Martın 20-si Qum adasındakı “Bahar” neft yatağında qəza olduğu bildirilir.
Bu barədə AzadlıqRadiosu-na Neftçilərin Hüquqlarının Müdafiəsi Komitəsinin həmsədri Mirvari Qəhrəmanlı məlumat verib.
Onun deməsinə görə, qəzada bir nəfər ölüb, iki nəfər isə ağır xəsarət alıb.
Buna da bax: SOCAR-da nə baş verir? Köhnələr tapılmamış, təzə neftçilər itkin düşdü... [video]
“Xəsarət alanlardan birinin də boyunu sınıb. Vəziyyətinin çox ağır olduğu deyilir. O yataqdakı quyulardan əvvəllər neft çıxarılıb. Sonra quyular dayanıb. İndi “Bahar Enerji Əməliyyat Şirkəti” quyuları yenidən təmir edib, işə salmaq istəyir. Söhbət 4 quyudan gedir. Həlak olan və xəsarət alanlar podratçı tikinti-quraşdırma idarəsinin işçiləri olub. Həmin yataq istismara yararsız olub...”
Buna da bax: Nərimanov NQÇİ-də daha bir qəza
Mirvari Qəhrəmanlı deyir ki, qeyri iş vaxtı, Novruz bayramı günü işçiləri ağır və təhlükəli işə çıxarmaq başa düşülən deyil?
“Bu, ölkədə həmkarların olmadığını göstərir. Həmin yataq “Bahar Enerji Əməliyyat Şirkəti”nə məxsusdur. Bu şirkət SOCAR-a tabe deyil. Ancaq bu ölkədə fəaliyyət göstərir. Şirkətin nə saytı var, nə də başqa əlaqə vasitələri...”
Mirvari Qəhrəmanlı deyir ki, tez-tez neft qaz çıxarma idarələrində insan itkiləri ilə nəticələnən qəzalar baş verir. Ancaq buna rəsmilərdən heç kim məsuliyyət daşımır.
Buna da bax: “Günəşli” yanğını ən fəlakətli qəzaların ilk onluğuna düşür- [video]
Məsələyə, hələlik, nə “Bahar Enerji Əməliyyat Şirkəti”dən, nə də Dövlət Neft Şirkətindən (SOCAR) münasibət almaq mümkün olub.
Azərbaycan Həmkarlar İttifaqları Konfederasiyası da, hələlik, susur.