Keçid linkləri

Təcili xəbərlər
2023, 11 Dekabr, Bazar ertəsi, Bakı vaxtı 17:14

Dünya xəbərləri

Rusiya döyüş gəmisi ‘aqressiv’ şəkildə ABŞ gəmisinə yaxınlaşıb

Arxiv foto
Arxiv foto

Rusiya döyüş gəmisi Ərəbistan dənizində "aqressiv" şəkildə ABŞ hərbi gəmisinə yaxınlaşıb. Hadisənin yanvarın 9-da baş verdiyini bildirən ABŞ Dəniz Qüvvələri Twitter-də bu baş verənləri görüntüləyən video paylaşıblar.

ABŞ hərbi qüvvələri bildirir ki, Rusiya gəmisinin uzaqlaşması üçün gəmilərin toqquşması təhlükəsi zamanı beynəlxalq qaydalara uyğun olaraq 5 dəfə qısa siqnal veriblər. Məlumata görə, əvvəlcə Rusiya gəmisi bu xəbərdarlığa əməl etməyib, amma sonradan kursunu dəyişib və gəmilər bir-birindən uzaqlaşıblar.

Beynəlxalq sularda Rusiya və ABŞ hərbi gəmiləri arasında buna oxşar təhlükəli anlar bundan əvvəl də baş verib. Sonuncu belə bir hadisə 2019-cu ilin yayında Flippin yaxınlığında olub. Bu zaman Rusiya döyüş gəmisi ilə Amerikanın raket kreyseri arasında təhlükəli anlar yaşanıb.

Bütün xəbərləri izləyin

Navalnı ilə günlərdir əlaqə kəsilib, vəkilləri onunla görüşə bilmir

 Aleksey Navalnı
Aleksey Navalnı

Rusiyada həbsdə olan müxalifətçi Aleksey Navalnının həmkarları dekabrın 11-də bildiriblər ki, onunla bir həftədir əlaqə saxlaya bilmirlər, vəkillərinin cəzaçəkmə müəssisəsində onu görməsinə icazə verilmir.

Kremlin açıq tənqidçisi olan Navalnının mətbuat katibi Kira Yarmış X platformasında yazıb ki, Navalnının cəza çəkdiyi müəssisə dekabrın 11-də onu bir məhkəmə işinə videobağlantı ilə qoşmayıb, dekabrın 7-dən elektrik təchizatı problemləri olduğunu əsas gətirib.

Navalnı hazırda ekstremizm və başqa ittihamlarla 19 il həbs cəzası çəkir, özü isə ittihamları siyasi motivli sayır.

Yeni cinayət işi

"Altıncı gündür Alekseyin harada olduğunu, başına nə gəldiyini bilmirik", -- Yarmış yazıb.

Navalnı dekabrın 1-də ona qarşı vandalizm ittihamları ilə yeni cinayət işi açıldığını bildirib.

Müxalifətçinin vəkilləri isə dekabrın 6-dan bəri onunla görüşə icazə ala bilmədiklərini deyirlər.

Yarmış və Navalnının digər həmkarı Ruslan Şavetdinov daha öncə deyiblər ki, Navalnı noyabrın sonu - dekabrın əvvəlində kamerada özünü çox pis hiss edib. Belə ki, həbsxana nəzarətçiləri onu yeməkdən, təmiz havadan məhrum edib, təkadamlıq kamerada saxlayıb, kameradan kənarda gəzintiləri məhdudlaşdırıblar.

Putinə qarşı kampaniya

Son olaylar Navalnının komandasının dekabrın 7-də prezident Vladimir Putinə qarşı kampaniyası fonunda baş verir. Həmin gün Rusiya parlamentinin yuxarı palatası - Federasiya Şurası 2024-cü il martın 17-nə prezident seçkisi təyin edib.

1999-cu ildən ölkəni baş nazir, yaxud prezident kimi idarə edən Putin seçkiyə qatıla biləcək, 2021-ci ildə qəbul edilmiş konstitusiya dəyişiklikləri buna imkan verir. Putinin seçkini udacağı gözlənilir.

Navalnının həbs cəzası avqustda 19 ilə qaldırılıb, o, ekstremist təşkilat yaratmaqda təqsirli bilinib. Müxalifətçi daha sərt - xüsusi rejimli müəssisəyə köçürülüb.

O, 2021-ci ildə Almaniyadan Moskvaya qayıdarkən saxlanıb. Navalnı Kremli ittiham etdiyi zəhərlənmədən Berlində müalicə olunurdu.

Kremlin açıq tənqidçisi olan Navalnı həbsindən öncə hökumətə qarşı böyük etirazlar təşkil edə bilib.

Onun üç keçmiş vəkili oktyabrda saxlanaraq ekstremist qrupun fəaliyyətində ittiham olunub. Həmin şəxslərin Navalnının antikorrupsiya fondu ilə əlaqələri olub.

Qəzzanın cənubunda ağır döyüşlər gedir

İsrailin Qəzzaya endirdiyi zərbə zamanı yüksələn tüstü
İsrailin Qəzzaya endirdiyi zərbə zamanı yüksələn tüstü

Dekabrın 11-də İsrail tankları ABŞ və Aİ-nin terrorçu saydığı HƏMAS radikal qruplaşmasına qarşı döyüşləri davam etdirib. Döyüşlər, əsasən, Qəzza zolağının cənubundakı Xan Yunis şəhəri və ətrafında gedir. Bu arada BMT rəsmiləri humanitar fəlakətin qarşısını almaqdan ötrü atəşkəs çağırışlarını bir daha dilə gətiriblər.

İsrailin Qəzzanın şimalını bombalaması nəticəsində anklavın 2.3 milyonluq əhalisi evindən didərgin düşüb. Təl-Əviv hərbi əməliyyatlara HƏMAS-ın oktyabrın 7-də qəfil hücumundan sonra başlayıb.

Ümumdünya Səhiyyə Təşkilatı (ÜST) Qəzzada "fəlakətli" səhiyyə durumu ilə bağlı xəbərdarlıq edib. Fələstinli fəallar isə bazar ertəsi qlobal tətil elan edərək İsrailin atəşkəsə getməsi üçün koordinasiyalı işə başlayıb. Onlar ümumdünya tətilinin vaxtının çatdığını bildiriblər. Amma bunun qlobal miqyası, yaxud İsrailin müharibə planlarına təsiri aydın deyil, - "Reuters" belə yazır.

BMT Baş Assambleyasının 193 üzvü dekabrın 12-də atəşkəsin tələb olunduğu qətnamə layihəsini səsə qoyacaqlar.

ABŞ-ın vetosu narazılıq yaradıb

Cümə günü - dekabrın 8-də ABŞ BMT Təhlükəsizlik Şurasının humanitar məqsədlərlə dərhal atəşkəs təklifinə veto qoyub.

Bazar günü Qətərin paytaxtı Dohada beynəlxalq konfransda ərəb ölkələrinin xarici işlər nazirləri ABŞ-ın vetosunu tənqid ediblər. Qətər ötən ayın sonunda atəşkəsin əldə olunmasında əsas rol oynayıb.

BMT-nin baş katibi Antonio Quterreş deyib ki, atəşkəs çağırışından əl çəkməyəcək.

HƏMAS oktyabrın 7-də İsrailə qəfil hücum edərək min 200 nəfəri qətlə yetirib, 240 nəfəri girov götürüb. İsrail isə buna cavab olaraq 2007-ci ildən Qəzzanı idarə edən HƏMAS radikal qruplaşmasını məhv edəcəyini bildirib.

Qəzzadakı səhiyyə orqanları İsrailin hücumları nəticəsində 18 minədək insanın öldürüldüyünü, 49 min 500 nəfərin xəsarət aldığını açıqlayıb. Dekabrın 1-də başa çatan birhəftəlik atəşkəs dövründə 100-dək israilli girov azad olunub.

Rusiya Kiyevə ballistik raketlər, kamikadze dronlar ilə hücum edib

Kiyevə hücum zamanı "Şahed" dronunun vurulması
Kiyevə hücum zamanı "Şahed" dronunun vurulması

Dekabrın 11-nə keçən gecə Rusiya qüvvələri Kiyevə ballistik raketlər və kamikadze dronlar ilə hücum gerçəkləşdirib. Ukrayna Hava Qüvvələri komandanlığı səkkiz raketin hamısının vurulduğunu bildirir.

