Antoniu Koşta: Yaxın Şərq müharibəsinin yeganə qalibi Rusiyadır
Yaxın Şərqdəki müharibənin indiyədək yeganə qalibi Rusiya olub. Səbəb isə enerji qiymətlərinin artması, Ukraynadakı təcavüzkar müharibəyə diqqətin azalmasıdır. Bunu martın 10-da Avropa İttifaqı (Aİ) Şurasının prezidenti Antoniu Koşta deyib.
"İndiyədək bu müharibənin bircə qalibi var, o da Rusiyadır", – Koşta Brüsseldə Aİ səfirləri qarşısında çıxışında deyib.
"Enerji qiymətlərinin qalxması Rusiyaya Ukraynadakı müharibəni maliyyələşdirməyə əlavə resurslar qazandırır. Rusiya Ukraynaya göndərilə biləcək hərbi imkanların başqa səmtə yönəlməsindən də faydalanır. Bundan əlavə, Yaxın Şərqdəki münaqişənin diqqət mərkəzinə gəlməsi Ukrayna cəbhəsinə diqqəti azaldıb", – Koşta vurğulayıb.
Onun sözlərinə görə, Aİ beynəlxalq qaydalara əsaslanan nizamı qorumalıdır, hazırda ABŞ bu düzənə meydan oxuyur. Koşta Yaxın Şərqdə bütün tərəflərin danışıqlar masasına qayıtmasının vacibliyini də qeyd edib.
"Azadlıq və insan hüquqları bombalarla əldə edilə bilməz. Onları yalnız beynəlxalq hüquq qoruyur", – o deyib.
Koşta daha böyük eskalasiyanı önləməyin vacibliyindən danışıb.
İran azərbaycanlıları savaşın ortasında: 'Ümidimiz itir'
Ərdəbildə yaşayan milli fəallardan biri AzadlıqRadiosuna danışır ki, ABŞ və İsrailin İrana hücumu, ali dini lider Əli Xameneinin öldürülməsi ilə bağlı insanlar arasında fikir ayrılığı var. Hökumətə müxalif olanlar isə yeni dini liderin təyinatından sonra ümidlərini lap itiriblər.
İranın polis rəisindən xəbərdarlıq
Regional müharibədə Tehranın düşmənlərini dəstəkləyən etirazçılarla nümayişçi kimi yox, düşmən kimi davranılacaq. AFP-nin yazdığına görə, belə xəbərdarlıqla İranın baş polis rəisi Əhməd-Rza Radan çıxış edib.
Onun sözlərinə görə, İslam Respublikasını müdafiə etmək üçün təhlükəsizlik qüvvələrinin "barmaqları tətikdədir".
İlin əvvəlində İranda iqtisadi narazılıqlarla başlayan etirazlar amansızlıqla yatırılıb. Rəsmilər iğtişaşlarda 3 mindən çox insanın öldüyünü deyirlər. Hüquq müdafiə qrupları itki sayının daha yüksək olduğunu bildirir.
Rəsmilər ABŞ və İsraillə münaqişə gərginləşdikcə, etiraz aksiyalarının yenidən baş qaldıra biləcəyindən ehtiyatlanırlar.
Hörmüz boğazı dünya iqtisadiyyatı üçün niyə bu qədər vacibdir
"Alternativ marşrutlar və boru kəmərləri mövcud olsa da, onlar Körfəz ölkələrinin bütün ixracını əvəz edə bilmir. Buna görə də Hörmüz boğazında hər hansı ciddi gərginlik qlobal iqtisadi sabitlik üçün birbaşa risk hesab olunur".
