“Ölkəmizdə hər şey “Asan” olub. Bu da “asan məhkəmə”. Başlanması ilə başa çatması bir oldu. Bloqqer Mehman Hüseynov məhkəmə zalında həbs edildi. Belə ildırım sürətli həbs ancaq “asan məhkəmədə” ola bilər”.
Milli Şuranın sədri, tarixçi professor Cəmil Həsənli bloqqer M.Hüseynovun həbsinə belə münasibət bildirib.
O, bloqqerin həbsinin təsadüfi olmadığını vurğulayıb:
“ Doğrusu, ölkəmizdə adamı təəccübləndirəcək daha bir şey qalmayıb. Hakimiyyət Mehmanı çoxdan gözaltı etmişdi. Onun “korrupsiya seriyaları” çoxlarının rahatlığını pozmuşdu. Bu seriyada göstəriləcək hələ çox yüksək vəzifəli məmur qalmışdı”.
Bu il yanvarın 9-da naməlum şəxslər M. Hüseynovu oğurlamışdı. Yalnız yanvarın 10-da Nəsimi rayon məhkəməsinə çıxaırlakən onun Nəsimi rayon 22 saylı Polis Bölməsində saxlandığı məlum olub. Məhkəmə M.Hüseynovu 200 manat cərimə edərək sərbəst buraxıb.
Jurnalistlər önünə çıxan M.Hüseynov saxlandığı müddətdə işgəncələrə məruz qalması haqda açıqlama verib. Vəkil E.Sadıqov işgəncə faktları ilə bağlı sübutları Baş Prokurorluğu təqdim edib. Bundan sonra Nəsimi Rayon Polis İdarəsinin rəisi M.Hüseynov barəsində xüsusi ittiham qaydasında iddia qaldırıb.
Suraxanı rayon məhkəməsi M.Hüseynovu martın 3-də 2 il müddətinə azadlıqdan məhrum edib. Bloqqer hakimiyyətin sifarişi ilə həbs olunduğunu bildirib.