Məlumatda raketlərin şimal istiqamətdən - Bryansk vilayətindən buraxıldığı qeyd olunur.

Ukrayna hərbçiləri Moskvanın qanunsuz ilhaq etdiyi Krımdan buraxılmış 18 dronun hamısını vurduqlarını bildirirlər.

Rusiya raketlərinin qalıqları Kiyevin cənub hissəsinə, Darnitsk rayonuna düşüb. Dörd nəfər xəsarət alıb. Şəhərin meri Vitali Kliçkonun dediyinə görə, onlardan biri ayağından qəlpə yaraları alıb.

Mer qalıqların yerdə dağıntılara, yanğınlara səbəb olduğunu, ancaq bunların qarşısının operativ alındığını söyləyib.

Rusiya qüvvələri Ukrayna ərazisinə, demək olar, hər gün dronlarla, müxtəlif növ raketlərlə hücum edir.

Britaniya hərbi ekspertləri təxmin edirlər ki, Rusiya Ukraynanın enerji infrastrukturunu dağıtmağı hədəfləyən yeni kampaniyaya başlayıblar.

Rusiyanın Müdafiə Nazirliyi yalnız hərbi hədəflərə zərbələr endirdiyini bildirir. Rusiya tərəfi dinc sakinlərin ölümü, yaşayış evlərinin, mülki infrastrukturun dağılmasını adətən şərh etmir.

Nərgiz Məhəmmədinin övladları Nobel Sülh mükafatını qəbul ediblər

Həbsdə olan iranlı hüquq müdafiəçisi Nərgiz Məhəmmədinin övladları Əli və Kiana 2023-cü il Nobel Sülh mükafatını qəbul edirlər.
Həbsdə olan iranlı hüquq müdafiəçisi Nərgiz Məhəmmədinin övladları Əli və Kiana 2023-cü il Nobel Sülh mükafatını qəbul edirlər.

İranda həbsdə olan insan haqları fəalı Nərgiz Məhəmmədinin yeniyetmə övladları dekabrın 10-da Osloda analarının adından Nobel Sülh mükafatını qəbul ediblər. Məhəmmədinin adından səsləndirilən çıxışda o, Tehrandakı "despotik" rejimi tənqid edir.

17 yaşlı əkizlər Əli Kiana səkkiz ildir Fransada mühacirətdə qalırlar. Onlar analarının 2021-ci ildən bəri saxlandığı Tehrandakı Evin həbsxanasından gizli yolla göndərdiyi çıxışını oxuyublar.

Nobel Mükafat Komitəsi əkizlərin mükafatı qəbuletmə mərasiminin videosunu yayıb.

Dünyada "Qadın, həyat, azadlıq" hərəkatının qatı tərəfdarı kimi tanınan Məhəmmədi oktyabrın 6-da Nobel Sülh mükafatına layiq görülüb.

Nobel mükafatlarının dəyəri 11 milyon İsveç kronudur (1 milyon dollardan artıq).

Məhəmmədi illərlə İran qadınlarına qarşı məcburi hicab qaydasına, eləcə də ölkədə qadın hüquq və azadlıqlarına digər məhdudiyyətlərə etiraz edib.

İran rejimi xalqın tələblərinə necə cavab verib

Boş stulun yanında dayanmış övladları onun çıxışını oxuyublar. "Bu mesajı həbsxananın hündür, soyuq divarları arxasından yazıram", - Məhəmmədi yazır.

"Mən hazırda despotik dini hökumətin zülmü altında olan, sivilizasiyaya məğrur və şərəfli töhfəsini verən bir iranlı qadınam", - o vurğulayıb.

Məhəmmədi çıxışında qeyd edib ki, "İslam respublikası rejimi hazırda xalq arasında legitimliyinin ən aşağı səviyyəsindədir, bu hökumət xalqın tələblərinə zülm, edam, qətl və həbslə cavab verib".

Məhəmmədi dekabrın 9-da Instagram səhifəsində üçgünlük aclıq aksiyasına başladığını elan edib.

Daha öncə insan haqları qrupları Evin həbsxanasında saxlanan qadının səhhətindən narahatlıq bildiriblər.

Türkiyə və Yunanıstan deklarasiya imzalayıblar

Yunanıstanın baş naziri Kiriakos Mitsotakis və Türkiyə prezidenti Rəcəb Tayyib Ərdoğan mehriban qonşuluq münasibətlərinə dair birgə bəyannamə imzalayırlar.
Yunanıstanın baş naziri Kiriakos Mitsotakis və Türkiyə prezidenti Rəcəb Tayyib Ərdoğan mehriban qonşuluq münasibətlərinə dair birgə bəyannamə imzalayırlar.

Türkiyə və Yunanıstan qarşılıqlı etimadı möhkəmləndirmək, ikitərəfli münasibətlərdə gərginliyi azaltmaq niyyətindədirlər. "Deutsche Welle"nin məlumatına görə, bu haqda Yunanıstanın baş naziri Kiriakos Mitsotakis və Türkiyə prezidenti Rəcəb Tayyib Ərdoğan dekabrın 7-də Afinada görüşdə razılıq əldə ediblər.

Ərdoğan danışıqları məhsuldar adlandırıb, Mitsotakisi Türkiyəyə səfərə dəvət edib.

Danışıqlarda iştirak etmiş iki ölkə nazirləri turizm, ticarət, energetika, eləcə də texnologiya və təhsilin birgə inkişafı, miqrasiya məsələlərinin birlikdə həlli ilə bağlı razılığa gəliblər. Tərəflərin beş il ərzində ticarət dövriyyəsini 10 milyard dollaradək qaldırmağa çalışacağı bildirilir.

Türkiyə vətəndaşları Yunanıstanın 10 adasında istirahət üçün sadələşdirilmiş prosedurla viza ala biləcəklər. Bunun üçün Yunanıstan Avropa Komissiyasından icazə alıb.

Kipr məsələsi

Ancaq iki ölkənin özəlliklə Kipr məsələsində fikir ayrılığı qalır. Ərdoğan Kipr məsələsinin ədalətli, "ada reallıqları əsasında" həllinə tərəfdardır. Mitsotakis isə deyir ki, yeganə həll yolu BMT-nin qətnamələri əsasında adanın birləşdirilməsidir.

Egey dənizinin dibindəki təbii resursların istismarı hüququ üzrə də fikir ayrılığı qalmaqdadır. Mitsotakis ümidini bildirib ki, hər iki ölkə bunların öhdəsindən gələ biləcək. Ərdoğan isə tərəflərin həll edə bilməyəcəyi problem olmadığını bildirib.

Liderlər hər il belə görüşlər keçirməyə razılaşıblar. Bundan öncəki görüş 2016-cı ildə olub, o vaxtdan ikitərəfli münasibətlər pisləşməyə doğru gedib.

Qəzzada döyüşlərdə İsrail nazirinin oğlu həlak olub

Qəzza üzərinə İsrailin hava hücumları. 7 dekabr 2023
Qəzza üzərinə İsrailin hava hücumları. 7 dekabr 2023

Qəzza sektorunda radikal HƏMAS qruplaşması ilə döyüşlərdə İsrail ordusu baş qərargahının keçmiş rəisi, hazırda nazir postunda olan Qadi Ayzenkotun oğlu Qal Ayzenkot həlak olub. ABŞ və Avropa İttifaqı HƏMAS-ı terrorçu sayır.

Məlumatı ordunun baş qərargahı yayıb. Son bir sutkada Qəzza sektorunda iki israilli hərbi qulluqçunun öldürüldüyü, onlarda birinin 25 yaşlı böyük serjant Qal Ayzenkot olduğu bildirilir.

Onun atası Qadi Ayzenkot 2015-2019-cu illərdə baş qərargah rəisi olub. O, Knessetin müxalifətdən olan üzvüdür, oktyabrın 12-də milli birlik hökumətində hərbi kabinetin tərkibinə salınıb. Bu kabinet HƏMAS-ın İsrailə hücumundan sonra yaradılıb.

