Kremlin sözçüsü Dmitry Peskov qızının Brüsseldə, Avropa Parlamenti üzvünün köməkçisi kimi təcrübə keçməsini müdafiə edib.
Bundan əvvəl AzadlıqRadiosu Yelizaveta Peskovanın Avropa Parlamentində işləməsi və bunun ona blokun həssas sənədlərinə çxış verə biləcəyindən yazmışdı.
Bu barədə narahatlıqlarını Avropa Parlamentinin bəzi üzvləri də ifadə etmişdilər.
Dmitry Peskovsa fevralın 26-da deyib ki, burda söhbət “sadəcə olaraq adi bir tələbədən və adi bir təcrübəçilikdən” gedir:
"Söhbət mənim qızımdan gedir. Bunun mənim işimə və vəzifəmə nə dəxli var?”
Rusiyanın dövlət xəbər agentliyi TASS-ın məlumatına görə Peskovun qızına iş vermiş fransalı millət vəkili Chauprade deyib ki, təcrübəçilərin məxfi sənədlərə çıxışları olmur.
Chauprade bunu da bildirib ki, Peskovaya ayda 1000 avro maaş verir.
O həmkarlarının tənqidini rədd edib və bildirib ki, onlar “rusofobiyaya” qapılıblar.
