Amerikalıların çoxu yeni seçilmiş prezident Donald Trump-ın öhdəliklərini yerinə yetirə biləcəyinə inanmır. «Gallup» sorğu təşkilatının araşdırmaları belə deməyə əsas verir.
Sorğular göstərir ki, ABŞ vətəndaşlarının cəmi 46%-i D.Trump-ın beynəlxalq böhranın öhdəsindən gələcəyinə ümidlidir. Onun hərbi gücdən müdrikliklə yararlanacağına inananların göstəricisi 47%-dir. Respondentlərin cəmi 44%-i D.Trump-ın administrasiyasındakı qalmaqalların qarşısını ala biləcəyinə əmindir.
«Gallup» əvvəlki prezidentlər – Barack Obama, George W.Bush və Bill Clinton hakimiyyətə gəlməzdən öncə aparılmış sorğularda amerikalıların 10-dan 7-nin onlara etimad göstərdiyini xatırladır.
Buna da bax-'Trump xofu' BP-ni İranla kontraktlardan çəkindirdi?
KONQRESLƏ ƏMƏKDAŞLIĞA İNAM BÖYÜKDÜR
«Gallup» sorğu zamanı əhalinin yeni prezidentə 7 məsələdə güvəni olub-olmadığını yoxlayıb. Bəlli olub ki, ABŞ əhalisi daha çox D.Trump-ın Konqreslə effektiv işləyəcəyinə (60%), iqtisadi çətinliklərin öhdəsindən gələcəyinə (59%), xaricdə ölkənin maraqlarını qoruyacağına (55%), icra orqanlarının işini tənzimləyə biləcəyinə (53%) inanır. Amma sorğu təşkilatı bu məsələlərdə də D.Trump-a etimad göstərənlərin sayının əvvəlki prezidentlərlə müqayisədə az olduğunu vurğulayır.
Sənəd müəlliflərinin fikrincə, D.Trump-ın iqtisadi çətinlikləri yoluna qoyacağına inam onun şəxsi biznesiylə bağlıdır. İqtisadiyyat D.Trump-ın seçki kampaniyası zamanı da ən çox vurğulanan məsələlərdən olub.
Sorğular demokratların arasında D.Trump-ın işini bacaracağına inananların çox az olduğunu göstərib. Məsələn, yeni prezidentin administrasiyasındakı qalmaqalları önləyə biləcəyinə əmin olan demokratlar sorğuya qatılanların cəmi 14%-ni təşkil edib. Ən böyük göstərici prezidentin Konqreslə əməkdaşlığına inananların göstəricisidir – 35%.
Buna da bax-Adam Schiff-ə görə, Trump ciddi müqavimətlə üzləşə bilər
Amma respublikaçıların 77%-dən 90%-ə qədəri D.Trump-ın prezident kimi işinin öhdəsindən gələcəyinə əmindir.
84% VS. 95%
Bununla belə, «Gallup» D.Trump-a etimad edənlərin həm tərəfdarları, həm də müstəqil respondentlər arasında az olduğunu, daha doğrusu, Obama və Bush-la müqayisədə az olduğunu qeyd edir. Partiyadaşları arasında D.Trump-a dəstək olanların göstəricisi ümumilikdə 84%-dir. Obama və Bush-un həmin göstəricisi 95% olub.
Sorğu müəlliflərinin fikrincə, rəqəmlərə şəxsən D.Trump-a münasibətlə yanaşı, dövlətə münasibət də təsir edib. «Gallup» son sorğuların amerikalıların dövlət idarəçiliyinə – dövlətin daxili və beynəlxalq problemləri həll edə biləcəyinə inamının azaldığını göstərdiyini qeyd edir. ABŞ əhalisinin prezident institutuna da etimadı bütün əvvəlki illərə nisbətən azdır – 33%-dir.
Bütün bunlar yeni prezident D.Trump-ın sələfləriylə müqayisədə Ağ Evdə daha çətin şəraitdə işləməyə başlayacağını göstərir.
D.Trump prezident kimi yanvarın 20-dən – inauqurasiya mərasimindən sonra fəaliyyətə başlayacaq.