Azı 80 israilli hərbçi həlak olub

Oktyabrın sonunda Qəzzada başlayan quru əməliyyatında həlak olan israilli hərbçilərin sayı 80-i keçib. HƏMAS-ın neçə radikal üzvünün öldürüldüyü açıqlanmır. Bu qruplaşmanın nəzarətində olan Qəzzanın səhiyyə nazirliyi yalnız ümumi itki sayını açıqlayır, indiyədək azı 17 min nəfərin öldürüldüyünü bildirir.

HƏMAS oktyabrın 7-də İsrailin cənubuna girərək azı min 200 nəfəri qətlə yetirib, 240 nəfər girov götürülüb. Bundan sonra İsrail Qəzzanı bombalamağa başlayıb. Hazırda azı 130 nəfər hələ də girovluqdadır.

Həm sektorun şimalında, həm də cənubunda ağır döyüşlər gedir. İsrail hərbçiləri cənubdakı Xan Yunis şəhərini nəzarətə götürməyə çalışırlar. Baş qərargah Qəzzanın şimalında onlarla HƏMAS üzvünün əsir götürüldüyünü açıqlayıb.

İsrailin şimalı isə Livandan, "Hizbullah" radikal şiə qruplaşması tərəfindən atəşə tutulub, bir nəfər həlak olub.

İsrail deyir ki, məqsədi HƏMAS-ın məhv etmək, Qəzzaya nəzarəti ondan almaqdır. İsrailin, əsasən, Yaxın Şərqdə və islam dünyasındakı tənqidçiləri iddia edirlər ki, Təl-Əvivin məqsədi Qəzza sektorunu nəzarətə götürmək, fələstinli əhalini çıxarmaqdır.

Məktəbli sinif yoldaşlarına atəş açıb, ölənlər var

Atəş açıldığı gimnaziyanın qarşısı
Atəş açıldığı gimnaziyanın qarşısı

Rusiyanın Bryansk şəhərində 5 saylı gimnaziyada səkkizinci sinif şagirdi məktəbdə atəş açıb. Bu haqda TASS xəbər yayıb.

"Baza" Telegram kanalının məlumatına görə, məktəbli qız dördüncü mərtəbədə biologiya dərsinin keçirildiyi otağa qalxıb, sinif yoldaşlarına atəş açmağa başlayıb.

"RİA Novosti" şahidlərə və mənbəyə istinadla yazır ki, şagird dörd oğlanı yaralayıb və özünü öldürüb. RBK isə şəhər administrasiyasına istinadla xəbər verir ki, atəş açan daxil olmaqla iki nəfər öldürülüb, dörd nəfər yaralanıb.

"Baza" atəş açanın 14 yaşlı məktəbli olduğunu öyrənə bilib. O, 13 yaşlı sinif yoldaşı Mariyaya atəş açıb, həmin qız da həlak olub, Alina isə öz həyatına qəsd edib. Yaralı oğlanlardan birinin vəziyyəti ağırlaşıb, həyatına təhlükə var. Onun hazırda reanimasiya olduğu xəbər verilir.

Səhiyyə Nazirliyi daha sonra beş nəfərin xəsarət aldığını, onların hamısının vəziyyətinin orta ağır olduğunu, birinin əməliyyat olunacağını açıqlayıb.

İlkin informasiyaya görə, qız məktəbə atasının "Bekas-3" silahını gətirib.

Daxili İşlər Nazirliyinin yerli şöbəsi informasiyanı təsdiqləyib. Hadisənin motivlərinin və baş vermə şəraitinin aydınlaşdırıldığı bildirilir.

TASS hüquq-mühafizə orqanlarına istinadla yazır ki, insidentin əsas səbəbi kimi sinif yoldaşları arasında münaqişə nəzərdən keçirilir.

Hadisədən sonra məktəblilər təxliyə olunub, bina polislərin əhatəsindədir.

İranda etirazçılara qarşı zorlama iddiaları - 'Amnesty International'

Qadınlara, kişilərə və uşaqlara qarşı cinsi zorakılıqdan silah kimi istifadə olunub.
Qadınlara, kişilərə və uşaqlara qarşı cinsi zorakılıqdan silah kimi istifadə olunub.

İranda təhlükəsizlik qüvvələri ötən ilin sentyabrında başlamış etirazları amansızlıqla yatıranda etirazçıları qorxutmaq üçün zorlamaya, digər cinsi zorakılığa əl atıb. Bunu "Amnesty International" insan haqları təşkilatı dekabrın 6-da yaydığı hesabatda bildirir.

2022-ci ilin sentyabrında Tehranda Məhsa Əmini guya hicabı düzgün bağlamadığına görə polis tərəfindən saxlanandan sonra vəfat edib. Bunun ardınca İranı "Qadınlar, Həyat, Azadlıq" devizi ilə etirazlar bürüyüb.

120-səhifəlik hesabatda deyilir ki, qadınlara, kişilərə və uşaqlara qarşı cinsi zorakılıqdan silah kimi, həm də cəzasızlıqla istifadə olunub.

Hesabat 45 qurbanın dedikləri əsasında hazırlanıb. Onlardan 26-sı kişi, 12-si qadın, yeddisi uşaqdır, İran təhlükəsizlik qüvvələrinin cinsi zorakılığına məruz qalıblar. Buraya zorlama, qrupla zorlama, cinsi zorakılığın digər formaları daxildir.

İndiyədək heç bir İran təhlükəsizlik əməkdaşına saxlanan etirazçılara qarşı seksual cinayətlərə görə ittiham verilməyib, yaxud təqib olunmayıb.

12 yaşlı uşağa da işgəncə verilib

İranda etirazların önündə qadınlar gedib. Ancaq onlara xeyli sayda kişilər və oğlanlar da qoşulub. Onlar İran teokratiyasının on illər boyunca qadınlara qarşı dini məhdudiyyətlərinə, yaxud istibdadın digər formalarına etirazlarını bildiriblər.

Etirazlar 2022-ci ilin sonuna səngiyib, çünki təhlükəsizlik sistemi qəddar repressiyaları işə salıb. Yüzlərlə etirazçı öldürülüb, minlərlə insan həbs olunub.

"Araşdırmamız üzə çıxarıb ki, İranda kəşfiyyat və təhlükəsizik agentləri etirazçılara, o cümlədən 12 yaşlı uşaqlara işgəncə vermək, onları cəzalandırmaq, davamlı fiziki və psixoloji zərbə vurmaq üçün zorlamaya və zorakılığın digər formalarına əl atıblar", - "Amnesty International"ın baş katibi Anyes Kalamar deyib.

"Amnesty International" hesabatı noyabrın 24-də İran hakimiyyətinə təqdim etsə də, cavab almadığını bildirir.

Rumıniyada qızılca epidemiyası elan olunub

Qızılca
Qızılca

Rumıniyanın Səhiyyə Nazirliyi ölkədə qızılca epidemiyası elan edib. Ölkə boyunca qızılcaya yoluxma hallarının təşviş yaradacaq səviyyədə yayıldığı bildirilir.

"Nazirlik 9-11 aylıq uşaqların, eləcə də indiyədək peyvənd olunmayan uşaqların vaksinasiyasını asanlaşdırmaq üçün ölkə səviyyəsində epidemiya elan edir", - nazirlik dekabrın 5-də bildirib.

Nazirlik Rumıniyanın 41 vilayətindən 29-da ümumilikdə 2 minə yaxın yeni yoluxmanın aşkarlandığını açıqlayıb.

Rumıniyada sosial şəbəkələrdə vaksinlərə qarşı kampaniya səbəbindən peyvənd olunan uşaqların sayında davamlı azalma var.

Son günlər Azərbaycanda yüzlərlə qızılcaya yoluxma faktı qeydə alınıb. Mediada çıxan xəbərlərdən bəlli olur ki, ölkənin müxtəlif bölgələrində dörd uşaq bu xəstəlik üzündən həyatını itirib.

İsrail ordusu Xan Yunis şəhərini mühasirəyə salır

İsrail və HƏMAS yaraqlıları arasında döyüşlər davam edərkən Qəzza zolağının cənubundakı Xan Yunisdəki binaların üzərindən tüstü qalxır.
İsrail və HƏMAS yaraqlıları arasında döyüşlər davam edərkən Qəzza zolağının cənubundakı Xan Yunisdəki binaların üzərindən tüstü qalxır.

