Keçid linkləri

2024, 19 Mart, çərşənbə axşamı, Bakı vaxtı 09:22

Deputatlar büdcədən SOCAR-a pul ayrılmasını tənqid edir


Milli Məclis, 4 mart 2011
Milli Məclis, 4 mart 2011

““2018-ci il dövlət büdcəsinə dəyişikliklər edilməsi haqqında" qanun layihəsində qeyri-neft sektoru üzrə gəlirlərin 1 milyard manatdan artıq məbləğdə azaldılması sual doğurur. Biz qeyri-neft sektorunun inkişaf etdirilməsi üçün küllü miqdarda vəsait ayırırıq, lakin büdcədə bu sahə üzrə gəlirlərin azaldılması nəzərdə tutulur”.

Deputat:”Azərbaycan özü qaz hasil edir, lakin “Azərenerji”yə kompensasiya veririk?”

APA-nın xəbərinə görə, bunu bu gün, iyunun 22-də Milli Məclisin İqtisadi siyasət, sənaye və sahibkarlıq komitəsinin iclasında deputat Vahid Əhmədov deyib. Onun sözlərinə görə, bu məsələ diqqət mərkəzində saxlanılmalıdır:

Vahid Əhmədov, Bakı, 18 oktyabr 2011
Vahid Əhmədov, Bakı, 18 oktyabr 2011

“Bundan başqa, büdcədə xərclərin artırılması da nəzərdə tutulur. Bunlar əsasən pensiya, əmək haqları, sosial müavinətlərin yerinə yetirilməsi ilə bağlıdır. Eyni zamanda, büdcədə Dövlət Neft Şirkətinə qazma işləri ilə bağlı 663 milyon manat vəsaitin ayrılması nəzərdə tutulub. Mən bir məsələni başa düşə bilmirəm- Necə olur ki, Azərbaycan özü qaz hasil edir, lakin “Azərenerji”yə kompensasiya veririk? Düşünürəm ki, qeyri-neft sektorunun inkişafı daha diqqətdə olmalı olan məsələdir. Məni narahat edən digər məsələ İkinci Azərbaycan Kənd İnvestisiya Layihəsinin dayandırılması ilə bağlıdır. Dünya Bankı ilə birgə həyata keçirilən layihə ilə biz rayonlarda, kənd yerlərində təcili ehtiyac yaranan zaman investisiyadan istifadə edirdik. İndi bu layihə dayandırılıb. Kənd yerlərindən bizə müraciət çox olur. Mən kənd təsərrüfatı naziri İnam Kərimovla danışmışam. Lazımdırsa, prezident İlham Əliyevə də müraciət edilməsini xahiş edirəm,”

Buna da bax: Büdcə xərcləri 2 milyard artırılır​

“Burada korrupsiya elementlərinin olması ehtimalı böyükdür”

Başqa bir deputat Əli Məsimli“2018-ci il dövlət büdcəsinə dəyişikliklər edilməsi haqqında" qanun layihəsi ilə bağlı öz iradlarını bildirib:

Əli Məsimov, 2005
Əli Məsimov, 2005

"Biz hər il büdcəyə yenidən baxırıq. Büdcədə nəzərdə tutulan xərclər səmərəsiz xarakter daşıyır. Tikintiyə ayrılan vəsait 5 milyard manatdan çoxdur. İnsan inkişafına, təhsilə ayrılan xərclər isə azdır. Burada korrupsiya elementlərinin olması ehtimalı böyükdür. Bu məsləyə diqqət yetirmək lazımdır. Dövlət borcuna ayrılan vəsait 10 faizdən çox artırılıb. Dövlət zəmanəti ilə ayrılan borcların analizinə xüsusi ehtiyac var. Bir sıra dövlət təşkilatlarına ayrılan vəsait artırılıb. SOCAR Azərbaycan dövlət büdcəsinə yardım etməlidir. Dövlət büdcəsindən SOCAR-a yardım edilməməlidir. Bu, büdcədən vəsaitin qoparılması deməkdir. Bu istiqamətdə ciddi addımlar atılmalıdır. Əgər Azərbaycan əhalisinin maaşı 25 manatla 40 manat arasında artırsa, köməklik edilirsə, elə əhaliyə edilsin. Dövlət büdcəsindən SOCAR-a edilən yardım heç bir məntiqə sığmır. SOCAR kimi böyük şirkətlər bu cür yardıma arxayınlaşıb dövlət zəmanəti ilə kredit alıb qaytarmayacaqlar. Bu, Azərbaycanın dövlət büdcəsini donor büdcəyə çevirmək deməkdir”.

Nazirin iradlara cavabı

Buna da bax: Artan neft gəlirləri Azərbaycana ikinci şans verir, amma…​

Maliyyə naziri Samir Şərifov deputatıların iradına münasibət bildirib:

Samir Şərifov - 16 may 2014
Samir Şərifov - 16 may 2014

"Bəzi millət vəkilləri mənə müraciət ediblər.Burda İkinci Azərbaycan Kənd İnvestisiya Layihəsinin bağlanmasından söhbət getmir. Bu layihə regionlarda müəyyən işlərin görülməsi ilə bağlıdır. Layihənin dayandırılması yox, davam etdirilməsi nəzərdə tutulub. Lakin əvvəlki illərdə biz bu layihəni xarici borclanma hesabına edirdik. Bundan sonra layihəni daxili maliyyə imkanları hesabına həyata keçirəcəyik. Xarici borclanmaya getməməyin əsas səbəbi ondan ibarətdir ki, biz xarici valyuta ilə bağlı məsələlərə həssas yanaşırıq. Xarici valyutada gəlirlərimizi artırmağa çalışırıq, bunun hesabına ölkədən valyuta axınının qarşısını almalıyıq. Ona görə xarici borclanma yalnız o layihələr üçün nəzərdə tutulub ki, orada idxal komponenti qaçılmazdır. Kənd investisiya layihəsi ilə bağlı nəzərdə tutulan işlər daxili tikinti, abadlıqla bağlı işlərdir. Burada xarici valyutaya ehtiyac yoxdur".

Xatırlatma

Parlamentə 2018-ci il dövlət büdcəsinə dəyişikliklərlə bağlı layihə təqdim edilib. 2018-ci ilin dövlət büdcəsinin gəlirlərinin 1.983 milyard manat artırılacağı gözlənir. Büdcəyə dəyişiklikdən sonra gəlirlərin 22 milyard 110 milyon manat təşkil edəcəyi bildirilir.

Büdcənin xərclərinin də artırılmasının təklif olunduğu qeyd edilir. Xərclərin 2.014 milyard manat artırılaraq 23.061 milyard manata çatdırılmasının istəndiyi bildirilir.

Yayılan məlumatlara görə, hökumət həmçinin, dövlət büdcəsində neftin baza qiymətinin artırılmasını təklif edib. Büdcədə neftin qiymətinin 45 dollardan 55 dollara qaldırılmasının istəndiyi vurğulanır.Hazırda neftin bir bareli 75 dollar civarındadır.
Ancaq dəyişikliklər layihəsi, hələ rəsmi şəkildə dərc edilməyib.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

Abunə

XS
SM
MD
LG