qeydiyyatdan keçib.
Bunlar «Els» Müstəqil Araşdırmalar Mərkəzi, «RƏY» Monitorinq Mərkəzi, Vətəndaşların Əmək Hüquqlarını Müdafiə Liqası və Vətəndaş Cəmiyyəti Uğrunda Müstəqil Məsləhət və Yardım Mərkəzidir. Vətəndaşların Əmək Hüquqlarını Müdafiə Liqası ABŞ-ın «Artur Finkelşteyn və Assosiasiya» şirkəti ilə , Vətəndaş Cəmiyyəti Uğrunda Müstəqil Məsləhət və Yardım Mərkəzi isə Fransanın «Opinion Way» təşkilatı ilə birlikdə «exit-poll» keçirəcəyini açıqlamışdı.