Elinanın ölümünə səbəb olan diaqnoz 26 saat sonra qoyulubmuş...
162 saylı orta məktəbin 8-ci sinif şagirdi Elina Hacıyevanın intihar cəhdindən sonra ölümüylə bağlı məhkəmə araşdırmaları yekunlaşdı. Oktyabrın 11-də Səbail rayon Məhkəməsində məktəblinin ölümünə görə cinayət məsuliyyətinə cəlb olunmuş keçmiş direktor Sevinc Abbasovanın işi üzrə istintaqın tamamlandığı elan edilib. Oktyabrın 16-da prokuror çıxış edib ona cəza istəyəcək.
Məhkəmə istintaqı yekunlaşmamışdan öncə Elina Hacıyevanın anasının vəkilləri ev dustaqlığında olan keçmiş direktorun həbsi barədə vəsatət qaldırıblar. Deyiblər ki, S.Abbasova şahidlərə təzyiq göstərib, əllərində bunu təsdiqləyən sübutlar var.
«Mən ona necə təsir göstərmişəm ki...»
Vəkil Sevinc Əliyeva keçmiş direktorun məktəbin psixoloqu olmuş Könül Ağayeva (o da Elinanın ölümündən sonra işdən çıxarılıb-red.) ilə Whatsapp yazışmasını, psixoloqun yerli mediaya müsahibəsi olan diski, məktəbin sabiq müdir müavini Məlahət Hüseynova barəsində məhkəmə qərarlarını sübut kimi hakimə təqdim edib. Sözügedən məhkəmə qərarlarında şahid ifadələri var ki, işdən çıxarılan M.Hüseynova haqqında həqiqətə uyğun olmayan şikayətlərə, aktlara imza atmağa onları S.Abbasova məcbur edib. Diskdəki müsahibədə isə psixoloq bildirir ki, məhkəmədə dindirilməmişdən əvvəl S.Abbasova onunla əlaqə saxlayıb, onun mənafeyinə uyğun ifadə verməsini istəyib.
Təqsirləndirilən S.Abbasova isə kimsəyə təzyiq göstərmədiyini deyib: «Mən ona necə təsir göstərmişəm ki, məhkəmədə mənim əleyhimə kifayət qədər ağır ifadə verdi? Əgər təsir vardısa, burada dindiriləndə niyə demirdi?».
Vəsatət təmin olunmayıb.
Məhkəmədə həm təqsirləndirilən direktorun vəkili, həm də zərərçəkmiş tərəf Elinanın ölümüylə bağlı rəy vermiş ekspertlərin dindirilməsi, təkrar ekspertiza keçirilməsi barədə də vəsatətlər qaldırıblar. Bildiriblər ki, ekspert rəyi ilə məhkəmədə dindirilən həkimlərin dedikləri arasında kəskin ziddiyyətlər var.
«İş materiallarından görünür ki, Elinanın ölümünə səbəb olan diaqnozu ona hadisədən 26 saat sonra qoyublar. Buna görə heç kim məsuliyyət daşımır», - deyən zərərçəkmişin vəkili Azər Nağıyev həkimlərin də məsuliyyətinə diqqət çəkib.
Amma məhkəmə təkrar ekspertiza və ekspertlərin dindirilməsi barədə vəsatətləri də təmin etməyib.
Prokuror məktəb direktoruna cəza istədi
162 saylı orta məktəbin şagirdi Elina Hacıyevanın intiharına görə cinayət məsuliyyətinə cəlb olunan Sevinc Abbasovaya prokuror cəza istəyib. Oktyabrın 16-da Səbail rayon Məhkəməsində çıxış edən prokuror məktəbin keçmiş direktorunun azadlığının 2 il 6 ay məhdudlaşdırılmasını (elektron qolbaq tətbiqi-red.) təklif edib.
Prokuror qısa çıxış edib. Deyib ki, S.Abbasovaya qarşı CM-in 143 (təhlükədə qoyma) və 314.2 (səhlənkarlıq-ağır nəticələrə səbəb olduqda) maddələriylə verilən ittiham məhkəmədə sübuta yetirilib. Onun işini ağırlaşdıran və yüngülləşdirən hallar yoxdur.
