Aİ-dən xəbərdarlıq: İran münaqişəsi uzansa, enerji şoku yarana bilər
Avropa İttifaqı (Aİ) üzv dövlətlərini xəbərdar edib ki, İranla münaqişənin uzanması qlobal enerji bazarlarında davamlı şoka səbəb ola, bu da yanacaq istehlakının azalmasına gətirib çıxara bilər. Bu haqda diplomatlar "Reuters"ə danışıb.
Avropa Komissiyası Aİ ölkələrinin səfirləri ilə keçirilən qapalı iclasda iki ssenari təqdim edib:
1. Atəşkəs qüvvədə qalarsa və Hörmüz boğazı yenidən açılsa, neft və qaz axınları bir neçə ay ərzində bərpa olunar və qiymətlər sabitləşər. Ancaq Qətərdə infrastrukturun zədələnməsi səbəbindən mayeləşdirilmiş təbii qaz bazarlarında gərginliyin illərlə qalacağı ehtimal olunur.
2. Pozuntular davam edərsə, bazarlarda kəskin qiymət artımları baş verər, "tələbin məhvi" adlanan vəziyyət yarana bilər. Bu zaman yüksək qiymətlər istehlakçıları və sənayeni yanacaqdan istifadəni azaltmağa məcbur edir.
Avropa həmçinin qışöncəsi qaz anbarlarını doldurmaqda ciddi çətinliklə üzləşər, bir neçə həftə ərzində təyyarə yanacağı çatışmazlığı yarana bilər.
Aİ indiyədək təchizat çatışmazlığından yayına bilib, amma qiymət artımı artıq iqtisadiyyata təsir göstərməyə başlayıb.
"Reuters" bildirir ki, Komissiya bu təsirlərin yumşaldılması, mədən yanacaqlarından asılılığın azaldılması və gələcək şoklara davamlılığın artırılması üçün tədbirlər hazırlayır. Bu tədbirlərə elektrik enerjisi vergilərinin azaldılması və təmiz enerjiyə keçidin sürətləndirilməsi daxildir.
Tramp: Çin İrana silah vermədiyini deyir
ABŞ prezidenti Donald Tramp bildirib ki, Çin lideri Si Cinpin ona məktubunda Pekinin İrana silah vermədiyini deyib.
"Ona [Si] məktub yazaraq bunu etməməsini xahiş etdim. O da mənə cavab məktubunda yazıb ki, bunu əsasən etmir", – Tramp "Fox News"a müsahibəsində deyib.
ABŞ prezidentinin gələn ay Si ilə görüşü planlaşdırılır.
O, müsahibədə deyib ki, müharibənin bitməyə çox yaxın olduğunu düşünür, ancaq bu fikrini detallı izah etməyib.
SEPAH-dan İran limanlarının dəniz blokadası ilə bağlı xəbərdarlıq
ABŞ İran limanlarına qarşı dəniz blokadasını davam etdirərsə, bu, atəşkəsin pozulması sayılacaq. Bu xəbərdarlıqla blokadanın başlamasından iki gün sonra İran İslam İnqilabı Keşikçiləri Korpusunun (SEPAH) yüksəkrütbəli komandiri çıxış edib.
İran silahlı qüvvələrini koordinasiya edən "Xatəm əl-Ənbiya" qərargahının komandiri Əli Abdullahinin bəyanatını İran mediası aprelin 15-də yayıb. Bəyanatda deyilir ki, blokada davam etsə, "İslam Respublikasının silahlı qüvvələri Fars körfəzində, Oman körfəzində və Qırmızı dənizdə heç bir ixrac və idxala imkan verməyəcək".
Bəyanatda mümkün addımların nədən ibarət olacağı açıqlanmır.
Bu arada SEPAH-a yaxın media qurumları blokada başlayandan sonra da İran gəmilərinin və neft tankerlərinin hərəkəti davam etdirdiyini, Hörmüz boğazından keçdiyini yazır.
ABŞ hərbçiləri isə bildirirlər ki, aprelin 13-də blokada başlayandan İranın dəniz yolu ilə iqtisadi ticarətini tamamilə dayandırıblar.
İsrail ordusu Livanın cənubundan təxliyəyə çağırır
İsrail ordusu Livanın cənubunda yaşayanlara yeni təxliyə çağırışı edib. Bu, Təl-Əvivin "Hizbullah"a zərbələri davam etdirməsi fonunda səslənir. Əsasən Livanın cənubuna nəzarət edən bu qruplaşmanı ABŞ terror təşkilatı sayır, Avropa İttifaqı (Aİ) onun silahlı qanadını qara siyahıya salıb.
İsrail Müdafiə Qüvvələri (SAXAL) aprelin 14-də bildirib ki, hava zərbələri davam edir və qüvvələri bölgədə böyük qüvvə ilə əməliyyat aparır.
"Buna görə də... sizi evlərinizi təcili tərk etməyə, Zəhrani çayının şimalına doğru hərəkət etməyə çağırırıq", – bəyanatda deyilir.
Aprelin 14-də Livan və İsrailin ABŞ-dakı səfirləri Vaşinqtonda birbaşa danışıqlar aparıblar. İsrail ordusunun çağırışı həmin danışıqlardan sonraya təsadüf edir.
Bu arada İsrail və "Hizbullah" arasında toqquşmalar yenidən şiddətlənib.
Livan dövlət mediası ölkənin cənubunda İsrailin hava zərbələrindən ölənlərin olduğunu bildirib. İsrail isə "Hizbullah" mövqelərinə qarşı "hədəfli quru əməliyyatları" apardığını açıqlayıb.