"Bu günə qədər 4200 nəfərə qədər şəxsdə koronavirus infeksiyası ilə bağlı müayinə aparılıb. 25 nəfərdə koronavirus aşkarlanıb. Onlardan 7 nəfərdə inkubasiya dövrü bitib, onlar sağalaraq evə buraxılıblar".
Bu barədə martın 16-da Milli Məclisin Səhiyyə və Hüquq siyasəti və dövlət quruculuğu komitələrinin birgə iclasında Nazirlər Kabineti yanında operativ qərargahın üzvü, Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Ramin Bayramlı məlumat verib. Onun sözlərinə görə, indiyə qədər xəstəlik aşkar olunmadığı üçün 711 nəfər karantindən evə buraxılıb, hazırda karantində 560 nəfər var.
Azərbaycanla Türkiyə arasında gediş-gəliş dayandırılır
Türkiyə ilə Azərbaycan vətəndaşlarının hava və quru yolu ilə qarşılıqlı səfərləri martın 15-i saat 00:00-dan etibarən müvəqqəti olaraq dayandırılacaq.
Bu barədə martın 14-də Azərbaycan Prezidentinin mətbuat xidməti məlumat yayıb.
Məlumatda bildirilir ki, martın 14-də Azərbaycan Prezidenti İlham Əliyev ilə Türkiyə Prezidenti Rəcəb Tayyib Ərdoğan arasında telefon danışığı olub.
Azərbaycan-Gürcüstan sərhədi bütün nəqliyyat vasitələri üçün bağlanıb
Hər iki ölkənin vətəndaşlarının təhlükəsizliyinin təmin edilməsi və sağlamlığının qorunması məqsədilə hökumət başçılarının razılığına əsasən, 2020-ci il martın 14-ü saat 00:00-dan etibarən 10 gün müddətində Azərbaycan və Gürcüstan arasında dövlət sərhədinin bütün nəqliyyat vasitələri üçün bağlanması barədə qərar verilib:
"Azərbaycan ərazisində olan Gürcüstan vətəndaşlarının ölkədən çıxmasını, Gürcüstan ərazisində olan Azərbaycan vətəndaşlarının ölkəyə gəlməsini təşkil etmək üçün zəruri dəhliz təmin olunacaq. Eyni zamanda, yükdaşımaların həyata keçirilməsi üçün tranzit dəhliz də fəaliyyət göstərəcək".