İran Küveytdəki Amerika hərbi bazasını vurduğunu iddia edir
İranın İslam İnqilabı Keşikçiləri Korpusu (SEPAH) iyulun 24-də ABŞ-nin Küveytdə istifadə etdiyi Əli Əl-Səlim aviabazasına zərbə endirdiyini açıqlayıb
SEPAH-ın iddiasına görə, hücum nəticəsində böyük sursat anbarı və ABŞ hərbçilərinin yerləşdiyi bir neçə bina məhv edilib.
Qurum bildirir ki, altı iri bina tamamilə dağıdılıb, daha üç bina ciddi zədələnib, həmçinin ABŞ hərbçiləri arasında ölən və yaralananlar olub. Onların sayı açıqlanmayıb.
Bu iddiaları müstəqil mənbələrdən təsdiqləmək mümkün olmayıb. ABŞ ordusu və Küveyt hakimiyyəti də hələlik bununla bağlı rəsmi açıqlama verməyib.
ABŞ-nin Əhvaza zərbəsi nəticəsində 4 nəfər həlak olub
İran mediası iyulun 24-də səhər saatlarında ABŞ-nin zərbəsi nəticəsində 4 nəfərin öldüyünü, daha 7 nəfərin yaralandığını bildirib.
Əhvaz şəhəri ətrafına endirilən raket zərbəsi nəticəsində dörd nəfər həlak olub, beş nəfər isə yaralanıb.
Xuzistan vilayətinin rəsmisi Vəliullah Həyati hücumun dəqiq hansı ərazilərə edildiyi barədə məlumat verməyib. O əlavə edib ki, son 14 gün ərzində ABŞ Xuzistan vilayətinin 12 şəhərində bir neçə obyekti hədəfə alıb.
Bəndər-Abbasdan gələn xəbərlərə görə, iyulun 23-də şəhərin "Təppə Allahu Əkbər" adlanan ərazisinə zərbədən 2 nəfər yaralanıb. Hücumdan sonra həmin ərazidə elektrik enerjisinin verilişi dayandırılıb.
İsfahan vilayətinin rəsmisi də ABŞ-nin Nayin rayonundakı bir əraziyə zərbə endirdiyini açıqlayıb. O, hücum nəticəsində ölən və ya yaralanan olmadığını vurğulayıb.
BMT Hörmüz boğazındakı dənizçilərlə bağlı hərəkətə keçməyə çağırdı
BMT-nin İnsan Hüquqları üzrə Ali komissarı Volker Türk Hörmüz boğazında ilişib qalan minlərlə dənizçinin üzləşdiyi humanitar və insan hüquqları böhranının həlli üçün təcili tədbirlər görülməsinə çağırıb.
BMT İnsan Hüquqları üzrə Ali Komissarlığı İdarəsinin (OHCHR) sözçüsü Şabiya Mantunun sözlərinə görə, Hörmüz boğazında sıxışıb qalan təxminən 400 gəmidə azı 6 min dənizçi çıxılmaz vəziyyətdədir. O əlavə edib ki, Beynəlxalq Dəniz Təşkilatının (IMO) açıqladığı bu rəqəmlər də tam deyil: "Bu rəqəm mövcud mənzərəni tam olaraq ortaya qoymur, çünki bir çox dənizçinin taleyi hələ də bəlli deyil. Onların Fars körfəzində müxtəlif kiçik gəmilərdə qaldığı, yaxud yerlərinin müəyyən edilə bilmədiyi bildirilir".
Mantu bildirib ki, OHCHR-ə daxil olan məlumatlara görə, bəzi gəmi sahibləri dənizçiləri dənizdə taleyin ümidinə buraxıblar. Nəticədə onlar vətənlərinə qaytarılmır, hətta onlara ödənilməli olan əmək haqlarını belə ala bilmirlər.
Bəyanatda qeyd olunur ki, sözügedən dənizçilər gəmilərdə ərzaqsız, içməli susuz, yanacaqsız, tibbi yardımsız və elektrik enerjisiz qalıblar; həmçinin ailələri ilə əlaqə saxlamaq imkanından tamamilə məhrumdurlar.
"Bu vəziyyət isə onların həm psixi, həm də fiziki sağlamlığı üçün ciddi təhlükə yaradır", –açıqlamada vurğulanır.
Tramp: Gəmilərə dəyən ziyan İranın ABŞ-dəki vəsaitləri hesabına ödəniləcək
ABŞ prezidenti Donald Tramp bildirib ki, Hörmüz boğazında davam edən gərginlik fonunda gəmilərə və ya yüklərə dəyəcək istənilən zərər ABŞ-nin nəzarətində olan İran vəsaitləri hesabına kompensasiya olunacaq. Tehran isə bu bəyanata sərt reaksiya verib.
"Bu andan etibarən gəmilərə, yüklərə dəyən ziyan və ya bununla əlaqəli yaranacaq istənilən maliyyə öhdəliyi ABŞ-nin nəzarətində və sərəncamında olan İran vəsaiti hesabına ödəniləcək", – Tramp iyulun 24-də "Truth Social" platformasında yazıb.
Tehran Trampın bəyanatını kəskin şəkildə pisləyib. İranın xarici işlər naziri Abbas Əraqçi bu addımı "təhlükəli presedent" adlandırıb.
"Başqa bir dövlətin aktivlərini onunla heç bir əlaqəsi olmayan gələcək iddiaların ödənilməsi üçün müsadirə etmək təhrikedici bir presedentdir", – Əraqçi "X" platformasında yazıb.
O xəbərdarlıq edib ki, "belə vəsaitlərin istifadəsini alqışlayan və ya bundan mənfəət götürənlər yadda saxlamalıdırlar: hökumətlər müsadirəni norma halına gətirdikdən sonra artıq heç kimin aktivləri təhlükəsiz olmayacaq".
Əraqçi əlavə edib ki, bunun nəticəsində yaranacaq "xaos nə xoş, nə də dinc olacaq".