Dekabrın 6-da İsrail qüvvələri Qəzzanın cənubunda əsas şəhəri mühasirəyə salmağa başlayıblar. HƏMAS-ın radikal silahlıları ilə küçələrdə, binalarda döyüşlər gedir.

ABŞ və Avropa İttifaqı HƏMAS-ı terrorçu təşkilat sayır.

İki aydır davam edən İsrail-HƏMAS müharibəsi artıq anklavın cənubuna keçir. Qəzzanın şimalı İsrail bombardmanı nəticəsində, əsasən, dağılıb, iki milyona yaxın insan evindən didərgin düşüb.

HƏMAS oktyabrın 7-də İsrailin cənubuna girərək min 200 nəfəri qətlə yetirib, azı 240 nəfəri girov götürüb. Bundan sonra İsrail HƏMAS-ın idarə etdiyi Qəzza zolağını bombardman etməyə başlayıb.

Köçkünlər yenidən qaçır

Dekabrın 5-də Qəzzanın cənubundakı Xan Yunis şəhəri yaxınlığında İsrail tankları, zirehli texnikası, buldozerləri görünməyə başlayıb. Şahidlərin AFP-yə dediyinə görə, məcburi köçkünlər əşyalarını yığıb yenidən qaçmağa məcbur qalıblar.

"Qüvvələrimiz hazırda Qəzza zolağının cənubundakı Xan Yunis şəhərini mühasirəyə salır", - İsrail ordusunun sözçüsü Herzi Halevi dekabrın 5-də axşam deyib.

"Qəzza zolağının şimalında HƏMAS-ın bir çox istehkamını ələ keçirmişik, indi isə cənubdakı istehkamlara qarşı hərəkətə keçmişik", - o əlavə edib.

Qəzzada indiyədək azı 16 min nəfərin, əsasən, qadın və uşaqların öldürüldüyü bildirilir.

İsrail HƏMAS-ı məhv, 138 girovu azad edəcəyini bildirib. Bir neçə günlük atəşkəs zamanı onlarla girov fələstinli məhbuslara dəyişdirilib.

Gürcüstanda itkin düşmüş rusiyalı fəal Sverdlovskda təcridxanadadır

Rafail Şepelev
Rafail Şepelev

Oktyabrın ortasında Gürcüstanda itkin düşmüş rusiyalı fəal Rafail Şepelev Rusiyanın Uraldakı Sverdlovsk vilayətində, Nijni Taqil təcridxanasındadır. "Birinci şöbə" insan haqları təşkilatı fəal barəsində həbs-qətimkan tədbiri seçildiyini bildirir.

Terrorçuluq ittihamı

"Artpodqotovka" hərəkatının fəalı Şepelevə terrorçuluq ittihamı irəli sürülüb. "Birinci şöbə" bu haqda Telegram kanalında yazıb.

Rusiya sol-qanad millətçi "Artpodqotovka" təşkilatını 2017-ci ildə ekstremist qrup elan edib, Rusiya ərazisində fəaliyyətini yasaqlayıb.

İnsan haqları fəalları deyirlər ki, 2021-ci ildən Gürcüstanda yaşayan Şepelev Rusiyaya qayıtmağı planlamırdı, onu Rusiyanın təhlükəsizlik qüvvələri Tbilisidən çıxmaq üçün dilə tutublar.

"Onlar onu dilə tutub Tbilisidən Tsxinvaliyə (Rusiyanın dəstəklədiyi separatçı Cənubi Osetiya) apararaq orada saxlayıblar, oradan Vladiqafqaza apararaq inzibati həbs veriblər. Bu müddətdə ona cinayət ittihamı irəli sürülüb, Nijni Taqil təcridxanasına salınıb", – "Birinci şöbə" bildirib.

Sənədləri Gürcüstanda qalıb

Şepelevin sənədləri, o cümlədən pasportu Gürcüstanda qalıb.

Onun Tbilisidə oktyabrın 12-də itkin düşməsi xəbəri yayılıb. Dostu İrina Ruçko Mediazona-ya deyib ki, o, evdən iş dalınca çıxıb, əlavə heç nə deməyib.

Şepelev itkin düşəndən bir gün sonra ona qarşı Rusiyanın Vladiqafqaz şəhərində inzibati iş açılıb. Əvvəlcə xırda xuliqanlıq ittihamı ilə 15 sutkalıq həbsə məhkum edilib. Sonradan ittiham terrorçu təşkilatın fəaliyyətində iştiraka dəyişdirilib. Buna görə 10 ildən 20 ilədək həbs nəzərdə tutulub. Fəala qarşı terrorçuluğu əsaslandırma ittihamı üzrə 5 ildən 7 ilədək həbs cəzası kəsilə bilər.

Oktyabrda başqa bir rusiyalı fəal – Lev Skoryakin Qırğızıstanda itkin düşüb, daha sonra onun Moskvada təcridxanada olduğu üzə çıxıb.

İsrail əməliyyatları bərpa edir, HƏMAS-ı atəşkəsi pozmaqda günahlandırır

İsrailin zirehli texnikası Qəzza zolağının sərhədinə doğru irəliləyir.
İsrailin zirehli texnikası Qəzza zolağının sərhədinə doğru irəliləyir.

İsrail ordusu dekabrın 1-də Qəzzada HƏMAS radikal qruplaşmasına qarşı döyüşləri bərpa etdiyini bildirib. ABŞ və Aİ-nin terrorçu saydığı HƏMAS İsrail ərazisinə atəş açmaqla yeddi günlük müvəqqəti atəşkəsi pozmaqda ittiham olunur.

Noyabrın 24-də başlanan atəşkəs iki dəfə uzadılıb. Qəzzada saxlanan onlarla girov, yüzlərlə fələstinli məhbus dəyişdirilib. Anklava humanitar yardımın göndərilməsi asanlaşıb.

Atəşkəs yerli vaxtla səhər 7-də başa çatırdı. İsrail atəşkəsin bitməsinə bir saat qalmış Qəzzadan atılan raketin vurulduğunu bildirib.

Dünən səkkiz girov buraxılıb

Fələstin mediası atəşkəs bitəndən sonra İsrailin anklava havadan və artilleriya zərbələri endirdiyini xəbərləyib.

HƏMAS durumu şərh etməyib, yaxud məsuliyyəti götürməyib.

Qətər və Misir atəşkəsin uzadılmasına çalışırdı. Dünən – noyabrın 30-da səkkiz girov 30 fələstinli məhbusla dəyişdirilmişdi.

İsrail bundan öncə bildirmişdi ki, günə minimum 10 girovun buraxılması qarşılığında quru əməliyyatı və bombardmanına fasilə verər.

HƏMAS oktyabrın 7-də İsrailə hücum edərək min 200 nəfərin qətlə yetirib, 240 nəfər girov götürülüb. İsrail buna cavabında bu radikal qruplaşmanı məhv edəcəyini bildirib.

İsrail intensiv bombardman və quru əməliyyatlarına başlayıb. BMT-nin etibarlı saydığı Fələstin səhiyyə orqanları azı 15 min qəzzalının öldürüldüyünü açıqlayıb.

Blinken Netanyahuya nə deyib

ABŞ-ın dövlət katibi Antoni Blinken (Antony Blinken) müharibə başlayandan İsrailə üçüncü səfərini edir. O, Təl-Əvivdə jurnalistlərə baş nazir Benyanim Netanyahu ilə görüşündən danışıb. Blinkenin sözlərinə görə, Netanyahuya deyib ki, İsrail Qəzzanın cənubunda şimalındakı kütləvi dinc sakin ölümlərini, adamların evlərindən didərgin düşməsini təkrarlaya bilməz.

"İsrail hökuməti bu yanaşma ilə razıdır. Buraya kritik infrastruktura, xəstəxanalara, su qurğularına ziyan vurmamaq üçün konkret addımları, təhlükəsiz zonaları aydın müəyyənləşdirmək daxildir", – Blinken söyləyib.

Almatıda hosteldə yanğında 13 nəfər ölüb

Almatı hosteli
Almatı hosteli

Qazaxıstanın ən böyük şəhəri Almatının mərkəzində yerləşən hosteldə yanğın baş verib, 13 nəfər həlak olub.

