CENTCOM: ABŞ blokadası çərçivəsində 31 gəmi geri qaytarılıb
ABŞ qüvvələri İrana dəniz blokadası çərçivəsində 31 gəminin istiqamətini dəyişərək geri dönməsini və ya limana qayıtmasını tələb edib. Bunu ABŞ Mərkəzi Komandanlığı (CENTCOM) aprelin 23-də X platformasında bildirib.
CENTCOM qeyd edib ki, əksəriyyət ABŞ-nin göstərişlərinə əməl edib və onların çoxu neft tankeridir.
ABŞ İran limanlarına qarşı dəniz blokadasına aprelin 13-də başlayıb. Bu, İranın Hörmüz boğazını bağlamasına cavab olaraq atılıb. İran fevralın 28-də ABŞ və İsraillə müharibəsi müharibə başlayandan az sonra boğazı faktiki bağlayıb. Qlobal neft və mayeləşdirilmiş təbii qaz tədarükünün təxminən beşdə biri Hörmüzdən keçir.
ABŞ Hərbi Dəniz Qüvvələrinin rəhbəri istefa verib
Pentaqonun aprelin 22-də yaydığı məlumata görə, ABŞ Hərbi Dəniz Qüvvələrinin rəhbəri Con Felan vəzifəsindən istefa verib.
İstefanın səbəbi açıqlanmayıb.
Neftin qiyməti 4 faiz artıb
ABŞ ilə İran arasında atəşkəsin taleyi ilə bağlı qeyri-müəyyənlik fonunda aprelin 23-də dünya bazarlarında neftin qiyməti təxminən 4 faiz yüksəlib.
ABŞ-nin "Qərbi Texas" markalı neftinin fyuçersləri gecə saatlarında 4 faizədək artaraq bir barel üçün 96.73 dollara çatıb.
Qlobal etalon hesab olunan "Brent" neftinin qiyməti 3.62 faiz yüksələrək bareli 105.63 dollara bərabər olub.
Bir neçə dəqiqə sonra qiymətlər müəyyən qədər korreksiya olunaraq aşağı düşüb.
Bu dalğalanmalar İranın ABŞ limanlarına dəniz blokadası qaldıqca, Hörmüz boğazını açmayacağını bildirməsi fonunda baş verir.
Almaniya Tehranı ABŞ ilə danışıqlara çağırır
Almaniya hökuməti İranı mövcud atəşkəs fürsətindən yararlanmağa və müharibənin yenidən alovlanmasını önləmək üçün ABŞ ilə diplomatik təmasları bərpa etməyə çağırıb.
Berlin Tehranı hərbi nüvə proqramını dondurmağa, İsraili və digər qonşu dövlətləri hədələməyi dayandırmağa, Hörmüz boğazının "daimi, etibarlı, məhdudiyyətsiz və ödənişsiz" şəkildə açıq qalmasını təmin etməyə çağırır.
"Hərtərəfli razılaşma əldə olunarsa, Almaniya hökuməti tərəfdaşları ilə birlikdə mövcud məhdudlaşdırıcı tədbirləri tədricən yumşaltmağa hazırdır. Əks halda, əgər İran Hörmüz boğazını bloklamağa davam edərsə, Almaniya hökuməti əlavə sanksiyaların tətbiqini gündəmə gətirəcək", – bəyanatda deyilir.