Ağ Evdə olan mənbələr ABŞ prezidenti Donald Trump-ın özünün ziddiyyətli baş siyasi strateqi Steve Bannon-u qüdrətli Milli Təhlükəsizlik Şurasından çıxardığını xəbər veriblər.
AzadlıqRadiosu xəbər verir ki, Milli Təhlükəsizlik Şurasının yeni tərkibi ABŞ hökumətinin Federal Qeydiyyat qurumu tərəfindən aprelin 5-də elan edilsə də, ictimaiyyət üçün aprelin 6-da açıqlanacaq.
Ağ Evdəki anonim mənbələr bunu da bildiriblər ki, bu barədə verilmiş memorandumda Bannon-un şuradan çıxarılması və tərkibə milli kəşfiyyat direktorunun və Qərargah Rəisləri Birləşmiş Komitəsi sədrinin daxil edilməsi qeyd olunub.
Ağ Evin vəzifəli rəsmisi Associated Press agentliyinə deyib ki, fevral ayında Trump-ın birinci milli təhlükəsizlik müşaviri Michael Flynn istefa verdikdən sonra Bannon-un şurada daimi üzv olmasına ehtiyac qalmayıb.
Trump-ın Bannon-u şuraya daxil etməsi bir çox opponentlər tərəfindən kəskin tənqidlə qarşılanmışdı.
Reuters agentliyi adının çəkilməsini istəməyən Ağ Ev rəsmisinə istinadən bildirib ki, Bannon-un şuradan çıxarılması hazırkı milli təhlükəsizlik müşaviri H.R. McMaster üçün qələbə hesab edilə bilər.
Bəzi məlumatlara görə, onunla Bannon arasındakı münasibətlər son dərəcə gərgin idi.