Almatı polisinin məlumatına görə, qurbanların doqquzu Qazaxıstan vətəndaşları, dördü əcnəbilərdir. Əcnəbilərin ikisi rusiyalı, ikisi Özbəkistan vətəndaşıdır.

Üçmərtəbəli binanın birinci mərtəbəsi və zirzəmisində yerləşən hosteldə çoxu əcnəbi olmaqla 72 nəfər qalırmış. 59 nəfər yanğından xilas ola bilib.

Rəsmi orqanların ölümlərin səbəbi kimi dəm qazından zəhərlənməni göstərir. Yanğının səbəblərinin araşdırılması üçün komissiya yaradılıb.

Almatı meri Yerbolat Dosayev deyib ki, Səhiyyə Nazirliyinin qaydalarına görə, qonaqların zirzəmilərdə yerləşdirilməsi qadağandır. Zirzəmiləri yalnız anbara və mətbəxə çevirmək olar.

"Orada, əsasən, qazaxlar yaşayırdı"

Ayyarım öncə açıldığı bildirilən hostel fəaliyyət lisenziyası almayıbmış. Bunu Almatı Fövqəladə Hallar Departamenti bildirib. Hosteldə yanğın siqnalizasiyası olub və hadisə vaxtı işə düşüb. Amma binada məcburi yanğınsöndürmə avadanlığı olmayıb.

Hosteldə qalan, cənubi Jambıl vilayətindən olan bir qazax insidenti "Tengrinews" xəbər portalına təsvir edib: "Yanğın başlayanda siqnalizasiya işə düşdü, hər tərəf tüstü idi. Hamı otaqlara girib o biriləri oyatmağa başladı. Hər kəs küçəyə qaçırdı, amma mən yanğını əslində görmədim. Birinci mərtəbədə yeddi otaq vardı, hərəsində də yeddi nəfər. Orada, əsasən, qazaxlar yaşayırdı".

1.8 milyon əhalisi olan Almatı 1997-ci ilədək Qazaxıstanın paytaxtı olub. Bu şəhər Orta Asiyanın əsas ticarət və mədəniyyət mərkəzi olaraq qalır.

Henri Kissincer 100 yaşında vəfat edib

Henri Kissincer
Henri Kissincer

ABŞ-ın keçmiş dövlət katibi Henri Kissincer (Henry Kissinger) vəfat edib. Onun 100 yaşı vardı.

Kissincer İkinci Dünya müharibəsindən sonra ABŞ-ın ən nüfuzlu dövlət katibi sayılır. O, 1969-cu ildə prezident Riçard Niksonun (Richard Nixon) milli təhlükəsizlik üzrə müşaviri olub. 1973-cü ildə ABŞ dövlət katibi təyin edilib və hər iki postu idarə edib. Prezident Nikson istefa verəndən sonra prezident Cerald Fordun (Gerald Ford) administrasiyasında da dövlət katibi kimi çalışıb.

Nobel Sülh Mükafatına aparan yol

Məhz həmin dönəmdə Birləşmiş Ştatlar xarici siyasətdə böyük addımlar atıb, Soyuq müharibənin yönünü dəyişib. Kissincerin 1971-ci ildə apardığı gizli danışıqlar nəticəsində Nikson Pekinə tarixi səfər edib, ABŞ və Çin arasında münasibətlər normallaşıb.

Kissincer SSRİ ilə münasibətlərin yaxşılaşdırılmasına tərəfdar idi. Onun sovet rəhbərliyi ilə dialoqu yumşalmaya gətirdi, nüvə silahlarına nəzarət üzrə ikitərəfli sazişlər imzalandı.

H.Kissincer Şimali Vyetnamla çoxillik danışıqların təşkili və aparılmasında vacib rol oynayıb. Bu isə Amerika qoşunlarının Cənubi Vyetnamdan çıxarılması ilə sonuclanıb. Bu səylərinə görə o, Nobel Sülh Mükafatına layiq görülüb.

Almaniyada doğulmuş H.Kissincer 1938-ci ildə, 15 yaşında ailəsi ilə Birləşmiş Ştatlara köçüb. O, orduda xidmət edib, Harvard Universitetini bitirib, beynəlxalq münasibətləri araşdırıb. Yazdığı kitablar Kissinceri siyasi dairələrdə məşhurlaşdırıb, respublikaçıların iki administrasiyasında işləməsinə yol açıb.

İranın Şərqi Azərbaycan vilayətində saxlanmış fəalların ailələri nigarandır

Əli Babayi, Davud Şiri və Yoruş Mehrəli Biqlu
Əli Babayi, Davud Şiri və Yoruş Mehrəli Biqlu

İranın Şərqi Azərbaycan vilayətində saxlanmış 13 siyasi və vətəndaş cəmiyyəti fəalının ailələri İran hakimiyyətini insan haqları pozuntularında ittiham edir. Onlar AzadlıqRadiosunun fars xidməti – Radio Fərda-ya deyiblər ki, qohumlarının vəkilə çıxışı təmin olunmur, onlara ittihamlar naməlum qalır.

Hər dəfə fərqli izah

Fəal Davud Şirinin qardaşı Əyyub Şirinin dediyinə görə, qardaşı sentyabrın 22-də Təbrizdəki evinin qarşısında saxlanıb, o vaxtdan onunla üç dəfə telefonla qısaca danışa biliblər.

Şiri qardaşına ittihamların aydın olmamasından da narahatlığını bildirib.

"Xəbərimiz yoxdur. Bizə ittihamın məğzini açıqlamayıblar, hər dəfə gedəndə də eyni şeyi deyirlər. Hakim orqanlar hər dəfə əlaqə saxlayanda fərqli izah verirlər", – o vurğulayıb.

Yılmaz Mehrəli Biqlunun qardaşı Ayət (Yuroş) noyabrın 7-də Culfada həbs olunub. Onun ailəsi də oxşar durumdan şikayətçidir. Onun dediyinə görə, qardaşı saxlanandan sonra bircə dəfə həyat yoldaşına qısa zəng edib. Ailəsi onun Təbriz Kəşfiyyat Təcridxanasında saxlanmasından şübhələnir.

"Məhkəmə sistemi bizi məlumatlandırmaqdan ötrü yetərincə müstəqil deyil. Biz Təbriz məhkəməsinə gedəndə cavab vermədilər, dedilər ki, qardaşınız dörd aylığa qonağımızdır", – Yılmaz Mehrəli Biqlu Radio Fərda-ya deyib.

Tibbi qayğı sarıdan narahatlıq

Bəzi ailələr təkcə informasiya qıtlığından, yaxud vəziyyətin hüquqi aspektlərindən deyil, saxlananların səhhətindən də nigaranlıq dilə gətiriblər.

Marağa şəhərində saxlanmış Həmid Yeganəpurun fiziki durumunun pisləşməsi xəbərləri gəlir. Ürəyində problemlər olmasına baxmayaraq, Yeganəpurun yetərli tibbi qayğı görmədiyi, xəstəxanaya qısa ziyarətdən sonra təcridxanaya qaytarıldığı bildirilir.

İsrail – HƏMAS atəşkəsi beşinci gündür davam edir

Fələstinlilər HƏMAS və İsrail arasında müvəqqəti atəşkəs zamanı Qəzza zolağının mərkəzindəki Deyr əl-Balah çimərliyində vaxt keçirirlər
Fələstinlilər HƏMAS və İsrail arasında müvəqqəti atəşkəs zamanı Qəzza zolağının mərkəzindəki Deyr əl-Balah çimərliyində vaxt keçirirlər

İsraillə HƏMAS radikal qruplaşmasının elan etdiyi müvəqqəti atəşkəs beşinci gündür davam edir. ABŞ və Aİ-nin terrorçu saydığı qruplaşma döyüşlərin yenidən başlanmasını yubatmaqdan ötrü daha çox dinc sakini azad etməyə boyun olub. İsrail isə döyüş zamanı dinc fələstinlilərə aman verməsi üçün təzyiq altındadır.

Tərəflər atəşkəsi çərşənbə günü – noyabrın 29-dək uzatmağa razılaşıblar. HƏMAS-ın girov götürdüyü şəxslərlə İsrail həbsxanalarında olan fələstinlilərin daha iki mübadiləsi gözlənilir.