Prokuror keçmiş direktora 3 il 6 ay azadlığın məhdudlaşdırılması cəzası istəyib. S.Abbasovanın ev dustaqlığında olması nəzərə alınıb, üzərində 2 il 6 ay cəza saxlanmasını təklif edib. Dövlət ittihamçısı ona əlavə cəza kimi, 3 il də pedaqoji fəaliyyətlə məşğul olmağın qadağan olunmasını uyğun bilib.
Elinanın anasının vəkilləri çıxışa hazırlaşmaq üçün vaxt istəyib. Onlara oktyabrın 18-nə qədər vaxt verilib.
Təqsirləndirilən S.Abbasova AzadlıqRadiosuna deyib ki, ittihamların məhkəmədə sübuta yetirilməsi barədə prokurorun dedikləriylə razılaşmır: «Heç nə sübuta yetirilməyib. Ümumiyyətlə, istintaq düzgün istiqamətdə aparılmayıb».
Elinanın anası Sevil Hüseynova AzadlıqRadiosuna deyib ki, prokurordan belə yumşaq cəza tələbi gِözləmirdi: «Ümidim vardı ki, heç olmasa, 3 il həbs olunacaq. Vəkillərim əllərindən gələni eləyirlər. Əgər nəticə istədiyimiz kimi olmasa, bu işi Avropa Məhkəməsinə çıxaracağıq. Belə qoymayacağıq».
Elina Hacıyevanın anası prezidentə müraciət edib
162 saylı məktəbdə intihara cəhddən sonra xəstəxanada vəfat etmiş Elina Hacıyevanın anası Sevil Hüseynova prezident İlham Əliyevdən kömək istəyir. Oktyabrın 17-də məktubla dövlət başçısına üz tutan S.Hüseynova qızının ölümünə görə günahkar saydığı şəxslərin cəzalanmamasından gileylənir. O, özəlliklə həkimlərin məsuliyyətdən kənarda qalması, məktəbin direktoru Sevinc Abbasovaya prokurorun 2 il 6 ay azadlığın məhdudlaşdırılması cəzası istəməsindən narazılığını bildirir.
«Daha ağır nə baş verməli idi ki, uşağımı 2 saat otağında inildətdirən qadın layiqli cəzasını alsın?! Mən ilk dəfə övladım keçinəndə, indi isə məhkəmədə özümü aciz hiss edirəm. Niyə görə dövlət ittihamını təmsil edən orqan mənim hüquqlarımı qorumaq əvəzinə, verdiyim bütün vəsatətlərə qarşı çıxır?! Niyə prokurorluq bu qadının layiqli cəza almasını istəmir?!», - S.Hüseynova prezidentə məktubunda yazır.
O vurğulayır ki, Elina məktəbdəki qısnamalara dözməyərək intihar edib. Qızının xəstəxanaya gec çatdırılması üzündən vəfat etdiyini bildirən ana dövlət başçısından bu məsələyə həssas yanaşılmasını xahiş edir: «Heç bir həkim məsuliyyətə cəlb edilməyib. Təhsil Nazirliyi uzun müddətdir qanunları çeynəyən bir adamı vəzifədə saxladığı halda, nəinki öz məsuliyyətini anlamır, hətta proseslərə vəkil göndərərək, bu işə görə heç bir məsuliyyət daşımadığını bəyan edir. Məsuliyyətə cəlb olunan bircə nəfər sabiq direktordur ki, ona da real və ədalətli cəza verilmir. Ana fəryadına biganə qalmayın!».
Elinanın ölümünə görə cinayət məsuliyyətinə cəlb olunan Sevinc Abbasova isə özünü təqsirli bilmir. O, ittihamların məhkəmədə sübuta yetirilməsi barədə prokurorun dedikləriylə də razılaşmır: «Heç nə sübuta yetirilməyib. Ümumiyyətlə, istintaq düzgün istiqamətdə aparılmayıb».
