BƏƏ İranın Hörmüz boğazına nəzarətini rədd edir
Birləşmiş Ərəb Əmirliklərinin (BƏƏ) diplomatik müşaviri Ənvər Qarqaş İranın Hörmüz boğazı üzərində nəzarətini rədd edib. O, münaqişədən sonrakı dövrdə dəniz təhlükəsizliyinə dair beynəlxalq hüquqa əsaslanan təminatların vacibliyini vurğulayıb.
Qarqaş mayın 1-də X platformasında yazıb ki, "kollektiv beynəlxalq iradə və beynəlxalq hüququn müddəaları bu həyati əhəmiyyətli keçid üzərindən naviqasiya azadlığının əsas təminatçısıdır".
"İranın bütün qonşularına qarşı xain aqressiyasından sonra onun heç bir birtərəfli təşəbbüsünə etibar etmək və ya güvənmək olmaz", – o əlavə edib.
Son günlərdə İran rəsmiləri Tehranın Hörmüz boğazına nəzarət etmək niyyətini yenidən vurğulayıblar. Fevralın 28-də ABŞ və İsrail İrana hava zərbələrinə başlayandan bəri Tehran boğazı faktiki olaraq bağlayıb.
Dünyada neft və mayeləşdirilmiş qazın təxminən 20 faizi, BƏƏ-nin mayeləşdirilmiş təbii qaz ixracının isə, demək olar ki, hamısı Hörmüz boğazından keçir. Boğazdan keçən neftin 12-13 faizi BƏƏ-nin payına düşür.
Skot Bessent: İran valyutası rekord həddə ucuzlaşıb
ABŞ-nin maliyyə naziri Skot Bessent deyir ki, artan iqtisadi təzyiq, ölkəsinin İranın neft ixracına və dəniz marşrutlarına qarşı tətbiq etdiyi blokada fonunda İranın milli valyutası rekord səviyyədə ucuzlaşıb.
"Neft sənayesinin iflic olduğu, valyutanın sürətlə dəyər itirdiyi bir vaxtda İran rejimi nəhayət etiraf etməlidir ki, İran xalqı mövcud rejimin törətdiyi dağıntılardan qat-qat yaxşısına layiqdir", – o, X platformasında yazıb.
"İran xalqı yeni bir dövrə layiqdir. Bunu isə korrupsiyaya bulaşmış və xaotik İran rejimi təmin edə bilməz", – Bessent əlavə edib.
Tehranda hava hücumundan müdafiə sistemləri işə düşüb
Aprelin 30-da gecə saatlarında Tehranda hava hücumundan müdafiə sistemləri aktivləşdirilib. İran mediasının yaydığı məlumata görə, şəhərin müxtəlif istiqamətlərində zenit qurğularından atəş səsləri eşidilib. İlkin ehtimala görə, sistemlər pilotsuz uçuş aparatlarına reaksiya verib.
İran İslam İnqilabı Keşikçiləri Korpusu (SEPAH) ilə əlaqəli "Tasnim" və "Fars" agentlikləri bildirir ki, təxminən 20 dəqiqə ərzində Tehran səmasında kiçik uçuş aparatları və kəşfiyyat dronları hədəfə alınıb. Baş verənlərin hərbi təlim, yoxsa real hədəfə qarşı əməliyyat olduğu hələlik rəsmi şəkildə təsdiqlənməyib.
Məlumatda qeyd olunur ki, fəaliyyət dayandıqdan sonra paytaxtda vəziyyət normallaşıb. Hər hansı dağıntı və ya tələfat barədə məlumat daxil olmayıb.
Aprelin 8-də İran və ABŞ qüvvələri arasında atəşkəs razılaşmasından sonra tərəflər arasında birbaşa hərbi toqquşmalar dayandırılıb.
"Yenidən hərəkətə keçməli ola bilərik" – İsrail İranı hədələyir
İsrailin müdafiə naziri İsrael Kats aprelin 30-da bildirib ki, Tehranın yenidən təhdidə çevrilməməsi üçün ölkəsi "yenidən hərəkətə keçməyə məcbur qala bilər".
Nazirin ofisinin yaydığı bəyanatda deyilir ki, ABŞ prezidenti Donald Tramp baş nazir Binyamin Netanyahu ilə koordinasiya şəraitində kampaniyanın məqsədlərinə çatmağa çalışır. Həmin məqsəd isə İranın gələcəkdə İsrail, ABŞ və azad dünya üçün yenidən təhdidə çevrilməməsini təmin etməkdir.
"Bu səyləri dəstəkləyirik və zəruri yardımı göstəririk, lakin bu məqsədlərə nail olmaq üçün yaxın zamanda yenidən hərəkətə keçməli ola bilərik", – bəyanatda vurğulanır.
ABŞ və İsrailin İrana qarşı birgə hərbi kampaniyası aprelin 8-də Vaşinqtonla Tehran arasında atəşkəs razılaşdırıldıqdan sonra dayandırılıb.
Bundan sonra İsrail ilə Livan da atəşkəs əldə edib. Bununla belə, həm İsrail, həm də "Hizbullah" Livanda bir-birinə hücumlar edir.
Həm silahlı qruplaşma, həm də siyasi təşkilat olan "Hizbullah" Livanın cənubunda böyük əraziyə nəzarət edir. ABŞ onu terror təşkilatı sayır. Avropa İttifaqı isə onun yalnız silahlı qanadını qara siyahıya salıb, siyasi qanadını deyil.