ABŞ dövlət katibi Antoni Blinken (Antony Blinken) bu həftənin sonunda regiona müharibə başlayandan üçüncü dəfə səfər edəcək. Onun atəşkəsin uzadılması, daha çox girovun buraxılmasına çalışacağı gözlənilir. Dövlət Departamentinin məlumatına görə, Blinken həmçinin İsrailin Qəzzada əməliyyatları zamanı dinc sakinlərin qorunmasına yönəlik cəhdləri müzakirə edəcək.

İsrail HƏMAS-ı məhv edəcəyini deyir

HƏMAS-ın oktyabrın 7-də İsrailə hücum zamanı 240 nəfəri girov götürdüyü bildirilirdi, onların 160 nəfəri hələ də buraxılmayıb. Bu isə atəşkəsə daha iki həftəyə uzatmağa imkan verir. Amma HƏMAS-ın İsrailin əlində olan əsgərlərin buraxılması üçün daha böyük tələblər irəli sürəcəyi gözlənilir.

İstənilən halda, İsrail atəşkəs bitəndən sonra HƏMAS-ın darmadağın olunmasından ötrü müharibəni davam etdirəcəyini deyir.

HƏMAS-ın hücumu nəticəsində min 200 israilli öldürülüb. Bundan sonra İsrail Qəzza zolağını bombalamağa başlayıb. Azı 13 min fələstinlinin həlak olduğu bildirilir. Ancaq onların nə qədərinin dinc sakin, yaxud silahlı olduğu açıqlanmır.

İsrail HƏMAS-ın Qəzzada 16 ildir davam edən idarəçiliyinə son qoyacağını, onun hərbi gücünü məhv edəcəyini bildirir. Bundan ötrü Qəzzanın şimalında gedən quru əməliyyatının cənuba genişləndirilməsi tələb olunur. Şimalda bütöv yaşayış sahələri yerlə yeksan edilib.

Ötən həftədən qüvvəyə minən atəşkəs çərçivəsində 51 israilli və 19 digər millətlərdən olan girov azad edilib. İsrail həbsxanalarından isə 150 fələstinli buraxılıb. İsrail hər 10 əlavə girovun buraxılması üçün atəşkəsi bir gün uzatmağa razılaşıb.

Rusiyada amerikalı jurnalistin həbs müddəti uzadılır

Evan Qerşkoviç
Evan Qerşkoviç

Rusiya məhkəməsi ABŞ-ın "The Wall Street Journal" qəzetinin müxbiri Evan Qerşkoviç (Evan Gershkovich) barəsində həbs-qətimkan tədbirinin müddətini uzadıb. Moskvadakı Lefortovo rayon Məhkəməsi bu haqda noyabrın 28-də Telegram-da məlumat yayıb.

Qerşkoviç martın sonunda Uralın Yekaterinburq şəhərində saxlanılıb. Rusiyanın Federal Təhlükəsizlik Xidməti (FSB) onda bildirmişdi ki, Qerşkoviçə qarşı hərbi-sənaye kompleksi barədə dövlət sirlərini yığmağa görə casusluq işi açılıb. Jurnalist ittihamları rədd edib.

Təqsirli bilinərsə, ona 20 ilədək həbs cəzası kəsilə bilər.

Ağ ev və "The Wall Street Journal" bildiriblər ki, Qerşkoviç Rusiyada müvafiq akkreditə ilə işləyən jurnalist olub.

Qerşkoviç Moskvadakı Lefortovo həbsxanasında saxlanır. Çar dövründən qalan bu həbsxana sovet repressiyasının simvolu sayılır, Lefortovoda casusluqda şübhəli bilinənlər saxlanır.

Avqustun 24-də Lefortovo məhkəməsi həbs-qətimkan tədbirini üç aylığa, noyabrın 30-dək uzatmış, oktyabrın 10-da bu qərardan apellyasiya şikayəti təmin olunmamışdı.

Qerşkoviç kimdir

ABŞ vətəndaşı olan 31 yaşlı Qerşkoviç Moskvada yaşayır. O, Yekaterinburqda rusiyalıların Kremlin Ukraynaya qarşı müharibəsinə, "Vaqner" muzdlu qruplaşmasına münasibətindən yazmağa getmişdi.

Vəkil Mariya Korçaqina jurnalistlərə deyib ki, müdafiə tərəfi məhkəmədən Qerşkoviçin ev dustaqlığına, yaxud 50 milyon rubl (561 min dollar) qarşılığında zaminə buraxılmasını istəyib. Girov pulunu "The Wall Street Journal"ın sahibi "Dow Jones&Co" ödəyəcəkdi.

ABŞ Dövlət Departamenti Qerşkoviçi "qanunsuz saxlananlar" kateqoriyasına salıb. Bu isə Departamentə Qerşkoviçin maraqlarına uyğun hərəkət etməyə əsas verir.

Rusiya amerikalıları Birləşmiş Ştatlarda saxlanan rusiyalılarla dəyişmək məqsədilə saxlamaqda ittiham olunur.

AzadlıqRadiosunun müxbiri də saxlanılıb

AzadlıqRadiosunun müxbiri, ikili ABŞ və Rusiya vətəndaşlığı olan Alsu Kurmaşeva ötən ay saxlanıb, "xarici agent" kimi qeydiyyatdan keçməməkdə ittiham olunub. Buna görə 5 ilədək həbs cəzası kəsilə bilər.

Kurmaşeva mayda ailəsində yaranmış təcili vəziyyətə görə Rusiyaya gedib, iyunun 2-də geri qayıdarkən Kazan aeroportunda saxlanıb, hər iki pasportu müsadirə olunub. O, pasportlarının qaytarılmasını gözləyirdi, oktyabrın 18-də yenidən saxlanıb, ona ittiham irəli sürülüb.

AzadlıqRadiosunun azı 30 jurnalisti Rusiyanın Ədliyyə Nazirliyi tərəfindən "xarici agent" siyahısına salınıb.

AzadlıqRadiosu bildirir ki, "xarici agent" qanunu siyasi senzuraya bərabərdir, məqsəd jurnalistlərin peşəkar borclarını icra etməsinin qarşısını almaqdır. AzadlıqRadiosu Rusiya məhkəmələrində, Avropa İnsan Hüquqları Məhkəməsində iddialar qaldırıb.

İranda 17 yaşlı oğlan edam olunub

Həmidrza Asari
Həmidrza Asari

İranda qətlə görə mühakimə olunaraq təqsirli bilinmiş 17 yaşlı oğlan edam edilib. Bu haqda Norveçdə yerləşən "Hengaw" və İran İnsan Hüquqları (İİH) təşkilatları məlumat yayıb.

İİH Həmidrza Asarinin noyabrın 24-də edam olunduğunu bildirib.

"Qeyd olunmalıdır ki, onun daha öncə yayımlanmış məcburi etirafında və dövlət mediasının xəbərində yaşı 18 göstərilirdi", – İİH qeyd edir. Qurum bunu yeniyetmələrə qarşı ölüm hökmünü qadağan edən beynəlxalq qanunlardan yayınma cəhdi sayır.

İİH yeni əldə etdiyi məlumata əsasən Asarinin iddia olunan qətl vaxtı 16 yaşı olduğunu yazır. Onun Sabzevar həbsxanasında edam edildiyi vurğulanır.

Qurum "Tasnim" agentliyinə istinadla bildirir ki, gənc iddia olunan namus qətlinə görə təqsirli bilinib.

İranda bu il edamların kəskin artması beynəlxalq ictimaiyyətin qınağına səbəb olub. Tənqidçilərin dediyinə görə, bir çox hallarda tələsik hökmlər çıxarılır, saxta məhkəmələr keçirilir, məcburi etiraflar alınır.

Ermənistan və Səudiyyə Ərəbistanı diplomatik münasibətləri təsis edir

Ermənistanla Səudiyyə Ərəbistanı arasında diplomatik münasibətlərin qurulmasına dair protokol imzalandığı bildirilir.

İki ölkə arasında diplomatik münasibətlərin yaradılmasına dair razılıq BƏƏ paytaxtı Əbu Dabidə imzalanıb.

Ermənistanın Xarici İşlər Nazirliyinin məlumatına görə, ölkələr arasında əldə olunan protokol Ermənistanın və S.Ərəbistanın BƏƏ səfirləri tərəfindən imzalanıb.

