Rusiyanın «Interfax» agentliyinin yazdığına görə, Ermənistanın xarici işlər naziri Eduard Nalbandian deyib ki, Yerevan Qarabağ tənzimlənməsi çərçivəsində Bakıyla «Qarabağa təhlükə təşkil etməyən ərazilər»in qaytarılmasını müzakirə edir. Onun sözlərinə görə, söhbət «təhlükəsizlik baxımından nə Qarabağ, nə də münaqişənin qızışması üçün hədə təşkil etməyəcək» ərazilərin qaytarılmasından gedir. Bəs «təhlükəsiz» ərazilər hansılardır?
Rəsmi Bakı hələlik Ermənistanın xarici işlər nazirinin açıqlamasına münasibət bildirməyib.
RASİM MUSABƏYOV: «... HƏR BİR ADDIM BİZİM ÜÇÜN MƏQBULDUR»
Milli Məclisin Beynəlxalq münasibətlər və parlamentlərarası əlaqələr komitəsinin üzvü, deputat Rasim Musabəyov AzadlıqRadiosuna deyir ki, hələlik tərəflər arasında heç nə müzakirə olunmur, indiki məqamda sadəcə həmsədrlər danışıqları ölü nöqtədən tərpətmək üçün səfərlər edir, təkliflər verirlər. Ancaq masa üzərində konkret layihə yoxdur.
O ki qaldı Ermənistanın xarici işlər nazirinin dediyi «təhlükə yaratmayacaq» torpaqların qaytarılmasına, Musabəyov deyir ki, söhbət Dağlıq Qarabağ ətrafındakı ərazilərdən gedə bilər.
***Buna da bax-Nalbandian Dağlıq Qarabağın statusu haqda nə deyib
«Mən prosesləri izlədiyim qədər, onlar Kəlbəcərdən, Laçından əl çəkmək niyyətində deyillər. «Madrid prinsipləri»nə görə də, birinci mərhələdə beş rayon azad olunmalıdır», – Musabəyov bildirir.
İndiki mərhələdə beş rayonun qaytarılması Azərbaycanı qane edirmi? «Birinci addım kimi qane edir», – deputat cavab verir:
«Ermənilərin işğal edilmiş torpaqlardan geriyə çəkilməsi ilə bağlı hər bir addım bizim üçün məqbuldur».
Amma dərhal da əlavə edir ki, Azərbaycan nəinki Laçını, Kəlbəcəri, heç Dağlıq Qarabağı ermənilərə güzəşt etməyəcək:
«Cənab prezident də dəfələrlə deyib və bununla xalqın iradəsini ifadə edib ki, bizim ermənilərə veriləsi torpağımız yoxdur, öz ərazimizdə ikinci erməni dövlətinin yaradılmasına imkan verməyəcəyik».
ELXAN ŞAHİNOĞLU: «BEŞ RAYONUN ƏVƏZİNDƏ NƏ İSTƏYİRLƏR?»
«Atlas» Araşdırmalar Mərkəzinin rəhbəri Elxan Şahinoğlu isə deyir ki, erməni nazirin açıqlamasından sonra bəziləri sosial şəbəkələrdə və ya mediada bundan «sensasiya» yaratmağa çalışırlar və bu da Azərbaycan cəmiyyətini «yalançı ümid»ə kökləyə bilər.
Siyasi şərhçinin sözlərinə görə, əslində ortada yeni heç nə yoxdur. O, Ermənistan rəsmilərinin, o cümlədən prezident Serzh Sarkisian-ın da onların nə vaxtsa Dağlıq Qarabağ ətrafındakı bəzi rayonları boşaltmalı olacaqları barədə açıqlamalarını yada salır. E.Şahinoğlunun qənaətincə, indiki halda erməni nazirin dediklərindən ruhlananlar yanlışa yol verirlər, çünki söhbət torpaqları dərhal boşaltmaqdan yox, referendumla bağlı təminat aldıqdan sonra boşalda biləcəklərindən gedir.
***Buna da bax-ABŞ Konqresinin üzvləri Yerevandadır, Dağlıq Qarabağa gedəni də var
«Onsuz da əvvəldən deyilirdi ki, ilkin olaraq Dağlıq Qarabağ ətrafındakı beş rayon azad olunmalıdır, bunu Azərbaycan cəmiyyəti də bilir, erməni cəmiyyəti də. Amma bunlar beş rayonun əvəzində nə istəyirlər? Nalbandian-ın sözlərinə görə, bunun müqabilində referendum keçirilməsi ilə bağlı təminat əldə etmək niyyətindədirlər. Bununla da biz beş rayonu alsaq da, Dağlıq Qarabağı itirə bilərik. İkincisi, nazir «təhlükəsizlik yaratmayan» ifadəsindən istifadə edir, onun cümləsindən belə başa düşülür ki, Şuşa, Laçın, Kəlbəcərin boşaldılmasından söhbət belə getmir. Biz isə işğal altındakı bütün rayonların boşaldılmasını istəyirik. Beş rayon, üstəgəl Şuşa, Laçın, Kəlbəcər. Amma həmin üç rayon kənara qoyulub. Özü də Nalbandian say da demir, bəlkə də beş yox, iki rayondan söhbət gedir. O, Xankəndi üçün, Dağlıq Qarabağın erməni əhalisi üçün təhlükə yaratmayan rayonların boşaldılmasını nəzərdə tutur», – E.Şahinoğlu belə deyir.
Onun qənaətincə, Bakı bu deyilənlərə gecikmədən reaksiya verməli, Azərbaycanın işğal altındakı bütün rayonların boşaldılmasını, azərbaycanlı köçkünlərin qaytarılmasını tələb etdiyini və yalnız bundan sonra statusla bağlı müzakirələrə başlaya biləcəyini bəyan etməlidir.