Elinanın anası məktəb direktorunun ona pul təklif etdiyini deyir
162 saylı orta məktəbdə intihar etmiş Elina Hacıyevanın anasına məktəbin keçmiş direktoru Sevinc Abbasova böyük məbləğdə pul təklif edib. Bu barədə Elinanın ailəsinin vəkili Sevinc Əliyeva oktyabrın 18-də məhkəmədə bildirib. Vəkilin sözlərinə görə, Sevil Hüseynova kasıb, ağır şərtlər altında yaşamasına baxmayaraq, təklifi qəbul etməyib.
Məhkəmədə iştirak edən sabiq direktor və vəkili bu məsələyə münasibət bildirməyib.
Məhkəmədə zərərçəkmiş S.Hüseynova və vəkilləri çıxış ediblər. Onlar prokurorun keçmiş direktora 2 il 6 ay azadlığın məhdudlaşdırılması cəzası istəməsinə etiraz ediblər.
«Belə çıxır ki, bu uşaq kasıb idi, qüvvəli adamı yox idi deyə, ona hər şey eləmək olardı? Elinanın əvəzinə pullu, güclü valideynin uşağı olsaydı, məktəbdə ona qarşı elə rəftara görə dərhal tədbir görülərdi. Mənim uşağımı məktəbdə aşağılayırdılar, incidirdilər, direktora da bu barədə məlumat verilmişdi. Ümid edirdik ki, tədbir görər, amma heç nə eləmədi. Mən artıq digər kiçik övladlarımı məktəbə göndərməyə qorxuram», – S.Hüseynova belə deyib.
Anasının sözlərinə görə, Elinaya peyvənd vurmaq olmazdı, allergiyası vardı, bunu onun tibbi kartında da yazmışdılar. Direktora da məlumat verilmişdi. Ancaq məktəbdə deyiblər ki, peyvənd vurulmayan qovulacaq: «Məcburən Elinaya peyvənd vurdular. Nəticədə qolu şişdi. Bundan sonra uşaqlar Elinaya «vərəm» deyib, ələ salırdılar».
S.Hüseynova məktəbin keçmiş direktoruna ağır cəza verilməsini istəyib. Vəkillərinin də tələbi eyni olub.
«Məhkəmə sinifdə qalmasın»
Azər Nağıyev deyir ki, Elina olayı ölkədə həm təhsilin, həm səhiyyənin, həm prokurorluğun durumunun yoxlanması - test idi: «Təhsil Nazirliyi də, Səhiyyə Nazirliyi də, prokurorluq da bu imtahandan keçmədi, sinifdə qaldı. İstəməzdik ki, məhkəmə də sinifdə qalsın. Məhkəmə millətin vicdanıdır. Heç bir günahkar cəzasız qalmasın ki, başqalarına da dərs olsun».
A.Nağıyev həkimlərin də barəsində xüsusi qərar çıxarılmasını istəyib.
Vəkil Emin İsayev deyir ki, nə istintaqda onları dinləyən tapıldı, nə də məhkəmədə. Qaldırdıqları vəsatətlərin heç biri təmin olunmayıb: «İnsanların istədiyi ədalətin bərqərar olmasıdır. Onu təmin edə biləcək yeganə şəxs Sizsiniz, cənab hakim! Əgər bunu etməyəcəksinizsə, daha heç bir sözümüz yoxdur».
Təhsil Nazirliyinin nümayəndəsi Elmar Kərimov zərərçəkmişin qaldırdığı 100 min manatlıq mülki iddiaya etiraz edib. Zərərçəkmiş tərəf o məbləğin təqsirləndirilən direktor və Təhsil Nazirliyindən birgə qaydada tutulmasını istəyir. Amma nazirliyin nümayəndəsi bildirir ki, təmsil etdiyi qurumun bu olayda günahı yoxdur: «Biz mülki iddianın əsaslı olub-olmamasını mübahisələndirmirik. Sadəcə, Təhsil Nazirliyinə aidiyyəti olmadığını deyirik».
Məhkəmə oktyabrın 24-də təqsirləndirilən Sevinc Abbasovanın vəkilinin çıxışı və özünün son sözüylə davam edəcək. Ardınca da hökm elan olunacaq.