"Bu barədə protokolu Əbu-Dabidə Ermənistanın BƏƏ-dəki səfiri Karen Qriqoryan və Səudiyyə Ərəbistanının səfiri Sultan bin Abdulla Əl-Anqar imzalayıblar", - məlumatda qeyd olunub.

Azadlıq Radiosunun Ermənistan xidməti yazır ki, Səudiyyə Ərəbistanı Qarabağ konfliktinin başlamasının ardından Azərbaycanın ərazi bütövlüyünün təmin olunmadığı müddət ərzində Ermənistanla diplomatik münasibətləri qurmayacağını açıqlamışdı.

İtaliyada 22 yaşlı qadının qətli etirazlara səbəb olur

İtaliyada qadın qətlləri əleyhinə etirazlar
İtaliyada qadın qətlləri əleyhinə etirazlar

İtaliyada universitet tələbəsi, 22 yaşlı qadının keçmiş sevgilisi tərəfindən öldürülməsi ölkə boyunca etirazlara səbəb olub.

"The Guardian" məcmuası yazır ki, hər üç gündə bir qadının zorakılıq qurbanı olduğu İtaliyada qadın cinayətləri əsas müzakirə mövzularından biridir.

Mühəndislik tələbəsi olan 22 yaşlı Giulia Cecchettin-in cəsədi məzuniyyət tədbirindən qısa müddət əvvəl Venesiyanın şimalındakı gölün yaxınlığındakı xəndəkdə tapılıb. Universitet tələbəsinin plastikə bükülmüş və bir neçə dəfə bıçaqlanmış şəkildə tapıldığı bildirilir.

Qeyd edək ki, İtaliyanı sarsan cinayətin şübhəlisi Filippo Turetta hadisədən bir həftə sonra yol kameralarının köməyi ilə ələ keçirilərək saxlanılıb.

21 yaşlı Turettanın avtomobili xarab olduqdan sonra yolda qaldığı və Almaniyada həbs olunduğu bildirilir. Yerli mətbuat yazır ki, Almaniyanın şərqindəki saxlanılan Turetta məhkəmə qərarı ilə İtaliyaya ekstradisiyasının artıq təsdiqlənib.

Son bir ildə 106 qadın cinayəti

Noyabrın 25-də Qadın Zorakılığına qarşı Beynəlxalq Mübarizə Günündə İtaliyanın bir çox yerində Cecchettin-in diqqət mərkəzində olduğu etirazların olacağı gözlənilir.

Bolonya Univeristetinin araşdırmaçısı Cristina Gamberi deyir ki, İtaliyada son bir ildə 106 qadın ya sevgilisi ya da keçmiş partnyoru tərəfindən öldürülüb.

Avropa Gender Bərabərliyi İnstitutunun 2021-ci ildə dərc etdiyi və 2018-ci ilin məlumatlarına əsaslanan hesabatına görə, İtaliya 15 Avropa İttifaqı ölkəsi arasında qadınların partnyorları və ya keçmiş partnyorları tərəfindən öldürülməsi hallarına görə 9-cu, qohumlar tərəfindən törədilən qadın qətllərinə görə isə 10-cu yerdə qərarlaşıb.

Rusiya ordusunun Kiyevə 'ən böyük' dron hücumu etdiyi bildirilir

Rusiya ordusunun səhər saatlarında Ukrayna paytaxtını geniş miqyaslı dron hücumu ilə hədəf aldığı bildirilir.

Ukrayna prezidenti Zelenski çox sayda yaralı və dağıntılara səbəb olan hücumu "qəsdən terror aktı" olaraq adlandırıb.

“Rusiya 70-ə yaxın “Şahed” pilotsuz uçan aparatını məhz Holodomor soyqırımının anım günü ərəfəsində Ukraynaya göndərib”. - bu sözləri Ukrayna lideri Volodomir Zelenski öz X səhifəsində yazıb.

Ukraynanın hava qüvvələri Rusiya ordusu tərəfindən atıldığı bildirilən 75 drondan 71-i zərəsizləşdirdiklərini açıqlayıb.

Kiyev şəhərinin hərbi administrasiya rəhbəri Mixaylo Şamanov noyabrın 25-də, səhər saatlarında baş verən hücumu Rusiyanın Ukraynaya hücumunun başladığı gündən ən böyük dron hücumu adlandırıb.

Kiyev rəsmiləri dron hücumlarının Solomyanskiy rayonunu hədəf aldığı və başda elektrik xətləri olmaqla yaşayış binalarında dağıntılara səbəb olduğunu deyir.

Rusiyada 'xarici agent'in materiallarını işarələmədən yaymağa görə cərimə gəlir – 5 min 600 dollar

Jurnalist Moskvada Federal Təhlükəsizlik Xidmətinin qərargahı yaxınlığında "Xarici agentlər özünüzsüz" yazılmış plakat tutur.
Jurnalist Moskvada Federal Təhlükəsizlik Xidmətinin qərargahı yaxınlığında "Xarici agentlər özünüzsüz" yazılmış plakat tutur.

Rusiyada "xarici agent"in hazırladığı materialları işarələmədən, "bilərəkdən, yaxud bilməyərəkdən" təbliğ edən, yaxud yayan üçüncü tərəf 500 min rubl (5 min 600 dollar) cərimələnə bilər. Bunu noyabrın 23-də ədliyyə nazirinin müavini Oleq Sviridenko deyib.

Onun rəsmi TASS agentliyinə dediyinə görə, ədliyyə naziri Konstantin Çuyçenko ayın sonunda uyğun əmri imzalayacaq, daha sonra hökumət fərmanı dərc olunacaq.

Nazir müavini deyib ki, cərimələr kitabxanalara, kitablara, universitetlərə, televiziyaya, eləcə də "xarici agent"lərə bilərəkdən, yaxud bilməyərəkdən kömək edən, yaxud dəstəkləyən sıravi şəxslərə şamil ediləcək.

"Xarici agent" qanunu

Mövcud qanunvericiliyə əsasən, "xarici agent"ə yardım etməyə görə hüquqi şəxslər 500 min, vətəndaşlar isə 50 min rubladək cərimə edilir. Ancaq "xarici agent"in materiallarının yayılmasının yardım sayılıb-sayılmadığı göstərilmir.

Rusiyada 2012-ci ildən tətbiq olunan qanuna görə, hakimiyyət xaricdən maliyyə alaraq siyasi fəaliyyətlə məşğul olan qeyri-kommersiya təşkilatlarını "xarici agent" elan edə bilər.

Qanun media orqanları və fərdi jurnalistləri də "xarici agent" elan etməyə imkan verir. Buraya xaricdən maliyyə almayan, ancaq "xarici təsir altında olanlar" da daxildir. Bu kateqoriyaya salınanların materialları "xarici agent" tərəfindən hazırlanmasına dair qeydlə birlikdə yayılmalıdır.

Ədliyyə Nazirliyi AzadlıqRadiosunun azı 30 əməkdaşını "xarici agent" siyahısına salıb.

Qalkinin şousu efirə verilirsə...

Sviridenkonun dediyi addım isə bu tələbləri üçüncü tərəflərə də aid edəcək.

Nazir müavini misal da çəkib ki, telekanal Maksim Qalkinin iştirakı ilə şou yayınlayırsa, onun "xarici agent" olduğunu xüsusi qeydlə bildirməlidir. Müğənni Alla Puqaçovanın həyat yoldaşı Qalkin Rusiyanın Ukraynanı işğalına etiraz olaraq ölkədən gedəndən sonra "xarici agent" elan olunub.

Belə bir pozuntu baş verərsə, Ədliyyə Nazirliyi xəbərdarlıqlar göndərəcək. "Bir ay ərzində cavab gəlməsə, əvvəlcə 300-500 min rubl cərimə tətbiq olunacaq. Vəziyyət bundan sonra da irəli gedə bilər", – Sviridenko vurğulayıb.

Tehranda Behişti Universitetinin tələbələri tətil edir

Behişti Universiteti tələbələrinin tətili
Behişti Universiteti tələbələrinin tətili

Tehranın Behişti Universitetinin psixologiya fakültəsinin tələbələri noyabrın 21-də tətilə başlayıb. Bu bir müddətdir davam edən tələbə etirazlarında əhəmiyyətli eskalasiya sayılır. Ölkə boyunca tələbələr şəhərciklərdə təhlükəsizlik tədbirlərinin gücləndirilməsinə, məcburi hicab qanununun daha sərt formada tətbiqinə etiraz edirlər.

Tələbələr tətili son vaxtlar baş verənlərə etiraz olaraq keçirdiklərini deyiblər. Noyabrın 20-də maskalı şəxslərin təhsil ocağının təhlükəsizlik qüvvələri ilə birlikdə dərs otaqlarına girərək hicab taxmayan qadın tələbələrin şəxsiyyət sənədlərini müsadirə etdiyi bildirilir.

Şahidlər naməlum şəxslərin baş örtükləri sürüşmüş qadın tələbələri hədəfə aldığını deyirlər.

Bu tətil İranda tələbə fəallığının artmasını göstərir. Bu yaxınlarda Tərbiyət Müdərris Universitetinin tələbələri dərslərə girməyərək təhsil ocağının təhlükəsizlik qüvvələrinin repressiv taktikasına etirazlarını bildiriblər.

Dərinləşən repressiya və etirazlar

Yeni dərs ilindən İran universitetlərində repressiv mühit güclənib. Kəşfiyyat və təhlükəsizlik qurumları daha çox adamı dindirməyə çağırır, inzibati tədbirlər görülür, hətta tələbələr və fakültə üzvləri kənarlaşdırılır.

İranda universitetlər, tələbələr daha böyük sosial və siyasi azadlılar uğrunda mübarizənin önündə gediblər. 1999-cu ildə tələbələr islahatçı qəzetin bağlanmasına etiraz ediblər. Tehran Universitetinə qəddar reyddə azı bir tələbə öldürülüb.

Hakimiyyət isə illərlə tələbə fəalları və liderlərini həbs etdirib, onların təhsil almasını yasaqlayıb.

Fəalların HRANA xəbər agentliyinin məlumatına görə, 2022-ci ilin sentyabrından başlamış etirazlarda azı 700 universitet tələbəsi həbs olunub. Həmin etirazlara 22 yaşlı Məhsa Əmininin, guya, hicab qaydasını pozduğuna görə saxlanandan sonra vəfat etməsi səbəb olub.

Saxlanan tələbələr həbsə, yaxud şallaq cəzasına məhkum edilib. Onlarla tələbə universitetlərdən qovulub.

Rusiya Ukraynaya dron zərbələri endirir

Rusiya dronunun Zaporojye vilayətinə hücumu
Rusiya dronunun Zaporojye vilayətinə hücumu

Noyabrın 22-də səhər Rusiya qüvvələri Ukraynanın Dnepropetrovsk vilayətindəki Nikopol şəhərini atəşə tutub, yaralılar var, şəhərə ziyan dəyib. Bu haqda vilayətin qubernatoru Sergey Lısak Telegram-da yazıb. Ukraynanın havadan müdafiə qüvvələri isə Rusiyanın daha bir dron zərbəsi dalğasını dəf etdiyini bildirib.

"İşğalçılar ötən gecədən Nikopol vilayətini ağır artilleriyadan dörd dəfə atəşə tutublar", – yazan Lısak iki dinc sakinin yaralandığını sözlərinə əlavə edib. O, şəhərdə elektrik xətlərinin qırıldığını, azı min 200 ailənin elektriksiz qaldığını bildirib.

Dron hücumu

Rusiya Nikopolu tez-tez artilleriya və dron zərbələrinə məruz qoyur, dinc sakinlər arasında itkilər olur, infrastruktur zədələnir. Ötən həftə dron zərbəsində bir nəfər öldürülüb.

Ukrayna havadan müdafiə qüvvələri isə noyabrın 22-də bildirib ki, Rusiya ötən gecə bir neçə vilayətə dron hücumu edib, ancaq İran istehsalı olan 14 dronun hamısı vurulub.

Məlumatda deyilir ki, Rusiyanın qanadlı raketi Zaporojye vilayətinə düşüb, ancaq hədəfə dəyməyib, infrastruktura ziyan dəyib.

Bu arada Rusiyanın Müdafiə Nazirliyi işğal olunmuş Krım üzərində Ukraynanın üç dronunun, habelə dörd donanma dronunun vurulduğunu bildirib.

Cəbhədə vəziyyət

Ukrayna qüvvələri son 24 saat ərzində cəbhə xəttində yaxın məsafədən 48 döyüşün baş verdiyini açıqlayıblar. Donetsk vilayətində Lıman, Baxmut və Avdeyevka istiqamətlərində Rusiyanın hücumlarının qarşısının alındığı bildirilir.

Noyabrın 21-də Almaniya Ukraynaya 1.3 milyard avro (1.42 milyard dollar) hərbi yardım ayırıb. Yardıma dörd ədəd IRIS-T havadan müdafiə sistemləri, eləcə də artilleriya sursatı daxildir.

Müdafiə naziri Boris Pistorius Kiyevə səfəri zamanı belə bir açıqlama verib.

Almaniya ABŞ-dan sonra Kiyevə böyük yardım ayıran ikinci ölkədir. İndiyədək Ukraynaya artıq üç ədəd IRIS-T sistemləri verilib, sonuncusu ötən ay çatdırılıb.

İsrail və HƏMAS atəşkəsə razılaşıblar

İsrail tankları Qəzzada
İsrail tankları Qəzzada

İsrailin baş naziri Binyamin Netanyahu noyabrın 22-də səhər Qəzza sektorunda azı dörd günlük atəşkəs elan edib. Bu müddətdə HƏMAS radikal qruplaşması (ABŞ və Aİ tərəfindən terrorçu sayılır) 200-dən çox girovun azı 50-sini azad etmək öhdəliyi götürüb. HƏMAS-ın radikal silahlıları oktyabrın 7-də İsrailə hücum edərək azı 240 nəfəri girov götürüb, min 200 nəfər öldürülüb.

İsrail hökuməti noyabrın 22-nə keçən gecə xüsusi iclasda HƏMAS-la razılaşmanın şərtlərini təsdiqləyib. Razılaşmanın birinci mərhələsində radikal silahlılar dörd gün ərzində azı 50 girovu buraxmalıdırlar. Netanyahunun sözlərinə görə, sonrakı mərhələdə atəşkəs rejimi uzadıla, hər 10 girovun azad olunması qarşılığında bir gün əlavə oluna bilər.

Ancaq Netanyahu bəyanatında İsrail həbsxanalarından fələstinlilərin buraxılmasına toxunmayıb.

Qətərin vasitəçiliyi ilə əldə olunan razılaşmada İsrail həbsxanalarında saxlanan fələstinli məhkumların – qadınların və yeniyetmələrin bir qisminin azad edilməsi də nəzərdə tutulurdu. 150-dən 300-dək müxtəlif rəqəmlər səslənirdi. Qətərin Xarici İşlər Nazirliyi isə rəsmi bəyanatında İsrailin azad edəcəyi fələstinlilərin sayını açıqlamır.

Atəşkəs nə vaxt qüvvəyə minəcək

ABŞ prezidenti Co Bayden (Joe Biden) İsraillə HƏMAS arasında razılaşmanın əldə olunmasını alqışlayıb. O, bütün aspektlərin icra olunacağına ümidini bildirib.

Atəşkəs rejimində İsrail qüvvələri Qəzzadakı mövqelərində qalacaqlar, anklavın şimal hissəsini tərk etmiş sakinlərin qayıtmaq imkanı olmayacaq. Bu dönəmdə Qəzzaya humanitar yardım və yanacaq maşınları buraxılacaq.

Ancaq atəşkəsin noyabrın 23-dən tez qüvvəyə minməyəcəyi gözlənilir, çünki İsrailin məhkəmə orqanları əvvəlcə bu sənədin qanuniliyini dəyərləndirməlidir. Günə 12 girovun buraxılması gözlənilir.

HƏMAS-ın hücumundan sonra İsrail Qəzzanı bombalamağa başlayıb. Qəzzadakı rəsmiləri azı 12 min nəfərin öldürüldüyünü bildirirlər.

Davamı

XS
SM
MD
LG